Read kapsiki Gha ta Wəshi 22 Bible Online

Gha ta Wəshi 22 - kapsiki bible

Gha ta Wəshi 22

¹Kwetere wəmbəa wəshi nyighɛ, pa Shala dzeghakɛ yɛ ta Abraham, ma ke shɛ: «Abraham!» Ma ke Abraham zhɛnete nda: «Wa nya 'ya nya!»

²Ma ke Shala: «Kelete Izak, wəzege kwetɛa ŋa nya ɗe na. Kwiɗi kadzete hɛɗia Moriya, tagha ne, dzeghekɛ ɗa melɛ le, pelɛ ghweme nya tencɛ ŋa 'ya!»

³Pelɛhetɛme Abraham mbanyɛ ŋkwa, mɓɛke ŋkɛ hwepate wəshi te kwara ta ŋkɛ, pa ŋkɛ hekakɛ ka mene slene ta ŋkɛ bake ba'a wəzege ta ŋkɛ Izak. Pa ŋkɛ peraweve sheghwə mbe kezha dzeghe melɛ, cape ŋkɛ kadzete ŋkwa nya gezete nda Shala.

⁴Te kwa maheke ta hɛ ne, pa Abraham kafete ghə ba'a nakɛ ŋkwa shɛ mba ŋkɛ cakeɗake.

⁵Ma ke Abraham sha mbeli nyi kemene nda slene: «Nza ŋayɛ mə teke le kwara. Ma 'ya le wəzege nya ne, katedzeme n'yɛ vaŋe pelɛke kahawe va Shala, kwa sebe ta ŋkɛ, katezhɛne geva n'yɛ kase sha gheyɛ!»

⁶Pa Abraham kelete sheghwə kezha dzeghe melɛ, pa ŋkɛ veyi nda kwa ghə ke wəzege ta ŋkɛ Izak. Ma gheŋkɛ le ŋa ŋkɛ, pa ŋkɛ kelete ghwə mbe dzeve le hwa, cape hɛ bake nci.

⁷Ma ke Izak sha yitenyɛ Abraham: «Yita yawe!» Ma ke zhɛnete: «Wa nya 'ya nya wəzege ta ɗa!» Ma ke Izak: «Ghwə ba'a sheghwə ya va gheɓə, ama tema zhɛgwəa təmə kezha dzeghe melɛ wa?»

⁸Ma ke Abraham zhɛnete: «Shala nde tesepa zhɛgwəa təmə kedzeghe melɛ, wəzege ta ɗa!» Cape hɛ zlaɓe yitea dzeghwa ta nci.

⁹Ma kwa ntsehe hɛ te ŋkwa nya ncɛte nda Shala ne, pa Abraham pate reghwetɛ ba'a betate sheghwə te. Pa ŋkɛ hwepete wəzege ta ŋkɛ Izak ba'a vate ŋkɛ te sheghwə nyi te reghwetɛ.

¹⁰Pa Abraham hate dzeve kakele hwa kezha sla ghə te wəzege ta ŋkɛ.

¹¹Ama pa nde ghwene ta Mahwətə hekakɛ ŋkɛ sawa pelɛ ghweme, ma ke shɛ: «Abraham, Abraham!» Ma ke zhɛnete: «Wa nya 'ya nya!»

¹²Ma ke nde ghwene ta Mahwətə shɛ: «Dɛapema dzeve na te wəzege nyagha ma! Mene nda ma wəsə kwa ndiremi na ma! Nahe 'ya keɗepe tsetsenya kahawe na va Shala: kefɛake ɗa wəzege kwetɛa ŋa na we!»

¹³Pa Abraham kafete ghə, newe ke sha ŋkwa ne, dəkwə ŋkɛ te game nya nza tereme ta ŋkɛ kekelawe kelawe hwa gezlere. Pa ŋkɛ lə kakeseve gamea shɛ ba'a dzeghekɛ melɛ le te ŋkwa wəzege ta ŋkɛ.

¹⁴Pa Abraham hekate nda slə ke ŋkwa shɛ “KaMahwətə nde tesepa”. Vatse geze mbeli pa ɓeshi: «Pelɛ ghəa ghweme ne, Mahwətə nde tesepa!»

¹⁵Pa nde ghwene ta Mahwətə hekakɛ Abraham sawa pelɛ ghweme kakwa bake zhigə,

¹⁶ma ke shɛ: «Wa nya ghena nya geze Mahwətə nya: Kazeme fela 'ya le sləa ɗa. Ma kwa menete na kala nya, kwa ɗema na kefɛake ɗa wəzege kwetɛa ŋa ne,

¹⁷katewəpi ŋa 'ya, kwele kwele tembake hwelefefia ŋa 'ya kala saseregwa nyi pelɛ ghweme keɗema kala ndaleghe nyi kwa hələ. Katefəhwe yɛ meleme hwelefefia ŋa va ka jaga ta nci.

¹⁸Laka ghenci tewəpi geva pɛtɛa hwelefefi nyi te hɛɗi lema, kwa nza nde nahe na keyɛte ghena ta ɗa.»

¹⁹Pa Abraham zhɛneghe geva kalə sha ka mene slene ta ŋkɛ. Cape hɛ kwa hweŋkwa zlaɓe kadzembe Bɛrshɛba nya nza Abraham mbe.

²⁰Ma kwa sebe ta wəshi nyi kemenete geva nyi, ma ke mbeli sha Abraham: «Nahe Milka keyake nda ŋwale tezhili ke wəza meyɛ ŋa Nahor perə:

²¹Əws ya katezhɛa wəzege, Bəwz, wəza meghekɛ, Keməwɛl, yitenyɛa Aram,

²²Kɛsɛd, Hazo, Pildash, Yidlaf ba'a Betəwɛl.»

²³Nyi ya kaŋwale tezhili nyi yake nda Milka deghese ke Nahor, wəza meghekɛa Abraham. Ma Betəwɛl ne, yitenyɛa Rɛbɛka ŋkɛ.

²⁴Nahe kwete male meghwa kese yitea Nahor, Rɛwəma sləa nta. Ghenta perə ne, nahe nde keyake ŋwale: Tɛba, Gaham, Tahash ba'a Ma'aka.