Read kapsiki Gha ta Wəshi 23 Bible Online

Gha ta Wəshi 23 - kapsiki bible

Gha ta Wəshi 23

¹Va gwəmsə ba'a bakemsə mberefaŋeghəmbe menete Sara teghweme.

²Te hɛɗia Kanan mte nde mbe Kiriyat-Arba, geze ta ŋkɛ, Hɛbron. Pa Abraham nehwenekɛ Sara.

³Kwetere wəmbəa ŋkɛ, ntəŋə ŋkɛ slə te ŋkwa nya nza wəndə kemte mtea male ta ŋkɛ, ma ke sha hwelefe ta Hɛt:

⁴«Deke kala nde se se ba'a kala mentiɓə 'ya hwa gheyɛ. Ŋ'wave ɗa mə ŋkwa kela ŋkwa kezha lamte male ta ɗa gi.»

⁵Ma ke ka Hɛt shɛ:

⁶«Fate ghena ta n'yɛ, nde sleke n'yɛ yawe! Nahe Shala keveyi ŋa kawəndə nya te ghə hwa ghen'yɛ. Lamte male ta ŋa kwa nya ganyɛ ma kwele hwa kwele ta n'yɛ. Wəndə shɛ hwa ghen'yɛ kafɛa ŋa kwele kezha la male ta ŋa kwa we.»

⁷Pelɛhetɛme Abraham sate te ŋkwa, ntiŋə ŋkɛ ŋame ghə mbe hɛɗi kwa kema ta ka Hɛt nyi te hɛɗia shɛ.

⁸Ma ke sha hɛ: «Ma kenza nde kayɛ yɛ kala male ta ɗa 'ya teke hwa gheyɛ ne, fate ɗa mə ŋa ɗa, 'yɛwete ɗa mə va Ɛfron, wəzege ta Sowar,

⁹kezha ndeke ɗa zlera ta Makpɛla nya kaŋa ŋkɛ ŋkɛ, vare bela ta wəvea ŋkɛ. Ndeke ɗa ŋkɛ kapa kala nza ta səkəməa ŋkɛ kwa ntsə ta ŋayɛ, kezha nza kwelea shɛ kaŋa ɗa ŋkwa.»

¹⁰Tagha Ɛfron mentishɛ hwa ka kesaka yitenyɛ nyi kaŋwalea Hɛt. Ma ke sha Abraham le berete kezha fate ka Hɛt nyi tagha pɛtɛ mɛa degha ta meleme:

¹¹«Ewə, nde sleke ɗa yawe, fate ŋa ɗa: kave ŋa wəvea shɛ 'ya. Zlera nya vare wəvea shɛ ɓiyitsa ne, kave ŋa ŋkɛ 'ya gəmə kwa ntsə ta ka menəhɛ ɗa. Wərə na kalamte male ta ŋa te ŋkwa shɛ.»

¹²Ntiŋə Abraham zhɛne kaŋame ghə mbe hɛɗi kwa kema ta mbeli nyi te hɛɗia shɛ,

¹³ma ke sha Ɛfron kafefa mbeli pɛtɛ: «Təhwə təhwə ŋa 'ya, fate ŋa ɗa! Kateve ŋa cɛdɛa wəvea shɛ 'ya kala səkəməa ŋkɛ. Kelete cɛdɛa shɛ kezha lamte male ta ɗa 'ya te.»

¹⁴Ma ke Ɛfron zhɛnete nda ke Abraham:

¹⁵«Nde sleke ɗa yawe, fate ŋa ɗa. Wəve nya pa mbeli kadəɓərəa mze kwa tɛawetɛa gwəmsə wəfaɗe ne, kwete ŋkɛ wəsə kwelɛ gheɓə we. Lamte male ta ŋa te.»

¹⁶Pa yɛ Abraham tseɓate ghena shɛ le Ɛfron. Pa ŋkɛ ɓelave nda dəɓərə kala nya gezete ŋkɛ kwa kema ta ka Hɛt: kadəɓərəa mze kwa tɛawetɛa gwəmsə wəfaɗe kala səkəmə nya te shikwə.

¹⁷Se te vəa shɛ ne, nahe wəvea Ɛfron nya mbe Makpɛla, laka ŋkwa kesame ta veci yitea Mamrɛ, zlera nya mbe ba'a wəfe nyi mbe kala ghala wəvea shɛ

¹⁸kezhɛre kaŋa Abraham. Pɛtɛa ka Hɛt nyi kese tagha mɛa degha ta meleme ya kaka negha fete yite.

¹⁹Kwetere wəmbəa ŋkɛ lamte male ta ŋkɛ Sara Abraham mbe zlera nya mbe wəvea Makpɛla, terasle yitea Mamrɛ, geze ta ŋkɛ, Hɛbron nya te hɛɗia Kanan.

²⁰Nahe ka Hɛt keɗepe ŋa Abraham wəve ba'a zlera nya mbe. Wərə ŋkɛ kala mbelia ŋkɛ nyi kempə te ŋkwa shɛ.