Read kapsiki Gha ta Wəshi 25 Bible Online

Gha ta Wəshi 25 - kapsiki bible

Gha ta Wəshi 25

¹Pa Abraham wəmeve kwete male, Kɛtəwra sləa nta.

²Pa nde yake nda ŋwale tezhili: Zimran, Yoksan, Mɛdan, Madiyan, Ishebak ba'a Shəwa.

³Yoksan nde yake yɛ Saba le Dɛdan. Ma hwelefefi nyi kesawa mbe Dɛdan ne, ka Ashəwr, ka Lɛtəwsh ba'a ka Lewəm.

⁴Ma ŋwale tezhili nyi yake Madiyan ne, Ɛfa, Ɛfɛr, Hanok, Abida ba'a Ɛlda. Pɛtɛa nci kaŋwale tezhili nyi yake Kɛtəwra.

⁵Pa Abraham fəave nda pɛtɛa wəshia ŋkɛ ke Izak.

⁶Ma kwa nza ŋkɛ mba teghweme ne, nahe Abraham keɗave nda wəshi ke ŋwale tezhilia kweci mia ŋkɛ nda teŋkamte hɛ ŋkɛ cakeɗake le wəzege ta ŋkɛ Izak, laka ŋkwa kesame ta veci.

⁷Va ta Abraham gwəmsə ba'a mberefaŋemsə mcɛfeghəmbe

⁸nda mte ŋkɛ. Mbe meha nya le zeɗe nza ba'a mbe galɛpi mtenyɛ ŋkɛ. Pa ŋkɛ lənyɛ sha ka shihɛnyɛ nyi kempə.

⁹Pa ŋwale tezhilia ŋkɛ Izak ba'a Ismayɛl lamte ŋkɛ mbe zlera ta Makpɛla nya mbe wəvea Ɛfron, wəzege ta Sowar, nde Hɛt terasle yitea Mamrɛ.

¹⁰Va hwelefe ta ka Hɛt pave wəvea shɛ Abraham. Pa mbeli lamte ŋkɛ tagha yitea male ta ŋkɛ Sara.

¹¹Ma kwa sebe ta mte ta Abraham ne, pa Shala wəpikɛ wəzege ta ŋkɛ Izak. Terasle yitea ghwa ta Lahay-Roy se Izak kanza.

¹²Wa nyi sləa ŋwale tezhilia Ismayɛl nya yake nda Agar, wəzha ta ka Ɛzhipte nya kakwatera ta Sara ke Abraham nyi.

¹³Wa nyi sləa ŋwalea Ismayɛl kekwele kekwele nyi: Nebayot, Kɛdar, Adbɛyɛl, Mibsam,

¹⁴Mishema, Dəwma, Masa,

¹⁵Hadad, Tɛma, Yetəwr, Nafish ba'a Kɛdma.

¹⁶Tsetse se ŋwale tezhilia Ismayɛl nyi meŋe bakeghəmbe. Yayata wəndə kawəndə nya te ghəa pelə, pa hɛ ndeke nda sləa nci ke meleme ta nci ba'a ghedəkwəa nci.

¹⁷Va ta Ismayɛl gwəmsə ba'a mahekenemsə mberefaŋeghəmbe nda mtenyɛ.

¹⁸Ma hwelefefia Ismayɛl ne, te hɛɗi nya kwelɛ yɛ Havila le Shəwr se hɛ. Dekwede Shəwr yitea Ɛzhipte laka Ashəwr. Pa hɛ nzanji cakeɗake le kweci hwelefefia Abraham.

¹⁹Wa nya ghena ta Izak nya: Abraham nde yake Izak.

²⁰Kwa nza va ta Izak wəfaɗemsə ne, pa ŋkɛ kelete Rɛbɛka, wəzha ta Betəwɛl kamale ta ŋkɛ, wəzha ta meghekɛa Laban nya kande Aram nde.

²¹Ntake Izak kasəkwə Mahwətə te ghəa male ta ŋkɛ kwa nza nde kajɛŋa. Pa Mahwətə zhɛakɛ heli yite, zlivə Rɛbɛka dzawa hwə.

²²Ama ntake kwalegha nyi kwa hwəa nta kandendəkwə ghəa nci, ma ke lewela: «Ma nda tsetse ŋkɛ ne, wa ganyɛ nya mbe dzawa ghwə wa?» Cape nde kalə ka'yɛwe ghena va Mahwətə.

²³Ma ke Mahwətə shɛ: «Hwelefe bake ya kwa hwəa ŋa, bake teya mama ta mbeli na. Berete ma tenza kwete ke kwete, nya kwele nde temene nda slene ke nya ɓɛhwɛ!»

²⁴Ma kwa senyɛ və keya ta nta ne, kwalegha ya kwa hwəa Rɛbɛka.

²⁵Ma nya keghate kasawa ne, gheme ŋkɛ, bətə ŋkɛ mbe shinti kala wəshi keseɗa: pa mbeli ndeke nda slə kaƐzawə.

²⁶Pa wəza meghekɛ sawa kwa sebe ta ŋkɛ, hecape te tetərəa Ɛzawə le dzeve: pa mbeli ndeke nda slə kaZhakob. Va ŋkwaŋemsə menete Izak nda yake geva hɛ.

²⁷Pa ŋwale tezhilia shɛhɛ kelenji. Kande zlɛaŋezlɛa ganyɛ nya kedzeghwa gamba Ɛzawə. Ma Zhakob le ŋa ŋkɛ ne, bivə ŋkɛ ki ghɛ.

²⁸Kwele ma ɗehwe Ɛzawə Izak, va nya nza ŋkɛ slia wəshi nyi hwa gamba ya zeɗe ma shɛ. Ama Rɛbɛka ne, za ma Zhakob ɗe nde.

²⁹Ma te kwete hɛ kata nɗeli Zhakob ne, pɛkwe Ɛzawə sheke kwamte, leɓakwe ŋkɛ kwele kwele.

³⁰Ma ke sha Zhakob: «Pelakɛ ɗa kazeme nɗelia ŋa nya gheme nya, va nya nza 'ya leɓakwe.» Vatse hekate nda kwete slə mbeli kaƐdom, geze ta ŋkɛ, nya gheme.

³¹Ma ke Zhakob zhɛnete: «Pahwe ɗa nza ta ŋa kawəndə kwele kaba.»

³²Ma ke Ɛzawə: «Katemte 'ya va ma ne, wa kwete wəsə nya teve ɗa nza ta ɗa kawəndə kwele wa?»

³³Ma ke Zhakob zhɛnete: «Zemete ɗa fela kaba.» Pa Ɛzawə zemete nda fela ba'a pamte nda nza ta ŋkɛ kawəndə kwele ke Zhakob.

³⁴Pa Zhakob ndeke nda ɗafa ba'a mzave nda ghazlə tsə kwa gheme. Ma kwa zehwe Ɛzawə ba'a kwa sakɛ yɛmə ŋkɛ ne, pelɛhetɛme sate, pa ŋkɛ dzeghwanyɛ. Kese ŋkɛ kaɓela nza ta ŋkɛ kawəndə kwele we.