Read kapsiki Gha ta Wəshi 28 Bible Online

Gha ta Wəshi 28 - kapsiki bible

Gha ta Wəshi 28

¹Pa Izak hekakɛ Zhakob ba'a wəpikɛ ŋkɛ. Ma ke gezave nda: «Wəmema wəzha ta ka Kanan na ma.

²Kwiɗi kadzeme Mɛzopotami nya pelɛghə kadzeki ghɛa Betəwɛl yiteyɛa meyɛ ŋa, wəmeve kwete wəndəa ŋwalea kwɛa Laban, wəza meghekɛa meyɛ ŋa.

³Pa Shala nde berete wəpikɛ ŋa, pa ŋkɛ ndeke ŋa ŋwale kwele kwele kezha nza na kashia mbeli kwele kwele.

⁴Pa ŋkɛ wəpikɛ ŋa kala ŋa Abraham, gha le ŋwale nyi ketesawa mbe gha yitea nza hɛɗi nya nza nya na te kaŋa ŋa, hɛɗi nya ndeke nda Shala ke Abraham.»

⁵Pa Izak ghweneghe Zhakob kadzeme Mɛzopotami nya pelɛghə sha Laban, wəzege ta Betəwɛl nde Aram ba'a wəza meghekɛa Rɛbɛka, meghekɛa yɛ Zhakob le Ɛzawə.

⁶Pa Ɛzawə fate nahe Izak kewəpikɛ Zhakob ba'a keghwenakɛ ŋkɛ kadzeme Mɛzopotami nya pelɛghə kezha wəme male. Ma kwa wəpi ŋkɛ ŋkɛ ne, ma ke gezete nda: «Wəmema wəzha ta ka Kanan na ma.»

⁷Nahe Zhakob keyɛte nda ghena ke yɛ yitenyɛ le meghekɛ ba'a kedzeme Mɛzopotami nya pelɛghə.

⁸Pa Ɛzawə ɗepete dewə ghəa yitenyɛ Izak te ŋwalea kwɛa ka Kanan.

⁹Cape ŋkɛ kalə sha Ismayɛl, pa ŋkɛ wəmeve Mahalat, wəzha ta Ismayɛl nya kawəzege ta Abraham, wəzha ta meghekɛa Nebayot, kadzevare mia ŋkɛ.

¹⁰Ntəŋə Zhakob shave mbe Bɛrshɛba kadzembe Haran.

¹¹Ma kwa teɗe veci ne, pa ŋkɛ ghereŋenyɛ ba'a hɛnyɛ te ŋkwa shɛ. Pa ŋkɛ kelete pelɛ kezha ve yitea ghəa ŋkɛ, ɓelahe ŋkɛ te ŋkwa shɛ.

¹²Pa ŋkɛ shiwəte shiwə: ma newe ŋkɛ ne, gepe cigwərə se kwake te hɛɗi dəzlə yitea ghweme. Kwele kwele ka ghwene ta Shala nyi kedzeme ba'a nyi kesawa te.

¹³Pa Mahwətə slete te kema ta ŋkɛ, ma ke shɛ: «'Ya ya kaMahwətə Shala ta shia ŋa Abraham ba'a Shala ta Izak. Ma hɛɗi nya nza nya na te meɓelahe ne, kateve nda ŋkɛ 'ya ke gha ba'a ke hwelefefia ŋa.

¹⁴Kwele kwele teya ka hwelefefia ŋa kala ndaleghe. Katembake geva hɛɗia ŋayɛ laka ŋkwa kepəkwə ta veci ba'a laka ŋkwa kesame ta ŋkɛ, laka bela kwa gwela ba'a laka bela kwa zeme. Laka gha ba'a ka hwelefefia ŋa tewəpi pɛtɛa hwelefefi nyi te hɛɗi 'ya.

¹⁵Le gha nza 'ya, kateya ŋa 'ya te yayata ŋkwa nya tedzete na, katezhɛne ŋa 'ya kase kadzete hɛɗi nya. Katewəfə ŋa 'ya we, katemene pɛtɛa wəshi nyi meɗeyi ŋa 'ya 'ya.»

¹⁶Pa Zhakob feɗeghe, ma ke: «Kaganda nza Mahwətə teke, ama keɗepete 'ya we.»

¹⁷Ntake ghazlənə kazhɛ nda, ma ke: «Wa nya ghazlənə ve nda ŋkwa nya ke wəndə! Ghəpə yite we, kwete ŋkɛ ghɛa Shala, mɛa ŋkwa kedzeme ghweme ŋkɛ!»

¹⁸Pelɛhetɛme Zhakob sate te ŋkwa masheke masheke, laŋe te pelɛ nya kese yitea ghəa ŋkɛ, gepe ŋkɛ mɓete kagɛaŋa, pa ŋkɛ gəyi n'yi kwa ghəa pelɛa shɛ.

¹⁹Pa ŋkɛ ndeke nda slə ke ŋkwa shɛ kaBɛtɛl, geze ta ŋkɛ, “Ghɛa Shala”. Ama Ləwz se sləa melemea shɛ vəashi.

²⁰Kwetere wəmbəa ŋkɛ, ma ke Zhakob menete meɗe mɛ: «Ma kenza nde le 'ya Mahwətə ba'a kaya ɗa ŋkɛ mbe dzeghwa ta ɗa, kenza nde kave ɗa ɗafa kezeme ta ɗa ŋkɛ ba'a lekwesa kedzeghəa geva,

²¹ma kezhɛneke geva 'ya kwelɛŋe kadzeki ghɛa yiteyɛ ɗa, Mahwətə nde tenza kaShala ta ɗa.

²²Ma pelɛ nya mɓete nya 'ya kagɛaŋa ne, katenza ŋkɛ kaghɛa Shala. Ke gheŋkɛ teve nda kwa meŋe ta bela ta pɛtɛa wəshi nyi teve ŋkɛ 'ya.»