Read kapsiki Gha ta Wəshi 29 Bible Online

Gha ta Wəshi 29 - kapsiki bible

Gha ta Wəshi 29

¹Ntəŋə Zhakob kwa hweŋkwa kalə laka hɛɗi nyi laka ŋkwa kesame ta veci.

²Ma te kwete hɛ ne, pa ŋkɛ nakɛ kwete belageji mbe gamba. Tagha wəvəsəa timɛti mahekene yitea belagejia shɛ meɓelahe meɓelahe, kwa nza ŋkɛ kwa belagejia shɛ sa yɛmə wəshi keseɗa. Kwete pelɛ kewəbanyɛ yaŋzlete belagejia shɛ mbeli le.

³Ma ketsenete geva wəshi keseɗa pɛtɛ tagha ne, katsəkwə pelɛ mbeli seyi mɛa belagejia shɛ, kasame nda yɛmə mbeli ke wəshi keseɗa nda tezhɛne pelɛa shɛ mbeli kadzemɛ

⁴Ma ke Zhakob sha ka ya wəshi: «Ka kesaka ma, tema se yɛ wa?» Ma ke hɛ shɛ: «Se mbe Haran ghen'yɛ.»

⁵Ma ke sha hɛ: «Nahe yɛ keɗepe Laban, wəzege ta Nahor tse na?» Ma ke hɛ shɛ: «E'e.»

⁶Ma ke sha hɛ: «Kwelɛŋe ŋkɛ na?» Ma ke hɛ shɛ: «Kwelɛŋe ŋkɛ, wa nya wəzha ta ŋkɛ Rashɛl nya kaseyi le timɛti.»

⁷Ma ke Zhakob zhɛkwa: «Newema mə, kenaka və gare tsene wəshi keseɗa we. Same nda mə yɛmə ke hɛ shɛ yɛ ŋkaghe hɛ kadzete ŋkwa kezeme gwəzə.»

⁸Ma ke hɛ shɛ: «Kashɛ ghen'yɛ sa nda yɛmə ke wəshi tewə ghen'yɛ ketsenete hɛ pɛtɛ we. Ma kwa sebe ta ŋkɛ, kapəŋə pelɛ nya mɛa belageji n'yɛ nda tesa nda yɛmə ghen'yɛ ke wəshi.»

⁹Mba Zhakob kageze ghena le hɛ nda dzeghwake dzeghwa Rashɛl le timɛtia yitenyɛ, kwa nza nde kakwa ya wəshi.

¹⁰Nakɛma ta Zhakob ke Rashɛl, wəzha ta kwesegwenyɛ Laban le timɛti ne, pa ŋkɛ hendave nda geva ke belagejia shɛ. Pa ŋkɛ pəŋəmte pelɛ nya mɛ ba'a same nda yɛmə ke timɛtia Laban.

¹¹Həməwə Zhakob həməwəve Rashɛl, ntake ŋkɛ kanehwene.

¹²Pa ŋkɛ gezete nda ke Rashɛl kamenənyɛa yitenyɛ ba'a kawəzege ta Rɛbɛka ŋkɛ. Tereŋe Rashɛl te hwɛ te ŋkwa shɛnyɛ kalə sha yitenyɛ.

¹³Fatema ta Laban kageze ghena ta Zhakob, wəzege ta wəzha ta meghekɛ mbeli ne, tereŋe ŋkɛ te hwɛ kabegeme le, həməwə ŋkɛ shɛ, pa ŋkɛ keleghe ŋkɛ kadzeki ghɛ. Pa Zhakob ɓelate nda wəshi nyi kemenete nda geva pɛtɛ.

¹⁴Ma ke Laban shɛ: «Kaganda nza na kahwelefe ta ɗa.» Tere zake Zhakob menete ki ghɛa Laban.

¹⁵Ma te kwete veci ne, ma ke Laban sha Zhakob: «Menə ɗa na, ama kehite geva ŋkɛ kezha mene ɗa slene na gəmə we. Gezete ɗa wəsə nya kehi kazhɛme ta ŋa.»

¹⁶Ŋwalea kwɛ bake ya va Laban, Lɛya sləa nya kwele, Rashɛl nya ɓɛhwɛ.

¹⁷Kendeɗe ndeɗenji ntsə kwa Lɛya, ama zlahe ganyɛa Rashɛl.

¹⁸Pa Zhakob ɗehwe Rashɛl, ma ke: «Katemene ŋa slene 'ya kava mberefaŋe kadzembe Rashɛl, wəzha ta ŋa nya ɓɛhwɛ.»

¹⁹Ma ke Laban shɛ: «Megela ma ke gha ve ŋa 'ya kenya ve nda ŋkɛ 'ya ke kwete wəndə. Nza ŋa ki ghɛa ɗa.»

²⁰Pa Zhakob menete va mberefaŋe kamene nda slene ke Laban kadzembe Rashɛl. Kala hɛ ɓɛhwɛ newe va nyighɛ ŋkɛ kwa ɗehwe ŋkɛ ŋkɛ.

²¹Kwa sebe ta ŋkɛ, ma ke Zhakob sha Laban: «Ndeke ɗa male ta ɗa, 'ya kaŋzle ŋkɛ, kwa nza nde nahe vəa slene nya mene ŋa 'ya kekiɗi.»

²²Pa Laban tsenete pɛtɛa mbeli nyi te ŋkwa shɛ, takwe ŋkɛ sha veghe.

²³Ma kwa se tɛhwɛɗi ne, pa ŋkɛ beghave nda wəzha ta ŋkɛ Lɛya ke Zhakob kezha hɛ ŋkɛ le.

²⁴Pa Laban ndeke nda Zilpa ke wəzha ta ŋkɛ kakwatera ta nta.

²⁵Ma newe ke Zhakob masheke ne, Lɛya yanza ŋkɛ le. Ma ke Zhakob sha Laban: «Wa wəsə nya menete ɗa nya na wa? Ashɛ kezha wəme Rashɛl menete ŋa slene 'ya wəka? Yitea wa ghwetete ɗa na wa?»

²⁶Ma ke Laban shɛ: «Kehite geva ŋkɛ laka wəsə keshia n'yɛ kave nda wəzha nya ɓɛhwɛ ke za mba nya kwele we.

²⁷Ɓelamte nda gəsəkəa nya nda teve ŋa nya ɓɛhwɛ mbeli kemenete slene ɗa na kava mberefaŋe zhɛkwa.»

²⁸Pa Zhakob menete kala nyagha. Pa ŋkɛ kiɗimte ɓela nda gəsəkəa Lɛya, kwetere wəmbəa ŋkɛ, pa Laban ndeke nda wəzha ta ŋkɛ Rashɛl kamale.

²⁹Pa ŋkɛ ndeke nda Bilha ke Rashɛl kakwatera ta nta.

³⁰Ntake Zhakob kaɓelahe le Rashɛl, za ma ɗehwe nde ke Lɛya. Va mberefaŋe ŋkɛ menete nda slene zhɛkwa ke Laban.

³¹Ma kwa nakɛ Mahwətə dewə ɗe Lɛya mbeli ne, pa ŋkɛ ndeke nda ya ŋwale. Ama kajɛŋa nza nda Rashɛl.

³²Njehe Lɛya le hwə, bawe yake wəzege teza, pa nde hekate nda slə kaRəwbɛn, kwa nza ŋkɛ ma ke: «Nahe Mahwətə kenakɛ hawe nya te 'ya. Ma tsetsenya ne, kateɗe ɗa za ɗa.»

³³Njehe le hwə zhɛne, bawe yake kwete wəzege teza. Ma ke: «Nahe Mahwətə keɗepe kaɗema mbeli kaɗe ɗa, pa nde ndeke ɗa kwete wəzege.» Pa nde ndeke nda slə kaSimɛyon.

³⁴Njehe nde le hwə zhɛkwa, bawe nde yake nde mahekene ta wəzege teza. Ma ke: «Ma tsetsenya gɛ ne, katejikə geva za ɗa le 'ya kwa yake nda ŋwale tezhili 'ya mahekene.» Vatse hekate nda slə Zhakob ke wəzegea shɛ kaLɛvi.

³⁵Njehe nde le hwə zhɛkwa, bawe yake nde wəfaɗe ta wəzege teza. Ma ke: «Ma tsetsenya gɛ ne, katetsahe Mahwətə 'ya.» Vatse hekate nda slə nde ke wəzegea shɛ kaZhəwda. Tagha gɛ, ghereŋe nde keya wəzege.