Read kapsiki Gha ta Wəshi 3 Bible Online

Gha ta Wəshi 3 - kapsiki bible

Gha ta Wəshi 3

¹Shishi nde se ntsehwele ma hwa pɛtɛa wəshi keseɗa nyi hwa gamba nyi pate Shala Mahwətə. Ma ke sha male: «Kaganda gezete ŋayɛ Shala kezha ɗema yɛ kazeme ya ta wəfe nyi kwa ntsa nya na?»

²Ma ke male zhɛnete nda ke shishi: «Wərə ghen'yɛ kazeme ya ta wəfe nyi kwa ntsa.

³Ama te ghəa ya ta wəfe nya te tepe ta ntsa ne, ma ke Shala sha ghen'yɛ: ‹Zemema ya ta ŋkɛ yɛ ba'a kwaɗema ŋkɛ yɛ, yagha yɛ kampə ma.›»

⁴Ma ke shishi zhɛnete nda ke male: «Ewə, katempə yɛ we.

⁵Ama nahe Shala keɗepe: ma te veci nya tezehwe yɛ ne, katepele ntsə ta ŋayɛ ba'a katenza yɛ kala yɛ shala nyi keɗepe wəsə nya ganyɛ keɗema nya ndiremi.»

⁶Ma newe ke male ne, megela ya ta wəfea shɛ kazeme, ganyɛke hɛ kwa ntsə kezha ɗepe wəshi kwele kwele. Pa nde ndave ya ta ŋkɛ kwetɛŋe ba'a zehwe. Pa nde ndeke nda ŋa ŋkɛ ke za nta nya tagha vare, pa ŋkɛ zehwe perə.

⁷Pa ntsə ta nci bake nci ghwenemte geva, newe ke hɛ ne, mederelaŋe hɛ. Pa hɛ ɗave slekea dasekwa ba'a hwepeyite yitea yitə kala ghwəli.

⁸Ma hetɛhwɛɗi ne, ntake sefə kavɛ, pa yɛ za le male ta ŋkɛ fate gaka ta Mahwətə nya kedzeghwa kwa ntsa. Pa hɛ wəfərənji va Shala Mahwətə mbe wəfe nyi kwa ntsa.

⁹Ntake Shala Mahwətə kaheka za, ma ke shɛ: «Tema na wa?»

¹⁰Ma ke zhɛnete: «'Ya fate gaka ta ŋa kwa ntsa, pa ghazlənə zhɛte ɗa kwa nza 'ya mederelaŋe, vatse wəfərə ɗa 'ya.»

¹¹Ma ke Shala shɛ: «Wa nde ncɛte ŋa mederelaŋe na wa? Gha zehwe ya ta wəfe nya fɛake ŋa 'ya kezeme na?»

¹²Ma ke za zhɛnete: «Male nya ndeke ɗa nya na kanza yitea 'ya nde ndeke ɗa ya ta wəfea shɛ nda zehwe 'ya.»

¹³Ma ke Shala Mahwətə sha male: «Wa wəsə nya menete nya na wa?» Ma ke male zhɛnete: «Shishi nde ghwetete ɗa nda zehwe 'ya.»

¹⁴Ma ke Shala Mahwətə sha shishi: «Ma kwa menete na tsagha ne, 'ya kabezla ŋa. Deke gha hwa pɛtɛa wəshi keseɗa nyi ki ghɛ ba'a nyi hwa gamba nde tedzeghwa le hwə te hɛɗi, keləwə yatezeme na kala nza ta hɛa ŋa teghweme.

¹⁵Kateve ghema 'ya kwelɛ gha le male, kwelɛ yɛ hwelefe ta ŋa le ŋa nta. Ghə yateŋkwape hɛ te gha, ama yitea tetərə tehale hɛ na.»

¹⁶Ma ke sha male kwetere wəmbəa ŋkɛ: «Katezhɛre nza ta ŋa le hwə 'ya dzawe, katesa yaka na kezha ya ŋwale. Katekelehwe mehele ta ŋa za ŋa, ama gheŋkɛ nde tesleke ŋa.»

¹⁷Ma ke Mahwətə sha Adam: «Nahe na kefate ghena ta male ta ŋa ba'a kezehwe ya ta wəfe nya fɛake ŋa 'ya kezeme. Se te beze ghena ta ŋa ne, nahe hɛɗi kebezlamte geva tsetsenya. Kwele kwele tesa yaka na kezha ŋ'we wəsə kezemea ŋa shave mbe kala nza ta hɛa ŋa teghweme.

¹⁸Katepese yɛ tigə le tigə kwara te hɛɗi kezha gha. Wəshi nyi kepese kwamte mbe wəve yatezeme na.

¹⁹Nda hwələ katɛakwe yitea gha nda teŋ'we wəsə kezemea ŋa na hwa'a te və nya tezhɛne geva na kadzembe hɛɗi nya shave na mbe. Ma kwa nza ŋkɛ yitea keləwə pate geva na ne, katezhɛne geva na kadzembe keləwə.»

²⁰Pa Adam hekate nda slə kaƐve ke male ta ŋkɛ, geze ta ŋkɛ, Kwa teghweme, kwa nza nde ghenta ya kameghekɛa pɛtɛa mbeli nyi teghweme.

²¹Pa Shala Mahwətə menete nda lekwesa yitea hweta ta wəshi keseɗa ke yɛ Adam le male ta ŋkɛ, seɗaghe nda ŋkɛ ke hɛ.

²²Ma ke Shala Mahwətə mbe ghəa ŋkɛ: «Wa nya wəndə nya kezhɛrenyɛ kala kwete wəndəa ɓəmə, kwa ɗepe wəsə nya ganyɛ keɗema nya ndiremi ŋkɛ. Ma tsetsenya gɛ ne, hama dzeve ŋkɛ kezha nda ya ta wəfe ta mpi perə ma. Ma kezehwe ŋkɛ ne, teghweme tenza ŋkɛ kaghala ghala!»

²³Pa Shala Mahwətə ŋkamte wəndə ŋelɛ same kwa ntsa nya kwa Ɛdɛn kezha lə ŋkɛ kawəza hɛɗi nya shave ŋkɛ mbe.

²⁴Ma kwa ŋkamte ŋkɛ ŋkɛ same kwa ne, pa ŋkɛ veyi ka shɛrəbɛŋe laka ŋkwa kesame ta veci yitea ntsa ta Ɛdɛn. Kafayɛ nya ghyana kala ghɛnia ghwə ya yitea dzeve va hɛ kaya hweŋkwa ta wəfe ta mpi.