Read kapsiki Gha ta Wəshi 35 Bible Online

Gha ta Wəshi 35 - kapsiki bible

Gha ta Wəshi 35

¹Ma ke Shala sha Zhakob kwete hɛ: «Sate kadzeme kanza pelɛ Bɛtɛl, pate nda reghwetɛ pelɛagha ke Shala nya kencɛte ŋa geva kwa nza na kahwɛ va wəza meyɛ ŋa Ɛzawə.»

²Ma ke Zhakob sha pɛtɛa mbeli nyi ki ghɛa ŋkɛ zlaɓe le mbeli nyi kese le: «Betakɛ mə yɛ shala ta kweci mbeli nyi va gheyɛ, yaɓemte mə geva ta ŋayɛ wɛŋe wɛŋe shɛ yɛ mbeɗemte lekwesa.

³Hite mə geva, dzeme Bɛtɛl gheɓəmə. 'Ya katedzeme kapa nda reghwetɛ ke Shala nya kezhɛnete ɗa ghena te və nya se 'ya mbe yaka ba'a nya kekemanakɛ ɗa te yayata ŋkwa nya se 'ya.»

⁴Pa hɛ fəave nda wəshi nyi kashala ta kweci mbeli nyi va hɛ pɛtɛ ba'a wəshi nyi kese mbe sleme va hɛ ke Zhakob. Pa Zhakob leyi hɛ mbe hɛɗi yitea kwete hwemeke dekwede yitea Sishɛm.

⁵Ma kwa slənji yɛ Zhakob le ŋwalea ŋkɛ ne, pa Shala ndeke nda ghazlənə nya wəba ke mbeli nyi mbe meleme nyi dzeyi yite, wəndə shɛ kese kakeka hɛ we.

⁶Pa yɛ Zhakob le pɛtɛa mbeli nyi kebeghe ŋkɛ ntsehe mbe Ləwz, geze ta ŋkɛ, Bɛtɛl nya te hɛɗia Kanan.

⁷Pa ŋkɛ pate reghwetɛ mbe ba'a hekate nda slə ke ŋkwa shɛ kaShala ta Bɛtɛl, kwa nza ŋkɛ tagha ncɛte nda ghəa ŋkɛ Shala te və nya se ŋkɛ kahwɛ va wəza meghekɛ.

⁸Pa Dɛbora, male nya kenewe ghweme te Rɛbɛka mtenyɛ, pa mbeli lamte ŋkɛ dekwede yitea Bɛtɛl yitea cɛana nya hekate nda slə mbeli se te vəa shɛ kaCɛana ta Nehwene.

⁹Pa Shala ncɛte nda geva zhɛkwa ke Zhakob kwa zhɛneke geva ŋkɛ se mbe Mɛzopotami ba'a wəpikɛ ŋkɛ.

¹⁰Ma ke Shala shɛ: «Zhakob se sləa ŋa, katezhɛne mbeli kaheka ŋa kaZhakob we, ama Israyɛl tenza sləa ŋa.» Pa ŋkɛ hekate nda sləa kaIsrayɛl.

¹¹Ma ke shɛ zhɛkwa: «'Ya ya kaShala nde berete. Kwele kwele teve ŋa ŋwale 'ya kezha nza na kashia hwelefe ba'a kaŋa hwelefefi kwele kwele. Kwele kwele teshave ka meghe mbe gha.

¹²Ma hɛɗi nya ndeke nda 'ya ke Abraham ba'a ke Izak ne, 'ya kave ŋa ŋkɛ, kateve nda ŋkɛ 'ya ke hwelefefi nyi ketesawa mbe gha kwa sebe ta ŋa.»

¹³Kwetere wəmbəa ŋkɛ ne, pa Shala slənyɛ te ŋkwa nya gezete nda ghena ŋkɛ ke Zhakob.

¹⁴Pa Zhakob mɓete gɛaŋa te ŋkwa shɛ, pa ŋkɛ gəyi n'yi ba'a tɛ te kezha nza ŋkɛ kapelɛ nya keveyi geva tekeleke.

¹⁵Pa Zhakob hekate nda slə kaBɛtɛl, geze ta ŋkɛ, “Ghɛa Shala”, ke ŋkwa nya gezete nda ghena Shala te.

¹⁶Pa yɛ Zhakob le mbelia ŋkɛ slənji mbe Bɛtɛl. Mbanji hɛ cakeɗake le Ɛfrata ne, ferete Rashɛl yake wəzege. Tekwazhizhi yake wəzegea shɛ nde.

¹⁷Ma kwa heha Rashɛl va ya, ma ke male kwa ya ŋkwa shɛ: «Zhɛma ŋa ghazlənə ma, kwete wəzege teza ŋkɛ.»

¹⁸Mbe wənə mbe wənə tene Rashɛl. Ma katekeɗaŋe mpi hwe ne, pa nde hekate nda slə kaBɛn-Oni, geze ta ŋkɛ, “Wəzege yaka”. Ama kaBɛnjamɛn hekate yitenyɛ, geze ta ŋkɛ, “Wəzege ta dzeve kwa zeme”.

¹⁹Mtiwə Rashɛl, pa mbeli lamte ŋkɛ kwa hweŋkwa ta Ɛfrata, geze ta ŋkɛ, Bɛtelɛhɛm.

²⁰Pa Zhakob mɓeyi gɛaŋa te kwele ta nta: mba mbeli kaheka pelɛa shɛ pa ɓeshi kagɛaŋa ta kwele ta Rashɛl.

²¹Cape Zhakob slənyɛ ba'a mɓete cɛ lekwesa ta ŋkɛ zlake ke Migdal-Ɛdɛr.

²²Ma kwa nza Zhakob te hɛɗi nyagha ne, cape Rəbɛn lə kaɓelahehwe ɓelahe le Bilha, male meghwa ta yitenyɛ, pa Zhakob fate. Ŋwale tezhili meŋe bakeghəmbe yaŋ'wete Zhakob:

²³Ŋwale nyi yake ŋkɛ hwa Lɛya: Rəbɛn nya katezhɛa wəzege, zhɛne Simɛyon, Lɛvi, Zhəwda, Isakar ba'a Zabəlon.

²⁴Ŋwale nyi yake ŋkɛ hwa Rashɛl: yɛ Zhozɛf le Bɛnjamɛn.

²⁵Ŋwale nyi yake ŋkɛ hwa Bilha nya kakwatera ta Rashɛl: yɛ Dan le Nɛftali.

²⁶Ŋwale nyi yake ŋkɛ hwa Zilpa nya kakwatera ta Lɛya: yɛ Gad le Asɛr. Tsetse ŋwalea Zhakob nyi keya mbe Mɛzopotami.

²⁷Hwa'a Zhakob sha yitenyɛ Izak mbe Mamrɛ, dekwede yitea Kiriyat-Arba nya heka mbeli kaHɛbron tsetsenya. Nahe yɛ Abraham le Izak kese kanza mbe.

²⁸Va gwəmsə ba'a deghesemsə menete Izak teghweme

²⁹nda mtenyɛ ŋkɛ. Kwele kwele temə ŋkɛ teghweme nda telə ŋkɛ sha ka shihɛnyɛ. Pa yɛ Ɛzawə le Zhakob, ŋwale tezhilia ŋkɛ lamte ŋkɛ.