Read kapsiki Gha ta Wəshi 47 Bible Online

Gha ta Wəshi 47 - kapsiki bible

Gha ta Wəshi 47

¹Cape Zhozɛf kalə sha Farawon, ma ke shɛ: «Nahe yiteyɛ ɗa ba'a ka kesaka yiteyɛ ɗa kesawa pelɛ hɛɗia Kanan le timɛtia nci, kwia nci, sla ta nci ba'a wəshia nci pɛtɛ. Te hɛɗia Goshɛn hɛ tsetsenya.»

²Kwa sebe ta ŋkɛ, pa Zhozɛf hekake ka kesaka yitenyɛ mcɛfe ba'a ncɛte nda hɛ ke Farawon.

³Ma ke Farawon sha hɛ: «Wa slene nya mene yɛ wa?» Ma ke hɛ zhɛnete nda: «Meghea n'yɛ, ka ya wəshi keseɗa nyi ɓɛhwɛ ɓɛhwɛ ghen'yɛ kala nya se ka shihɛ n'yɛ kaya.»

⁴Ma ke hɛ sha Farawon: «Ghen'yɛ se kanza te hɛɗia ŋa, kwa nza ŋkɛ kaɗema gwəzə shɛ kezha timɛtia n'yɛ ba'a kwele kwele ma te hɛɗia Kanan. Pelave n'yɛ hweŋkwa kanza te hɛɗia Goshɛn gi.»

⁵Ma ke Farawon sha Zhozɛf: «Nahe yiteyɛ ŋa ba'a ka kesaka yiteyɛ ŋa kesawanji sha gha.

⁶Te dzeve ta ŋa pɛtɛa hɛɗia Ɛzhipte, veyi yiteyɛ ŋa ba'a ka kesaka yiteyɛ ŋa te ŋkwa nya ganyɛ. Wərə hɛ kanzanji te hɛɗia Goshɛn. Ma kesləyi ka katsala kɛfi na hwa hɛ, veyi hɛ te ghəa ŋa ɗa wəshi keseɗa.»

⁷Pa Zhozɛf keleghe yitenyɛ Zhakob ba'a ncɛte nda ŋkɛ ke Farawon. Pa Zhakob njiŋwakɛ Farawon le hawe.

⁸Ma ke Farawon shɛ: «Ŋkwini va ta ŋa wa?»

⁹Ma ke Zhakob zhɛnete nda: «Va gwəmsə ba'a mahekenemsə ghala dzedzeghwa 'ya kehɛɗi kehɛɗi kala nde se se. Kahe kahe hale ɗa 'ya ba'a dzawe sahwe yaka 'ya. Kekekave va ta ka shihɛ ɗa nyi kese kadzedzeghwa 'ya we.»

¹⁰Pa Zhakob zhɛne kanjiŋwakɛ Farawon, cape ŋkɛ shave ki ghɛa meghe.

¹¹Pa Zhozɛf veyi yitenyɛ ba'a ka kesaka yitenyɛ te ŋkwa nya ganyɛ mbe Ɛzhipte, te hɛɗia Ramsɛs kala nya gezete nda Farawon. Pa ŋkɛ ndeke nda hɛɗi ke hɛ kaŋa nci.

¹²Pa Zhozɛf fəave nda wəshi kezeme ke yɛ yitenyɛ, ka kesaka yitenyɛ ba'a mbeli nyi ki ghɛa yitenyɛ pɛtɛ kala nza ta ŋwale nyi va hɛ kazeme nda zeme.

¹³Nahe ma kenza dzawe kwa nahe wəshi kezeme te hɛɗi pɛtɛ. Pahe yapahe mbeli nyi te hɛɗia Ɛzhipte ba'a nyi te hɛɗia Kanan va ma shɛ.

¹⁴Pɛtɛ Zhozɛf tsenehwe cɛdɛ nyi te hɛɗia Ɛzhipte ba'a nyi te hɛɗia Kanan nyi pave ha mbeli te, beteyi ki ghɛa Farawon.

¹⁵Ma kwa ɗema cɛdɛ mba te hɛɗia Ɛzhipte ba'a te hɛɗia Kanan, hwa'a ka Ɛzhipte sha Zhozɛf, ma ke hɛ shɛ: «Ɗave n'yɛ wəshi kezeme gi. Mpə n'yɛ n'yɛ va ma kwa kema ta ŋa kwa ɗema cɛdɛ mba va ghen'yɛ gɛ na?»

¹⁶Ma ke Zhozɛf zhɛnete: «Ma keɗema cɛdɛ mba va gheyɛ ne, kese ɗa mə wəshi keseɗa ta ŋayɛ nda teɗa ŋayɛ wəshi kezeme 'ya.»

¹⁷Pa hɛ keseke nda wəshi keseɗa ta nci ke Zhozɛf. Pa Zhozɛf ɗave nda wəshi kezeme ke hɛ te gədəwəa lɛməa nci, timɛti, kwi, sla ba'a kwara lɛməa nci. Kala nza ta səkəməa wəshi keseɗa ta nci ɗave nda wəshi kezeme Zhozɛf ke hɛ wərə zeme ta nci te va shɛ.

¹⁸Kiɗima ta va nyagha ne, hwa'a hɛ shɛ te kwete va, ma ke hɛ shɛ: «Nde sleke ŋkwa, kashɛ ghen'yɛ wəfərəakɛ ghena va gha we. Nahe cɛdɛ yitea dzeve va ghen'yɛ ba'a pɛtɛ wəshi keseɗa ta n'yɛ va gha. Kwete wəsə shɛ ketene va ghen'yɛ kave ŋa keɗema ghəa n'yɛ ba'a yɛ wəvea n'yɛ we.

¹⁹Mpə n'yɛ n'yɛ kwa kema ta ŋa gɛ na? Keɗema ghen'yɛ shɛ ne, gəmə wəvea n'yɛ. Pahwe n'yɛ le yɛ wəvea n'yɛ te wəshi kezeme. Katemene nda slene ghen'yɛ le wəvea n'yɛ ke Farawon. Nta n'yɛ felehwe ta wəshi. Ma tsagha, teghweme tenza ghen'yɛ, katempə n'yɛ ba'a katenza wəvea n'yɛ kaɓerama we.»

²⁰Pa Zhozɛf pave nda wəve nyi mbe Ɛzhipte pɛtɛ ke Farawon, va nya nza ŋkɛ nahe yayata nde Ɛzhipte kepamte wəvea ŋkɛ va dzawea ma nya shɛ. Tsagha gɛ ne, nahe pɛtɛa hɛɗi kezhɛre kaŋa Farawon.

²¹Se te kwete bela ta hɛɗi hwa'a te kwete ne, pɛtɛ Zhozɛf zhɛrete mbeli kaka mavashi.

²²Ama deke wəvea ka dzeghe Shala yasema Zhozɛf kapa, va nya gezeyi ghena zlaɓa heli Farawon kaŋa nci. Wəshi nyi fə nda Farawon ke hɛ yazeme hɛ, vatse sema hɛ kapamte wəvea nci.

²³Ma ke Zhozɛf sha mbeli: «Tsetsenya ne, nahe 'ya kepahwe ŋayɛ le wəvea ŋayɛ kaŋa Farawon. Katenta ŋayɛ felehwe ta wəshi 'ya kezha tsawe mbe wəvea ŋayɛ.

²⁴Ma te və kemene wəshi se te wəve ne, kateve nda wəsə yɛ təhə mbe mcɛfe ke Farawon. Ma wəshi nyi ketene wəfaɗe ne, kaŋa ŋayɛ nza hɛ kezha tsawe mbe wəvea ŋayɛ ba'a kezha zeme yɛ, gheyɛ, ŋwalea ŋayɛ ba'a mbeli nyi ki ghɛa ŋayɛ.»

²⁵Ma ke hɛ zhɛnete: «Nahe na kembelete n'yɛ mpia n'yɛ. Ma kwa kemave zlaɓa helia ŋa ghen'yɛ ne, kayɛ ghen'yɛ kanza kaka mavashia Farawon.»

²⁶Tsagha gɛ, pa Zhozɛf hwepete kawəsə mahalegə nya mba kamene slene pa ɓeshi: mbe wəshi mcɛfe nyi kese te wəve ne, təhə nza ŋa Farawon. Deke yɛ wəvea ka dzeghe Shala ka ɗema kaŋa Farawon.

²⁷Pa ka Israyɛl nzanji kwa Ɛzhipte te hɛɗia Goshɛn. Pa hɛ kemave yɛ wəve kaŋa nci ba'a yate ya kala repanja.

²⁸Va meŋe mberefaŋeghəmbe menete Zhakob kwa Ɛzhipte. Va gwəmsə ba'a wəfaɗemsə mberefaŋeghəmbe menete ŋkɛ teghweme pɛtɛ.

²⁹Ma takwa takwa ŋkɛ kamte ne, daŋe hekakɛ wəzege ta ŋkɛ Zhozɛf, ma ke shɛ: «Ma kenza nde kaɗe ɗa na ne, zemete ɗa fela laka ve dzeve ta ŋa kwelɛ basa ta ɗa. Ncɛte ɗa ɗe ta ŋa ba'a ganyɛa ŋa kezha ɗema mbeli kala ɗa mbe Ɛzhipte.

³⁰Ma kemte 'ya ne, katekele ɗa na shave mbe Ɛzhipte kalə kala ɗa hwa kwele ta ka shihɛ ɗa.» Ma ke Zhozɛf zhɛnete: «Katemene 'ya kala nya gezete na.»

³¹Ma ke Zhakob zhɛkwa: «Zemete ɗa kafela.» Pa Zhozɛf zemete nda fela. Pa Zhakob gwəɗəŋənyɛ te ghəa gezle ta ŋkɛ.