Read kapsiki Gha ta Wəshi 49 Bible Online

Gha ta Wəshi 49 - kapsiki bible

Gha ta Wəshi 49

¹Pa Zhakob hekake ŋwale tezhilia ŋkɛ, ma ke sha hɛ: «Tsenete mə ghəa ŋayɛ, 'ya kategeze ŋayɛ wəsə nya ketemene ŋayɛ geva te kwete veci.

²Rəkwəte mə ghəa ŋayɛ, fate mə, ŋwalea Zhakob, fate mə ghena ta Israyɛl, yiteyɛ ŋayɛ.

³Gha ya kande ghate ta wəzege ta ɗa Rəbɛn, nde ghate ta wəzege nya yake 'ya kwa nza berete mba mbe 'ya. Za ma na ke ka kesaka yiteyɛ ŋa laka nza kaza ba'a laka berete.

⁴Kala hələ nya kegaŋkeɓe na. Ama katezhɛne na kanza kande ghate we, kwa nza ŋkɛ nahe na kekelemte zləvə te ghəa ŋa kwa se na kaɓelahe te gezlea ɗa le kwete hwa mia ɗa.

⁵Ka mama yɛ Simɛyon le Lɛvi: nahe hɛ ketsahwe yitea mene wəsə kwa berete.

⁶Kadzehwa ghena nya tsa hɛ 'ya we, kadzehwa tsene ta nci 'ya we, kwa nza ŋkɛ nahe hɛ kempəmte mbeli mbe hwepe ta wənəa nci, nahe hɛ ketsetsaslemte ŋeli yitea mcɛmcɛli va mawe ta nci.

⁷'Ya kabezla nza ghwə ta hwepe ta wənəa nci ba'a zhɛma helia nci nyagha. 'Ya katetaze hwelefefia nci 'ya dzeyi hwa ka Israyɛl, 'ya katepesle hɛ kwetɛ kwetɛŋe te hɛɗi nya.

⁸Zhəwda, gha yatetsahe ka kesaka meyɛ ŋa. Katenza na bereteke kənəa ka jaga ta na, kategwəɗəŋə ka kesaka yiteyɛ ŋa kwa kema ta ŋa.

⁹Wəzege ta ɗa Zhəwda, kala megela nivɛrə nya kempeɗehwe wəsə ba'a nya kezhɛneke geva kadzete ghweɓea ŋkɛ na. Kacɛfɛakwe nivɛrə, kaɓelahe ŋkɛ. Wa nde nza kaŋkakate ŋkɛ sate te ŋkwa wa?

¹⁰Va sebe ta Zhəwda tenza geta ta meghe. Mbe dzeve ta hwelefe ta ŋkɛ tenza geta meghe pa te və nya tese wəndə nya nza ŋkɛ kaŋa ŋkɛ fate fate, wəndə nya tenza mbeli mbe dzeve ta ŋkɛ.

¹¹Gheŋkɛ nde tehwepe kwara ta ŋkɛ vare wəfe ta rɛzɛŋe, ba'a leve ta kwara ta ŋkɛ te dzeve ta wəfe ta rɛzɛŋe. Tɛa rɛzɛŋe yatetsewe lekwesa ta ŋkɛ ŋkɛ le ba'a yɛməa rɛzɛŋe yateghwəɓə lekwesa ganyɛ ta ŋkɛ ŋkɛ le.

¹²Ghɛmɛ ma tenza ntsə ta ŋkɛ ke tɛ ba'a tɛawetɛa ma tenza yɛ slene ta ŋkɛ ke ŋ'wa.

¹³Mɛa ndərə tenza Zabəlon, te ŋkwa nya ghereŋe yɛ kwambelə. Hwa'a mbe Sidon tenza hɛɗia ŋkɛ.

¹⁴Nahe Isakar kenza bidalea kwara nya keɓelahenyɛ kwa zlema.

¹⁵Nahe ŋkɛ kenakɛ ganyɛke ŋkwa shɛ ba'a keɗehwe hɛɗia shɛ. Pa ŋkɛ hite wəmbə kezha fə wəshi, megela ŋkɛ kezha slene mava.

¹⁶Dan nde temeha ghwə te mbelia ŋkɛ kala kweci yitehɛ ta Israyɛl.

¹⁷Nahe Dan kenza kala shishi nya kwa hweŋkwa, kala mentsape nya mɛa hweŋkwa. Kahale gədəwə ŋkɛ yitea seɗa kezha teɗe nde zleɗe gədəwə me'yaŋe 'yaŋe.

¹⁸Mahwətə yawe, katembele ɗa na zəzə 'ya!

¹⁹Ma kahave nda mpa ka mefətekwə ke Gad ne, kabazle ghəa ŋkɛ ŋkɛ, kakeka hɛ ŋkɛ.

²⁰Kwele kwele temene wəshi te hɛɗia Asɛr, wəshi kezeme ta ka meghe yatemene hɛɗia ŋkɛ.

²¹Kala kɛme nya werete nya keya ŋwale ganji Nɛftali.

²²Kala wəfe nya keya ŋkerɛape Zhozɛf, kala wəfe nya keya ŋkerɛape mɛa ɗasle. Bebiya ma ke zli ha yɛ dzeve ta ŋkɛ.

²³Pa ka he have se kaɗeke ŋkɛ le have, pa hɛ ghwezakɛ mɛ hwe, have nda mpa.

²⁴Ama rape keseyi rəgia ŋkɛ ŋkɛ le berete, nahe mɓəa ŋkɛ ba'a dzeve ta ŋkɛ kehite geva megela. Laka berete ta Shala nde berete ta Zhakob ne, nahe na kezhɛre ŋa kande ya wəshi, kakeleɓa ta Israyɛl.

²⁵Laka Shala ta yiteyɛ ŋa nya kekemane ŋa, laka Shala nde berete nya kewəpi ŋa ne, kemave wəshi ganjia va nya keme sawa pelɛ ghweme, ŋa yɛmə nya kesame kwa zeweve ta hɛɗi, tsagha ŋwale ba'a wəshi keseɗa kwele kwele.

²⁶Ma wəpi nyi wəpi ŋkwa yiteyɛ ŋa ne, za ma hɛ ke wəshi ganjia ghweme nyi ghalanzanji, za ma hɛ ke mcɛlə nyi pelɛ wəmbə nyi hecanji. Dzeghəa Zhozɛf wəpi ta yitenyɛ, gheŋkɛ nya keveyi geva tekeleke hwa ka kesaka yitenyɛ!

²⁷Makwagwele nya ghyana Bɛnjamɛn. Masheke ne, kampeɗe wəsə nya keseve ŋkɛ ŋkɛ, ma hetɛhwɛɗi, kanehe wəsə nya keseke ŋkɛ ŋkɛ.»

²⁸Ghenci ya kaka yitehɛ nyi meŋe bakeghəmbe mbe Israyɛl. Nyi ya kaghena nyi gezete nda yiteyɛa nci ke hɛ vəa ŋkwa nya wəpikɛ hɛ ŋkɛ. Yayata wəndə kekemave ŋa ŋkɛ wəpi tekeleke.

²⁹Kwa sebe ta ŋkɛ, pa ŋkɛ gezave nda ghena nyi ke hɛ, ma ke: «Ma kemte 'ya ne, lamte ɗa mə hwa ka shihɛ ɗa mbe zlera nya mbe wəvea Ɛfron, nde Hɛt,

³⁰mbe Makpɛla, terasle yitea Mamrɛ, te hɛɗia Kanan. Nahe Abraham kepahwe wəvea shɛ va Ɛfron yitea nza ŋkɛ kaŋkwa kela ŋkwa ta ŋkɛ.

³¹Mbe lamte yɛ Abraham mbeli le male ta ŋkɛ Sara, mbe lamte yɛ Izak mbeli le male ta ŋkɛ Rɛbɛka, mbe lamte Lɛya 'ya.

³²Ma yɛ wəvea shɛ le zlera shɛ ne, va ka Hɛt pave mbeli.»

³³Ma kwa keɗaŋemte geze nda ghena Zhakob ke ŋwalea ŋkɛ ne, pa ŋkɛ zhɛne kaɓelahe, kwa sebe ta ŋkɛ, mtiwə ŋkɛ, jikə ŋkɛ hwa ka shihɛnyɛ.