Read kapsiki Gha ta Wəshi 50 Bible Online

Gha ta Wəshi 50 - kapsiki bible

Gha ta Wəshi 50

¹Fɛke Zhozɛf sha ghəa ŋkɛ kənəa yitenyɛ, sərəɓə sərəɓə ŋkɛ sha nehwene ba'a həməwə ŋkɛ həməwəve ŋkɛ.

²Pa Zhozɛf gezave nda ke ka dakwəterəa ŋkɛ kezha fi geva ta yitenyɛ le 'wərdə. Pa ka dakwəterəa shɛhɛ fikɛ Israyɛl le 'wərdə.

³Hɛ wəfaɗemsə menete hɛ kafi geva ta ŋkɛ le 'wərdə kezha ɗema ŋkɛ kada kala nya seneve hɛ kamene. Hɛ mberefaŋemsə menete ka Ɛzhipte kanehwene ŋkɛ.

⁴Ma kwa nahemte geva nehwene ta ŋkɛ ne, ma ke Zhozɛf sha mbeli nyi ki ghɛa Farawon: «Ma kenza ŋkɛ kaɗe ɗa yɛ ne, təhwə təhwə ŋayɛ 'ya, ma pe yɛ sha Farawon:

⁵‹Ma nda temte yiteyɛ ɗa ne, nahe ŋkɛ kegeze ɗa kazeme nda fela kezha la ŋkɛ kwa kwele nya late ŋkɛ pelɛ Kanan. Kaɗe 'ya kadzeme Kanan tsetsenya kezha la yiteyɛ ɗa, nda tezhɛne geva 'ya kasawa.›»

⁶Ma ke Farawon zhɛnete: «Dzeme lamte yiteyɛ ŋa kala nya zemete nda fela na.»

⁷Ntəŋə Zhozɛf kadzeme kezha la yitenyɛ. Cape ka mene slene ta Farawon, mbelia jama nyi ki ghɛa ŋkɛ ba'a mbelia jama nyi te pɛtɛa hɛɗia Ɛzhipte kadzeme yite,

⁸tsagha mbeli nyi ki ghɛa Zhozɛf, ka kesaka yitenyɛ ba'a mbeli nyi ki ghɛa yitenyɛ. Deke ŋwale fəshi ba'a wəshi keseɗa ka tene te hɛɗia Goshɛn.

⁹Yɛ wəmata gədəwə ba'a ka zleɗe gədəwəa lɛmə ka beghakɛ ŋkɛ kadzeme. Kambeli kwele kwele nza hɛ.

¹⁰Hwa'a hɛ mbe Gorɛn-Atad pelɛ kema ta hələa Zhəwrdɛŋe. Pa hɛ veyi nehwene kewəbanyɛ ba'a dzawe tagha. Pa Zhozɛf menete hɛ mberefaŋe kanehwene yitenyɛ.

¹¹Ma kwa nakɛ nehwene nya mbe Gorɛn-Atad ka Kanan nyi te hɛɗia shɛ ne, ma ke hɛ: «Nehwene nya dzawe ŋkɛ kaŋa ka Ɛzhipte!» Vatse hekate nda slə mbeli ke ŋkwa nya pelɛ kema ta hələa Zhəwrdɛŋea shɛ kaAbɛl-Misrayim, geze ta ŋkɛ, “Nehwene ta ka Ɛzhipte”.

¹²Kala nya gezete yiteyɛa nci menete nda ŋwalea Zhakob.

¹³Pa hɛ keleghe ŋkɛ kadzeme hɛɗia Kanan, lamte ŋkɛ mbe zlera nya mbe wəve nya mbe Makpɛla, nya pave Abraham va Ɛfron, nde Hɛt kaŋkwa kela ŋkwa, terasle yitea Mamrɛ.

¹⁴Kwa sebe ta nya lamte yitenyɛ Zhozɛf ne, tewətelɛwe ŋkɛ zhɛneghe geva kadzawa Ɛzhipte le ka kesaka yitenyɛ ba'a pɛtɛa mbeli nyi kebeghakɛ ŋkɛ.

¹⁵Ma kwa nakɛ ka kesaka yitenyɛa Zhozɛf nahe yiteyɛa nci kemtenyɛ ne, ma ke hɛ: «Nda kwete katezhɛre ɓəmə Zhozɛf kaka jaga ba'a katewa wəsə kwa ndiremi nya menete nda gheɓəmə ŋkɛ tse we.»

¹⁶Pa hɛ ghwenakɛ nda mɛ ke Zhozɛf, ma ke hɛ shɛ: «Ma ke yiteyɛ ŋa gezave n'yɛ ghena nda temte ŋkɛ:

¹⁷‹Ma pe yɛ sha Zhozɛf: Təhwə təhwə ŋa 'ya, kelemte fete ba'a wəsə kwa ndiremi nyi menete ŋa ka kesaka yiteyɛ ŋa te wənə.› Tsetsenya gɛ ne, kelemte n'yɛ fetea shɛ te wənə, ghen'yɛ ka mene nda slene ke Shala ta yiteyɛ ŋa.» Ma kwa gezete nda ghena hɛ kala nyagha ne, ntake Zhozɛf kanehwene.

¹⁸Kwetere wəmbəa ŋkɛ ne, cape ka kesaka yitenyɛ le ghəa nci kalə kagwəɗəŋə yitea seɗa ta ŋkɛ, ma ke hɛ shɛ: «Ka mavashia ŋa nza ghen'yɛ.»

¹⁹Ama ma ke Zhozɛf zhɛnete nda ke hɛ: «Ghazlənəma yɛ ma. 'Ya nza kaShala na?

²⁰Ndiremi yaɗehwe yɛ kamene ɗa, ama nahe Shala kezhɛrete wəsə kwa ndiremia shɛ kawəsə ganyɛ. Nahe ŋkɛ keɗehwe kambele mpia mbeli kwele kwele kala nya newe nya yɛ ɓeshi.

²¹Ghazlənəma yɛ gɛ ma, katenewe ghweme 'ya te gheyɛ le ghɛa ŋayɛ.» Laka ghena ganji nyi kala nyi gweɗakwete nda wənə ŋkɛ ke hɛ.

²²Pa yɛ Zhozɛf le mbeli nyi ki ghɛa yitenyɛ nzanji mbe Ɛzhipte. Va gwəmsə ba'a meŋe menete Zhozɛf teghweme.

²³Nahe Zhozɛf kenakɛ ŋwalea wəzege ta ŋkɛ Ɛfrayim hwa'a te kwa mahekene ta shi. Ɓiyitsa ne, kwa seɗa ta ŋkɛ kele ŋwalea Makir nya kawəzege ta Manasɛ.

²⁴Te kwete veci, ma ke Zhozɛf sha ka kesaka yitenyɛ: «'Ya katemte, ama katekemane ŋayɛ Shala ya tsemanyɛ ŋkɛ. Katefə ŋayɛ ŋkɛ shave mbe Ɛzhipte kadzete hɛɗi nya meɗeyi nda ŋkɛ le fela ke Abraham, Izak ba'a Zhakob.»

²⁵Kwa sebe ta ŋkɛ, ma ke Zhozɛf sha ŋwalea Israyɛl: «Zemete ɗa mə kafela kezha kele geva ta ɗa se teke kadzeme vəa ŋkwa nya kemanakɛ ŋayɛ Shala.»

²⁶Mtiwə Zhozɛf mbe Ɛzhipte kwa sebe ta va gwəmsə ba'a meŋe. Pa mbeli fikɛ geva ta ŋkɛ le 'wərdə kezha ɗema ŋkɛ kada, kwa sebe ta ŋkɛ, pa mbeli veyi ŋkɛ kwa səndəkwə pelɛ.