Read kapsiki Gha ta Wəshi 7 Bible Online

Gha ta Wəshi 7 - kapsiki bible

Gha ta Wəshi 7

¹Ma ke Mahwətə sha Nowɛ: «Kwiɗi kadzembe kwambelə, gha le mbelia ŋa kwa nza ŋkɛ deke gha ya kawəndə nya tiɗiɗi hwa mbeli nyi mbe vəa ŋa.

²Hwa mama ta wəshi keseɗa nyi wɛŋe wɛŋe ne, tsehave bake nyi bake nyi mberefaŋe zhigə, ama hwa wəshi keseɗa nyi wale wale ne, kwetɛŋe zhigə nta na, yɛ za le male hwa mama ta nci.

³Ma kaŋa 'yɛ nyi yitea ghweme ne, mberefaŋe zhigə nta na bake nyi bake nyi, yɛ za le male kezha yate hwelefe ta nci te hɛɗi.

⁴Ma mbe hɛ mberefaŋe ne, kateme va 'ya kadzete hɛɗi kaveci wəfaɗemsə ba'a viɗi wəfaɗemsə. Pɛtɛ teza sebe 'ya te wəshi nyi pate 'ya.»

⁵Pa Nowɛ menete pɛtɛa wəshi nyi gezete nda Mahwətə.

⁶Ma nda menete geva yɛmə nya wəba te hɛɗi ne, gwəmsə ŋkwaŋe va ta Nowɛ.

⁷Shilimə ŋkɛ dzembenyɛ mbe kwambelə le ŋwale tezhilia ŋkɛ, male ta ŋkɛ ba'a makwashia ŋkɛ kezha mbele va yɛmə nya wəba.

⁸Ma wəshi keseɗa nyi wɛŋe wɛŋe ba'a nyi wale wale, yɛ 'yɛ ba'a yayata wəsə nya kedzeghwa te hɛɗi ne,

⁹pɛtɛ hɛ kentsehe mbe kwambeləa Nowɛ bake nyi bake nyi, yɛ za le male kala nya gezete Shala.

¹⁰Kwetere wəmbəa hɛ mberefaŋe ne, bətə ŋkwa nya te hɛɗi va yɛmə nya wəba.

¹¹Te kwa gwəmsə ŋkwaŋe ta va ta Nowɛ, mbe hɛ kwa meŋe mberefaŋeghəmbe te tere kwa bake ne, pɛtɛ yɛmə nyi mbe hɛɗi kahwɛ shave mbe, pɛtɛ wəfela nyi pelɛ ghweme keghwenemte geva kebeŋwe beŋwenji.

¹²Ntake va kame te hɛɗi kaveci wəfaɗemsə ba'a viɗi wəfaɗemsə.

¹³Te vecia shɛ dzembe kwambelə yɛ Nowɛ le ŋwalea ŋkɛ Sɛm, Sham le Zhafɛt ba'a yɛ male ta ŋkɛ le makwashia ŋkɛ mahekene,

¹⁴zlaɓe le mama ta wəshi keseɗa nyi ki ghɛ ba'a nyi hwa gamba, mama ta wəshi keseɗa nyi ɓɛhwɛ ɓɛhwɛ nyi kedzeghwa te hɛɗi, mama ta 'yɛ ba'a wəshi nyi ɓɛhwɛ ɓɛhwɛ nyi kezlə.

¹⁵Bake nyi bake nyi hwa mama ta wəshi nyi le mpi kadzembe kwambelə yitea Nowɛ.

¹⁶Yɛ za le male hwa mama ta nci se hɛ kadzembe kala nya gezete nda Shala ke Nowɛ. Jaslɛ Mahwətə ŋzlete gelembe yitea Nowɛ.

¹⁷Hɛ wəfaɗemsə menete yɛmə nya wəba shɛ te hɛɗi. Ma kahende geva yɛmə kadzeme ne, pa kwambelə kafeghe geva kadzeme kənəa hɛɗi.

¹⁸Ma kambake geva yɛmə kadzeme ne, tambaŋe kwambelə te ghəa yɛmə.

¹⁹Nda mbake yambake geva yɛmə kadzeme, hwa'a te zhiɓə ta ghəa ghweme nyi biya biya te hɛɗi.

²⁰Pa yɛmə dzeme gare mɛtre mberefaŋe zlake ma ke yɛ ghəa ghweme.

²¹Pɛtɛ wəshi nyi nza mpi hwe nyi kedzeghwa te hɛɗi mpənji: 'yɛ, wəshi keseɗa nyi ki ghɛ, nyi hwa gamba, pɛtɛa wəshi nyi kedzeghwa te hɛɗi ba'a mbeli perə.

²²Pa pɛtɛa wəshi nyi nza mpi hwe ba'a nyi kenza te hɛɗi kwa ghwele ghwele mpənji.

²³Tsagha zamte sebe Mahwətə te pɛtɛa wəshi nyi nza mpi hwe te hɛɗi: mbeli, wəshi keseɗa nyi jama jama, nyi ɓɛhwɛ ɓɛhwɛ ba'a yɛ 'yɛ. Terayɛ hɛ zanji te hɛɗi. Deke yɛ Nowɛ le mbeli nyi mbe kwambeləa shɛ ya mba teghweme.

²⁴Hɛ gwəmsə ba'a mcɛfemsə menete yɛmə zhiɓə kənəa hɛɗi.