Read kapsiki Gha ta Wəshi 9 Bible Online

Gha ta Wəshi 9 - kapsiki bible

Gha ta Wəshi 9

¹Pa Shala wəpikɛ yɛ Nowɛ le ŋwalea ŋkɛ, ma ke sha hɛ: «Yate mə ya ba'a mbakete mə geva kwele kwele, viɗikɛ mə hɛɗi.

²Pɛtɛ teghazlənə wəshi keseɗa nyi te hɛɗi ba'a 'yɛ nyi yitea ghweme va gheyɛ. Ma pɛtɛa wəshi nyi kedzeghwa te hɛɗi ba'a kelepe nyi kwa ndərə ne, te dzeve hɛ va gheyɛ.

³Yayata wəsə nya kedzeghwa te hɛɗi ba'a nya nza mpi hwe ne, kawəsə kezeme ta ŋayɛ tenza nde kala nya ndeke ŋayɛ wəshi nyi kepese 'ya. 'Ya kave ŋayɛ pɛtɛ tsetsenya.

⁴Ama katezeme sli nya nza mpi mbe, geze ta ŋkɛ, mimi yɛ we.

⁵Ma mimia ŋayɛ perə ne, mpia ŋayɛ ŋkɛ. Vatse gɛ, kate'yɛwe ghena 'ya te, kate'yɛwe ghena 'ya va yayata wəsə keseɗa keɗema wəndə nya kepeslekɛ ŋkwa te. Kate'yɛwe ghena 'ya te mpia wəndə ŋelɛ.

⁶Ma wəndə nya kepeslekɛ wəndə ne, va wəndə temte ŋkɛ. Va nya nza ŋkɛ kala ghəa ŋkɛ pate wəndə ŋelɛ Shala.

⁷Ma gheyɛ le ŋa ŋayɛ gɛ ne, yate mə ya ba'a mbakete mə geva kwele kwele, pesleyi mə geva te hɛɗi ba'a viɗikɛ mə ŋkɛ.»

⁸Ma ke Shala sha yɛ Nowɛ le ŋwalea ŋkɛ:

⁹«Katemene jikə geva 'ya le gheyɛ, le ŋwale nyi ketesawa mbe gheyɛ

¹⁰ba'a le wəshi nyi nza mpi hwe nyi yitea gheyɛ: yɛ 'yɛ, wəshi keseɗa nyi ki ghɛ ba'a nyi hwa gamba, pɛtɛa wəshi nyi keshave mbe kwambelə ba'a wəshi keseɗa nyi ketenza te hɛɗi lema.

¹¹Katemene jikə geva 'ya le gheyɛ: katezhɛne yɛmə nya wəba kaza wəsə nya nza mpi hwe te hɛɗi we. Katezhɛne yɛmə nya wəba kaza ŋkwa nya te hɛɗi we.»

¹²Ma ke Shala zhɛkwa: «Wa nya wəsə kencɛ jikə geva nya mene 'ya le gheyɛ ba'a wəshi nyi nza mpi hwe yitea gheyɛ keshi keshi nya:

¹³'Ya kave rəgia ɗa te ləmbə kezha nza nde kawəsə kencɛ jikə geva nya kwelɛ 'ya le hɛɗi.

¹⁴Kala və nya temene ləmbə 'ya kənəa ghəa hɛɗi ba'a nya tenca maɓelɛaŋe ne,

¹⁵katezəzə jikə geva nya kwelɛ 'ya le gheyɛ, le mama ta wəshi nyi nza mpi hwe 'ya. Katezhɛne yɛmə nya wəba kaza wəsə nya nza mpi hwe we.

¹⁶Ma vəa ŋkwa nya tenza maɓelɛaŋe te ləmbə ne, katenewe ŋkɛ 'ya kezha zəzə jikə geva kwa kiɗima nya menete 'ya le mama ta wəshi nyi nza mpi hwe te hɛɗi.»

¹⁷Ma ke Shala sha Nowɛ zhɛkwa: «Gheŋkɛ ya kawəsə kencɛ jikə geva nya menete 'ya le yayata wəsə nya nza mpi hwe te hɛɗi.»

¹⁸Ma ŋwalea Nowɛ nyi keshave mbe kwambelə ne, Sɛm, Sham ba'a Zhafɛt. Sham ya kayiteyɛa Kanan.

¹⁹Se mbe ŋwalea Nowɛ nyi mahekenea shɛhɛ yate ya mbeli te hɛɗi.

²⁰Nowɛ ya kande ghate ta nde wəza nya kemɓete wəfe ta rɛzɛŋe.

²¹Pa ŋkɛ sakɛ tɛa ŋkɛ, ghwəyinyɛ ba'a nzanyɛ mederelaŋe mbe cɛ lekwesa ta ŋkɛ.

²²Pa Sham nya kayiteyɛa Kanan nakɛ yitenyɛ mederelaŋe ba'a gezete nda ke ka kesaka meghekɛ nyi bake pelɛ te ŋwela.

²³Tagha ne, pa yɛ Sɛm le Zhafɛt kelete lekwesa ta Nowɛ, pa hɛ veyi te bazla ta nci. Shilimə hɛ mbe cɛ lekwesa shɛ le wəmbə le wəmbə, pa hɛ dəpəyi lekwesa kənəa yite nci. Ŋkwa nya laka kwete ŋkwa yanewe hɛ yitea ɗema hɛ kanakɛ yite nci mederelaŋe.

²⁴Ma kwa wetɛaŋe ghwəyia ŋkɛ yitea ghə va Nowɛ ne, pa ŋkɛ fate wəsə nya menete nda wəzege ta ŋkɛ nya ɓɛhwɛ ma.

²⁵Tagha, ma ke: «Kande bezla bezla nza Kanan! Nza ŋkɛ kande keɗaŋe ta ka mene slene ta ka kesaka meghekɛ!»

²⁶Ma ke zhɛkwa: «Nza zləvə te Mahwətə, Shala ta Sɛm! Nza Kanan kande mene slene ta Sɛm!

²⁷Ndeke nda hɛɗi Shala kwele kwele ke Zhafɛt, nza ŋkɛ mbe yɛ cɛ lekwesa ta Sɛm ba'a nza Kanan kande mene nda slene ke Zhafɛt!»

²⁸Va gwəmsə mahekene ba'a mcɛfemsə menete Nowɛ zhɛkwa kwa sebe ta yɛmə nya wəba.

²⁹Ma kwa menete va ŋkɛ gwəmsə mesli ba'a mcɛfemsə pɛtɛa ŋkɛ ne, mtiwə ŋkɛ.