Read kapsiki 2 Saməyɛl 1 Bible Online

2 Saməyɛl 1 - kapsiki bible

2 Saməyɛl 1

¹Nahe Sawəl kemte nda tese David kantishɛ mbe Siklag kwa sheke ŋkɛ kwamte ɗa ka Amalɛk. Pa ŋkɛ menete hɛ bake kwa sebe ta ŋkɛ.

²Ma kwa sebe ta hɛ mahekene ne, pa kwete mempɛhweta nya ghweneke mbeli shave mbe ghedəkwəa Sawəl ntsehe. Keŋkwahe ŋkwahe lekwesa ta ŋkɛ, kebehwe behwe ghəa ŋkɛ va keləwə nya kawəsə kencɛ ghena ta mte. Ma takwa takwa ŋkɛ yitea David ne, vəkwə ŋkɛ ntiŋə sha ghə mbe hɛɗi.

³Ma ke David: «Tema se na wa?» Ma ke zhɛnete nda: «'Ya mbele ɗa shave mbe ghedəkwəa ka Israyɛl.»

⁴Ma ke David zhɛkwa: «Gezete ɗa wəsə nya kemenete geva.» Ma ke shɛ: «Nahe ka sewajɛa ka Israyɛl kehwɛnji same kwa mpa, kwele kwele ka sewajɛ nyi mpəmte mbeli. Pa le Sawəl le wəzege ta ŋkɛ Zhonatan kempə.»

⁵Ma ke David shɛ zhɛkwa: «Tsema ɗepe na nahe yɛ Sawəl le Zhonatan kempə wa?»

⁶«'Ya dzeme ɗa dzeme ghəa ghweme ta Gilbowa gəmə gəmə ke mempɛhweta shɛ. Nda nakɛ Sawəl 'ya medɛŋe te megha ta ŋkɛ, terasle yɛ ka gədəwəa yɛ wəmata gədəwə le yɛ ka gədəwə yite.

⁷Pa zhɛrete geva, nakɛ ɗa ba'a hekakɛ ɗa. Ma 'ya zhɛnete nda: Maze yawe.

⁸Pa 'yɛwete va 'ya nde wa nde wa 'ya. Ma 'ya zhɛnete nda: Nde Amalɛk 'ya.

⁹Ma ke sha 'ya: Nde peslekɛ ɗa. Ya kwela nza 'ya mba te ghweme ne, kafefa mte 'ya mbe geva ta ɗa.

¹⁰Pa 'ya hendave nda geva ba'a peslekɛ ŋkɛ, kwa nza ŋkɛ nahe 'ya keɗepe kaɗema ŋkɛ kanzate nza teghweme va ɗa nya ɗate ŋkɛ mbeli. Kwa sebe ta ŋkɛ gɛ nde sleke ɗa, pa 'ya kelete derə meghea ŋkɛ ba'a takase mɓəa ŋkɛ. Pa 'ya fəke ŋa hɛ teke.»

¹¹Pa David ŋkwahemte lekwesa ta ŋkɛ, tsagha shɛ menete mbeli nyi tagha yite.

¹²Pa va tɛhwɛɗi hɛ kanehwene kamene səwəmayɛ mbe nehwene ta Sawəl, le Zhonatan le kweci pɛtɛa ka Israyɛl, nyi kambelia Mahwətə, nyi kempə kwamte mpa.

¹³Ma ke David sha mempɛhweta nya kekeleke nda ghena: «Nde wa na wa?» Ma ke zhɛnete: «'Ya ne, nde Amalɛk nya te hɛɗi nya le nza 'ya.»

¹⁴Ma ke David sha lewela: «Ashɛ na kese kaghazlənə va pesle mɛsi nya ntave Mahwətə wəka!»

¹⁵Pa hekakɛ kwete mempɛhweta hwa ka sewajɛa ŋkɛ kandeke nda hweŋkwa: «Kwiɗi peslekɛ!» Pa sewajɛ peslekɛ nde Amalɛk,

¹⁶ma ke David shɛ: «Va fete ta ŋa mte na. Gha nde ndeke nda fete ke ghəa ŋa, ma pa na gezete: Ya nde peslekɛ meghe nya ntave Mahwətə.»

¹⁷Pa David ghate nehwene gela yitea Sawəl ba'a yitea Zhonatan wəzege ta ŋkɛ.

¹⁸Pa ŋkɛ ndeke nda hweŋkwa ke mbeli nyi te hɛɗi Zhəwda kateke nda ke hɛ. Gheŋkɛ ya “kaNehwene yitea Rəgi”. Kerafe rafe ŋkɛ mbe “Palepa ta Wəndə nya tiɗiɗi”.

¹⁹Israyɛl, tewəmbəreke wa mpənji ka katsala kɛfia ŋa, mbeli kempa ta ŋa nyi nza zləvə te, ɓeɓelayɛ hɛ pelɛ ghəa ŋkwa wa?

²⁰Zlapema ghena nya na dzeyi mbe meleme ta Gat ma, peslema yɛ dzeyi kwa hweŋkwa ta Askalon. Ɗema zlama shɛ va mia ka Filisti, ɗema ŋwalea kwɛa ka slama mɓɛta nyi kamene farefa.

²¹Ghweme ta Gilbowa, pa mɛnɛ fɛake ŋa geva, mba va keme kənəa gheyɛ, yagha mbeli kanakɛ wəve nya mene wəshi megela mbe te hɛɗia ŋa. Te ŋkwa shɛ vate geva hawe te yɛ geləa ka katsala kɛfi, kezhɛne geləa Sawəl kafikɛ geva le n'yi we.

²²Te kema ta ka ghema kezha mpə hɛ, te kema ta ka ghema nyi berete berete, kazhɛre geva rəgia Zhonatan dzeyi te sebe we, kafayɛa Sawəl ne, slene ta ŋkɛ yamene ŋkɛ shanda.

²³Mbe nza ta nci teghweme ne, kwele kwele ɗe ghəa nci yɛ Sawəl le Zhonatan, mbe mte ta nci perə ne, keneheve geva hɛ we. Wɛrewɛ ma hɛ ke yɛ zele, ghyana ma hɛ ke yɛ nivɛrə!

²⁴Mi nyi te hɛɗia ka Israyɛl, nehwene mə yitea Sawəl! Nahe ŋkɛ keseɗaghe ŋayɛ lekwesa nyi ndeɗe ndeɗe, nahe ŋkɛ kepesakɛ ŋayɛ lekwesa ta ŋayɛ le wəshi kepesa geva nyi le mze kwa tere tere.

²⁵Va wa mpənji ka katsala kɛfi mbe tepe ta mpa wa? Zhonatan kemte pelɛ slərə, wa raberə wa?

²⁶Viɗi wənəa ɗa va ghena kwa ndiremi tewəmbəreke gha, wəza meyɛ ɗa Zhonatan, gha ya kamcɛ ɗa ganyɛ. Nahe mene mcɛ le gha kese za ma ke ɗe ta male.

²⁷Tewəmbəreke wa mpə hɛ wa, ka ghyana kempa, Tewəmbəreke wa zamte geva hɛ wa, ka sewajɛ nyi jama jama nyi?