Read kapsiki 2 Saməyɛl 10 Bible Online

2 Saməyɛl 10 - kapsiki bible

2 Saməyɛl 10

¹Ma temə kwa sebe ta ŋkɛ ne, pa meghea ka Amon mte, pa wəzege te ŋkɛ Hanəwn kelete meghe ta ŋkwa ŋkɛ.

²Ma ke David: «'Ya katemene nda ganyɛ 'ya ke Hanəwn kala yitenyɛ Nahash, kala nya menete ɗa yitenyɛ perə.» Pa ghwenakɛ kweci hwa ka mene slene ta ŋkɛ kanjiŋwe Hanəwn va mte ta yitenyɛ. Ma kwa ntsehe mbelia jama ta David te hɛɗia ka Amon ne,

³ma ke mbeli nyi te ghə mbe Amon sha Hanəwn, nde sleke hɛ: «Ma zəzə na ne, deke kezha vate zləvə te yiteyɛ ŋa ba'a kezha njiŋwe ŋa va mte ta ŋkɛ ghweneke mbelia ŋkɛ David na? Ashɛ kezha newe ŋkwa yitea meleme ta ŋa shɛ hɛ mbe dzeghwa mbe kezha kelehwe te kwete hɛ wəka?»

⁴Pa Hanəwn keseve ka mene slene ta David, pa ŋsəmte kweci bela ta ghwɛmɛa nci, slamte lekwesa ta nci ghala zeweve ba'a ŋkamte hɛ.

⁵Pa mbeli gezete nda ke David. Pa ghweneghe mbeli kabegeme le ka mene slene ta ŋkɛ, kwa nza hɛ shiwə va hawe. Ma ke maze sha hɛ: «Ntishɛ ŋayɛ mə mbe Zhɛriko nda pese ghwɛmɛa ŋayɛ nda nza yɛ kase teke.»

⁶Nahe ka Amon keɗepete nahe wənəa David keɗema wəsəa shɛ. Pa hɛ pave ka sewajɛa ka Siri 20.000 se mbe Bɛt-Rehob le ŋa ka Soba, slibə zhili ŋa meghea ka Ma'aka, 12.000 ŋa ka Tob.

⁷Ma kwa fate David ne, pa ghwenakɛ wəndə kwelea ka sewajɛ, Zhowab ba'a ka sewajɛ nyi berete berete pɛtɛ kalə kadzete ŋkwa shɛ.

⁸Pa ka Amon lə kezha pa geva yitea mpa mɛa degha ta meleme. Nahe ka Siri nyi mbe Soba ba'a nyi mbe Bɛt-Rehob, tsagha ka sewajɛ ka Tob ba'a ŋa ka Ma'aka kenzanji te kwete ŋkwa tekeleke kwamte.

⁹Nahe Zhowab keɗepete bake veyi nda ghwa mpa mbeli, te kema kwete kwa sebe kwete. Pa tsehave ka sewajɛa ka Israyɛl nyi za ma kaveyi hɛ kwa kema ta ka Siri.

¹⁰Pa ŋkɛ ndeke nda nyi ketene ka sewajɛ ke wəza meghekɛ Abishay kaveyi hɛ kwa kema ta ka Amon.

¹¹Ma ke sha wəza meghekɛ: «Ma kendakɛ ɗa berete ka Siri ne, nda se na kaya ɗa. Ma nda ka Amon ndakɛ ŋa berete ne, 'ya nde telə kaya ŋa.

¹²Ncɛte nda ghəa ŋa kawəndə nya ghyana ke mbeli, mpa kala katsala kezha hwelefe ta ɓəmə ba'a meleme ta Shala ta ɓəmə, nda temene Mahwətə kala nya nakɛ ŋkɛ megela.»

¹³Pa yɛ Zhowab le ka sewajɛa ŋkɛ lə yitea mpa le ka Siri, pa hɛ hwɛnji te kema ta ŋkɛ.

¹⁴Ma kwa nakɛ ka Amon nahe ka sewajɛ kehwɛnji ne, pa hɛ hwɛnji le ghəa nci kwa kema ta Abishay ba'a dzembenji mbe meleme ta nci. Tagha gɛ, pa Zhowab zhɛneke geva sheke kwamte mpa le ka Amon ba'a zhɛneghe geva kadzembe Zhɛrəzalɛm.

¹⁵Ma kwa nakɛ ka sewajɛa Siri nyighɛ na ka Israyɛl keɗate hɛ ne, pa hɛ jikəte berete ta nci kanya kwetɛŋe.

¹⁶Pa Hadadɛzɛr ghwenakɛ mɛ katsene ka Siri, pa le nyi pelɛ kwete kema ta hələa Efrate. Pa hɛ se kadzembe Hɛlam. Shobak ya kawəndə kwelea ka sewajɛa Hadadɛzɛr, te ghəa nci.

¹⁷Pa David fate. Pa tsenete ka sewajɛa ka Israyɛl, kajive te Zhəwrdɛŋe hwa'a mbe Hɛlam. Pa ka Siri dzawa ghwa mpa yitea David. Ntake hɛ kampa.

¹⁸Ama pɛtɛ hɛ hwɛnji va ka Israyɛl. Pa David le mbelia ŋkɛ mpəmte hwa hɛ gwəmsə mberefaŋe nyi te kema ta gədəwə 40.000 ka gədəwə. Pa hɛ ɗamte Shobak, wəndə kwelea ka sewajɛ le zhi, pa ŋkɛ mtenyɛ tagha.

¹⁹Ma kwa nza ŋkɛ pɛtɛ ka Israyɛl keɗate ka meghe nyi kese mbe dzeve ta Hadadɛzɛr, pa hɛ kesete mcɛ le ka Israyɛl. Mba ka Siri kashɛ kemane ka Amon we.