Read kapsiki 2 Saməyɛl 12 Bible Online

2 Saməyɛl 12 - kapsiki bible

2 Saməyɛl 12

¹Pa Mahwətə ghwenakɛ nde mɛ ŋkwa Natan kalə sha David. Pa Natan dzeki sha meghe, ma ke shɛ: «Ma mbe kwete meleme ne, bake mbeli mbe: nde mcɛlə kwete nde titikwə kwete.

²Kwele kwele sla le timɛti va nde mcɛlə nyagha.

³Ma nde titikwə nyagha ne, deke zhɛgwəa temə kwetɛŋe ya ve nahe nya pave ŋkɛ. Kazeme nda wəshi kezeme, kakele ki ghɛa ŋkɛ kala ŋwalea ŋkɛ. Kazeme wəshi nyi kwetɛŋe ba'a kasa wəsə nya kwa kwalekwə nya kwetɛŋe nde le, kahɛ nde yite. Kala wəzha ta ŋkɛ nza ta ŋkɛ.

⁴Ma te kwete hɛ ne, pa mentiɓə seke nda se ke nde mcɛlə nyagha. Pa ŋkɛ ɗema kese wəsə hwa wəshi keseɗa ta ŋkɛ kezha hene nda. Ama pa kelehwe daɓa təməa nde titikwə kezha hene nda ke mentiɓəa ŋkɛ.»

⁵Kwele kwele zhɛte nda wənəa David va wəsə nya menete nde mcɛləa shɛ. Ma ke sha Natan: «Te sləa Mahwətə nya le mpi ne, gare mte wəndəa shɛ!

⁶Ma kwa menete ŋkɛ kala nya kaɗema kese kazhɛ heli ne, pa ŋkikɛ daɓa təmə nya ghərəhwe nya ŋkɛ le daɓa lɛmə wəfaɗe.»

⁷Ma ke Natan shɛ: «Wəndə nya kemenete kala nya ne, gha. Wa nya ghena nya gezete Mahwətə nya, Shala ta ka Israyɛl: Nahe 'ya keveyi ŋa kamaze mbe Israyɛl. Nahe 'ya kembelete ŋa va ɗa ta Sawəl.

⁸Pa 'ya veyi mbelia nde sleke ŋa Sawəl mbeyitere berete ta ŋa. Pa 'ya fəave ŋa mia ŋkɛ mbe dzeve. Pa 'ya ndeke ŋa mbelia ka Israyɛl le ka Zhəwda kasleke na. Ashɛ wərə wəka? Wərə 'ya kamenete za ma ke nyi ɓiyitsa kezha gha.

⁹Yitea wa shifəmte ɗa na kwa menete wəsə nya ɗema 'ya na wa? Pa na peslekɛ Əwri nde Hɛt, gha nde menete kezha peslekɛ ka Amon, pa na wəmehwe male ta ŋkɛ.

¹⁰Ma tsetse ŋkɛ gɛ, slə te veci nya, kakiɗi ndiremi ki ghɛa ŋa we, kwa nza ŋkɛ nahe na keŋ'wəshikɛ ɗa laka kele male ta Əwri kamale.

¹¹Fate megela ghena nya geze ŋa 'ya: Katekele ndiremi 'ya kase kadzeghəa gha, te tepe ta ghɛa ŋa. Katekele mia ŋa 'ya kave nda ke kwete hwa ka menəhɛ ŋa kwa ntsə ta ŋa, kaɓelahe ŋkɛ le hɛ kateɗepe mbeli pɛtɛ.

¹²Kwa nza ŋkɛ wəsə nya menete na te wəfərə, katemene 'ya heveci, kanewe newe pɛtɛa ka Israyɛl.»

¹³Ma ke David sha Natan: «Nahe 'ya kemenete jaɗafa kwa kema ta Mahwətə, nahe 'ya keɗepete.» Ma ke Natan shɛ: «Ma nda tsetse ŋkɛ ne, kakelemte ŋa jaɗafa ta ŋa Mahwətə te wənə. Kamte na we.

¹⁴Ma mbe wəshi nyi pɛtɛ ne, tsape tsape bezemte nda ghena na ke Mahwətə. Vatse wəzege ta ŋa nya kwateya nya ne, katemte ŋkɛ.»

¹⁵Pa Natan zhɛneghe geva sha ghɛa ŋkɛ. Pa Mahwətə vate zereghwe te wəzege nya yake David hwa Bacɛba male wedea Əwri.

¹⁶Pa David səkwəte Shala kezha wəzegea shɛ. Ntake ŋkɛ kamene səwəmayɛ, ma kwa dzeki ghɛa ŋkɛ ŋkɛ heviɗi ne, hwa hɛɗi ɓelahe ŋkɛ.

¹⁷Pa mbeli nyi jama jama ki ghɛa ŋkɛ kampi nda dzeve kezha satenyɛ ŋkɛ ne, kaɗe ŋkɛ we, pa le wəsə kezeme ɗema ŋkɛ zeme le hɛ.

¹⁸Ma te kwa keɗaŋe ta hɛ mbe shikwə ne, mtiwə wəzege. Keɗe ka mene slene kancɛ nda ke David we, ma ke hɛ: «Mba wəzege le mpi, kaɗe meghe kafa ghena ta ɓəmə we. Tsema ncɛ nda mte ta ŋkɛ mə wa? Katemene wəsə kwa ndiremi ŋkɛ!»

¹⁹Ma fa David ne, mbe ŋwashɛ ŋwashɛ hɛ kwelɛ hɛ, na keɗepete wəsə nya kemenete geva. Ma ke 'yɛwete va hɛ: «Nahe wəzege ta ɗa shɛ kemte na?» Ma ke hɛ zhɛnete: «E'e, nahe ŋkɛ kemte.»

²⁰Pa David satenyɛ hwa hɛɗi, pɛkɛ pɛ, menate 'wərdə te geva ba'a mbeɗete lekwesa. Pa ŋkɛ dzembe ghɛa Mahwətə kezha hawe ve. Ma kwa se ŋkɛ kadzeki ghɛa ŋkɛ ne, pa gezete nda ke mbeli kamene nda wəsə kezeme, pa zehwe.

²¹Ma ke ka mene slene ta ŋkɛ 'yɛwete ve: «Meghe yawe, wa yaɗe wəsə nya menete nya na kancɛ wa? Ma kwa nza wəzege ta ŋa mba le mpi ne, kamene səwəmayɛ na, kanehwene na, ma tsetsenya nahe ŋkɛ kemte ne, pelɛhetɛme na sate, ntake kazeme wəsə!»

²²Ma ke David: «E'e tsagha shɛ, ma kwa nza wəzege ta ɗa teghweme ne, nahe 'ya kemenete səwəmayɛ kanehwene, ma 'ya sha ŋa ɗa: Wa nde ɗepe wa? Nda kwete kazhɛakɛ heli Mahwətə yitea 'ya ba'a kasərəakɛ wəzege ŋkɛ le mpi.

²³Ma nahe ŋkɛ kemte tsetsenya ne, yitea wa mene səwəmayɛ 'ya wa? Mba 'ya kazhɛnahwe mpi hwe tɛape we! 'Ya nde telə shɛ, gheŋkɛ nde tese sha 'ya we.»

²⁴Pa David lə kagweɗakwe nda wənə ke male ta ŋkɛ Bacɛba, pa ɓelahe le. Pa yake wəzege teza, pa David hekate nda slə kaSalomon. Kaɗe wəzegea shɛ Mahwətə,

²⁵pa gezete nda ke David laka nde mɛ ŋkwa Natan. Ma tewəmbəreke ɗea shɛ ne, pa Natan hekate nda slə ke wəzege kaYedidiya, geze ta ŋkɛ, “Nya ɗehwe Mahwətə”.

²⁶Ma mbe nyagha vəa shɛ ne, na meghea ka sewajɛ Zhowab kehave nda mpa ke Raba, meleme nya wəba ta ka Amon, pa kelehwe ghedəkwə nya nza meghe mbe.

²⁷Pa ghwenakɛ nda mɛ ke David: «Nahe 'ya kendeke nda mpa ke Raba. Nahe 'ya kekelehwe ghedəkwə nya nza yɛmə mbe.

²⁸Ma tsetsenya gɛ, se mə le nyi ketene ka sewajɛ kanza mbe meleme kezha kele na le ghəa ŋa. Keɗe 'ya kakele nda nza zləvə pɛtɛ te 'ya we.»

²⁹Pa David tsenete ka sewajɛ nyi ketene, se kezha ha nda mpa ke Raba ba'a kelehwe ŋkɛ.

³⁰Pa ŋkɛ kelete derə meghe nya mbe ghəa wəsə nya ŋate ka Amon kashala Molɛk. Ma derə meghe mze kwa tere terea shɛ ne, gare mahekenemsə kiləwəa ŋkɛ, le pelɛ nya nza zləvə te menete geva ŋkɛ, pa mbeli veyi ŋkɛ te derə meghea David. Kwele kwele kweci wəshi nyi fəke hɛ se mbe melemea shɛ.

³¹Ma mbeli nyi mbe meleme ne, pa David fəte hɛ kaka mene slene nya keɗema le ɗe ta nci: kapesle pelɛ ba'a katsehe, kampə wəfe, kamene wəshi kempa brəki. Tsagha shɛ menete ŋkɛ le kweci meleme ta ka Amon pɛtɛ. Pa David le ka sewajɛa ŋkɛ pɛtɛ zhɛneghe geva kase kadzembe Zhɛrəzalɛm.