Read kapsiki 2 Saməyɛl 14 Bible Online

2 Saməyɛl 14 - kapsiki bible

2 Saməyɛl 14

¹Zhowab, wəzege ta male nya heka mbeli kaSerəwya, na keneweve za ma vate zəzə meghe David te Absalom ɓiyitsa.

²Pa ghwenakɛ ŋkwa kadzawa Tɛkowa kaheka kwete male kentsehwele ntsehwele, ma ke shɛ: «Pa na menete ghəa ŋa kala wəndə nya mte wəndə ve: kateseɗe lekwesa nehwene na, katemene 'wərdə na te geva ta ŋa we, katezhɛre ghəa ŋa na kala male nya ketemə kanehwene wəndə.

³Katelə na sha meghe ba'a kategeze nda wəsə nya tencɛ ŋa 'ya na.» Pa Zhowab ncɛte nda ghena nya tegeze nde.

⁴Pa malea shɛ se kwa kema ta meghe. Kwelebəhə hwa hɛɗi, ntiŋə ghə mbe hɛɗi, kɛake sha lewela: «Kemanakɛ ɗa meghe!»

⁵Ma ke meghe shɛ: «Wa ghena nya te gha wa?» Ma ke zhɛnete: «Meghe yawe, male wede 'ya, nahe za ɗa kemte.

⁶Ŋwale bake ya va 'ya. Pa hɛ mpate mpa kwamte, pa kwete peslekɛ kwete, kwa ɗema wəndə kenehe hɛ shɛ.

⁷Pa pɛtɛa mbeli nyi kwa pelə tseneyite geva yitea 'ya, ma ke hɛ sha 'ya: Ndeke n'yɛ wəndə nya kepeslekɛ ŋkwa. Ghen'yɛ kapesle ŋkɛ kezha wa wəza meghekɛ, tsagha ne, ghen'yɛ kateza nde zeme ghɛ. Ma kala nya ŋkɛ ne, gwəfə ghə nya ketene va 'ya ɓɛhwɛ yaɗe hɛ kazamte, bətə sebe te hwelefe te za ɗa te teghweme teke te hɛɗi.»

⁸Ma ke meghe shɛ: «Kwiɗi ŋa kajɛghɛ. Kategeze nda ghena 'ya ke mbeli te ghəa ŋa.»

⁹Ma ke male: «Meghe, ya tsema tsema temene geva ŋkɛ, nahe ghen'yɛ kehite geva le mbelia ɗa 'ya le ghəa ɗa, kanza ghena shɛ kwa ghəa n'yɛ. Mba nde kenza kənəa gha, ya kənəa meghea ŋa.»

¹⁰Ma ke meghe: «Ma keghakɛ ŋa wəndə le ghena shɛ ne, pa na keleke ɗa teke! Mba kazhɛne kaghakɛ ŋa we!»

¹¹Ma ke malea shɛ zhɛkwa: «Megela ma meɗeyi ɗa meɗe mɛ meghe le sləa Shala Mahwətə ta ŋkɛ, mba wəndə nya ketewa mte ta wəzege ta ɗa kamte kembakete ɗa mte. Yagha ŋkɛ kakeɗaŋemte nya ketene wəzege ta ɗa.» Ma ke meghe: «Le sləa Mahwətə nya le mpi, kazeme ŋa fela 'ya, ya shintia ghəa wəzege ta ŋa kwetɛŋe ne, kateɗe te hɛɗi we.»

¹²Ma ke malea shɛ: «Pelave ɗa hweŋkwa gezete ghena 'ya zhɛkwa meghe.» Ma ke zhɛnete: «Geze!»

¹³Ma ke malea shɛ: «Wa raberə nda menete nda wəsə nya wale wale na mbelia Shala wa? Kala nya gezete nya na tsetsenya, ma tsagha ne, gha nde ndeke nda fete ke gha ŋa, kwa ɗema na kekeleke Absalom se te meleme nya ŋkeyi mbeli mbe.

¹⁴Kaganda ne, katempə gheɓəmə te kwete veci. Katenza gheɓəmə kala yɛmə nya kesheke geva te hɛɗi nya zhɛnema mbeli kazhɛneke ŋkɛ. Ama kenza ŋkɛ kawəsə nya ve nda Shala tsetsenya ke Absalom we. Nahe ŋkɛ kemenete zəzə kezha ɗema Absalom kanza cakeɗake le.

¹⁵Meghe, ma nda se 'ya kase kagezete ŋa kala nya ne, mbeli dakemte ɗa. Vatse geze 'ya: ‹Gezete nda 'ya ke meghe. Nda kwete katemene wəsə nya gezete kwatera ta ŋkɛ ŋkɛ,

¹⁶kateyɛ ŋkɛ kampa le wəndə nya keɗe kazamte n'yɛ, wəzege ta ɗa ba'a 'ya perə, te hɛɗi nya ndeke nda Shala ke mbelia ŋkɛ.›

¹⁷Ya, Maze yawe, ma wəsə nya zəzə 'ya: ‹Ma wəsə nya gezete meghe ne, kategweɗakwe ɗa mehele ŋkɛ. Kwa nza ŋkɛ ne, kala nde ghwene ta Shala meghe, na keɗepe nehe wəsə nya ganyɛ le nya ndiremi.› Pa Shala Mahwətə ta ŋa nza le gha!»

¹⁸Ma ke meghe sha malea shɛ: «'Ya kate'yɛwe ghena kwetɛŋe va gha, pa na gezete ɗa mba na kewəfərə va 'ya.» Ma ke malea shɛ: «Gezete, meghe yawe!»

¹⁹Ma ke meghe shɛ: «Ashɛ Zhowab yatsate ghena nyi na le we?» Ma ke malea shɛ zhɛnete nda: «Kaganda nza meghe le mpi, kaganda ŋa ŋkɛ! Nde mene slene ta ŋa Zhowab nde gezave ɗa pɛtɛa ghena nyi gezete 'ya.

²⁰Ma nda menete ŋkɛ ne, kezha zhɛre ghena. Ama gha ne, pɛtɛ fa wəshi nyi kemene geva te hɛɗi na, kwa nza ŋkɛ keɗɛŋe ɗɛŋe na kala nde ghwene ta Shala.»

²¹Pa meghe geze nda ke Zhowab: «Nahe 'ya kezəzəte kamene kala nya zəzəte nya na. Kwiɗi zeleke mempɛhweta Absalom kase teke.»

²²Gwəɗəŋə Zhowab kwa kema ta meghe ntiŋə ghə mbe hɛɗi, ma ke tsate nda hana: «Nahe 'ya keɗepe tsetsenya na meghe kemenete ɗa ndeɗea mehele, kwa nza ŋkɛ na kayɛte mene wəsə nya zəzəte 'ya.»

²³Cape Zhowab kalə kadzembe Gɛshəwr. Pa keleke Absalom kadzembe Zhɛrəzalɛm.

²⁴Ma ke meghe: «Kwiɗi ŋkɛ kadzeki ghɛa ŋkɛ!» Mba ŋkɛ kese teke kwa kema ta ɗa! Ntəŋə Absalom kalə sha ghɛa ŋkɛ, kaɗema kese kwa kema ta meghe.

²⁵Mbe pɛtɛa ka Israyɛl ne, wəndə shɛ kandeɗe, kaɗe mbeli kala Absalom we: sawa pelɛghə pa kwa seɗa ne, kanakɛ ŋele na te we.

²⁶Keva keva sla shintia ŋkɛ ŋkɛ va ɗaŋeɗa. Ma kedzeghete shintia ŋkɛ mbeli: kwele ke kiləwə bake nza ŋkɛ.

²⁷Ŋwale tezhili mahekene ba'a kwetɛŋe wəzha makwa ya va Absalom. Sləa nya kawəzha makwa ne, Tamar, kendeɗe nda nde tsape tsape.

²⁸Va ta Absalom bake mbe Zhɛrəzalɛm kaɗema kese ki ghɛa meghe.

²⁹Ma te kwete hɛ ne, pa hekakɛ Zhowab kezha ghwene kalə sha meghe, pa Zhowab ɗema se shɛ. Pa ghwenakɛ nda wəndə kakwa bake zhigə, pa ɗema se zhɛkwa.

³⁰Ma ke Absalom sha ka mene slene ta ŋkɛ: «Nahe yɛ keɗepe wəvea megia Zhowab nya vare ŋa ɗa. Kwiɗi mə ndəyite mə ghwə yite!» Pa mbelia shɛhɛ menete kala ghena ta ŋkɛ.

³¹Te ŋkwa shɛnyɛ, pa Zhowab lə sha Absalom kageze nda: «Wa raberə nda ndəmte wəvea ɗa mbelia ŋa wa?»

³²Ma ke Absalom shɛ: «Kwa heka ŋa 'ya kase ne, pa na ɗema. 'Ya kaɗe kaghwene ŋa kalə sha meghe le ghena kala nya: ‹Wa ganyɛa slə ta ɗa mbe Gɛshəwr kase teke wa? Megela ma nza ɗa 'ya mbe sha 'ya! Tsetsenya tse gɛ, dzawa kema ta meghe yaɗe 'ya. Ma nda fete ya va 'ya ne, peslekɛ ɗa ŋkɛ!›»

³³Pa Zhowab lə kagezete nda ghena ta Absalom ke meghe. Pa meghe hekakɛ Absalom, pa ŋkɛ se le hwɛ kwelebəhə hwa hɛɗi, ntiŋə ghə mbe hɛɗi. Pa meghe həməwəve.