Read kapsiki 2 Saməyɛl 16 Bible Online

2 Saməyɛl 16 - kapsiki bible

2 Saməyɛl 16

¹Nahe David kezlakemte ghəa ghweme nda se Siba, nde mene slene ta Mefiba'al kabegeme le. Kwara lɛmə bake nyi nza ɗafa gwəmsə bake, dzeve ta ya ta rɛzɛŋe kwa ghwele ghwele gwəmsə, ya ta dasekwa gwəmsə ba'a slibə hweta ta tɛ te hɛ ya ve.

²Ma ke meghe 'yɛwete ve: «Wa yaɗe na kamene le nyi wa?» Ma ke Siba: «Maze, kadzeghwa mbelia ghɛa ŋa te kwara, yɛ ɗafa le ya ta wəfe ne, kazeme ka sewajɛa ŋa, tɛ ne, kasa mbeli nyi keleɓe te ɓerama.»

³Ma ke meghe: «Tema Mefiba'al shia nde sleke ŋa Sawəl wa?» Ma ke Siba: «Nahe ŋkɛ kentishɛnyɛ mbe Zhɛrəzalɛm, ma zəzə ŋkɛ ne, kateve nda meghea shinyɛ mbeli tsetsenya.»

⁴Ma ke meghe shɛ: «Yewə, 'ya ve ŋa pɛtɛa wəshia Mefiba'al.» Vəkwə Siba te hɛɗi, ma ke: «Ŋ'wese meghe yawe, kwa menete ɗa ganyɛ na.»

⁵Ma kwa ntsehe maze David takwa yitea Bahəwrim, pa Shimɛyi, wəzege ta Gɛra, nya kwa yita nya kwetɛŋe le Sawəl, shave mbe meleme, ntake kabezla David.

⁶Kabeza meghe le pelɛ le ka mene slene ta ŋkɛ, ya kwela nza mbeli kwele kwele tagha kadzeghwa laka bela kwa zeme ba'a bela kwa gwela ta meghe.

⁷Kabezla ŋkɛ katsa lewela: «Wəsə kwadanyɛa wəndə, slə teke, slə teke, nde mpə ŋkwa!

⁸Mahwətə kawa mbelia Sawəl nyi mpəmte na. Nahe na keghərəhwe meghea Sawəl, vatse ndeke nda Mahwətə ke wəzege ta ŋa Absalom. Gha tsetsenya gɛ ne, te yaka na kwa nza na kande mpə ŋkwa!»

⁹Ma ke Abishay nya heka meghekɛ mbeli kaSerəwya sha meghe: «Tsema bezla ŋa kelɛ nya kemte mte nya. Pelakɛ dzeyi 'ya slamte ghə te.»

¹⁰Ma ke meghe zhɛnete: «Abishay, wa yaɗe yɛ va 'ya le wəza meyɛ ŋa Zhowab wa? Ma nda bezla ɗa wəndə nya ne, Mahwətə nde ndeke nda hweŋkwa kabezla ɗa, wəndə shɛ kaghakɛ we.»

¹¹Ma ke David sha Abishay le yɛ ka mene slene ta ŋkɛ zhɛkwa: «Bandanyɛ tse, wəzege ta ɗa le ghəa ɗa nde zele pesle ɗa ne, kawəsə meŋele ŋkɛ kemene nde Bɛnjamɛn tsetse na? Sərəakɛ mə gweŋe! Bezla ɗa ŋkɛ, kenza nde na Mahwətə kendeke nda hweŋkwa.

¹²Nda kwete kanakɛ yaka ta ɗa Mahwətə ne, wərə ŋkɛ kazhɛrete bezla ta ŋkɛ kawəpi.»

¹³Mbe dzeghwa dzeghwa ta nci yɛ David le mbeli nyi kebeghe ŋkɛ kwa hweŋkwa, pa Shimɛyi hendakɛ geva ɓahwe le hɛ dzeme va ghweme. Mba wəndəa shɛ kabezla ŋkwa, kabeza hɛ le pelɛ ba'a kakərə hɛɗi shanda.

¹⁴Hwa'a yɛ meghe le mbeli nyi kebeghe ŋkɛ mɛa Zhəwrdɛŋe, leɓakwe hɛ ntishɛ kazhɛne mpi.

¹⁵Pa Absalom se kadzembe Zhɛrəzalɛm le mbelia ka Israyɛl kwele kwele kwa sebe ta ŋkɛ. Ahitofɛl perə ne, hɛ le.

¹⁶Ma kwa ntsehe Həwshay nde Ark, nde ncɛ nda ntsehwele ke David, takwa yitea Absalom ne, kɛake sha kaka: «Nza meghe le mpi! Nza meghe le mpi!»

¹⁷Ma ke Absalom shɛ: «Tsetse nza na dɛŋe dɛŋe te mcɛ ŋa David na? Wa raberə ɗema na beghe ŋkɛ wa?»

¹⁸Ma ke Həwshay shɛ: «'Ya ɗema, laka wəndə nya ntave Mahwətə le pɛtɛa ka Israyɛl kameghe. Yitea gha nza 'ya.

¹⁹Te kwa bake ta ŋkɛ, kave yayata wəndə 'ya kala nya mbe slene we. Ashɛ wəzege ta mcɛ ɗa na wəka? Kala nya se 'ya kamene nda slene ke yiteyɛ ŋa pa tsetsenya ne, gha yatene 'ya kamene nda ɓiyitsa.»

²⁰Ma ke Absalom sha Ahitofɛl: «Geze mə kwelɛ ghəa ŋayɛ wəsə nya temene mə.»

²¹Ma ke Ahitofɛl kahe kahe sha Absalom: «Kwiɗi kaɓelahe le mia yiteyɛ ŋa nyi sərəakɛ ŋkɛ kaya ghɛa meghe. Kazereghete yiteyɛ ŋa tsagha we, pɛtɛ tefa ka Israyɛl ne, mtsehe mtsehe nza berete ta mbelia ŋa tsagha.»

²²Pa mbeli menete cɛ lekwesa ke Absalom pelɛ ghəa ntsape ta cɛa meghe, kalə Absalom kaɓelahe le mia yitenyɛ, kanewe ka Israyɛl.

²³Ma vəa ŋkwa shɛ ne, nahe ghena nya gezete Ahitofɛl kenza kala ghena ta Shala le ghəa ŋkɛ. Tsagha ŋkɛ sha yɛ David le Absalom perə.