Read kapsiki 2 Saməyɛl 17 Bible Online

2 Saməyɛl 17 - kapsiki bible

2 Saməyɛl 17

¹Ma temə ɓɛhwɛ, ma ke Ahitofɛl sha Absalom: «Pelave ɗa hweŋkwa tsehave mbeli 'ya 12.000 kalə kazele David ɓeshi te viɗi nya.

²Ma vəa ŋkwa nya nza ŋkɛ leɓakwe ba'a keyirə yirə ne, katewəmbə ŋkɛ 'ya ba'a katedake ŋkɛ 'ya. Kwetɛ kwetɛŋe tenza mbeli nyi ketəkwə təkwə ŋkɛ. Tagha katepesle ŋkɛ 'ya vəa ŋkwa nya tenza ŋkɛ kwetɛŋenyɛ.

³Ma tsagha ne, pɛtɛ fə mbelia ŋkɛ 'ya kase sha gha. Va nya nza ŋkɛ ma kemte wəndə nya ɗe na kapesle, ma kemte ŋkɛ ne, pɛtɛ tese mbeli sha gha ba'a katenza mbeli le kwelɛŋe.»

⁴Ma newe ghena shɛ Absalom le yɛ mbelia jama ta ka Israyɛl ne, tiɗiɗi ŋkɛ.

⁵Pa Absalom ghwenakɛ ŋkwa kaheka Həwshay nde Ark perə, kezha fa ŋa ŋkɛ zəzə perə.

⁶Ma kwa se Həwshay ne, pa Absalom gezete nda wəsə nya dzeghakɛ Ahitofɛl kageze. Ma ke 'yɛwete ve: «Kehi hi mə kamene slene le ghena ta ŋkɛ na? Ma ewə pa ne, dzeghakɛ kwete.»

⁷Ma ke Həwshay sha Absalom: «Ma tsetsenya ne, kenza ntsehwelea Ahitofɛl megela we.

⁸Nahe na keɗepe yiteyɛ ŋa le mbelia ŋkɛ: zhili kempa ganji hɛ, keghwəyi ghwəyi mehele ta nci kala ŋemalea mtsekwele nya zanyɛ wəzege ta nta hwa gamba. Bandanyɛ ne, yiteyɛ ŋa wəndəa mpa ŋkɛ, kahɛ ŋkɛ jikə le mbeli we.

⁹Ma tsetsenya ne, tewəfərə ŋkɛ mbe kwete gezlɛŋə tse, keɗema te kwete ŋkwa. Ma ya wəndə ya shɛ te kwa ghate nya peslekɛ mbeli hwa mbelia ɓəmə ne, nza nahe ghena kese ne, ɗa ya te ka sewajɛa Absalom geze mbeli.

¹⁰Ya ka sewajɛ nyi ghyana ŋkɛ nyi nza wənəa nci kala ŋa nivɛrə ne, benake nza hɛ, wa nde Israyɛl nya keɗepema yiteyɛ ŋa kakatsala wa? Tsagha mbeli nyi nza hɛ le pɛtɛ ka katsala zhili.

¹¹Wa nya ghena nya ɗe 'ya kadzeghe nya: tsenete ka sewajɛa ka Israyɛl nyi te hɛɗia pɛtɛ, kwele kwele kala ndaleghe kwa hələ. Ntəŋə na le ghəa ŋa kadzemte mpa le hɛ.

¹²Katesləyi David gheɓəmə te ŋkwa nya nza ŋkɛ, nda gheɓəmə kadzeghə kala nya me mɛnɛ te hɛɗi. Kənə le ghəa ŋkɛ le mbelia ŋkɛ, ya kwetɛŋe katembele we.

¹³Ma kewəfərənyɛ ŋkɛ mbe kwete meleme ne, katefə yɛ zewe pɛtɛa ka Israyɛl kase ba'a katentsehe melemea shɛ mbeli kadzawa hələ nya dekwe. Tagha gɛ, katezhɛne mbeli kasləyi pelɛ kwetɛŋe te ŋkwa shɛ we.»

¹⁴Ma ke Absalom le Israyɛl: «Nahe hɛ kenakɛ ŋa Həwshay ntsehwele ganyɛ ma ke ŋa Ahitofɛl!» Kwa nza ŋkɛ ne, nahe Mahwətə kezəzəte kabezemte ntsehwele nya tiɗiɗi nya ncɛte Ahitofɛl, kezha ve ndiremi te Absalom.

¹⁵Pa Həwshay keleke nda ghena ntsehwele nya dzeghakɛ Ahitofɛl kancɛ nda ke Absalom, ke nde dzeghe Shala Sadok le Abiyatar kancɛte nda ke mbelia jama le ka Israyɛl, ba'a ŋa ŋkɛ zəzə le ghəa ŋkɛ.

¹⁶Ma ke zhɛkwa: «Tsetsenya gɛ ne, ntsə ɓəmə geva kaghwene nda mɛ ke David. Geze nda kezha ɗema ŋkɛ kahɛ te ŋwela ta Zhəwrdɛŋe. Nda ŋkɛ kajive te hələ, yagha mbeli kazamte ŋkɛ le mbelia ŋkɛ.»

¹⁷Yonatan, wəzege ta Abiyatar, le Ahimas, wəzege ta Sadok ya veyi mbeli mɛa hələ Ɛn-Rogəwɛl. Pa kwete nde mene nda slene ke hɛ kamale nya kekele ghena ta nci kalə sha meghe David. Mba hɛ kedzembe meleme yagha mbeli kanakɛ hɛ.

¹⁸Ama pa kwete mempɛhweta nakɛ hɛ pa gezete nda ke Absalom. Pa hɛ ntsəte geva kezha dzeghwanji. Pa hɛ dzeki ghɛa kwete wəndə mbe Bahəwrim. Ki ghɛa ŋkɛ ne, belageji ya ki pa hɛ dzawanji kawəfərənji.

¹⁹Pa male keghɛ kelete keshi dewe, pelakeyi ŋkɛ mɛa belageji ba'a beteyi ha te, yitea ɗema mbeli kanakɛ.

²⁰Pa mbeli nyi ghweneke Absalom ntsehe ki ghɛa malea shɛ, ma ke hɛ 'yɛwete ve: «Tema yɛ Ahimas le Yonatan wa?» Ma ke sha hɛ: «Nyi hɛ kedzeyi kwelɛ hələ.» Cape hɛ kazele hɛ ne. Ndɛare, pa hɛ zhɛnete geva kadzembe Zhɛrəzalɛm.

²¹Ma kwa dzeghwanji hɛ, pa yɛ Ahimas le Yonatan samenji kwa belageji kalə kancɛte nda ke meghe David. Pa hɛ gezemte nda ghena nya zəzəte Ahitofɛl, pa hɛ geze nda kawədə geva kahe kahe kajive te hələ.

²²Taghanyɛ cape yɛ David le mbeli nyi yite kajive te Zhəwrdɛŋe. Wakaka zeweve ta ghweme ne, pɛtɛ hɛ kejivenji ketene wəndə we.

²³Ma kwa nakɛ Ahitofɛl kaɗema mbeli keyɛte ntsehwelea ŋkɛ, pa vate serede te kwara ta ŋkɛ kazhɛneghe geva kadzembe meleme nya se ŋkɛ. Pa ŋkɛ gezave nda ghena ta ŋkɛ ke mbelia ŋkɛ, pa hwepeyi zewe yitea ghə ba'a peslekɛ ghəa ŋkɛ. Pa mbeli lamte kwa kwele ta yitenyɛ.

²⁴Nahe David kentsehe mbe Mahanayim nda tejive yɛ Absalom te Zhəwrdɛŋe le ka sewajɛa pɛtɛa ka Israyɛl.

²⁵Nahe Absalom keveyi Amasa kameghea ka sewajɛ te ŋkwa Zhowab. Amasa ne, wəzege ta kwete ŋkɛ nde Israyɛl sləa ŋkɛ Yɛtɛr, nya kewəmeve Abigal, wəzha ta Nahash wəzha ta meghekɛa Serəwya meghekɛa Zhowab.

²⁶Yɛ Absalom le ka Israyɛl ne, pa hɛ menete ghedəkwəa nci te hɛɗia ka Gala'ad.

²⁷Se ta ŋkɛ kadzembe Mahanayim, pa yɛ Shobi wəzege ta Nahash, nde Raba, meleme nya wəba ta ka Amon, le Makir, le wəzege ta Amiyɛl mbe Lo-Dabar, ba'a le Barzilay nde Rogelim mbe Gala'ad kemaneve.

²⁸Pa mbelia shɛhɛ fəke nda yɛ gezle, yɛ kwapɛ, yɛ dəghwə, ha, megi, hə, ha nyi kesere sere, yɛ tsə, yɛ tsə kwa gheme, yɛməa mze, mɛmre ŋ'wa, lɛwa ta ŋ'wa ta yɛ sla ba'a ŋa timɛti nyi fəke nda hɛ ke yɛ David le mbelia ŋkɛ. Kwa nza ŋkɛ ne, ma ke hɛ gezete: «Shewə hɛ va leɓe va ma ba'a ndere mbe dzeghwa ta nci te ɓerama.»