Read kapsiki 2 Saməyɛl 2 Bible Online

2 Saməyɛl 2 - kapsiki bible

2 Saməyɛl 2

¹Ma kwa sebe ta ghena shɛ ne, ma ke David 'yɛwakɛ va Mahwətə: «Lə ɗa 'ya kadzembe kwete hwa meleme ta ka Zhəwda na?» Ma ke Mahwətə: «E'e.» Ma ke David zhɛkwa: «Mbe nyama wa?» Ma ke Mahwətə shɛ: «Mbe Hɛbron.»

²Cape David le mia ŋkɛ bake, Ahinowam wəzha ta ka Zhizrɛyɛl, ba'a Abigayil, male kezeme ghɛa Nabal, wəzha ta ka Karmɛl.

³Pa David slə zlaɓe le mbeli nyi nza hɛ le yɛ mbelia nci, pa hɛ nza nci mbe meleme nya te ghedəkwə le Hɛbron.

⁴Pa mbelia Zhəwda se kadzembe Hɛbron kave David kameghea ka Zhəwda. Ma kwa gezete nda mbeli ke David na mbeli nyi mbe Yabɛsh, te hɛɗia Gala'ad kelamte Sawəl,

⁵pa ghwenakɛ mɛ, ma ke sha hɛ: «Pa Mahwətə wəpikɛ ŋayɛ va nya lamte Sawəl, nde sleke ŋayɛ yɛ ba'a nya se yɛ dɛŋe dɛŋe te ghena ta ŋkɛ.

⁶Pa Mahwətə ncɛte ŋayɛ zhɛ heli ba'a ganyɛ le ŋa ŋkɛ perə. Ma 'ya le ŋa ɗa ne, kamene ŋayɛ ganyɛ 'ya, kwa nza ŋkɛ nahe yɛ kemenete tsetse.

⁷Ma tsetsenya gɛ, ntsə mə geva nza mə kazhili nyi ghyana. Nahe nde sleke ŋayɛ Sawəl kemte, 'ya yanta ka Zhəwda kanza kamazea nci.»

⁸Pa Abnɛr, wəzege ta Nɛr, wəndə kwelea ka sewajɛa Sawəl ghweneghe Ishebal, wəzege ta Sawəl, kadzembe Mahanayim.

⁹Pa ŋkɛ tsaghe gaghwe kənəa meghe nya mbe hɛɗia Gala'ad, ŋa Asɛr, ŋa Zhizrɛyɛl, ŋa Ɛfrayim, ŋa Bɛnjamɛn, geze ta ŋkɛ, pɛtɛa ka Israyɛl.

¹⁰Ishebal, wəzege ta Sawəl ne, va wəfaɗemsə menete ŋkɛ nda dzete meghe ŋkɛ mbe Israyɛl ba'a kamenete va bake te meghe. Ama deke hwelefe ta Zhəwda nde ɗepe meghea David.

¹¹Pa David menete meghe te ka Zhəwda, mbe Hɛbron, kava mberefaŋe ba'a gasle yite.

¹²Abnɛr, wəzege ta Nɛr, nde ya Ishebal, wəzege ta Sawəl, pa slə mbe Mahanayim kakelete hweŋkwa ta Gabawon.

¹³Zhowab, wəzege ta Serəwya ba'a wəndə keya David, cape ŋkɛ kwa hweŋkwa perə. Pa hɛ begeme takwa yitea kwete ghwa ka Gabawon. Pa nya laka ke, pa nya laka ke hɛ yitea ghwa shɛ.

¹⁴Ma ke Abnɛr sha Zhowab: «Ma wəsə nya ɗe 'ya ne, pa ka sewajɛa ɓə nyi dzete mpa bake nci kwa kema ta ɓə.» Ma ke sha Zhowab: «Tsagha shɛ.»

¹⁵Pelɛhetɛme ka sewajɛ: meŋe bakeghəmbe kaŋa yɛ Bɛnjamɛn le Ishebal, wəzege ta Sawəl ba'a meŋe bakeghəmbe hwa ka mene slene ta David.

¹⁶Yayata sewajɛ kakese nde ghema ta ŋkɛ yitea ghə kabezate nda kafayɛ te slerepe nda bete hɛ kadzete ŋkwa kanya kwetɛŋe. Pa mbeli hekate nda slə ke ŋkwa nya mbe Gabawon shɛ kaWəve nya hwa gela.

¹⁷Te vecia shɛnyɛ, pa mpa menete geva ndiremike. Abnɛr le mbelia ŋkɛ ne, pa wəndə nya keya David hərəte hɛ.

¹⁸Tagha ŋwalea Serəwya mahekene Zhowab, Abishay le Asayɛl. Asayɛl shɛ ne, wɛre wɛre seɗa yite kala kɛme.

¹⁹Tereŋe Asayɛl yitea Abnɛr kwa zhɛrema geva ya te kwa gwela, ya te kwa zeme.

²⁰Pa Abnɛr zhɛrete geva, ma ke 'yɛwete ve: «Gha na Asayɛl?» Ma ke zhɛnete nda: «E'e, 'ya ŋkɛ.»

²¹Ma ke Abnɛr shɛ: «Keka kwete wəndə, te kwa zeme keɗema te kwa gwela. Keseve kwete wəndəa ka sewajɛ nyi kezha fəhwe wəshi kempa ta ŋkɛ na.» Ama kaɗe Asayɛl kaslə kwa sebe ta ŋkɛ we.

²²Ma ke Abnɛr shɛ zhɛkwa: «Asayɛl, slə ŋa kwa sebe ta ɗa! Yitea wa ŋka ɗa na le berete yitea pesle ŋa wa? Kashɛ 'ya tenewe wəza meyɛ ŋa Zhowab kwa kema ta ɗa we.»

²³Pa Asayɛl ɗema zhɛre geva. Kape Abnɛr sha megha mbe hwə ve petekwe pelɛke te wəmbə, kwəpe ŋkɛ teɗenyɛ ba'a mtiwə ŋkɛ taghanyɛ. Pɛtɛa mbeli nyi laka ŋkwa nya mte Asayɛl ne, kaghereŋe hɛ.

²⁴Tereŋe yɛ Zhowab le Abishay kakeka Abnɛr. Nahe veci kepəkwə nda ntsehe hɛ kwa Gibɛya-Ama laka same ta veci yitea Giya kwa hweŋkwa ta ɓerama ta Gabawon.

²⁵Tsene ka sewajɛa ka Bɛnjamɛn sha geva yitea Abnɛr, kantəsləte ghəa ghweme.

²⁶Ma ke Abnɛr sha Zhowab: «Mpa shɛ yatempa mə kajive kajive kezha zamte ghə ɓəmə na? Keɗepe na ndiremike tekiɗi ŋkɛ wəka? Wa yaneghe na nda ɗema fɛake ka sewajɛa ŋa kekeka ka menəhɛ nci wa?»

²⁷Ma ke Zhowab: «Te sləa Shala nya le mpi, ma keɗema na kezlapete kala nya kezha sərə mpa ne, nza pa va masheke hendɛ nza mpa.»

²⁸Pa Zhowab vɛte kwelɛghə, pa ka sewajɛa ŋkɛ sərəakɛ keka ŋkwa, nahe mpa.

²⁹Pa yɛ Abnɛr le mbelia ŋkɛ kiɗimte viɗia shɛ kadzeghwa kwa zlərəa Zhəwrdɛŋe, pa hɛ jivenji te hələ, zlakemte Bitron ba'a ntsehe mbe Mahanayim.

³⁰Ma kwa sərəakɛ keka Abnɛr Zhowab, pa ŋkɛ tsenete mbelia ŋkɛ. Deke mbeli meŋe meslighəmbe ba'a Asayɛl nde ɗema hwa mbelia wəndə nya keya David.

³¹Ama mbeli nyi keya David ne, zhili gwəmsə mahekene ba'a ŋkwaŋemsə mpəmte hɛ hwa ka Bɛnjamɛn le kweci sewajɛa Abnɛr.

³²Pa mbeli keleke wəndə kemte mtea Asayɛl kalamte kwa kwele ta yitenyɛ kwa Bɛtelɛhɛm. Kwa sebe ta ŋkɛ, hwencɛke ncɛke yɛ Zhowab le mbelia ŋkɛ kadzeghwa, hwa'a hɛ mbe Hɛbron yipə le kiɗi ta ŋkwa.