Read kapsiki 2 Saməyɛl 20 Bible Online

2 Saməyɛl 20 - kapsiki bible

2 Saməyɛl 20

¹Le kwete wəsəa kwadanyɛa wəndə tagha mbe Gilgal, nde Bɛnjamɛn sləa ŋkɛ Shɛba, wəzege ta Bikri. Pa ŋkɛ vɛte veke, ma ke tsate lewela: «Wəsə ketsakɛ n'yɛ shɛ le David we, wəsə shɛ kejikəte n'yɛ le wəzege ta Zhɛsɛ we! Ka Israyɛl, zhɛne geva yayata wəndə kalə sha ghɛa ŋkɛ!»

²Pa ka Israyɛl slənji yitea David kezha təkwə təkwə Shɛba, tene deke ka Zhəwda kabeghe meghe slə mbe Zhəwrdɛŋe kadzembe Zhɛrəzalɛm.

³Sema ta ŋkɛ kadzeki ghɛa meghe ne, ntake meghe kazele mi meghwa ta ŋkɛ nyi sərəakɛ ŋkɛ meŋe kezha ya ghɛa meghe. Pa beteyi hɛ ki kwete ghɛ kaya hɛ megela le wəshi kezemea nci, ama ashɛ kaɓelahe le hɛ we. Mba hɛ kala ka wedidi, ya tsema nza za nci teghweme.

⁴Ma ke meghe sha Amasa: «Tsenete ka sewajɛa ka Zhəwda! Nahe 'ya kendeke ŋa hɛ mahekene kase na le hɛ teke kwa kema ta ɗa.»

⁵Pa Amasa lə kamenete ghena nya gezete nda meghe, ama pa zlakemte hɛ nya ndeke nda meghe.

⁶Ma ke David sha Abishay: «Ma tsetsenya ne, dzawe ma tenza ndiremia Shɛba ke Absalom. Kwiɗi kanza kawəndə nya wəba te ghəa ka sewajɛa ɗa le ghəa ɗa, zelete ŋkɛ tewə ŋkɛ kenaka kakemave ŋkwa mbe meleme kwa berete ba'a kambelenyɛ va gheɓə.»

⁷Ma ka sewajɛ nyi va Zhowab, le ŋa ka Krɛte ba'a ŋa ka Pɛlɛt nyi keya ghɛa meghe, geze ta ŋkɛ ne, pɛtɛa ka sewajɛ nyi gare mpa, cape hɛ le Abishay. Pa hɛ slə mbe Zhɛrəzalɛm kazele Shɛba.

⁸Pelɛ hɛ takwa yitea gela nya wəba ta Gabawon. Ma nda ntsehe Amasa ne, nahe Zhowab kehwepemte geva le lekwesa sewajɛa ŋkɛ, le hətə hwa hwə zleŋgeɗe kafayɛa ŋkɛ ve mbe kwəɓə hwa hwə. Ma kadzeghwa Zhowab, pa kafayɛ teɗenyɛ.

⁹Ma ke Zhowab sha Amasa: «Tsema na wa wəza meyɛ ɗa?» Pa keseve ghwɛmɛa Amasa le dzeve kwa zeme kezha həməwə ŋkɛ.

¹⁰Kese Amasa kave zəzə te kafayɛ nya kelete Zhowab le gwela we. Tɛapa'a ŋkɛ shɛ te hwə ve. Ŋweyɛ helia Amasa te hɛɗi, mtiwə ŋkɛ kaɗema Zhowab ken'yikɛ ŋkɛ kakwa bake zhigə. Kwa sebe ta ŋkɛ cape yɛ Zhowab le wəza meghekɛ Abishay kazele Shɛba.

¹¹Pa kwete sewajɛa Zhowab ghereŋenyɛ kənəa wəndə kemte mtea Amasa, ma ke: «Ka mcɛhɛnyɛ Zhowab le mbeli nyi kaŋa David ne, pa hɛ katəkwə təkwə Zhowab!»

¹²Pa Amasa təŋwələŋwəahwe geva mbe mimia ŋkɛ kwa hweŋkwa. Ma newe ke sewajɛ ne, nahe yayata wəndə keghereŋe. Pa ŋkɛ kelemte wəndə kemte mte kwa hweŋkwa ba'a veyi ŋkɛ mbe kwete wəve, pa vaghe lekwesa kənə.

¹³Ma kwa menete ŋkɛ kala nyagha ne, ŋkeɗe ka sewajɛ kwa sebe ta Zhowab, kakeka Shɛba.

¹⁴Pa Zhowab zlakemte hɛɗia pɛtɛa ka Israyɛl kakekave meleme ta Abɛl-Bɛt-Maka. Pa pɛtɛa ka Bɛri tsenete geva kezha keka hɛ perə.

¹⁵Pa Zhowab le ka sewajɛa ŋkɛ dzaslete meleme le hi geva yitea mpa, kwa nza ŋkɛ mbe Shɛba. Pa hɛ tseneyite hɛɗi yitea zlia meleme yipə yipə le zlia shɛ, ntake hɛ kaŋzla.

¹⁶Ma ke kwete male kwa ntsehwele ntsehwele tsate lewela mbe meleme: «Kafa yɛ, kafa yɛ! Gezete nda mə ke Zhowab hendeke geva Zhowab ŋkɛ kasame teke, 'ya kageze nda ghena.»

¹⁷Pa Zhowab hendeke geva, ma ke malea shɛ: «Gha ya kaZhowab na?» Ma ke Zhowab: «E'e 'ya ŋkɛ!» Ma ke male: «Gweɗakwe pa na kezha fa wəsə nya geze ŋa 'ya.» Ma ke Zhowab shɛ: «Mbe fa 'ya.»

¹⁸Ma ke malea shɛ shɛ: «Mbe geze mbeli vəashi: ‹Nahe mbeli ketseɓate ghena mbe Abɛl-Bɛt-Maka ne, pa ŋkɛ hite geva.›

¹⁹Nahe meleme ta n'yɛ kenza hwa meleme nyi gweɗakwe ma ba'a nyi dɛŋe dɛŋe ma mbe Israyɛl. Ama gha ne, gha kaɗe kazamte meleme nya nza nya zləvə te hwa meleme ta ka Israyɛl! Wa raberə ɗe na kabezemte wəsə nya kaŋa Mahwətə wa?»

²⁰Ma ke Zhowab zlape zlape: «Tɛape we, kezəzəte teremte ŋkwa 'ya ba'a ya nyama nyama ŋkɛ we!

²¹Tsagha ŋkɛ we. Deke wəndə kwetɛŋe teke hwa ghweme ta Ɛfrayim, sləa ŋkɛ Shɛba, wəzege ta Bikri, nya kefate nda ma ghena ke meghe David. Kesave ɗa mə, gheŋkɛ nahe nda slə n'yɛ ghen'yɛ mbe meleme.» Ma ke malea shɛ shɛ: «Katenegha ŋa ghəa ŋkɛ ghen'yɛ dzawa te zli.»

²²Pa malea shɛ lə sha mbelia nta kancɛte nda ntsehwele ke hɛ. Pa mbeli slave nda ghəa Shɛba kaneghave nda ke Zhowab. Katevɛ veke ŋkɛ. Tagha gɛ, kateslə hɛ le mbelia ŋkɛ kajɛghɛ. Zhowab le ghəa ŋkɛ ne, kazhɛne geva kadzembe Zhɛrəzalɛm sha meghe.

²³Zhowab ya ka meghea ka sewajɛa ka Israyɛl. Benaya, wəzege ta Yoyada, ya te ghəa ka Krɛte, ka Pɛlɛt ba'a ka ya ghɛa meghe.

²⁴Adoram ya te ghəa slene nya ve nda mbeli ke wəndə le berete. Yoshafat, wəzege ta Ahiləwd, nde kele ghena ta meghe.

²⁵Sheva ya kande rafe wəshi. Yɛ Sadok le Abiyatar ya kaka dzeghe Shala.

²⁶Ira, hwelefe ta Yayir, kande dzeghe Shala ŋkɛ ke David.