Read kapsiki 2 Saməyɛl 23 Bible Online

2 Saməyɛl 23 - kapsiki bible

2 Saməyɛl 23

¹Wa nya kwa keɗaŋe ta ghena ta David nya: Fate mə ghena ta David, wəzege ta Zhɛsɛ, ghena ta wəndə nya keveyi geva pelɛ ghəa wəmbə. Mɛsia Shala ta Zhakob, nahe ka Israyɛl keɗehwe kagha kwa cimə.

²Nahe Sefəa Mahwətə kegezete ghena laka 'ya, kwa mɛa ɗa ghena ta ŋkɛ.

³Shala ta ka Israyɛl, kegezete ghena, ma ke Keleɓa ta ka Israyɛl sha 'ya: «Wəndə nya kemene meghe te mbeli le nza tiɗiɗi, wəndə nya kemene meghe te mbeli laka hawe va Shala,

⁴Gheŋkɛ nde nca kwa ghweme kesame veci, masheke te veci nya ɗema ləmbə shɛ. Laka ɓele ta ŋkɛ ba'a laka va ne, kapese wəshi shave mbe hɛɗi kakwa ɗɛkeɗɛ.»

⁵Wa nya tsetse mene nda Shala ke mbelia ɗa: nahe ŋkɛ kemenete jikə geva nya kaghala ghala le 'ya, laka ghena nyi nza ŋkɛ dɛŋe dɛŋe te. Te yayata və ne, kave ɗa hərə ŋkwa ŋkɛ, mbe yipəte ɗa zəzə ta ɗa ŋkɛ.

⁶Ma mbeli nyi yiɗə Shala ne, kala tigə nyi negha mbeli hɛ, nya ɗema wəndə kakelete le dzeve.

⁷Wəndə nya kekwaɗakɛ ne, wəsə kempa nya le lɛ keɗema nya le sheghwəa megha yakele ŋkɛ, nahe hɛ keteremte geva le ghwə taghanyɛ.

⁸Wa nyi sləa ka katsala kɛfi kempa ta David nyi: Isheba'al, nde Hakmon, nya hwa ka ya ŋkwa. Gheŋkɛ yaheka mbeli perə kaAdino, nde Ɛsne, nya kempəmte mbeli gwəmsə deghese kwetɛŋe zhigə.

⁹Kwa sebe ta ŋkɛ, Ɛlazar, wəzege ta Dodo, wəzege ta Ahowa. Tehə ŋkɛ hwa ka katsala kɛfi mahekene nyi nza hɛ le David kwa tsenete geva ka Filisti kampa le hɛ. Vəa ŋkwa dzeghwanji ka Israyɛl.

¹⁰Ama pa Ɛlazar ghereŋe dɛŋe dɛŋe ba'a mpəmte ka Filisti hwa'a te və nya nza dzeve ta ŋkɛ kemte mte va leɓe te ghəa kafayɛa ŋkɛ. Hərə ŋkwa nya wəba yandeke Mahwətə te vecia shɛ ke Israyɛl. Ma mbeli nyi kwa sebe ta Ɛlazar ne, deke kezha fə wəshi mbeli nyi kempə.

¹¹Kwa sebe ta ŋkɛ, Shama, wəzege ta Agɛ, nde Harar. Pa ka Filisti tsenete geva mbe Lɛhi. Le kwete wəve tagha nya wəzate tsə kwa gheme mbeli mbe. Kahwɛ mbeli kezha wəfərə mbe va ka Filisti.

¹²Ama meslete Shama te tepe ta wəvea shɛ, kampə ka Filisti. Pa Mahwətə menete hərə ŋkwa nya wəba.

¹³Ma yipə yipə le və keleke ha ne, pa kweci mahekene hwa ka meghe nyi mahekenemsə dzawa sha David kwa gezlɛŋəa Adəwlam. Nahe kwete bela ta ka sewajɛa ka Filisti kemenete ghedəkwəa nci kwa zlərəa Refay.

¹⁴Nahe David kenza tewəfərə. Kwete ŋkwa ka sewajɛa ka Filisti ya shɛ kwa Bɛtelɛhɛm.

¹⁵Pa David gezete kwete zəzə, ma ke: «Wa nde nza kasame ɗa yɛmə nya kwa dəghwə nya wəba nya mbe Bɛtelɛhɛm tse wa?»

¹⁶Pa ka sewajɛ nyi mahekene ɓiyitsa dzawa ghedəkwəa ka Filisti le berete, gəve yɛmə nya kwa ŋkwa ketsene yɛmə nya mɛa degha ta Bɛtelɛhɛm. Pa hɛ keleke yɛməa shɛ ba'a ndeke nda ke David. Ama kese ŋkɛ kasa we, pa ŋkɛ ndeke nda ke Mahwətə laka ɓasle ŋkɛ te hɛɗi.

¹⁷Ma ke David: «Mahwətə, hweŋkwa va 'ya kasa yɛməa shɛ we! Nahe ŋkɛ kenza kala mimia mbeli nyi kelə kezha gə ŋkɛ nyi mbasa mbasa kezamte mpia nci.» Pa ŋkɛ ɗema sa yɛməa shɛ. Wa nya tsetse wəsə nya menete ka katsala kɛfi nyi mahekenea shɛhɛ.

¹⁸Abishay, wəza meghekɛa Zhowab, wəzege ta Serəwya, wəndə kwelea ka ya meghe. Gheŋkɛ nde mpəmte ŋkwa gwəmsə mahekene le megha, hwa mbeli nyi mahekene nyighɛ ŋkɛ.

¹⁹Gheŋkɛ yanza zləvə te za ma ke nyi mahekene. Gheŋkɛ ya kameghea nci. Ama keyipəte geva le nyi mahekene we.

²⁰Benaya, wəzege ta Yoyada, wəndə nya nza zləvə te ŋkɛ, nde mbe Kabsɛyɛl nyi kemenete wəshi nyi dzawe dzawe. Gheŋkɛ nde mpəmte ka sewajɛ nyi ghyana ghyana bake mbe Mowab. Gheŋkɛa shɛ nde dzawa kapeslekɛ nivɛrə kwa yitea weta yɛmə hwa kwacakelɛ nya dzawe.

²¹Gheŋkɛ nde peslekɛ nde Ɛzhipte nya kefege le ghəa ŋkɛ. Megha ya yitea dzeve va nde Ɛzhiptea shɛ. Pa ŋkɛ dzawa shɛ le geta, zləgwəhwe megha ta nde Ɛzhipte ba'a peslekɛ ŋkɛ le megha.

²²Wa nya wəsə nya menete Benaya nya, wəzege ta Yoyada, kwete ŋkɛ təhə hwa ka katsala nyi mahekene nyighɛ.

²³Gheŋkɛ yanza zləvə te kwele ma ke ka mahekenemsə. Ama ashɛ ŋkɛ hwa wəvəsəa nyi mahekene we. Pa David mbeɗeyi ŋkɛ kawəndə nya keya ŋkɛ.

²⁴Asayɛl, wəza meghekɛa Zhowab, təhə ŋkɛ hwa nyi mahekenemsə. Tsagha Ɛlanan, wəzege ta Dodo, nde Bɛtelɛhɛm,

²⁵Shama, nde Harod. Ɛlika, nde Harod.

²⁶Hɛlɛts, nde Palti. Ira, wəzege ta Ikɛsh, nde Tɛkowa.

²⁷Abiyɛzɛr, nde Anatot. Mebəwnay, nde Həwsha.

²⁸Salmon, nde Ahowa. Maray, nde Netofa.

²⁹Hɛlɛb, wəzege ta Ba'ana, nde Netofa. Itay, wəzege ta Ribay, mbe Gibɛya ŋwalea Bɛnjamɛn.

³⁰Benaya, nde Piraton. Hiday, laka pəkwə ta veci yitea Ga'ash.

³¹Abiyalbon, pelɛ ŋwela nya ntɛaŋentɛa. Azmavɛt, nde Bahəwrim

³²Ɛliyaba, nde Sha'albon.

³³Shama, nde Harar. Ahiyam, wəzege ta Sharar, nde Harar.

³⁴Ɛlifɛlɛt, wəzege ta Ahasbay, wəzege ta kwete nde Ma'aka, Ɛliyam, wəzege ta Ahitofɛl, nde Gilo.

³⁵Hɛsray, nde Karmɛl, Pa'aray, nde Arab.

³⁶Igal, wəzege ta Natan, mbe Soba, Bani mbe hwelefe ta Gad

³⁷Sɛlɛk, nde Amon, Naray nde Beyɛrot, nya kekele wəshi kempa ta Zhowab, wəzege ta Serəwya.

³⁸Ira ba'a Garɛb nyi kwa yita ta Yɛtɛr,

³⁹Əwri, nde Hɛt. Pɛtɛa nci ne, mbeli mahekenemsə mberefaŋeghəmbe.