Read kapsiki 2 Saməyɛl 4 Bible Online

2 Saməyɛl 4 - kapsiki bible

2 Saməyɛl 4

¹Pa Ishebal wəzege ta Sawəl, fate nahe Abnɛr kemte kwa Hɛbron. Shaŋe geva ta ŋkɛ kanza le berete, pɛtɛa ka Israyɛl taheta taheta mehele ta nci.

²Ma Ishebal ne, bake mbelia nyi te ghəa kweci wəvəsəa ka sewajɛ nyi kedzeyite, sləa nci Ba'ana le Rɛkab, ŋwalea Rimon, nde Bɛnjamɛn nya kwa Beyɛrot. Beyɛrot ne, na mbeli keveyi kameleme nya te hɛɗia ka Bɛnjamɛn.

³Se mɛa nya hwɛnji ka Beyɛrot vəashi kawəfərənji mbe Gitayim ne, mba hwelefe ta nci mbe pa ɓeshi.

⁴Zhonatan, wəzege ta Sawəl ne, wəzege kwetɛŋea ŋkɛ Mefiba'al nya nza seɗa ta ŋkɛ bake nci kagweleba. Va ta Mefiba'al mcɛfe nda se ghena ta mte ta yɛ Sawəl le Zhonatan se mbe Zhizrɛyɛl. Kaɗe male nya kedəkwə ŋkɛ kakele ŋkɛ kezha hwɛ. Ama mbe wədə geva ta nta ne, pa teɗenyɛ ve ba'a zhɛrenyɛ kagweleba.

⁵Yɛ Rɛkab le Ba'ana, ŋwalea Rimon, ka Beyɛrot, pa hɛ lə sha Ishebal. Mbe ghwə ta veci ntsehe hɛ, yitea hɛ ŋkɛ kazhɛne mpi.

⁶Pa hɛ dzeki hwa'a ki hwərə ghɛ kala mbeli nyi kekeleke ha, ca pa hɛ sləyi Ishebal yitea hɛ ŋkɛ mbe cɛ kehɛa ŋkɛ, pa hɛ n'yimte te hwə. Ma kwa peslekɛ ka kesaka ma nyi bake nyighɛ ne, pa hɛ slahwe ghəa ŋkɛ kadzeghwanji le. Kwetere wəmbəa ŋkɛ, cape hɛ kwa hweŋkwa ta zlərəa Zhəwrdɛŋe hwencɛke ncɛke kadzeghwa.

⁸Pa hɛ keleke nda ghəa Ishebal ke maze David, kwa Hɛbron, ma ke hɛ shɛ: «Nde maze, wa nya ghəa Ishebal nya wəzege ta nde ghema ta ŋa Sawəl nya keɗe mte ta ŋa vecagha, ɓeshi ne, nahe Mahwətə kewate ŋa dewa te Sawəl ba'a te ŋwalea ŋkɛ.»

⁹Ma ke David sha hɛ: «Te sləa Mahwətə nya kembele ɗa va yayata ndiremi.

¹⁰Ma wəndə nya kekeleke ɗa ghena ta mte ta Sawəl ne, ganyɛke newe ŋkɛ, ama nahe 'ya kegezete nda ke mbeli kakese ŋkɛ ba'a kapesle ŋkɛ mbe Siklag. Tsetse ŋkikɛ nda ghena ganyɛ 'ya ke hɛ.

¹¹Tsema teŋki nda ŋa ka mefətekwə nyi 'ya tse gɛ? Gheyɛ nyi kepeslekɛ wəndə nya ɗema fete ve, ki ghɛa ŋkɛ te gezle ta ŋkɛ? Kateve ŋayɛ yaka 'ya kampə ŋayɛ, kazamte ŋayɛ te hɛɗi.»

¹²Pa David ghwenakɛ ka sewajɛa ŋkɛ nyi kamempɛhweta kampəmte yɛ Rɛkab le Ba'ana. Pa mbeli slamte dzeve le seɗa te hɛ kabeteyi mɛa ghwa ta ka Hɛbron. Ma ghəa Ishebal ne, pa mbeli lamte ŋkɛ kwa kwele ta Abnɛr wəzege ta Nɛr, kwa Hɛbron.