Read kapsiki 2 Saməyɛl 8 Bible Online

2 Saməyɛl 8 - kapsiki bible

2 Saməyɛl 8

¹Ma kwa sebe ta ŋkɛ ne, pa David ɗate ka Filisti ba'a shifəmte berete ta nci nya sleke hɛɗi hɛ le.

²Pa ɗate ka Mowab perə. Pa ŋkate hɛ yitea ɓelahe te hɛɗi kezha nehe hɛ mbe le zewe kewəvəsə kewəvəsə kampəmte hɛ. Mbe wəvəsəa mahekene ne, nyi bake yampəmte ŋkɛ, pa ŋkɛ sərəakɛ kwete le mpi. Ntake ka Mowab katsehe nda jaɓeregwale ke David.

³Pa ŋkɛ ɗate Hadadɛzɛr perə, wəzege ta Rehob ba'a meghea ka Soba nya te ghəa hɛɗia ka Siri, mbe vəa shɛ ɗe Hadadɛzɛr kakele bela ta hɛɗia Efrate.

⁴Pa David fəhwe ka zleɗe gədəwəa lɛməa ŋkɛ 1.700 ba'a 20.000 ka sewajɛ nyi mba kaŋwale. Pa sərəakɛ gədəwə gare gwəmsə kezha wəmata gədəwəa ŋkɛ, ama pɛtɛ tsaslemte ŋeli yitea kweci gədəwə.

⁵Ma tagha, pa ka Siri nyi laka Damas se kakemane Hadadɛzɛr. Pa David ɗate perə kampəmte mbeli hwa hɛ 22.000.

⁶Pa kamene meghe te hɛ le berete, pa ka Siri kambeli nyi keŋki nda jaɓeregwale. Tsetse ndeke nda hərə ŋkwa Mahwətə ke David mbe pɛtɛa yɛ mpa ta ŋkɛ.

⁷Pa David fəhwe gelə mze kwa tere tere nyi va ka sewajɛ nyi keya Hadadɛzɛr ba'a fəghe hɛ kadzeme Zhɛrəzalɛm.

⁸Pa ŋkɛ fəte mze kwa tɛawetɛa kwele kwele se mbe meleme ta Bɛta ba'a Bɛrotay, bake melemea shɛhɛ te hɛɗia Hadadɛzɛr.

⁹Nahe Towə, mazea ka Hamat kefate nahe David kempəmte ka sewajɛa Hadadɛzɛr pɛtɛ.

¹⁰Pa ghwenakɛ wəzege ta ŋkɛ Yoram kanjiŋwe David ba'a katsa nda same se mbe mpa kehərə ŋkwa nya mpate hɛ le Hadadɛzɛr. Kwa nza ŋkɛ kande ghema ta Towə Hadadɛzɛr. Pa Yoram fəke nda wəshi mze kwa tere tere, mze kwa tɛawetɛa ba'a mze kwa ghwə ghwə ke David.

¹¹Pa maze David veyi hɛ kaŋa Mahwətə, kala nya veyi nda mze kwa tɛawetɛa ba'a mze kwa tere tere nyi kese mbe kweci hɛɗi nyi fəhwe ŋkɛ tekeleke:

¹²Ɛdom, Mowab, Amon, Filisti le Amalɛk ba'a nyi fəke ŋkɛ va Hadadɛzɛr.

¹³Kala nyagha mtsehete zləvəa ŋkɛ David. Ma kwa hərəte ka Siri ŋkɛ ne, pa zhɛneke geva ba'a ɗate ka Ɛdom kwa zlərəa Araba, pa mpəmte mbeli 18.000 yitea hɛ.

¹⁴Pa ŋkɛ ndeke nda ka ŋgwamna ke hɛ le berete pa hɛ tsehete nda jaɓeregwale. Tsetse ndeke nda hərə ŋkwa Mahwətə ke David mbe yayata mpa sewajɛa ŋkɛ.

¹⁵Pɛtɛa ka Israyɛl mene meghe David te hɛ. Pa mehate nda ghwə le hweŋkwa ta ŋkɛ tiɗiɗi ke mbelia ŋkɛ.

¹⁶Zhowab, Serəwya sləa meghekɛ, gheŋkɛ ya kameghea ka sewajɛ. Yoshafat, wəzege ta Ahiləwd, ya kande geze ghena ta meghe.

¹⁷Sadok, wəzege ta Ahitəwb, le Ahimɛlɛk, wəzege Abiyatar, ya kaka dzeghe Shala. Seraya ya kande rafe palepa.

¹⁸Benaya, wəzege ta Yoyada, ya te ghəa ka Krɛte le ka Pɛlɛt nyi keya ghɛa maze. Ma ŋwalea David perə ne, ka dzeghe Shala hɛ.