Read kapsiki 2 Saməyɛl 9 Bible Online

2 Saməyɛl 9 - kapsiki bible

2 Saməyɛl 9

¹Ma te kwete hɛ ne, Ma ke David 'yɛwete: «Mba wəndə ketene hwa mbelia Sawəl teghweme na? 'Ya katemene nda ganyɛ tewəmbəreke Zhonatan.»

²Kwete wəndə ya shɛ nya kese kande mene slene ta mbelia Sawəl sləa ŋkɛ Siba. Pa mbeli hekake kase sha David. Ma ke David 'yɛwete ve: «Gha ya kaSiba na?» Ma ke Siba: «E'e, Meghe yawe.»

³Ma ke meghe: «Ketene wəndə hwa mbelia Sawəl kezha mene ndeɗea mehelea Shala 'ya wəka?» Ma ke Siba: «Mba wəzege ta Zhonatan kwetɛŋe kagweleba.»

⁴Ma ke meghe: «Tema ŋkɛ tse wa?» Ma ke Siba shɛ. «Ki ghɛa Makir wəzege ta Amiyɛl, mbe Lo-Dabar.»

⁵Pa David ghwenakɛ ŋkwa kanewe mbe Lo-Dabar.

⁶Ma kwa se Mefiba'al, wəzege ta Zhonatan hwelefe ta Sawəl sha David ne, gwəɗəŋə ŋkɛ ntiŋə sha ghə mbe hɛɗi kwa kema ta meghe. Ma ke David 'yɛwe ve: «Gha ya kaMefibal na?» Ma ke zhɛnete: «'Ya shɛ ŋkɛ, Meghe yawe.»

⁷Ma ke David shɛ: «Ghazlənəma na ma! Tewəmbəreke Yite ŋa Zhonatan, 'ya katemene ŋa ganyɛ. Kateve ŋa hɛɗi nya kese va shia ŋa Sawəl 'ya pɛtɛ, ɓiyitsa ne, gheɓə le gha zeme wəsə keveci keveci.»

⁸Gwəɗəŋə Mefiba'al, ma ke: «Wa raberə nda newe ghweme meghe te 'ya kala nya, kelɛ kemte mte 'ya wa?»

⁹Pa meghe hekakɛ Siba, nde mene slene ta Sawəl, ma ke shɛ: «Kandeke nda 'ya ke Mefiba'al shia nde sleke ŋa, pɛtɛa wəshi nyi kese kaŋa Sawəl le yɛ mbelia ŋkɛ.

¹⁰Gha, le ŋwalea ŋa le ka mene slene ta ŋa, kawəza nda wəza yɛ, kezha kemave wəshi kezeme mbelia ŋkɛ. Ma Mefiba'al ne, katezeme wəsə ŋkɛ keveci keveci le 'ya.» Meŋe mcɛfeghəmbe ŋwalea Siba bakemsə ka mene slene.

¹¹Ma ke Siba sha meghe: «Pɛtɛa ghena nyi gezete ɗa meghe kamene ne, katemene hɛ 'ya. Ghen'yɛ le Mefiba'al zeme wəsə kwa nza ŋkɛ kahwelefe ta Sawəl.»

¹²Wəzege kamempɛhweta ya va Mefiba'al sləa ŋkɛ, Mika, pa veyi kande mene slene ta ŋkɛ le yayata wəndə nya ki ghɛa Siba.

¹³Ma kwa nza ŋkɛ kempə mpə seɗa yite bake nci ne, ntishɛ ŋkɛ mbe Zhɛrəzalɛm kezha lə ŋkɛ keveci keveci kazeme wəsə ki ghɛa maze zlaɓe le.