Read kapsiki 1 Ka Meghea Kɛfi 14 Bible Online

1 Ka Meghea Kɛfi 14 - kapsiki bible

1 Ka Meghea Kɛfi 14

¹Ma mbe vəa shɛnyɛ ne, pa zereghwe keseve Abiya, wəzege ta Zhɛrobowam.

²Ma ke Zhɛrobowam sha male ta ŋkɛ: «Sate, mbeɗemte lekwesa yagha mbeli kaɗepete ŋa kamale ta meghe, nda dzawa Silo na. Kwa Ahiya, nde mɛ ŋkwa ta Shala, gheŋkɛ nde gezete ɗa katenza 'ya ka meghea ka Israyɛl.

³Pa na keleghe hwa ta ɗafa meŋe, le gatewe ɓɛhwɛ ba'a wəmbete mze zake kadzawa, nda lə na shɛ. Kategeze ŋa wəsə nya ketemene nda geva ke wəzege ta ɓə ŋkɛ.»

⁴Pa malea shɛ menete kala nyagha, cape kadzawa Silo kadzeki ghɛa Ahiya. Ma Ahiya gɛ, mba kanakɛ ŋkwa we, mba kashɛ pele ntsə va hale we.

⁵Ama ma ke Mahwətə gezete nda ghena: «Wa nya male ta Zhɛrobowam nya katese sha gha kezha 'yɛwe ghena te zereghwe ta wəzege ta nci. Ghena nya kala nya yatezhɛne nda na. Ma kese nde ne, kala kwete male tenza nde kwa mbeɗemte lekwesa nde.»

⁶Ma kwa fate gaka ta seɗa ta nta ŋkɛ vəa ŋkwa nya nza nde mɛa degha, ma ke: «Səaki male ta Zhɛrobowam, yitea wa ɗe na kazhɛrete ghəa ŋa kakwete male tekeleke wa? Ghena kwa ndiremi ya va 'ya kageze ŋa.

⁷Kwiɗi gezete nda ke Zhɛrobowam, ma pa na shɛ: ‹Wa nya ghena nya gezeke Mahwətə, Shala ta ka Israyɛl nya: Shave hwa mbeli nyi gəmə gəmə ntave ŋa 'ya kameghea mbelia ɗa ka Israyɛl.

⁸Nahe 'ya kekelehwe meghe shave ki ghɛa David kezha ve ŋa ŋkɛ. Ama kenza na kala nde mene slene ta ɗa David nya keyate wəshi mahalegəa ɗa, katəkwə təkwəte ɗa le wənəa ŋkɛ pɛtɛ ba'a kamene wəshi nyi kenza tiɗiɗi kwa kema ta ɗa we.

⁹Kwele ma bezemte ghena na ke mbeli nyi mpelɛa ma ke gha: nahe na kebezemte ɗa wənə le kweci wəshi nyi vɛsəte na le nyi feɗete na kazhɛrete hɛ kashala, pa na neghamte ɗa.

¹⁰Vatse teghwene wəsə kwa ndiremi 'ya kadzeghəa mbelia ŋa, kateza zhili 'ya mbe yita ta ŋa pɛtɛ, ka mavashi le mbeli nyi kaka mamza nyi mbe Israyɛl, pɛtɛ tezamte mbelia ŋa 'ya kala nya tsale kəsə mbeli helɛŋe.

¹¹Yayata wəndə nya kemte ki ghɛa Zhɛrobowam mbe meleme ne, kelɛa keti ka tezeme geva ta ŋkɛ. Ma wəndə nya kemte hwa gamba ne, yɛ zleŋa nyi yitea ghweme ka tempa ŋkɛ.› Wa nya ghena nya gezete nya Mahwətə.»

¹²Ma ke Ahiya zhɛkwa: «Ma kaŋa ŋa gɛ male, sate, kwiɗi sha ghɛa ŋayɛ. Ama pɛkwe ma ta ŋa te meleme ta ŋayɛ, katemte wəzege ta ŋa.

¹³Pɛtɛa ka Israyɛl katedzehwa nehwene ta ŋkɛ ba'a kalamte kwa nza nde gheŋkɛ kwetɛŋenyɛ nde tedzawa kwele shave ki ghɛa Zhɛrobowam. Deke mbe gheŋkɛ kwetɛŋenyɛ hwa mbelia Zhɛrobowam nza wəsə nya ganyɛ kaŋa Mahwətə, Shala ta ka Israyɛl.

¹⁴Katenta wəndə nya ketenza kameghea ka Israyɛl Mahwətə. Gheŋkɛ nde teza sebe te ghɛa Zhɛrobowam. Gheŋkɛ nde mene geva tsetsenya nya!

¹⁵Kwetere wəmbəa ŋkɛ, kateɗa ka Israyɛl Mahwətə, katebare bare hɛ kala ghwəvərə nya kegaŋkəɗə mɛa yɛmə. Katekelemte ka Israyɛl ŋkɛ se te hɛɗi ganyɛ nya ndeke nda ŋkɛ ke ka shihɛ nci ba'a katepele hɛ ŋkɛ tahe pelɛ kwete kema ta Efrate nya kahələa Babilone. Tsagha temene nda geva ŋkɛ ke hɛ kwa beze nda wənə hɛ ke Mahwətə le nya feɗete dəŋwəa wəfe hɛ kazhɛrete kashala ta nci.

¹⁶Katewəfə ka Israyɛl ŋkɛ va jaɗafa nyi menete Zhɛrobowam ba'a kwa tsəkwəyite ka Israyɛl ŋkɛ yitea beze ghena.»

¹⁷Pelɛhetɛme male ta Zhɛrobowam, cape nde kelete hweŋkwa ta nta kalə sha ghɛ kwa Tirsa. Ŋkeɗevema ta nta ke mɛ degha ta nci ne, mtiwə wəzege ta nta.

¹⁸Pa mbeli lamte, pɛtɛ ka Israyɛl hwa nehwene ta ŋkɛ kala ghena nya gezete Mahwətə laka nde mɛ ŋkwa ta ŋkɛ Ahiya.

¹⁹Ma nya ketene ghena ta Zhɛrobowam ne, nahe hɛ kenza kerafe rafe mbe Palepa ta wəshi nyi menete ka meghea ka Israyɛl, kageze ghena ta mpa nyi se ŋkɛ kamene le sleke nya se ŋkɛ kasleke ŋkwa mbe.

²⁰Ma kwa mtenyɛ ŋkɛ kwetere wəmbəa va nyi menete ŋkɛ bakemsə bakeghəmbe te meghe, wəzege ta ŋkɛ Nadab nde kelete meghea ŋkɛ.

²¹Ma nda dzete meghe Robowam, wəzege nya yake yɛ Salomon le Na'ama nya kawəzha ta ka Amon, mbe Zhəwda ne, wəfaɗemsə kwetɛŋeghəmbe va ta ŋkɛ. Va meŋe mberefaŋeghəmbe menete ŋkɛ te meghe mbe Zhɛrəzalɛm, nya kameleme nya ntave Mahwətə te hɛɗia pɛtɛa ka Israyɛl kezha ncɛ nza ta ŋkɛ hwa mbelia ŋkɛ.

²²Pa mbeli nyi mbe hwelefe ta ka Zhəwda menete wəsə nya ndiremi kwa kema ta Mahwətə. Pa hɛ hwepete nda wənəa Mahwətə le jaɗafa ta nci nyi za ma ke nyi se ka shihɛ nci kamene.

²³Ghenci perə ne, nahe hɛ kehite yɛ kələŋə, kemɓete yɛ gɛaŋa ba'a selə nyi keveyi geva tekeleke pelɛ pɛtɛa wəmbə nyi nza wəfe nyi gwəzləmə gwəzləmə.

²⁴Kwele kwele mbeli nyi kemene mefətekwə kezha mene nda slene ke kweci shala te hɛɗia shɛ. Cape hɛ yitea mene wəshi nyi ndiremi ndiremi kashasha ta hwelefefi nyi ŋkamte Mahwətə kezha ve nda ŋkwa ke ka Israyɛl.

²⁵Ma te kwa mcɛfe ta va ta Robowam te meghe, ntəŋə Shishak, meghea ka Ɛzhipte kadzeme Zhɛrəzalɛm le mpa.

²⁶Pa fəhwe mcɛlə nyi mbe ghɛa Shala le nyi ki ghɛa meghe. Pɛtɛ fəhwe wəshi ŋkɛ zlaɓe le gelə kwa mze kwa tere tere nyi vɛsəte Salomon.

²⁷Pa meghe Robowam vɛsəte gelə mze kwa tɛawetɛa te ŋkwa nci ba'a dapate nda hɛ te dzeve ke mbeli nyi te ghəa ka sewajɛ nyi keya degha kedzeki ghɛa meghe.

²⁸Kala və nya dzembe ghɛa Shala meghe kwa, kakele gelə nyighɛ mbeli nyi keya, kazhɛne hɛ kadzembe ŋkwa nya nza ka ya ŋkwa mbe.

²⁹Ma nyi ketene ghena ta Robowam ne, nahe hɛ kenza kerafe rafe mbe “Palepa ta wəshi nyi menete ka meghea ka Zhəwda”.

³⁰Keveci keveci se mpa kwelɛ yɛ Robowam le Zhɛrobowam.

³¹Mtiwə Robowam, pa mbeli lamte hwa ka shihɛnyɛ mbe “Meleme ta David”. Wəzha ta ka Amon meghekɛ, Na'ama sləa nta. Wəzege ta ŋkɛ Abiyam nde kelete meghea ŋkɛ.