Read kapsiki 1 Ka Meghea Kɛfi 19 Bible Online

1 Ka Meghea Kɛfi 19 - kapsiki bible

1 Ka Meghea Kɛfi 19

¹Pa meghe Akab gezete nda wəshi nyi menete Ɛli pɛtɛ ke male ta ŋkɛ Zhɛzabɛl le ka mɛ ŋkwa ta Ba'al nyi mpəmte ŋkɛ pɛtɛ.

²Pa Zhɛzabɛl ghwenakɛ wəndə sha Ɛli, ma ke shɛ: «Pa shala vate ɗa nya za ma ke kweci te 'ya kemenetema ŋa 'ya kala nya menete na le ka mɛ ŋkwa nyighɛ hendɛ tsetse veci!»

³Ma newe ke Ɛli, pelɛhetɛme ŋkɛ, pa slənyɛ kezha mbelete mpia ŋkɛ. Pa kekave Bɛrshɛba nya te hɛɗia Zhəwda ba'a sərəakɛ nde mene slene ta ŋkɛ mbe.

⁴Cape kadzeghwanyɛ, veci veci ŋkɛ kadzeghwa te ɓerama. Pa lə kantishɛnyɛ yitea shenaŋkwe ta kwete wəfe kwetɛŋenyɛ nya heka mbeli kazhɛnɛt. Ntake ka'yɛwe mte, ma ke: «Tsetsenya gɛ Mahwətə, wərə ɗa, kelehwe mpia ɗa, va nya nza ŋkɛ ne, kenza 'ya za ma ke ka shihɛ ɗa we.»

⁵Pa ɓelahenyɛ kadzeyitea hɛnyɛ yite wəfea shɛ. Ama pa kwete nde ghwene ta Shala se kakwaɗakɛ, ma ke shɛ: «Sate, zeme wəsə kezeme!»

⁶Newe ke terasle yite, tagha ɗafa nya ta mbeli te gela nyi ghyana keta ta, pa yɛmə kwa ghwelepe. Pa zehwe ɗafa shɛ, kasahwe yɛmə, zhɛne pa ɓelahenyɛ.

⁷Pa nde ghwene ta Shala se kakwaɗakɛ zhɛkwa, ma ke shɛ: «Sate, zeme wəsə kezeme, kwa nza ŋkɛ biyake tenza dzeghwa ta ŋa.»

⁸Pelɛhetɛme Ɛli, pa zehwe ɗafa shɛ, kasahwe yɛmə. Ma kwa kemave berete ŋkɛ mbe wəsə kezeme nyagha, cape ŋkɛ kadzeghwa kahɛ wəfaɗemsə veci, wəfaɗemsə viɗi, hwa'a pelɛ Horɛb, ghəa ghweme ta Shala.

⁹Ma kwa ntsehe nde mɛ ŋkwa Ɛli pelɛ ghweme ta Horɛb, pa dzembe mbe gezlɛŋə ba'a hɛnyɛ mbe. Tagha gɛ, ma ke Mahwətə gezete nda: «Yitea wa nza ŋa na teke wa Ɛli?»

¹⁰Ma ke zhɛnete: «Shala Mahwətə nde berete, kwele kwele ɗehwe ŋa 'ya: nahe ka Israyɛl keneghamte jikə geva ta ŋa, nahe hɛ keŋzla ŋzlamte reghwetɛa ŋa kampəmte ka mɛ ŋkwa ta ŋa le kafayɛ. Deke 'ya kwetɛŋe ɗa nde tene, ama sepa yasepa mbeli kazamte mpia ɗa.»

¹¹Ma ke Mahwətə shɛ: «Shave ŋa shɛ na dzeme ŋa pelɛ ghəa ghweme kwa kema ta ɗa kwa nza nde katedzeyi 'ya tagha.» Te ŋkwa shɛnyɛ, pa sefə vɛte geva kwele kwele, pa perawemte ghweme ba'a yɛ keleɓa mbe kema ta Mahwətə. Ama kenza Mahwətə mbe sefəa shɛ we. Kwa sebe ta sefəa shɛ ne, pa hɛɗi gaŋkəɗəte geva, ama tagha Mahwətə we.

¹²Kwetere wəmbəa gaŋkəɗə ta hɛɗi ne, pa ghwə tsete tse, ama kenza Mahwətə hwa ghwəa shɛ we. Kwetere wəmbəa ŋkɛ, kavɛ sefə fɛɗɛ fɛɗɛ.

¹³Ma kwa fate Ɛli, pa dəpəte kema ta ŋkɛ le lekwesa ta ŋkɛ, pa shavenyɛ kaghereŋenyɛ mɛa gezlɛŋəa shɛ. Pa ŋkɛ fate kwete ghena, ma ke ghena shɛ: «Yitea wa nza ŋa na teke wa Ɛli?»

¹⁴Ma ke shɛ: «Mahwətə Shala nde berete, kwele kwele ɗehwe ŋa 'ya: nahe ka Israyɛl keneghamte jikə geva ta ŋa, nahe hɛ keŋzla ŋzlamte reghwetɛa ŋa kampəmte ka mɛ ŋkwa ta ŋa le kafayɛ. Deke 'ya kwetɛŋe ɗa nde tene, ama sepa yasepa mbeli kazamte mpia ɗa.»

¹⁵Ma ke Mahwətə shɛ: «Kwiɗi, kelete hweŋkwa ta ŋa karaŋe laka ɓerama ta Damas. Ma kwa ntsehe na kwa, pa na fikɛ Hazayɛl kaveyi kameghea ka Siri.

¹⁶Kwetere wəmbəa ŋkɛ, katelə na kave Zhɛhə, wəzege ta Nimshi tekeleke kameghea ka Israyɛl. Kateve Ɛlizɛ, wəzege ta Shafat nya kande Abɛl-Mehola na tekeleke kande mɛ ŋkwa kezha dzete ŋkwa ŋa.

¹⁷Ma mbeli nyi ketehwɛnji va kafayɛa Hazayɛl, katempə hɛ Zhɛhə, ma nyi kembele va kafayɛa Zhɛhə, katempə hɛ Ɛlizɛ.

¹⁸Ama katepele mbeli 'ya slibə mberefaŋe hwa ka Israyɛl, kala nza ta mbeli nyi kesema kagwəɗəŋə mbe kema ta Ba'al, nyi kesema mɓisə mɛ te wəshi nyi feɗete shɛhɛ mbeli», ke shɛ.

¹⁹Cape Ɛli se tagha pa nakɛ Ɛlizɛ, wəzege ta Shafat, kawəza wəza ta ŋkɛ ŋkɛ le sla meŋe bakeghəmbe bake bake. Kwa meŋe bakeghəmbe ta nci yawəza Ɛlizɛ le. Pa Ɛli hendave nda geva ba'a neghate karalamea ŋkɛ te geva ta ŋkɛ.

²⁰Pa Ɛlizɛ sərəakɛ sla kewəza ta ŋkɛ, cape ŋkɛ kwetere wəmbəa Ɛli le hwɛ, ma ke shɛ: «Pelave ɗa hweŋkwa lə 'ya həməwəve yiteyɛ ɗa le meyɛ ɗa, nda se 'ya katəkwə təkwə ŋa.» Ma ke Ɛli shɛ: «Kwiɗi nda se na te wəsə nya menete ŋa nya 'ya!»

²¹Pa Ɛlizɛ zhɛreghe geva, pa ŋkave kweci sla bake ba'a henemte hɛ. Pa ŋkɛ pesakɛ slia nci le sheghwə kejikə sla kewəza, pa nehave nda ŋkɛ ke mbeli yitea zeme hɛ hɛ. Pelɛhetɛme ŋkɛ sate te ŋkwa, cape ŋkɛ kwetere wəmbəa Ɛli yitea nza kande mene nda slene.