Read kapsiki 1 Ka Meghea Kɛfi 22 Bible Online

1 Ka Meghea Kɛfi 22 - kapsiki bible

1 Ka Meghea Kɛfi 22

¹Va bake menete mbeli kaɗema mpa kwelɛ ka Siri le ka Israyɛl.

²Ama te kwa mahekene ta va ne, pa Zhozafat, meghea ka Zhəwda dzawa sha meghea ka Israyɛl Akab.

³Ma ke le ŋa ŋkɛ gezete nda ke mbeli nyi yite: «Nahe yɛ keɗepe, ma meleme ta ka Ramot nya mbe Gala'ad ne, ŋa ɓəmə ŋkɛ. Va wa dake mə kelə kakelehwe va meghea ka Siri wa?», ke sha hɛ.

⁴Ma ke sha meghe Zhozafat: «Kaɗe na kalə kamene mpa kwa Ramot nya mbe Gala'ad yitea zhɛneke mə na?» Ma ke Zhozafat shɛ: «Kanya kwetɛŋe mə gheɓə le gha, mbelia ɗa le mbelia ŋa ba'a gədəwəa ɗa le gədəwəa ŋa.»

⁵Ma ke Zhozafat sha meghe zhɛkwa: «'Yɛwakɛ ghena va Mahwətə kaba», ke shɛ.

⁶Pa meghea ka Israyɛl tsenete ka mɛ ŋkwa nyi gare gwəmsə wəfaɗe, ma ke 'yɛwete va hɛ: «Wərə 'ya kadzawa kampa kwa Ramot nya mbe Gala'ad tse na, na sərəakɛ 'ya na?» Ma ke ka mɛ ŋkwa zhɛnete: «Kwiɗi, kateve ŋa melemea shɛ Shala kadzembe dzeve ta meghe.»

⁷Ma ke Zhozafat: «Kwete shɛ nde mɛ ŋkwa ta Mahwətə teke kezha 'yɛwakɛ ɓə ghena ŋkɛ ve tse yi?»

⁸Ma ke meghea ka Israyɛl zhɛnete nda ke Zhozafat: «Le kwete shɛ wəndə nya nza mə ka'yɛwekɛ ghena va Mahwətə laka gheŋkɛ, ama 'ya le ghəa ɗa ne, kaɗe ghena ta ŋkɛ 'ya kwa ɗema ŋkɛ kegha kageze ɗa ghena ganyɛ we, deke ghena kwa ndiremi yageze ŋkɛ: Mishɛ sləa ŋkɛ, wəzege ta Imla.» Ma ke Zhozafat: «Gezema ghena na tsagha te nde mɛ ŋkwa ma!»

⁹Ma gɛ, pa meghea ka Israyɛl hekate kwete wəndə nya kemene slene ki ghɛa meghe kagezete nda kezha lə ŋkɛ kaheka Mishɛ, wəzege ta Imla kahe kahe.

¹⁰Mentishɛ mentishɛ yɛ meghea ka Israyɛl le meghea ka Zhəwda, yayata kwete kwa pasla ta ŋkɛ le lekwesa meghea nci kənəa geva, te kwete ŋwela terasle mɛa ŋkwa kedzembe meleme ta ka Samari. Ma ka mɛ ŋkwa le ŋa nci, ghena yageze hɛ pɛtɛa nci.

¹¹Pa Sidekiya, wəzege ta Kenana gezlate tereme kwa lɛ lɛ, ma ke: «Wa nya ghena nya gezeke Mahwətə nya: ‹Le tereme kwa lɛ lɛ ten'yi ka Siri na kala vələa mca.›»

¹²Pɛtɛ ka mɛ ŋkwa kageze tsagha: «Kwiɗi kadzeme Ramot nya mbe Gala'ad yitea mpa, katehərə ŋkwa na! Kateve melemea shɛ Mahwətə kadzembe dzeve ta ŋa meghe», ke hɛ.

¹³Ma ke wəndə nya ghwenakɛ mbeli kaheka Mishɛ shɛ: «Fate, pɛtɛ ka mɛ ŋkwa kageze nda ghena ganyɛ ke meghe, kanya kwetɛŋe ghena ta nci. Geze kala hɛ kezha hərə ŋkwa ŋkɛ.»

¹⁴Ma ke Mishɛ: «Laka Mahwətə nya le ntsə, ghena nya gezete ɗa Mahwətə yategeze 'ya.»

¹⁵Pɛkwe ŋkɛ kwa kema ta meghe, ma ke meghe shɛ: «Mishɛ, wərə n'yɛ kadzeme Ramot nya mbe Gala'ad yitea mpa na, jara ma ntishɛ n'yɛ ghen'yɛ na?» Ma ke Mishɛ shɛ: «Wərə na kadzeme, katehərə ŋkwa na, kateve ŋa melemea shɛ Mahwətə kadzembe dzeve.»

¹⁶Ma ke meghe shɛ zhɛkwa: «Ŋkwini zhigə te'yɛwe 'ya va gha kazeme ɗa fela yitea geze ɗa ghena nya kaganda na, nya kese va Mahwətə wa?»

¹⁷Ma ke Mishɛ ɓiyitsa: «Nahe 'ya kenakɛ pɛtɛa ka Israyɛl hɛ kwetɛ kwetɛŋe dzeme hwa ghweme kala wəshi keseɗa nyi ɗema nde ya wəshi yitea hɛ. Ma ke Mahwətə gezete: ‹Mba meghe va hɛ we. Slə yayata wəndə sha ghɛa ŋkɛ le mehele.›»

¹⁸Ma ke meghea ka Israyɛl sha Zhozafat: «Nahe 'ya kegezete ŋa megela. Kageze ghena ganyɛ ŋkɛ kaŋa ɗa we, deke ghena kwa ndiremi yageze ɗa ŋkɛ!»

¹⁹Ma ke Mishɛ zhɛkwa: «Fate ghena nya geze Mahwətə. Va nya nza ŋkɛ nahe 'ya kenakɛ Mahwətə mentishɛ pelɛ pasla meghea ŋkɛ le ka mene slene ta ŋkɛ nyi pelɛ ghweme meslete te kwa zeme ta ŋkɛ ba'a te kwa gwela ta ŋkɛ.

²⁰Ma ke Mahwətə: Wa nde nza kaghwetete Akab kezha dzeme Ramot nya mbe Gala'ad ŋkɛ yitea mpa, kadzeme ŋkɛ kaŋ'wete mte ta ŋkɛ tse wa? Keghə keghə zhɛnete nda hɛ tekeleke ŋa nya, tekeleke ŋa nya.

²¹Pa Sefə nya kegeze nda ghena ke ka mɛ ŋkwa hendeyi geva kwa kema ta Mahwətə, ma ke: Katelə 'ya kezha ghwete ŋkɛ. Ma ke Mahwətə shɛ: Tsema wa?

²²Ma ke shɛ: Katelə 'ya ba'a katezhɛre ghəa ɗa 'ya kasefəa tseŋwə kwa mɛa ka mɛ ŋkwa ta meghe kezha geze nda ghena tseŋwə hɛ pɛtɛ. Ma ke Mahwətə shɛ: Wərə na kaghwetete ŋkɛ fate fate, hweŋkwa ya va gha, kwiɗi menete kala nyagha!

²³Ma ke Mishɛ ɓiyitsa: Wa nya nahe Mahwətə keveyi sefə kesla tseŋwə kwa mɛ va ka mɛ ŋkwa ta ŋa pɛtɛ tsetsenya, nahe ŋkɛ kezəzəte kaghwene ŋa wəsə kwa ndiremi.»

²⁴Taghanyɛ pa Sidekiya, wəzege ta Kenana hendave nda geva ke Mishɛ kampave le dzeve kwa sleme, ma ke shɛ: «Nahe Sefəa Mahwətə keshave mbe 'ya kezha geze ŋa ghena na?»

²⁵Ma ke Mishɛ shɛ: «Ya, katenewe na vəa ŋkwa nya tewəfərə na dzembe nya cɛ, dzembe nya cɛ.»

²⁶Ma ke meghea ka Israyɛl gezete nda ke kwete wəndə: «Keseve Mishɛ shɛ na keleghe nda ke Amon nya te ghəa meleme ba'a ke Yowash, wəzege ta meghe.

²⁷Pa na gezete nda ke hɛ: Wa nya ghena nya gezete meghe nya: Veyi mə wəndə nya kwa daŋgayɛ, deke ɓɛhwɛ ɓɛhwɛ ŋa nda ɗafa yɛ le yɛmə pa te və nya tezhɛre geva 'ya se kwamte mpa le kwelɛŋe, wa ke», pa sha hɛ.

²⁸Ma ke Mishɛ shɛ: «Ma kezhɛreke geva na le kwelɛŋe kaganda ne, kese Mahwətə kageze ghena laka 'ya tsagha we.»

²⁹Cape yɛ meghea ka Israyɛl le Zhozafat meghea ka Zhəwda kadzeme Ramot nya mbe Gala'ad yitea mpa.

³⁰Ma ke meghea ka Israyɛl sha Zhozafat: «'Ya kambeɗemte lekwesa kezha dzawa yitea mpa, ama gha, seɗete lekwesa meghea ŋa.» Pa meghea ka Israyɛl mbeɗemte lekwesa kezha lə yitea mpa.

³¹Ma meghea ka Siri le ŋa ŋkɛ ne, ma ke gezete nda ke mbeli nyi te ghəa wəmata gədəwəa ŋkɛ nyi mahekenemsə bakeghəmbe: «Mba yɛ kempa le ka sewajɛ keɗema le ka meghe nyi te ghəa nci, ama deke meghea ka Israyɛl», ke sha hɛ.

³²Ma kwa nakɛ Zhozafat mbelia jama nyi te ghəa wəmata gədəwə nyighɛ, gheŋkɛ meghea ka Israyɛl kwa tsema ke hɛ kaghate, tereŋe hɛ yite le mpa. Ama cape Zhozafat katsa kaka kempa ta ŋkɛ.

³³Ma ɓiyitsa, pa ka meghea ka sewajɛ nyi te ghəa wəmata gədəwə nyighɛ ɗepete kaɗema ŋkɛ kameghea ka Israyɛl. Pa hɛ pelakɛ.

³⁴Ama pa kwete sewajɛa ka Siri hete have gəmə gəmə, ntare ŋkɛ te meghea ka Israyɛl dzawa kwelɛ ɓɛrɛa rəbəci nya kənə. Ma ke meghe sha wəndə nya kezleɗe wəmata gədəwəa ŋkɛ: «Zhɛrete geva, kelemte ɗa se te ŋkwa kempa nya kwa nza nde nahe wəsə keɗakɛ ɗa», ke shɛ.

³⁵Ama ghyanake se mpa te vecia shɛ, vatse nda se mbeli kapelakɛ meghe pelɛ wəmata gədəwəa ŋkɛ: tawe yatawe kwete wəndə kwa kema ta ka sewajɛa ka Siri. Ama kwa tɛhwɛɗi, mtiwə ŋkɛ. Nahe mimia zhia ŋkɛ kehwɛyi geva kwa zeweve ta wəmata gədəwəa ŋkɛ.

³⁶Ma yipə le pəkwə ta veci, ma ke mbeli tsate lewela mbe ghedəkwə: «Lə yayata wəndə sha meleme ta ŋkɛ, te hɛɗia ŋkɛ!

³⁷Kwa nza nde nahe meghe kemte!» Pa mbeli keleghe geva ta ŋkɛ kadzembe Samari kalamte mbe.

³⁸Ma shɛ mbeli kayaɓe wəmata gədəwəa Akab kwa ghwa ta Samari le yɛmə kwele kwele ne, kase kelɛa keti kanini mimia Akab, pɛ yapɛ kweci mi kemene tahe tagha kala ghena nya gezete Mahwətə.

³⁹Ma nyi ketene wəshi nyi menete Akab, nahe hɛ kenza kerafe rafe mbe Palepa ta wəshi nyi menete ka meghea ka Israyɛl. Kageze geva pɛtɛa wəshi nyi menete ŋkɛ mbe, tsema tsema ŋate ghɛ meghe nya kepesa pesa le slene ta cewe ŋkɛ ba'a ŋkwini ŋkwini meleme nyi ŋate ŋkɛ.

⁴⁰Ma kwa mte ŋkɛ, wəzege ta ŋkɛ Ahaziya nde kelete meghea ŋkɛ.

⁴¹Pa Zhozafat, wəzege ta Asa dzete meghe mbe Zhəwda te kwa wəfaɗe ta va ta Akab te meghe mbe Israyɛl.

⁴²Va mahekenemsə mcɛfeghəmbe va ta Zhozafat nda dzete meghe ŋkɛ, pa ŋkɛ menete va bakemsə mcɛfeghəmbe te meghe pelɛ Zhɛrəzalɛm. Wəzha ta Shili meghekɛ, Azəwba sləa nta.

⁴³Kala nya se yitenyɛ Asa kamene se ŋkɛ kamene tiɗiɗi, kamene wəshi nyi ganyɛ mbe kema ta Mahwətə.

⁴⁴Ama kezamte sebe ŋkɛ te ŋkwa kedzeghe melɛ nyi ŋate mbeli kwa ghəa yɛ ghweme we. Mba mbeli kalə kadzeghe melɛ le wəshi keseɗa ba'a katere 'wərdə kwa hə hə te hɛ.

⁴⁵Kakwa keɗaŋe, le nza kwelɛŋe se yɛ Zhozafat le meghea ka Israyɛl kanza.

⁴⁶Ma nyi ketene wəshi nyi menete Zhozafat ne, nahe hɛ kenza kerafe rafe mbe Palepa ta wəshi nyi menete ka meghea ka Zhəwda. Kageze ntsə geva nya se ŋkɛ kamene mbeli le yɛ mpa nyi se ŋkɛ kamene.

⁴⁷Pa zamte sebe te zhili le mi nyi kemene tahe laka kweci shala, nyi ketene te vəa yitenyɛ Asa.

⁴⁸Ma te vəa shɛ ne, meghe shɛ mbe hɛɗia Ɛdom we, deke kwete ŋgwamna, nya veyi meghea ka Zhəwda.

⁴⁹Pa Zhozafat baŋete kwambelə jama jama kwa Ɛsiyon-Gɛbɛr kezha lə kasepa mze kwa tere tere pelɛ hɛɗia Ofir, ama kese kajive kwa bezenji kwambelə kwa Ɛsiyon-Gɛbɛr we.

⁵⁰Ma ɓiyitsa, ma ke Ahaziya, wəzege ta Akab gezete nda ke Zhozafat: «Lə ka mene slene ta ɗa le ka mene slene ta ŋa le yɛ kwambelə!» Ama hɛreɗɛ Zhozafat ɗema yɛ.

⁵¹Ma kwa mtenyɛ Zhozafat, pa mbeli lamte hwa ka shihɛnyɛ mbe “Meleme ta David”. Pa wəzege ta ŋkɛ Zhoram kelete meghea ŋkɛ.

⁵²Pa Ahaziya, wəzege ta Akab zhɛrenyɛ kameghea ka Israyɛl kwa Samari te kwa meŋe mberefaŋeghəmbe ta va ta Zhozafat kameghea ka Zhəwda. Va bake menete ŋkɛ te meghe te ghəa ka Israyɛl.

⁵³Pa ŋkɛ menete wəshi nyi wale wale kwa ntsə ta Mahwətə kala yitenyɛ le meghekɛ ba'a kala Zhɛrobowam, wəzege ta Nebat nya keghweteyite ka Israyɛl yitea jaɗafa, se ŋkɛ kamene.

⁵⁴Cape ŋkɛ kagwəɗəŋə mbe kema ta shala Ba'al kahawe ve. Pa bezemte nda ghena ke Mahwətə, Shala ta ka Israyɛl, kala nya se yitenyɛ kamene.