Read kapsiki 1 Ka Meghea Kɛfi 3 Bible Online

1 Ka Meghea Kɛfi 3 - kapsiki bible

1 Ka Meghea Kɛfi 3

¹Pa Salomon wəmeve wəzha ta Farawon, megha ka Ɛzhipte, ma laka wəzha nya wəmeve ŋkɛ ne, nahe hɛ kejikəte geva le Farawon. Pa keleghe male ta ŋkɛa shɛ kadzembe “Meleme ta David”, nda teŋa zhigə ŋa ŋkɛ ghɛ meghe ŋkɛ ba'a ghɛa Mahwətə le zli dzasle yitea Zhɛrəzalɛm.

²Ma te və nyagha, mbanji mbeli kadzeghe melɛ te yɛ kələŋə, va nya nakama mbeli kaŋate ghɛ kaŋa Mahwətə kaba.

³Pa Salomon ncɛte ɗe ta ŋkɛ kwele kwele yitea Mahwətə kwa nza ŋkɛ kamene kala ghena nyi gezete nda David, ndagwara gheŋkɛ perə ne, nahe ŋkɛ kese kadzeghe melɛ le wəshi keseɗa ba'a katere wərdə te yɛ kələŋə.

⁴Ma te kwete veci ne, cape meghe kadzawa Gabawon kezha dzeghe melɛ kwa nza nde tagha nza ŋkwa nya hite geva za ma kezha dzeghe melɛ: na Salomon kedzeghekɛ melɛ kwa tere tere le wəshi keseɗa slibə te reghwetɛ nya pelɛ ŋkwa shɛ.

⁵Ma kwa Gabawon heviɗi ne, pa Mahwətə ncɛte nda geva te shiwə ke Salomon, ma ke shɛ: «Wa wəsə nya ɗe na kave ŋa 'ya wa? 'Yɛwete.»

⁶Ma ke Salomon zhɛnete nda: «Le ganyɛa mehele se na kanza le nde mene slene ta ŋa, yiteyɛ ɗa David va nya se ŋkɛ kadzeghwa mbe kema ta ŋa tiɗiɗi, kawəndə nya le mehele ganyɛ, nahe na keveyi nda ganyɛa mehele ta ŋa kwa ndeke nda wəzege na kezha nza te meghe pelɛ pasla ta ŋkɛ, kala nya newe mbeli ɓeshi.

⁷E'e, Shala Mahwətə ta ɗa, gha nde nteyi ɗa kameghe te ŋkwa yiteyɛ ɗa David. Ama ndagwara kawəzege 'ya, keɓɛhwɛ 'ya kezha ɗepete tsema tsema sleke ŋkwa mbeli.

⁸Wa nya 'ya nya te ghəa mbeli nyi ntave na, hwelefe nya kwele kaɗema mbeli kaɓelate.

⁹Ndeke ɗa ntsehwele ganyɛ 'ya nya kamava ta ŋa yitea nza 'ya le mehele kasleke mbelia ŋa, kezha ɗepe ghala kwelɛ wəsə nya ganyɛ le nya ndiremi, keɗema tsagha ne, tsema nza wəndə kaslekete mbelia ŋa nyi nza nyi zləvə te hɛ zlahe wa?»

¹⁰Megela zeɗehwe nda 'yɛwe ta Salomon nya ke Mahwətə.

¹¹Ma ke Shala sha meghe: «Kese na ka'yɛwe kezha temə teghweme kwele kwele, kezha zhɛre ŋa kande mcɛlə ba'a kese na kasəkwə kezha mpənji ka ghema ta ŋa we. Ama ntsehwele ya'yɛwete na kezha ɗepe nza te ghəa mbeli kameha ghwə tiɗiɗi.

¹²Vatse nza nde kala ghena ta ŋa temene 'ya: kave ŋa wənə nya le ntsehwele 'ya le ɗepe ghena, nya ɗema wəndə kekemave mpelɛa ma ke gha ghalanza, ba'a kwetere wəmbəa ŋa, kaɗema wəndə shɛ kanza kala gha.

¹³Ɓiyitsa, kateve ŋa wəsə nya 'yɛwetema na 'ya: mcɛlə wəshi ba'a zləvə kala nza ta hɛ ŋa le mpi, kwete wəndə shɛ kayipə geva le gha hwa ka meghea kɛfi we.

¹⁴Ma kakwa keɗaŋe gɛ ne, ma kenza nde kadzeghwa na kwa hweŋkwa ta ɗa tiɗiɗi, kenza nde kaya wəshi mahalegəa ɗa na le ghena nyi geze 'ya kala yiteyɛ ŋa David ne, katembake mpi ŋa 'ya.»

¹⁵Ma kwa feɗeghe Salomon ne, pa ɗepete nahe Shala kegezete nda ghena te shiwə. Cape zhɛneghe geva kadzeme Zhɛrəzalɛm kaghereŋenyɛ mbe kema ta Mahwətə te kema ta səndəkwəa jikə geva. Pa ŋkɛ dzeghekɛ nda melɛ kejikə ghə ba'a zehwe nda wəshi kezeme megela ke pɛtɛa mbeli nyi nza ŋkɛ le hɛ.

¹⁶Ma te kwete veci, bake kweci mi nyi kemene mefətekwə se kadzawa kema ta meghe Salomon.

¹⁷Ma ke kwa ghate: «Təhwə təhwə ŋa 'ya nde sleke ɗa, fate ɗa. Ghen'yɛ le male nya ne, ki ghɛ nya kwetɛŋe n'yɛ, pa 'ya yake wəzege shɛ nde tagha le 'ya ki ghɛ.

¹⁸Te kwa mahekene ta hɛ kwa ya ɗa 'ya, pa nde yake ŋa nta wəzege perə. Jikə ghen'yɛ bake n'yɛ kaɗema kwete wəndə le ghen'yɛ ki ghɛa shɛ.

¹⁹Ma heviɗi ne, pa wəzege ta male nyagha mtenyɛ kwa ɓelahate ɓelahe nde te.

²⁰Te tepe ta viɗi, pa nde sate nda te ŋkwa, kelemte wəzege ta ɗa yitea 'ya vəa ŋkwa nya nza 'ya yitea hɛ, pa nde ɓelaheyi ŋkɛ vare ghəa nta. Pa nde kelete ŋa nta wəzege nya kemte mte, pa nde ɓelaheyi ŋkɛ vare 'ya.

²¹Ma kwa feɗeghe 'ya masheke kezha sa nda ŋ'wa ke wəzege ta ɗa, kemte mte ŋkɛ, ma kwa kiɗinyɛ ŋkwa ghwɛɗɛɗɛa, newe 'ya ne, wəzege ta ɗa nya yake 'ya ŋkɛ we.»

²²Ma ke kwete male nyagha le ŋa nta: «Ewə! Wəzege ta ɗa ne, nya le mpi, ma ŋa ŋa ne, nya kemte mte.» Ma ke kwa ghate nyagha gezete: «Ewə! Wəzege ta ŋa ya kemte mte, ŋa ɗa wəzege ya mba teghweme!» Tsagha se hɛ katseha mɛ kwa kema ta meghe.

²³Ma ke Salomon: «Ŋa ɗa wəzege nya te ghweme, wəzege ta ŋa ya kemte mte, a ke kwete! ‹Ewə! Wəzege ta ŋa ya kemte mte, ŋa ɗa ya teghweme›, ke kwete sha zhɛne.»

²⁴Tagha gɛ, ma ke meghe sha mbeli: «Keleke ɗa mə kafayɛ!» Pa mbeli keleke nda kafayɛ.

²⁵Ma ke meghe zhɛkwa: «Ɓerezlemte mə wəzege nya le mpi nya bake mbe nda ndeke nda kwete bela ta ŋkɛ yɛ zake va nya, zake va nya ke mi nyi.»

²⁶Kwetɛ kwetɛŋe mehele ta male nya nza wəzege nya te ghweme kaŋa nta kwa zhɛ nda helia nta yitea wəzege ta nta, ma ke: «Təhwə təhwə nde sleke ɗa! Ndeke nda mə wəzegea shɛ le mpi, mba yɛ kepesle!» Ama ma ke kwete male nyagha: «Kanza ŋkɛ va gha we, kanza ŋkɛ va 'ya we! Ɓerezlemte mə wəzegea shɛ mbe!»

²⁷Ma tagha gɛ, ma ke meghe: «Ndeke nda mə wəzege ke male kwa ghate, peslema ŋkɛ yɛ ma, ghenta ya kameghekɛa wəzege.»

²⁸Pɛtɛ ka Israyɛl kefate tsema tsema mehate ghwə nyagha meghe Salomon, ntake mbeli kahawe ve kwele kwele kwa nakɛ mbeli ntsehwele nya kese va Shala ya ve kezha meha ghwə.