Read kapsiki 1 Ka Meghea Kɛfi 5 Bible Online

1 Ka Meghea Kɛfi 5 - kapsiki bible

1 Ka Meghea Kɛfi 5

¹Mba kweci hɛɗi meghe nyi mbe dzeve ta ŋkɛ se te Efrate, hələ nya wəba hwa'a te hɛɗia ka Filisti ba'a hwa'a kwa ghala le Ɛzhipte te dzeve va Salomon. Pɛtɛ ka meghe nyi mbe hɛɗia shɛhɛ kaŋki nda jaɓeregwale kala nza nya nzahwe ŋkɛ teghweme.

²Wəshi kezeme ta yɛ Salomon le mbelia ŋkɛ keveci keveci ne, kiləwəa hə kwa ghazle ghazle 9.000, kiləwəa hə kwa mɗɛ mɗɛ 18.000,

³sla nyi neghate mbeli meŋe, sla nyi ya mbeli kwamte bakemsə, timɛti gwəmsə, kaɗema mbeli keɓelate kweci wəshi keseɗa kala yɛ le, yɛ kɛme, yɛ kwakweshala ba'a kanare gamba nyi nza merege te hɛ.

⁴Pɛtɛa hɛɗi nyi te kwa gwela va ŋkwa kepəkwə ta veci va hələa Efrate se Salomon kasleke, se mbe Tifsa hwa'a mbe Gaza, pɛtɛa meghe nyi te hɛɗi nyighɛ mbe dzeve ta ŋkɛ. Le kwelɛŋe kaɗema mpa shɛ se hɛ kanza le kweci hɛɗi nyi nza hɛ kwa ghala le.

⁵Ma mbeli nyi mbe Zhəwda le nyi mbe Israyɛl, gwezlayɛ kaɗema ghazlənə shɛ se hɛ kanza te yayata bela ta meleme, yayata wəndə le nza gwezlayɛ mbe wəvea rɛzɛŋea ŋkɛ le dasekwa ta ŋkɛ kala nza ta hɛa Salomon teghweme.

⁶Gədəwəa lɛmə 12.000 ka se va Salomon ba'a zlema nyi kenza kakelete gədəwə 40.000 kezha wəmata gədəwəa ŋkɛ.

⁷Yayata kwete hwa mbeli nyi te ghə wəshia meghe nyi veyi nyighɛ meghe Salomon meŋe bakeghəmbe kakele nda wəshi kezeme ke yɛ meghe Salomon le mbelia ŋkɛ katere zake zake mbe va kele wəshi yayata wəndəa nci. Kapelakɛ meghe hɛ kadewə nda wəsə ya ɓɛhwɛ we.

⁸Kakele nda megi hɛ ba'a kweci gwəzə ke gədəwəa ŋkɛ nyi zleɗe mbeli le nyi kentsehe wəmata gədəwəa ŋkɛ. Kadzete ŋkwa nya nza meghe kele hɛ kala nya gezete nda mbeli ke yayata wəndəa nci.

⁹Nahe Shala kendeke nda ntsehwele nya wəba le ɗepe wəsə kwele kwele ke Salomon, le zəzə nya wəba kala nza ta ndaleghe nya mɛa ndərə.

¹⁰Kwele ma ntsehwelea Salomon ke ŋa ka ntsehwele ntsehwele nyi mbe Arabi le nyi mbe Ɛzhipte pɛtɛ.

¹¹Gheŋkɛ nde se kanya keɗepemte wəshi le ntsehwele za ma ke yayata wəndə pɛtɛ, ntsehwele ma ŋkɛ ke Ɛtan nde Ɛzrah, ba'a ke Hɛman, le Kalkol, le Darda, le ŋwalea Mahol. Pa tema tema ɗepete sləa ŋkɛ mbeli mbe pɛtɛa meleme nyi kwa ghala le ŋa ŋkɛ.

¹²Nahe ŋkɛ kegezete ghena ŋela gare 3.000 ɓela ta nci, kancake cimə 1.005.

¹³Nahe ŋkɛ kese kageze ghena te yayata wəfe: se te kwete lekeleke ta ka Liban hwa'a te dzeve ta izope, kwete wəfe nya kepese vare zli. Nahe ŋkɛ kese kageze ghena te wəshi keseɗa, le yɛ 'yɛ, le wəshi nyi kedzeghwa le hwə ba'a te yɛ kelepe.

¹⁴Kase mbeli mbe yayata meleme kezha fa ntsehwelea Salomon kageze ghena, kase mbeli laka ka meghea kɛfi nyi te hɛɗi pɛtɛ, nyi kefate kageze ghena ta ntsehwelea meghe Salomon mbeli.

¹⁵Ma Hiram, meghe nya mbe Tir ne, kamcɛ se hɛ le David te yayata və. Ma kwa fate ŋkɛ nahe mbeli keveyi Salomon kameghe te zhia yitenyɛ David, pa ghweneghe mbeli kageze nda njiŋwe ta ŋkɛ.

¹⁶Pa Salomon ghweneghe mbeli perə kezha geze nda:

¹⁷«Nahe na keɗepe kaɗema yiteyɛ ɗa David keŋate ghɛ kaŋa Shala Mahwətə ta ŋkɛ, va nya sema ka jaga ta ŋkɛ kasərəakɛ ha nda mpa kala yayata bela. Ama nahe Mahwətə kendeke nda hərə hɛ.

¹⁸Ama tsetsenya, nahe Shala Mahwətə ta ɗa kendeke ɗa nza kwelɛŋe kaɗema mpa shɛ le pɛtɛa ka ghala ta ɗa ba'a kaɗema nde jaga shɛ ya ghena kwa ndireminyɛ ŋkɛ.

¹⁹Nahe 'ya kezəzəte kezha ŋate ghɛ kaŋa Shala Mahwətə ta ɗa. Va nya nza nde na Mahwətə kegezete nda ke yiteyɛ ɗa: ‹Wəzege ta ŋa nya teve 'ya kameghe pelɛ pasla ta ŋa, gheŋkɛ nde teŋa ghɛ kaŋa ɗa›.

²⁰Ma tsetsenya ne, gezete nda ke mbeli kezha lə hɛ katsasle ɗa lekeleke nyi mbe Liban. Katekemane ka mene slene ta ŋa ka mene slene ta ɗa, kateŋki nda 'ya ke ka mene slene ta ŋa kala nya tegeze ɗa na, kwa nza nde gha le ghəa ŋa ne, nahe na keɗepe wəndə shɛ hwa ghen'yɛ nya keɗepe tsasle wəfe kala gheyɛ ka Sidon we.»

²¹Ma kwa keleghe nda ghena ta Salomon nyagha mbeli ke Hiram, cape ŋkɛ kazlama kwele kwele le geze: «Katsa nda hana mbeli ke Mahwətə ɓeshi veci nya kwa nza nde nahe ŋkɛ kendeke nda wəndə kentsehwele ntsehwele ke David kezha nza kameghe te ghəa Israyɛl nya kahwelefe nya kwele!»

²²Pa ghweneghe ŋkwa kageze nda ke Salomon: «Nahe 'ya kefate ghena nya gezeke ɗa na. E'e, nahe 'ya keyɛte kave ŋa pɛtɛa sheghwə lekeleke ba'a ŋa vɛ kala nya ɗe na.

²³Ka mene slene ta ɗa katefə dəŋwəa wəfe shɛhɛ sawa pelɛ ghəa Liban hwa'a kwa ndərə. Katehwepe hɛ hɛ te tseɓa kezha slə hɛ ləmbəŋə te ghəa yɛmə hwa'a te ŋkwa nya tegeze ɗa na. Te ŋkwa shɛ tepelemte hɛ hɛ nda se ka mene slene ta ŋa kafə dəŋwəa wəfea shɛhɛ. Ma gha le ŋa ŋa, wəsə kezeme yaɗe 'ya kamene ɗa na kaŋa ghɛa ɗa.»

²⁴Pa Hiram tsaslave nda dəŋwəa sheghwə lekeleke ba'a ŋa vɛ ke Salomon kala nya ɗete ŋkɛ.

²⁵Ma Salomon le ŋa ŋkɛ, keva keva se ŋkɛ kave nda ha gare kiləwə miliyeŋə ŋkwaŋe le ghəa n'yia bekele litrə 8.000 kezha zeme nda zeme ke mbeli nyi nza hɛ le ki ghɛ meghea ŋkɛ.

²⁶Nahe Mahwətə kendeke nda ntsehwele ke Salomon kala nya gezete nda ŋkɛ. Ntake yɛ Salomon kanza le ganyɛa mehele le Hiram, pa hɛ menete meɗe mɛ kwelɛ ghəa nci.

²⁷Pa meghe Salomon keleke slene berete mbe Israyɛl pɛtɛ, mbeli 30.000 nyi kese kamene.

²⁸Ketere ketere ghwene hɛ ŋkɛ kadzeme Liban mbeli 10.000 ba'a ke və ke və. Zake tere mene slene hɛ nda zhɛre geva hɛ sha ghɛ kamene tere bake. Adoniram nde se te ghəa slene berete nyagha kameghe.

²⁹Ka fə wəshi 70.000 ba'a ka tsehe pelɛ 80.000 ka mene nda slene hwa ghweme ke Salomon,

³⁰kaɗema mbeli keɓelate kweci mbeli nyi veyi mbeli te ghəa wəshia Salomon nyi 3.300, nyi kenewe dzeghwa ta slene ta mbeli nyighɛ.

³¹Pa meghe gezete kezha lase pelɛ nyi jama jama ba'a kezha tsehe pelɛ nyi ganji ganji mbeli kezha gha shihəa ghɛa Shala.

³²Ntake ka mene slene ta Salomon ba'a ŋa Hiram, zlaɓe le ka caŋa caŋa nyi mbe meleme ta Biblos kasla yɛ sheghwə ba'a katsehe yɛ pelɛ kezha ŋa ghɛa Shala.