Read kapsiki 1 Ka Meghea Kɛfi 6 Bible Online

1 Ka Meghea Kɛfi 6 - kapsiki bible

1 Ka Meghea Kɛfi 6

¹Te kwa gwəmsə wəfaɗe ba'a deghesemsə ta va kwetere wəmbəa shave ta ka Israyɛl mbe Ɛzhipte, va wəfaɗe menete Salomon kameghea ka Israyɛl, mbe terea Ziv nya kakwa bake ta tere mbe va ghate ŋa ghɛa Mahwətə ŋkɛ.

²Ma ghɛa Shala nya ŋate nda Salomon ke Mahwətə ne, mɛtre mahekenemsə dzate ghwa ta ŋkɛ, mɛtre meŋe bezlea ŋkɛ ba'a mɛtre meŋe mcɛfeghəmbe dzeme ghweme ta ŋkɛ.

³Ma mbe kema ta cɛ nya wəba nya mbe ghɛa shɛ ne, na mbeli keŋate dapa, mɛtre meŋe bezlea ŋkɛ kala ghɛa Shala shɛ, mɛtre mcɛfe bela kwa dzeki ghɛa ta ŋkɛ.

⁴Nahe ŋkɛ keslate yɛ wəfela te dewe ta ghɛa Shala shɛ, nya meneyi lɛ nyi ketsa tsa ŋkɛ te sheghwəa ŋkɛ.

⁵Pa ŋate kwete cɛ nya nza cɛ mbe mahekene kadzeme kadzeme dzasle yite dzeyi vare dewe ta cɛ nya wəba le dewe ta vi.

⁶Ma vi ne, mɛtre bake gasle kwete yite bezlea ŋkɛ, ma nya mbe tepe, mɛtre mahekene, ma kwa mahekene, mɛtre mahekene gasle kwete yite. Va nya nza nde ne, ma dewe nya pelɛ te ŋwela va ghɛa Shala shɛ ne, ashɛ deɓedea ŋkɛ yipə yipə kadzeme kadzeme kala biya ta ŋkɛ we. Kala dzeme ta ŋkɛ yitea ghweme, slɛfeslɛ ma kadzeme ghə yagha sheghwə nyi te kakwaɗakɛ dewe ta ghɛa shɛ.

⁷Ma kaŋa ghɛa shɛ mbeli ne, pelɛ nyi kese te ŋkwa nya tsehete mbeli yaŋa mbeli le. Vatse nda ɗema mbeli kafa gaka ta ndevele, le gaka ta dzaŋərə, keɗema ŋa yayata wəsə kwa lɛ lɛ.

⁸Ma ŋkwa kedzembe cɛ nya pelɛ ghəa cɛ nya li zeweve ne, laka bela kwa zeme ŋkɛ va ghɛa Shala. Dzeme te ŋkwa nya ŋate mbeli ketaŋa ketaŋa dzeme cɛ nya mbe tepe mbeli, ba'a cɛ nya pelɛ ghəa cɛ.

⁹Ma kwa ŋamte ghɛa Shala shɛ Salomon ne, pa sleɓate sheghwə lekeleke nyi slapesla slapesla jive te nyi deke deke.

¹⁰Ma kwete cɛ nya ŋate mbeli dzasle yitea ghɛa Shala ne, mɛtre bake gasle kwete yite biya ta ŋkɛ kala nza ta cɛ nya pelɛ ghəa cɛ, le sheghwə lekeleke ndeɓeyi geva ŋkɛ vare dewe ta ghɛa Shala.

¹¹Pa Mahwətə gezete nda ghena ke Salomon:

¹²«Nahe na keŋate ghɛa nya kaŋa ɗa. Ma kenza nde kadzeghwa na kala ghena ta ɗa, kenza nde kamene slene na le wəshi keshia ɗa ba'a keyate wəshi mahalegəa ɗa na pɛtɛ ne, katemene ŋa wəsə nya meɗeyi 'ya kaŋa ŋa kala nya gezete nda 'ya ke yiteyɛ ŋa David.

¹³Katese 'ya kanza mbe ghɛa ɗa te tepe ta ka Israyɛl, katesərə mbelia ɗa, ka Israyɛl 'ya tɛape we.»

¹⁴Pa mbeli keɗaŋemte ŋa ta ghɛa Shala le slene ta ŋkɛ kala nya gezeyi Salomon.

¹⁵Pa mbeli sleɓeyi sheghwəa lekeleke nyi feɗete mbeli slapesla slapesla yipə dzeme va dewe nya mbe hwəa pɛtɛa ŋkwa, se kwa te hɛɗi pa pelɛ yitea sheghwə nyi jive te cɛ, sleɓate sheghwəa vɛ te hɛɗi.

¹⁶Pa sleɓeyi sheghwə lekeleke yipə vare dewe ta cɛ nya li zeweve ta ŋkwa, se kwa te zeweve hwa'a pelɛ yitea ghə kamɛtre meŋe. Ɓiyitsa, pa mbeli hite ŋkwa nya mbe kezha menete kaŋkwa nya nza səndəkwəa jikə geva te, ŋkwa nya keveyi geva tekeleke tsape ke mbeli shɛ.

¹⁷Ma nya ketene bela ta ghɛa Shala, geze ta ŋkɛ bela nya kwele, nya mbe kema ta ŋkwa nya nza səndəkwə mbe ne, mɛtre bakemsə biya ŋkɛ kadzeyi ŋwela.

¹⁸Ma sheghwə lekeleke nyi mbe hwəa ghɛa Shala shɛ ne, na mbeli kerafate wəshi te kala ya ta wəfe ta kolokɛŋte ba'a kala ghwə ta wəfe tepele. Pɛtɛ sleɓemte mbeli le sheghwəa lekeleke yagha mbeli kanakɛ pelɛ ya kwetɛŋe.

¹⁹Pa mbeli hite ŋkwa nya mbe hwəa cɛ nya te tepe ghɛa Shala, kaŋkwa nya wɛŋe kezha ve səndəkwəa jikə geva ta Mahwətə.

²⁰Ma cɛa shɛ ne, mɛtre meŋe biya ŋkɛ, mɛtre meŋe bezlea ŋkɛ ba'a mɛtre meŋe dzeme ta ŋkɛ yitea ghweme. Nahe Salomon kemeneyi mze kwa tere tere nya ganyɛ kənə kala nya mbe hwəa ghɛa Shala. Nahe ŋkɛ kendɛaŋeyi livə mze kwa tere tere mɛa cɛa shɛ ba'a kemenete reghwetɛ le sheghwəa lekeleke nyi kefi fi le mze kwa tere tere.

²²Nahe ŋkɛ kefimte pɛtɛa ŋkwa nya mbe ghɛa Shala, tsagha reghwetɛ nya mɛa ŋkwa kedzembe cɛ nya nza səndəkwə mbe le mze kwa tere tere nya ganyɛ.

²³Pa mbeli feɗete shɛrəbɛŋe bake yitea sheghwə bekele kezha ve kadzembe cɛ nya nza səndəkwə. Mɛtre mcɛfe dzeme ta yayata wəndəa nci yitea ghweme. Ma kwa ghate ta shɛrəbɛŋea shɛ ne, mɛtre bake gasle kwete yite biya bidzəa ŋkɛ, mɛtre mcɛfe biya ŋkwa, se te mɛa kwete bidzə hwa'a mɛa ŋa kwete. Ma kwa bake ta shɛrəbɛŋe ne, yipə yipə nza ta ŋkɛ le kwa ghate, geze ta ŋkɛ mɛtre mcɛfe biya nci, yipə yipə pa ta nci: kala nza ta dzeme ghweme ta shɛrəbɛŋe kwa ghate.

²⁷Te tepe ta cɛ nya nza səndəkwə beteyi shɛrəbɛŋea shɛhɛ mbeli. Tepele bidzəa shɛrəbɛŋe nyighɛ: kakwaɗe kwaɗe dewe bidzəa kwa ghate, tsagha kwaɗe kwaɗe kwete dewe bidzəa kwete. Ma kweci bidzəa nci nyi kwelɛ tepe, kakwaɗe kwaɗe ghəa nci hɛ jikə ŋa nya le ŋa nya.

²⁸Nahe mbeli kefimte shɛrəbɛŋe nyi bake nyighɛ le mze kwa tere tere.

²⁹Pa mbeli feɗeyi shɛrəbɛŋe le wəshi kala dzeve ta peha le ghwə ta wəfe tepele dzasle yitea dewe ta ghɛa Shala se pelɛ te ŋwela pa ki ghɛ.

³⁰Pa mbeli sleɓemte ŋkwa nya te hɛɗi va cɛa shɛ se pelɛ te ŋwela ba'a ki mbe hwə le mze kwa tere tere.

³¹Kezha ŋzle cɛ nya nza səndəkwə mbe ne, pa mbeli baŋete gelembe nya nza ŋkwa kepele bake te, yitea sheghwə bekele nya hwa gamba. Ma sheghwə nya dzeme vare gelembe ne, te kwa mcɛfe ta bela ta dewe ŋkɛ.

³²Pa mbeli feɗate ka shɛrəbɛŋe, yɛ dzeve ta peha ba'a ghwə ta wəfe nyi kepele pele te seɗa ta gelembe nyi bake nyi le sheghwəa bekele, pa mbeli fiaghe mze kwa tere tere mbeli kənəa hɛ. Pa mbeli slapeyi mze kwa tere tere nya peslaɓe te ka shɛrəbɛŋe ba'a te yɛ dzeve ta peha shɛhɛ.

³³Tsagha shɛnyɛ ne, pa mbeli baŋete kwete gelembe kezha ŋzle cɛ nya wəba. Ama seɗa ta gelembe nyi le sheghwəa bekele ne, te kwa wəfaɗe ta bela ta dewe hɛ,

³⁴yitea vɛ feɗete sheghwə nyi bake dzeme vare gelembe mbeli, nahe yayata sheghwə nya dzeme vare gelembe kepesakɛ geva le takase bake nyi feɗete mbeli.

³⁵Nahe mbeli kefeɗate ka shɛrəbɛŋe te perə le wəshi kala peha ba'a kala ghwə ta wəfe, pa mbeli sleɓemte bela nyi feɗete nyighɛ mbeli le mze kwa tere tere.

³⁶Kwetere wəmbəa ŋkɛ, pa mbeli dzaslete hwəa ŋwela nya mbe mbe le pelɛ nyi tsehete mbeli, kapate kazəɗə mahekene ba'a zəɗəa medaŋa sheghwə lekeleke zake.

³⁷Te kwa wəfaɗe ta va ta Salomon te meghe, mbe terea Ziv ghate shihəa ghɛa Shala mbeli.

³⁸Te kwa meŋe kwetɛŋeghəmbe ta va ta Salomon te meghe kiɗimte geva ŋa ta ghɛa Shala jikə ta ŋkɛ pɛtɛ le yayata slene ta ŋkɛ, mbe terea Bəwl, geze ta ŋkɛ ne, tere kwa deghese. Va mberefaŋe menete mbeli kaŋa.