Read kapsiki 1 Ka Meghea Kɛfi 7 Bible Online

1 Ka Meghea Kɛfi 7 - kapsiki bible

1 Ka Meghea Kɛfi 7

¹Pa Salomon ŋate ghɛa ŋkɛ perə, va meŋe mahekeneghəmbe menete mbeli nda keɗaŋenyɛ ŋa ta ŋkwa pɛtɛ.

²Mpelɛa ma ghate ŋkɛ kaŋa kwete cɛ nya ndeke nda slə mbeli “Kaghɛa wəfe ta ka Liban”. Mɛtre mcɛfemsə biya cɛa shɛ, mɛtre bakemsə mcɛfeghəmbe bezlea ŋkɛ ba'a mɛtre meŋe mcɛfeghəmbe dzeme ghweme ta ŋkɛ. Va nya nza nde se te zəɗəa sheghwə lekeleke nyi kaselə wəfaɗe nyi kedɛŋe sheghwə nyi sleɓeyi mbeli yitea ghəa ŋkwa.

³Ma sheghwə lekeleke nyi sleɓate mbeli te ne, jive te ghəa medaŋa wəfaɗemsə mcɛfeghəmbe. Geze ta ŋkɛ ne, mahekene jive ta zəɗəa nci meŋe mcɛfeghəmbe te dewe ba'a kwa ghəa medaŋa kwa ghəa medaŋa.

⁴Ma te yayata kema ta cɛa shɛ ne, mahekene nya, mahekene nya dzeyi yitea wəfela nyi nza sheghwə dzasle dzasle yite, yayata wəfela kwa kema kwa kema le kwete.

⁵Yayata gelembe le sheghwə nya yite kakwa zlerehwaŋe zlerehwaŋe. Kwa kema kwa kema nza hɛ va ghəa nci te ŋkwa mahekene.

⁶Pa ŋkɛ ŋate cɛa yɛ selə perə: mɛtre bakemsə mcɛfeghəmbe biya ta ŋkɛ ba'a mɛtre meŋe mcɛfeghəmbe bezlea ŋkɛ. Kateɓe keshi menete mbeli mɛ, yɛ medaŋa ya yite ba'a keshi ya kənə. Kwa kema ta Kaghɛa wəfe ta ka Liban veyi geva cɛa shɛ.

⁷Pa mbeli ŋate cɛ nya nza pasla ta meghe mbe, nya heka mbeli perə “Kacɛ kemeha ghwə”. Pa mbeli sleɓeyi sheghwə lekeleke te yipə se te hɛɗi pa pelɛghə.

⁸Ma cɛ nya hɛ Salomon mbe ne, te kwete ŋkɛ ŋkwa tekeleke le ŋkwa nya nza pasla te, ama yipə yipə nza ta nci. Ma cɛ nya ŋate nda Salomon ke wəzha ta Farawon nya wəmeve ŋkɛ ne, yipə yipə ŋkɛ le cɛ nya heka mbeli “Kaghɛa wəfe ta ka Liban”.

⁹Pɛtɛ ŋate geva cɛa shɛhɛ le pelɛ nyi ganji ganji nyi tsehete mbeli jama jama kala nza ta kema nyi kedzete ŋwela le nyi mbe hwə. Le pelɛa shɛhɛ ghate shihə mbeli le ŋa ta ŋkɛ pa pelɛghə, tsagha ŋate geva ŋkwa nya pelɛ te ŋwela va zli nya yitea ŋwela nya wəba ki ghɛ.

¹⁰Ma kaŋa shihəa ŋkwa ne, le pelɛ nyi ketsehe tsehe jama jama, gare mɛtre wəfaɗe le mcɛfe ghate hɛ mbeli.

¹¹Kənəa shihəa shɛhɛ sleɓeyi pelɛ kwa tsehe tsehe nyighɛ mbeli le medaŋa lekeleke nyighɛ.

¹²Zəɗəa pelɛ mahekene nderete mbeli dzasle yitea ŋkwa nya kwele nyagha, zake zəɗəa medaŋa lekeleke kala nya nza hwə ŋwela nya ki ghɛ ki ghɛ va ghɛa Mahwətə ba'a kala dapa nya mɛ.

¹³Pa Salomon gezete kezha ndeke nda slene ke Hiram, nde Tir,

¹⁴kawəzege ta kwete male wede nya mbe hwelefe ta Nɛftali ŋkɛ, ba'a nde Tir yitenyɛ. Kwele kwele ntsehwele ve ba'a zlahe ɗepe mene slene ta mze kwa tɛawetɛa ŋkɛ. Vatse nda hekate meghe Salomon se mbe Tir kezha mene nda wəshi nyi ɗe ŋkɛ pɛtɛ.

¹⁵Pa Hiram vɛsəte selə nyi le mze kwa tɛawetɛa bake. Mɛtre mesli biya nci kadzeme ghweme, zewe nya kenza gare mɛtre ŋkwaŋe nde dzasle hɛ.

¹⁶Pa vɛsəte wəshi kala derə meghe nyi le mze kwa tɛawetɛa kezha ve kwa ghəa seləa shɛhɛ, mɛtre bake gasle kwete yite biya ta nci.

¹⁷Pa zhɛne kamenete kweci gwezla kwa mze kwa tɛawetɛa, le kweci kala zewe lɛ nya kala pa ta ghwə ta wəfe kezha wəshi nyi kala derə nyighɛ. Mberefaŋe kaŋa yayata kwete hwa derə nyi bake shɛhɛ.

¹⁸Pa mbeli menete yɛ ya ta kwakweme: zəɗə bake kənəa zamba nyi kənəa wəshi nyi kala derə meghe.

¹⁹Kwa ghəa yayata medaŋa ne, le kwa bake ta derə shɛ nyi kenza gare mɛtre bake dzeme ta nci yitea ghweme, kala pa ta ghwə ta gatawəfa.

²⁰Ma kwa ghəa wəshi nyi kala derə nyighɛ ne, le kwete bela nya nza wəmbə te shɛ. Ma wəmbəa shɛ ne, pelɛghəa yɛ ya ta kwakweme nyi gwəmsə bake, nyi kwa zəɗə dzasle yitea yayata kwete hwa derə.

²¹Pa mbeli sletete medaŋa nyi bake nyighɛ mbe kema ta mɛ degha ta ghɛa Shala: te kwa zeme kwete nya heka mbeli kaYakin, geze ta ŋkɛ, “Shala nde mbake berete”. Ama te kwa gwela kwete, kwete nya heka mbeli kaBowaz, geze ta ŋkɛ, “Mbe Shala nza berete”.

²²Ma ghəa yɛ seləa shɛhɛ ne, kala ghwə ta gatawəfa pa ta nci. Nahe slene ta medaŋa kemenemte geva tiɗiɗi.

²³Pa Hiram vɛsəte kwete pərətiməa weta le mze kwa tɛawetɛa nya ndeke nda slə mbeli kaNdərə. Mɛtre mcɛfe bezlea ŋkwa nya jive te hwəa ŋkɛ, mɛtre bake gasle kwete yite dzeme ghweme ta ŋkɛ, mɛtre meŋe mcɛfeghəmbe dzasle ta ŋkɛ.

²⁴Ma dzeyi mɛa mɛa ŋkɛ dzasle ne, na mbeli kerafeyi ya ta kwete wəsə kala gwənzə ha, nya heka mbeli kakolokɛnte. Bakemsə te mɛtre kwetɛŋe, bakemsə te mɛtre kwetɛŋe kazəɗə bake. Te veci nya kwetɛŋe vɛsəte hɛ mbeli le weta nyagha.

²⁵Te wəmbəa sla nyi vɛsəte mbeli le mze kwa tɛawetɛa meŋe bakeghəmbe veyi weta shɛ mbeli. Mahekene nyi nza kema ta nci laka bela kwa gwela, mahekene nyi nza ŋa nci laka ŋkwa kepəkwə ta veci, mahekene nyi nza kema ta nci laka bela kwa zeme, mahekene nyi nza kema ta nci laka ŋkwa kesame ta veci. Ma zeweve ta nci ne, laka ŋkwa nya kwetɛŋe zhɛrete geva hɛ sha weta nyagha.

²⁶Kala bezlea dzeve deɓedea weta shɛ. Ma ŋkwa nya dzeyi mɛa mɛa ŋkɛ, kala mɛa helape menete mbeli kala nza ta mɛa ghwə ta gatawəfa. Wərə dzawa weta shɛ litrə gare 80.000.

²⁷Kwetere wəmbəa ŋkɛ, pa Hiram vɛsəte wəmata gədəwə meŋe le mze kwa tɛawetɛa. Mɛtre bake biya yayata nci, mɛtre bake bezlea nci, mɛtre zake gasle kwete yite dzeme ghweme ta nci.

²⁸Wa nya tsetse menete geva hɛ: wəshi mze kwa ghwə ghwə nyi slapesla slapesla ya katepe. Nahe kweci wəshi nyi slapesla slapesla kenza dzeme kwelɛ geta nyi te hɛ,

²⁹ma te dəŋwə nyagha, yɛ nivɛrə, mcɛmcɛli ba'a ka shɛrəbɛŋe yavɛsəate ŋkɛ te, tsagha pelɛ te ghə. Yɛ nivɛrə ba'a mcɛmcɛli ya yitea hwə va hɛ le kweci wəshi kala zewe kwa tsa tsa kala livə.

³⁰Yayata wəndəa nci ne, wəfaɗe seɗa yitea wəmata shɛhɛ kakwa mze kwa tɛawetɛa, ma dəŋwəa lɛ nyi nza hɛ te, nahe mbeli kembakame dzeve mɛa hɛ le mze kwa tɛawetɛa te yayata megwekwe nyi wəfaɗe. Ma bela nyi kala seɗa nyi mbakame mbeli mɛa hɛ ne, le mze kwa tɛawetɛa vɛsəte hɛ mbeli yipə yipə le hwəa wəmata, ama kezlakemte zewe nya kala livə nyi yite hɛ we.

³¹Ma pelɛ ghəa wəmata shɛ ne, le mɛ shɛ taghele ghele gare mcɛfemsə kwa gwəmsə ta bela ta mɛtre kezha ve kweci weta. Ma mɛ nya sleyia shɛ mbeli pelɛghə ve ne, mberefaŋemsə mcɛfeghəmbe kwa gwəmsə ta bela ta mɛtre jive ta ŋkɛ te tepe se te kwete mɛ hwa'a te kwete. Ma bela nya biya ma ke hwəa ŋkɛ ne, kakwa zlerehwaŋe zlerehwaŋe ŋkɛ, ashɛ kakwa taghele ghele we. Nahe mbeli kevɛsəte wəshi kala gwezla dzeyi mɛa mɛa nya pelɛ ghəa shɛ kezha hi za ma le mze kwa tɛawetɛa.

³²Yitea hwə seɗa nyi wəfaɗe nyighɛ, ma dzeve nyi nza hɛ te, pɛkwe hɛ jive mbe wəmata shɛ. Ma bezlea ŋkwa nya jive te tepe ta seɗa ta ŋkɛ ne, mberefaŋemsə mcɛfeghəmbe kwa gwəmsə ta bela ta mɛtre.

³³Kala seɗa ta wəmata gədəwə menete hɛ mbeli. Nahe pɛtɛa wəshi nyi te hɛ kenza le mze kwa gheme kwa vɛsə vɛsə.

³⁴Ma kweci bela nyi mbakame mbeli mɛa hɛ kala seɗa, nyi te yayata mezlerehwaŋe ta ŋkwa ne, jikə hɛ le dəŋwəa wəmata shɛ.

³⁵Ma pelɛ kwa ghəa yayata wəmata shɛhɛ ne, le kwete shɛ wəsə taghele ghele dzasle yitea mɛ nya slate nyagha mbeli te gare bakemsə mcɛfeghəmbe kwa gwəmsə ta bela ta mɛtre bezlea ŋkɛ. Ma te nyagha bela ne, yɛ ŋkwa kekese ba'a mze kwa ghwə ghwə nyi helambaŋe helambaŋe ya shɛ perə, ama jikə hɛ le nya ketene bela ta wəmata.

³⁶Nahe mbeli kevɛsəte shɛrəbɛŋe, le nivɛrə le wəshi kala peha te bela nyi slapesla slapesla, le bela nyi kejikə hɛ, le hwəa ŋkɛ ba'a le zewe livə dzasle yite.

³⁷Tsagha gezlate wəmata nyi meŋe nyighɛ ŋkɛ kanya kwetɛŋe le lɛ nya kwetɛŋe, yipə yipə jama jama ta nci le pa ta nci.

³⁸Pa Hiram vɛsəte wəshi kesheke wəshi kala weta meŋe yitea mze kwa tɛawetɛa kezha ve pelɛ ghəa wəmata nyi meŋe nyighɛ. Mɛtre bake dzeme ghweme ta yayata weta nyighɛ ba'a litrəa 1.600 dzawa yɛmə.

³⁹Pa mbeli fəyi wəmata nyighɛ mcɛfe te kwa zeme, mcɛfe te kwa gwela le wəshi kesheke yɛmə nyi kala weta shɛhɛ kwa ghəa nci. Ma kwete wəsə kesheke yɛmə nya wəba nya ndeke nda slə mbeli kaNdərə ne, pa veyi te bela kwa zeme ta ghɛa Shala laka bela kwa zeme.

⁴⁰Ma kwa vɛsəmte wəshi kesheke yɛmə kala weta Hiram le yɛ pɛlə ba'a zlerekwe kepisə ŋkwa, nahe ŋkɛ kiɗimte slene nya 'yɛwake Salomon ve kezha ghɛa Mahwətə:

⁴¹selə bake, wəshi bake kala derə kezha ve kwa ghəa yɛ seləa shɛhɛ, kweci mama ta zamba bake kezha seɗe kənəa derə meghe nyi kwa ghəa seləa shɛhɛ,

⁴²yɛ ya ta kwakweme gwəmsə wəfaɗe, nyi hwepete mbeli kazəɗə bake te zewe kənəa yayata wəsə nya kala derə,

⁴³wəshi kentare wəshi meŋe, yɛ weta meŋe te wəshi kentare wəshia shɛhɛ,

⁴⁴zake weta nya wəba taghele ghele, mcɛmcɛli meŋe bakeghəmbe nyi nza weta shɛ te hɛ,

⁴⁵pa kweci helape kezha tsene pəsəɗə, yɛ pɛlə ba'a yɛ zlerekwe kepisə ŋkwa. Pɛtɛ wəshi nyi menete nyighɛ Hiram kala nya 'yɛwete meghe Salomon kezha dzembe ghɛa Mahwətə ne, le mze kwa ghwə ghwə nya shɛanɛa vɛsəte hɛ ŋkɛ.

⁴⁶Mbe hɛɗi vɛsəte hɛ Hiram kwa zlərəa Zhəwrdɛŋe kwelɛ tepe ta meleme ta Səwkot le Sartan.

⁴⁷Pa Salomon tseɓeyi wəshi nyighɛ pɛtɛ mbe ghɛa Mahwətə. Ama kwele kwele hɛ kaɗema mbeli kadzeghete ɗaŋeɗa ta mze kwa tɛawetɛa nyi menehwe slene mbeli le.

⁴⁸Nahe Salomon ke'yɛwete kamene nda wəshi nyi kehi mbeli mbe ghɛa Mahwətə kakwa mze kwa tere tere: reghwetɛ ketere 'wərdə nya kamze kwa tere tere, tabele keve nda ɗafa ke Shala nya kamze kwa tere tere,

⁴⁹wəshi kentare yɛ paterela meŋe, nyi veyi mbeli te kema ta cɛ nya wɛŋe, mcɛfe te kwa zeme, mcɛfe te kwa gwela kamze kwa tere tere, yɛ ghwə ta wəfe, yɛ paterela, wəshi keseɗe kadzevare ŋkwa nyi le mze kwa tere tere,

⁵⁰yɛ weta, yɛ hwa, yɛ zlerekwe kepisə ŋkwa, yɛ helape, yɛ dəghwə nyi le mze kwa tere tere nya ganyɛ, ŋkwa nya mɛa gelembe nya mɛa cɛ nya heka mbeli “kaŋkwa nya wɛŋe” ba'a nyi mɛa gelembe nya mɛa cɛ nya kwele kamze kwa tere tere.

⁵¹Ma kwa nahemte slene ta ŋa ta ghɛa Mahwətə meghe Salomon ne, pa keleke wəshi nyi veyi yitenyɛ kaŋa Mahwətə, kala mze kwa ghwə ghwə, le mze kwa tere tere le kweci wəshi keghə keghə, pa beteyi hɛ mbe cɛ ketsene mcɛlə nyi mbe ghɛa Shala pɛtɛ.