Read kapsiki 1 Ka Meghea Kɛfi 8 Bible Online

1 Ka Meghea Kɛfi 8 - kapsiki bible

1 Ka Meghea Kɛfi 8

¹Pa meghe Salomon tsenete mbeli pelɛ Zhɛrəzalɛm: mbelia jama ta ka Israyɛl, ka meghe nyi mbe hwelefe, le mbeli nyi te ghəa ka Israyɛl nyi ghalanza kezha keleghe səndəkwəa jikə geva ta Mahwətə se mbe “Meleme ta David” nya heka mbeli zhɛkwa kaSiyon kadzeme ghɛa Shala.

²Pɛtɛ ka Israyɛl tsenete geva yitea meghe Salomon mbe terea Ɛtanim nya katere kwa mberefaŋe, te vəa gəsəkə.

³Ma kwa senji mbelia jama ta pɛtɛa ka Israyɛl, cape ka dzeghe Shala kakele səndəkwəa jikə geva.

⁴Pa ka dzeghe Shala le ka Lɛvi keleghe səndəkwəa Mahwətə kadzeme zlaɓe le cɛ lekwesa kebegeme le Shala ba'a kweci wəshi nyi keveyi geva kaŋa Shala nyi mbe.

⁵Ma kwa tsenete geva yɛ meghe Salomon le jikə ta ka Israyɛl mbe kema ta səndəkwə, pa hɛ dzeghekɛ melɛ le timɛti kwele kwele ba'a le sla kaɗema mbeli kaɓelate hɛ megela va wəba.

⁶Kwetere wəmbəa ŋkɛ, pa ka dzeghe Shala nyighɛ keleghe səndəkwəa jikə geva ta Mahwətə kadzete ŋkwa nya kehite geva kaŋa ŋkɛ, mbe cɛ nya heka mbeli “kaŋkwa nya wɛŋe ma”, mbe hwəa bidzəa shɛrəbɛŋe.

⁷Va nya nza ŋkɛ ne, tepele bidzəa shɛrəbɛŋe nyighɛ kənəa ŋkwa nya keveyi geva kaŋa səndəkwə kezha nza kənəa səndəkwəa shɛ ba'a kənəa geta lɛ nyi kele mbeli te.

⁸Ma kwa nza geta lɛ shɛhɛ biyake biyake, kanewe newe ghəa nci mbeli se mbe cɛ nya wəba nya mbe kema ta cɛ nya nza səndəkwə mbe, ama kanakɛ hɛ mbeli se pelɛ te ŋwela we. Mba hɛ te ŋkwa shɛ pa ɓeshi.

⁹Kwete hwa wəsə shɛ kwa səndəkwə nyagha keɗema pelɛ nyi slapesla slapesla nyi beteyi Moyize bake kwa we. Ma pelɛa shɛhɛ ne, pelɛ nyi kemave ŋkɛ pelɛ ghweme ta Horɛb, te və nya se Mahwətə kajikə geva le ka Israyɛl kwa kelemte hɛ ŋkɛ shave mbe Ɛzhipte.

¹⁰Ma kwa shavenji ka dzeghe Shala mbe ŋkwa nya wɛŋe ma nyagha ne, viɗi ləmbə viɗikɛ ghɛa Mahwətə.

¹¹Mba ka dzeghe Shala nyighɛ kashɛma mene slene ta nci va ləmbə nyagha, va nya nza ŋkɛ zləvəa Mahwətə nde viɗikɛ ghɛa Shala nyagha.

¹²Ma ke Salomon tsate lewela: «Mahwətə, gha nde zəzəte kanza mbe ŋkwa nya zhikwətəkwə təkwə.

¹³Nahe 'ya keŋate ŋa ghɛ kendeɗenyɛ, wərə na kanza mbe kaghala ghala!»

¹⁴Pa meghe zhɛreghe geva laka ka Israyɛl nyi ketsenete geva pɛtɛ meslete, pa wəpikɛ hɛ.

¹⁵Ma ke: «Hana 'ya sha Mahwətə, Shala ta ka Israyɛl nya kegezete nda ghena ke yiteyɛ ɗa David le mɛa ŋkɛ, kayipəyi kwa le dzeve ta ŋkɛ kwa gezete ŋkɛ:

¹⁶‹Ghala nya fəakave mbelia ɗa ka Israyɛl 'ya shave mbe Ɛzhipte ne, kegha 'ya kantave meleme hwa meleme ta pɛtɛa ka Israyɛl kezha ŋate ghɛ nya nza sləa ɗa te we, ama nahe 'ya kentave David kezha nza ŋkɛ kameghea mbelia ɗa ka Israyɛl.›

¹⁷Ma yiteyɛ ɗa ne, mbe zəzə ŋkɛ kezha ŋate nda ghɛ ke Mahwətə, Shala ta ka Israyɛl.

¹⁸Ama nahe Mahwətə kegezete nda ke David: ‹Nahe na kemenete zəzə ganyɛ yitea ŋa ghɛa Shala kezha sləa ɗa.

¹⁹Ama gha nde teŋa ghɛa shɛ we, wəzege ta ŋa nya kesawa hwa gha. Gheŋkɛ nde teŋa ghɛ kezha sləa ɗa!›

²⁰Ma tsetsenya tse gɛ, nahe Mahwətə keyipəyi ghena nyi gezete ŋkɛ kwa: nahe 'ya kedzete zhia yiteyɛ ɗa David, ntishɛ 'ya pelɛ pasla meghea ka Israyɛl kala nya gezete Mahwətə, nahe 'ya keŋate ghɛ nya keveyi geva tekeleke kaŋa Mahwətə, Shala ta ka Israyɛl.

²¹Nahe 'ya kehite ŋkwa mbe kezha ve səndəkwə nya nza ghena ta jikə geva kwa, jikə geva nya menete Mahwətə le ka shihɛ ɓə kwa fəakave hɛ ŋkɛ shave mbe Ɛzhipte.»

²²Kwetere wəmbəa ŋkɛ, ghereŋe Salomon mbe kema ta reghwetɛa Mahwətə kwa ntsə kwa ntsə le ka Israyɛl nyi ketsenete geva pɛtɛ, pa kafete dzeve yitea ghweme kasəkwə ghə,

²³ma ke: «Mahwətə, Shala ta ka Israyɛl, kwete Shala shɛ kala gha tɛape, ya pelɛ yitea ghweme, ya kwake te hɛɗi kezha yate jikə geva le ganyɛa mehele laka ka mavashia ŋa nyi kedzeghwa mbe kema ta ŋa le wənəa nci pɛtɛ we.

²⁴Nahe na kemenete nda wəsə nya meɗeyi nda na ke yiteyɛ ɗa David. Wəsə nya gezete nda na le mɛa ŋa, nahe na keyipəyi kwa le dzeve ta ŋa kala nya nakɛ ghen'yɛ ɓeshi.

²⁵Ma tsetsenya gɛ Mahwətə, Shala ta ka Israyɛl, menete wəsə nya meɗeyi nda na ke mava ta ŋa David nya kayite ɗa, kwa gezete nda na: ‹Ma kenza nde le wənə nya tiɗiɗi dzeghwa hwelefe nyi ketesawa mbe gha kwa kema ta ɗa kala nya se na kadzeghwa ne, fəyitekeghə geze ŋa 'ya katenza kwete hwa hɛ kaghala ghala kameghea ka Israyɛl kwa sebe ta ŋa.›»

²⁶Tsetsenya gɛ Mahwətə, Shala ta ka Israyɛl, kasəkwə 'ya, menete wəsə nya meɗeyi nda na ke yiteyɛ ɗa David gi!

²⁷Kaganda nza Shala kanzanyɛ te hɛɗi tse na? Ghweme le ghəa ŋkɛ kaba ne, kambakete ŋa ŋkɛ ya tsema kwelea ŋkɛ we! Halama ghɛa Shala nya ɓɛhwɛ nya ŋate 'ya na!

²⁸Veyi sleme yitea səkwə ta ɗa le tsa ŋa təhwə təhwə, 'ya nya kamava ta ŋa, Shala Mahwətə ta ɗa! Fate heka le səkwə nya səkwə ŋa mava ta ŋa ɓeshi.

²⁹Pelaghe ntsə ta ŋa kənəa ghɛa Shala nya viɗi le veci, kwa nza ŋkɛ ma pa na gezete te ŋkwa shɛ: “Teke tenza sləa ɗa”. Fate səkwə nya səkwə mava ta ŋa laka ŋkwa nya.

³⁰Fate heka ta ɗa le heka ta mbelia ŋa ka Israyɛl kwa səkwə ŋa n'yɛ teke te ŋkwa nya. Fate n'yɛ te ŋkwa nya nza na pelɛ ghweme Mahwətə, fate n'yɛ shɛ na zhɛakɛ heli yitea ghen'yɛ.

³¹Ma kenakɛ kwete ghen'yɛ wəndə kebezemte nda ghena ke kwete, wərə ghen'yɛ ka'yɛwe nda fela pa bezla yite. Ma kese ŋkɛ kazeme fela mbe kema ta reghwetɛa ŋa nya ki ghɛa ŋa,

³²gha, Mahwətə nya pelɛ ghweme, pa na kafa, kamene slene te. Meha ghwə te ka mavashia ŋa kezha neghave nda fete ke wəndə nya kebezemte ghena ba'a kakelemte ghena kwa ghə va wəndə nya tiɗiɗi, nya ɗema fete ve.

³³Ma keɗate mbelia ŋa ka Israyɛl ka jaga ta nci kebezemte ŋa ghena hɛ ne, ma kezhɛreke geva hɛ ka'yɛwe təhwə təhwə va gha, katsahe sləa ŋa ba'a kasəkwə le mpi ŋa dzeve teke ki ghɛa nya,

³⁴gha Mahwətə nya pelɛ ghweme, pa na veyite sleme yite, pa na kelemte nda beze ghena ta nci ke mbelia ŋa ka Israyɛl ba'a pa na zhɛneke hɛ kadzete hɛɗi nya ndeke nda na ke ka shihɛ nci.

³⁵Ma keŋzlete geva ghweme kaɗema va shɛ va nya bezemte ŋa ghena mbelia ŋa ka Israyɛl, ma kezhɛreke geva hɛ laka ŋkwa nya kasəkwə ŋa, katsahe sləa ŋa ba'a ka'yɛwe təhwə təhwə va beze ghena ta nci kwa ɗate hɛ na,

³⁶gha, Mahwətə nya pelɛ ghweme, pa na kelemte nda beze ghena ta ka mavashia ŋa le mbelia ŋa ka Israyɛl te wənə. Pa na tekete nda dzeghwa kwa hweŋkwa ganyɛ ke hɛ, pa na keleke nda va ke hɛɗia ŋa nya ndeke nda na ke hɛ kaŋa nci.

³⁷Ma vəa ŋkwa nya temenete geva ma keɗema nya tenza ba te hɛɗi, nya teghwelenji keɗema tedanji wəshi nyi te wəve, nya tese yɛ dzale keɗema yɛ zhamaya kwele kwele, nya tesa nda yaka ka jaga ke ka Israyɛl pa mbe meleme nyi berete berete ta nci, nya temenete geva yayata ndiremi keɗema yayata zereghwe,

³⁸ya va yayata ɗa nya te hɛ səkwə ŋa hɛ keɗema 'yɛwe təhwə təhwə hɛ, ya wəndə kwetɛŋenyɛ keɗema mbelia ŋa pɛtɛa ka Israyɛl ka səkwə, ma keɗepete beze nya te hɛ hɛ mbe wənəa nda kafe dzeve hɛ laka ghɛ nya kasəkwə ŋa ne,

³⁹gha nya kenza pelɛ yitea ghweme, vate sleme yite, kelemte nda beze ghena ta nci ke hɛ, nza hwa ghena shɛ nda newe na kala nza ta yayata wəndə le dzeghwa ta ŋkɛ, kwa nza ŋkɛ nahe na keɗepe wənəa wəndə. Va nya nza ŋkɛ gha kwetɛŋe ŋa, nahe na keɗepe wənəa mbeli pɛtɛ.

⁴⁰Mene kala nyagha nda nza ka Israyɛl kahawe va gha keveci keveci kala nza ta nci le ntsə te hɛɗi nya ndeke nda na ke ka shihɛ nci.

⁴¹Katefa kweci hwelefefi kageze sləa ŋa mbeli, le berete ta ŋa. Ma tsagha, ma mentiɓə nya keɗema kande Israyɛl, wərə ŋkɛ kase se mbe kwete meleme nya cakeɗa kasəkwə ŋa ki ghɛ nya.

⁴²

⁴³Gha nya kefa n'yɛ pelɛ ghweme nya nza na, menete nda ke mentiɓəa shɛ kala wəsə nya 'yɛwe ŋkɛ va gha. Ma tsagha ne, pɛtɛa mbeli nyi te hɛɗi katehawe va gha kala nya hawe mbelia ŋa ka Israyɛl va gha. Kateɗepe hɛ, ma ghɛa Shala nya ŋate nya 'ya ne, kaŋa ŋa veyi geva ŋkɛ.

⁴⁴Ma te və nya tedzemte mbelia ŋa kampa le ka jaga ta nci, laka ŋkwa nya ncɛte nda na ke hɛ, ma kezhɛrete geva hɛ laka meleme nya ntave nya na ba'a laka ghɛ nya ŋate 'ya te sləa ŋa, ma kesəkwə ŋa hɛ, gha Mahwətə ne,

⁴⁵ve sleme yitea səkwə ta nci pelɛ ghweme, fa nehwene ta nci ba'a kemanakɛ hɛ.

⁴⁶Ma vəa ŋkwa nya tebeze ŋa ghena ka Israyɛl, kwa nza nde kaɗema wəndə nya keghama kabezemte ghena shɛ, nda kwete katehwepe wənə na va hɛ laka nya ve hɛ mbe dzeve ta ka jaga ta nci nyi ketefə hɛ kaka mavashi kadzete hɛɗia nci nya dekwede keɗema nya cakeɗake,

⁴⁷ma kezəzəte ghena hɛ te hɛɗi nya tefəghe hɛ hɛ kadzete, ma kempiyi dzeve hɛ ba'a kenehweneyi ŋa nehwene hɛ te hɛɗia ka hərəte hɛ, ma ke hɛ: Nahe ghen'yɛ kebezemte ŋa ghena, kemenete wəsə kwa ndiremi, kenza kaka beze ghena,

⁴⁸ma kezhɛreke geva hɛ sha gha le wənə kwetɛŋe ba'a le mehele kwetɛŋe te hɛɗia ka jaga nyi kefəhwe hɛ, ma kesəkwəte ŋa hɛ laka hɛɗi nya ndeke nda na ke ka shihɛ nci, laka meleme nya ntave na ba'a laka ghɛ nya ŋate 'ya te sləa ŋa ne,

⁴⁹fa səkwə ta nci ba'a nehwene ta nci pelɛ ghweme nya nza na ba'a kemanakɛ hɛ.

⁵⁰Kelemte jaɗafa nya menete ŋa mbelia ŋa te wənə, kelemte fama ghena ta nci laka gha te wənə ba'a ndeke nda zhɛ heli yitea hɛ ke ka jaga ta nci.

⁵¹Kwa nza ŋkɛ mbelia ŋa hɛ, ŋa ŋa hɛ, ghenci nyi fəakave na shave mbe tepe ta yaka nya wəba nya pelɛ Ɛzhipte.

⁵²Pelemte ntsə ta ŋa yitea dzeve nya mpi ŋa mava ta ŋa le mbelia ŋa ka Israyɛl Mahwətə, fate n'yɛ pɛtɛ kala yayata və nya tsa ŋa lewela ghen'yɛ kwa.

⁵³Va nya nza ŋkɛ gha nde ntave n'yɛ hwa mbeli nyi te hɛɗi pɛtɛ tekeleke kezha nza kambeli ŋa, kala nya gezeke na laka nde mene slene ta ŋa Moyize, vəa ŋkwa nya fəakave ka shihɛ n'yɛ na shave mbe Ɛzhipte.

⁵⁴Ma kwa kiɗimte səkwə ghə Salomon le mpi nda dzeve ke Mahwətə, pa sate te ŋkwa mbe kema ta reghwetɛ nya gwəɗəŋənyɛ ŋkɛ le dzeve tekafe yitea ghweme,

⁵⁵meghereŋe ne, pa wəpikɛ ka Israyɛl nyi ketsenete geva. Ma ke zlape zlape:

⁵⁶«Katsa nda hana 'ya ke Mahwətə nya kendeke nda ŋkwa kezhɛne mpi nya ke ka Israyɛl nyi kambelia ŋkɛ kala nya meɗeyi ŋkɛ: kwete shɛ hwa ghena ganji nyi gezeke ŋkɛ laka mava ta ŋkɛ Moyize mba kaɗema kemenete geva we.

⁵⁷Nza Shala Mahwətə ta ɓəmə le gheɓəmə kala nya se ŋkɛ le ka shihɛ ɓəmə, mba ŋkɛ kesərəakɛ ɓəmə, mba ŋkɛ keɗema kakemane ɓəmə.

⁵⁸Zhɛreghe wənəa ɓəmə ŋkɛ laka gheŋkɛ baŋe mə kadzeghwa kwa hweŋkwa ta ŋkɛ ba'a kezha yate wəshi mahalegəa ŋkɛ mə, le ghena nyi gezeke ŋkɛ le wəshi keshi nyi 'yɛwakɛ ŋkɛ kamene ka shihɛ ɓə.

⁵⁹Pa səkwə ghə nya se 'ya ka'yɛwe va Shala Mahwətə ta ɓəmə nza kwa ntsə ta ŋkɛ viɗi le veci kezha kemane ɓəmə ŋkɛ, 'ya mava ta ŋkɛ le pɛtɛa ka Israyɛl kala wəsə nya mawe mə keveci keveci kwa nza mə kambelia ŋkɛ.

⁶⁰Ma tsagha, kateɗepe mbeli nyi te hɛɗi pɛtɛ Mahwətə ya kaShala kaɗema kwete shɛ.

⁶¹Nza wənəa ŋayɛ tiɗiɗi kaŋa Shala Mahwətə ta ɓəmə, mba kedzeyi kwa kwete ŋkwa kezha dzeghwa mə kala nya 'yɛwete ŋkɛ va gheɓə ba'a kezha yate wəshi mahalegəa ŋkɛ ba'a ghena nyi gezeke ŋkɛ kala nya ɓeshi nya.»

⁶²Pa yɛ meghe Salomon le ka Israyɛl nyi tagha dzeghekɛ nda melɛ ke Mahwətə.

⁶³Pa Salomon dzeghekɛ melɛ le sla 22.000 ba'a kwi le timɛti 120.000, kamelɛ kejikə ghə kezha gha kamene slene mbe ghɛa Mahwətə.

⁶⁴Ma te vecia shɛnyɛ ne, pa meghe veyi ŋkwa nya te tepe ta ŋwela nya mɛa ghɛa Mahwətə tekeleke, kwa nza ŋkɛ tagha dzeghekɛ melɛ kwa tere tere ŋkɛ le wəsə gəmə nyi keleke mbeli ba'a merege ta melɛa kwelɛŋe, va nya nza reghwetɛ kwa mze kwa tɛawetɛa nya mbe kema ta ghɛa Shala keɓɛhwɛ kezha nza yɛ melɛ kwa tere tere, le wəsə gəmə nyi keleke mbeli ba'a merege ta melɛa kwelɛŋe mbe.

⁶⁵Te tere kwa mberefaŋe nyagha menete gəsəkəa Salomon zlaɓe le ka Israyɛl nyi ketsenete geva le. Katsene nya wəba se ŋkɛ: se mbe meleme pɛtɛ se hɛ, se mbe Lebo-Hamat laka bela kwa gwela hwa'a va hələa Ɛzhipte, laka bela kwa zeme. Pa hɛ menete gəsəkəa shɛ mbe kema ta Mahwətə kahɛ mberefaŋe, zhɛne zhɛkwa mberefaŋe kweci hɛ, jikə ta ŋkɛ hɛ meŋe wəfaɗeghəmbe.

⁶⁶Ma te hendɛ ta ŋkwa te kwa deghese ta hɛ mbe shikwə kwa bake, pa Salomon gezete nda ke ka Israyɛl kapesle hɛ sha ghɛa nci. Pa hɛ lə ba'a njiŋwakɛ meghe, cape hɛ le zlama kwa wənə kwa menete nda wəshi ganji Mahwətə ke David nya kande mene slene ta ŋkɛ ba'a ke ka Israyɛl nyi kambelia ŋkɛ.