Read kapsiki 2 Ka Meghea Kɛfi 10 Bible Online

2 Ka Meghea Kɛfi 10 - kapsiki bible

2 Ka Meghea Kɛfi 10

¹Meghe Akab ne, mberefaŋemsə ŋwale ve le yɛ ka shihɛnyɛ nyi mbe Samari le nza ta nci. Pa Zhɛhə ghwenakɛ palepa kalə kadzembe meleme ke mbeli nyi te ghə mbe Zhizrɛyɛl, ke mbelia jama ba'a mbeli nyi kekele ŋwale Akab. Wa nya ghena nya rafete nya ŋkɛ:

²«Gheyɛ nyi te ghəa ŋwalea meghe, wəmata gədəwə ya va gheyɛ, gədəwəa lɛmə ya va gheyɛ, le yɛ wəshi kempa. Mbe meleme nya ya mbeli megela yɛ le nza. Ma kemavema ta ŋayɛ ke palepa nya ne,

³neweve mə nya kenza gare kele meghe hwa ŋwalea ŋkɛ keɗema hwa ka shihɛnyɛ, pa yɛ veyi ŋkɛ pelɛ pasla ta meghe nda lə yɛ kampa yitea ghɛa meghe.»

⁴Pɛtɛa mbelia shɛhɛ shewə va ghazlənə, ma ke hɛ kwelɛ ghəa nci: «Bake ka meghe, kezhɛnete nda ghə hɛ ke Zhɛhə we ne, za ma mə ke hɛ na?»

⁵Wəndə nya te ghəa ghɛa meghe, wəndəa kwelea ka sewajɛ nya mbe meleme, mbelia jama le mbeli nyi te ghəa ŋwalea Akab, pa hɛ zhɛnete nda mɛ ke Zhɛhə: «Ka mene ŋa slene ghen'yɛ, pɛtɛ temene wəsə nya geze n'yɛ na kamene ghen'yɛ. Kave wəndə ghen'yɛ kameghe tɛape we. Mene wəsə nya nakɛ na megela.»

⁶Pa Zhɛhə rafete nda kwa bake ta palepa ke hɛ. Ma ke sha hɛ: «Ma kenza nde kaŋa ɗa yɛ mbeli ne, katefa ɗa ghena yɛ ne, slamte mə ghə te ŋwalea meghe le yɛ ka shihɛnyɛ, nda se yɛ sha 'ya teke mbe Zhizrɛyɛl tsetse və hendɛ.» Ma mbelia ghɛa meghe nyi mberefaŋemsə nyighɛ ne, ki ghɛa mbelia jama hɛ kezha dəkwə hɛ mbeli.

⁷Ma kwa kemave palepa shɛ mbelia jama ne, pa hɛ fəte ŋwalea meghe mberefaŋemsə, slamte ghə te hɛ, beteyi ghəa nci kwa kwaciga ba'a ghweneghe nda mbeli le hɛ ke Zhɛhə, mbe Zhizrɛyɛl.

⁸Pa kwete nde ghwene se kagezete nda nahe mbeli kefəke ghəa ŋwalea Akab ke shɛ: ma ke Zhɛhə sha hɛ, tsenete mə bake ŋkwa yitea hɛ mɛa degha ta meleme nda nza hɛ tagha pa va hendɛ!

⁹Ma te hendɛ ta ŋkwa masheke, pa Zhɛhə shave kaslete mɛa meleme, ma ke sha mbeli: «Nahe yɛ kenza tiɗiɗi, 'ya nde ɗema ghena ta Yoram ba'a peslekɛ ŋkɛ. Ama wa nde mpəmte mbeli nyi wa?

¹⁰Ɗepete hɛ, ketene kwete ghena nyi gezete Mahwətə te ghəa mbelia ghɛa Akab kaɗema kemenete geva we. Pɛtɛ Mahwətə keyipəte ghena nyi gezete ŋkɛ laka mɛa nde mɛ ŋkwa Ɛli.»

¹¹Ma kwa sebe ta ŋkɛ ne, pa Zhɛhə mpəmte hwelefe ta ghɛa Akab nyi mbe Zhizrɛyɛl: Pa ŋkɛ mpəmte mbelia jama ta Akab, ka menəhɛnyɛ ba'a pɛtɛa ka dzeghe Shala ta ŋkɛ, wəndə shɛ kesərəakɛ ŋkɛ teghweme we.

¹²Kwa sebe ta ŋkɛ pa Zhɛhə slə kalə kadzembe Samari: ma kwa hweŋkwa, te ŋkwa nya heka mbeli kaghedəkwəa ka ya wəshi.

¹³Pa begeme le ka menəhɛnyɛa Ahaziya meghea ka Zhəwda. Pa ka'yɛwe va hɛ: «Kawa yɛ wa?» Ma ke hɛ zhɛnete nda: ka menəhɛnyɛa Ahaziya. «Ghen'yɛ kalə kanjiŋwe ŋwalea meghe ba'a ŋwalea male ta meghe.»

¹⁴Ma ke Zhɛhə gezete nda ghena ke mbeli nyi yite le berete: «Kekeseve mə hɛ le mpi.» Pa hɛ kekeseve hɛ le mpi, mpəmte hɛ ba'a beteyi geva ta nci kwa belagejia ghedəkwəa ka ya wəshi. Pɛtɛa nci ne, wəfaɗemsə bakeghəmbe hɛ, kesərəakɛ wəndə Zhɛhə le mpi we.

¹⁵Ma kwa slə ŋkɛ tagha kalə mbe kema ɓahwe, begeme hɛ le Yonadab wəzege ta Rɛkab, kase ŋkɛ shɛ, pa Zhɛhə njiŋwakɛ ma ke shɛ: Kaganda kwa wənəa ŋa kala nya nza ŋa ɗa na? Ma ke Yonadab zhɛnete nda: Tsagha nde, ma nda tsagha nde ne ndeke ɗa dzeve ta ŋa ke shɛ, pa Yonadab ndeke nda dzeve. Pa Zhɛhə keseghe kadzeme wəmata gədəwəa ŋkɛ.

¹⁶Ma ke shɛ: Mbi ɓə zlaɓe nda nakɛ ɗe ta ɗa na kaɗe Mahwətə. Pa keleke pelɛ wəmata gədəwəa ŋkɛ.

¹⁷Ma kwa ntsehe Zhɛhə mbe Samari ne, pɛtɛ mpəmte mbelia Akab nyi mbe Samari, pɛtɛ zamte sebe te hɛ kala nya gezete Mahwətə te ghəa ŋkɛ laka mɛa Ɛli.

¹⁸Pa Zhɛhə tsenete mbeli pɛtɛ ma ke sha hɛ: Nahe Akab kese kamene nda slene ke Ba'al, za ma temene nda Zhɛhə.

¹⁹Ma tsetsenya gɛ hekakɛ ɗa mə ka mɛ ŋkwa ta Ba'al pɛtɛ, le ka mene nda slene pɛtɛ, le pɛtɛa ka dzeghe nda melɛ, yagha wəndə katene ya kwetɛŋe, kwa nza ŋkɛ ne, 'ya katedzeghe nda melɛ nya wəba ke Ba'al: Ma wəndə nya keɗema kese ne, kanza ŋkɛ teghweme we, le berete ghereŋe Zhɛhə te ghena shɛ kezha mpə mbeli nyi kemene nda slene ke Ba'al.

²⁰Vatse geze ŋkɛ kezha zlape gəsəkə mbeli kezha Ba'al. Pa mbeli zlapete gəsəkəa shɛ.

²¹Pa ghwenakɛ mɛ te hɛɗia ka Zhizrɛyɛl pɛtɛ: Pɛtɛa ka mene slene ta Ba'al kase, ketene ya kwetɛŋe nya kesema we, pa hɛ dzembe cɛa Ba'al ne viɗi cɛa shɛ.

²²Ma ke Zhɛhə sha wəndə nya keya lekwesa: fəakave lekwesa kezha ka mene slene ta Ba'al pɛtɛ. Pa wəndə nyagha fəakave nda ke hɛ.

²³Pa yɛ Zhɛhə lə kadzembe ghɛa Ba'al le Yonadab, wəzege ta Rɛkab, ma ke sha ka hawe va Ba'al: «Newemte mə ŋkwa megela kenza ŋkɛ kaɗema nde hawe va Shala ta Israyɛl hwa gheyɛ, ama deke ka hawe Ba'al ya teke kaghəa nci.»

²⁴Pa yɛ Zhɛhə le Yonadab dzembe kezha dzeghe nda yɛ melɛ kejikə ghə ba'a yɛ melɛ kwa tere tere ke Ba'al. Nahe Zhɛhə kebeteyi ka sewajɛ deghesemsə pelɛke te ŋwela, ma ke sha hɛ: «Ma wəndə nya kembelakɛ wəndə kwetɛŋe hwa mbeli nyi teve ŋayɛ nyi 'ya ne, katemte ŋkɛ te ŋkwa ŋkɛ.»

²⁵Ma kwa kiɗimte dzeghe nda melɛ kwa tere tere hɛ ke Ba'al ne, ma ke Zhɛhə sha ka ya ŋkwa ba'a mbelia jama ta ka sewajɛ: Dzembe mə kampəmte hɛ, yagha ya kwetɛŋe kashave. Pa hɛ mpəmte hɛ le kafayɛ. Pa ka ya ŋkwa le ka jama jama ta ka sewajɛ mpəyi hɛ mbagha, pa hɛ dzembe cɛa Ba'al.

²⁶Pa hɛ fəakave selə nyi keveyi geva tekeleke mbe ghɛa Ba'al ba'a pa hɛ teremte hɛ.

²⁷Pa hɛ ŋzlamte pa ta Ba'al kaŋzlamte selə nya mbe cɛ ŋkɛ kabeteyi te kəsə pa va ɓeshi.

²⁸Pa Zhɛhə zamte sebe te Ba'al hwa pɛtɛa ka Israyɛl.

²⁹Ama kesərəakɛ mene fete ta Zhɛrobowam, wəzege ta Nebat, nya kefəame mbelia ka Israyɛl mbe mene fete, kaneghamte wəsə kwa mze nya menete mbeli kala leve ta sla nya mbe Bɛtɛl ba'a Dan Zhɛhə we.

³⁰Ma ke Mahwətə sha Zhɛhə ɓiyitsa: Ma kwa nza ŋkɛ nahe na kemenete wəsə nya kenza megela kwa ntsə ta ɗa ne, nahe na kemenete nda ke mbelia ghɛa Akab kala nya ɗete 'ya, ma ŋwalea ŋa pa te shi kwa wəfaɗe ne, kameghea ka Israyɛl tenza hɛ te ŋkwa ŋa.

³¹Ya tsagha shɛ ŋkɛ ne, kese Zhɛhə kakele zəzə kwa wənəa ŋkɛ kamene kala nya ɗe wəshi mahalegəa Shala Mahwətə ta ka Israyɛl we. Keneghamte jaɗafa nyi fəame ka Israyɛl Zhɛrobowam mbe mene ta ŋkɛ we.

³²Ma vəa ŋkwa shɛ ne, nahe Mahwətə keghate shifə hɛɗia ka Israyɛl, pa Hazayɛl ɗate hɛ seke laka yayata ghala ta hɛɗia nci pɛtɛ.

³³Laka Zhəwrdɛŋe laka ŋkwa nya same veci, pa ɗate hɛɗia ka Gala'ad pɛtɛ, ŋa ka Gad, ŋa ka Rəbɛn, ba'a ŋa Manasɛ, se laka Arowɛr sawa laka hələa Arnon pa va Gala'ad ba'a Bashan.

³⁴Ma kweci ghena ta Zhɛhə nyi ketene ba'a nyi menete ŋkɛ, le yɛ kwelea ŋkɛ ne, nahe hɛ kerafeyi geva mbe palepa ta ghena nyi keveci keveci ŋa ka meghea ka Israyɛl.

³⁵Pa Zhɛhə menete va bakemsə degheseghəmbe kameghea ka Israyɛl mbe meleme Samari. Ma kwa mte ŋkɛ, pa mbeli lamte ŋkɛ mbe Samari. Zhowakaz, wəzege ta ŋkɛ nde kelete meghe te ŋkwa ŋkɛ.