Read kapsiki 2 Ka Meghea Kɛfi 15 Bible Online

2 Ka Meghea Kɛfi 15 - kapsiki bible

2 Ka Meghea Kɛfi 15

¹Ma mbe kwa bakemsə mberefaŋeghəmbe ta va ta Zhɛrobowam mbe meghe te ghəa ka Israyɛl ne, Azariya wəzege ta Amasiya nde kelete meghe mbe Zhəwda.

²Va ta ŋkɛ meŋe ŋkwaŋeghəmbe nda dzembe meghe ŋkɛ, pa ŋkɛ menete va mcɛfemsə bakeghəmbe kameghe mbe Zhɛrəzalɛm. Wəzha ta ka Zhɛrəzalɛm meghekɛ, Yekoliya sləa nta.

³Wəsə nya kehi yamene Azariya kwa ta Mahwətə, kala yitenyɛ Amasiya.

⁴Ya tsagha shɛ ŋkɛ ne, ashɛ keŋzlamte kələŋə nyi dzeghe melɛ mbeli te we. Mba mbeli kalə dzeghe melɛ le wəshi keseɗa ba'a katere 'wərdə kwa hə hə.

⁵Pa Mahwətə vate zereghwe ta derena kwele kwele te meghe Azariya: mba derena shɛ te pa te mte ta ŋkɛ. Pa kanza le ŋa ŋkɛ ghɛ cakeɗa cakeɗa le mbeli. Wəzege ta ŋkɛ Yotam, wəndə kwele nya te ghəa ghɛa meghe, pa kasleke mbeli nyi te hɛɗia shɛ.

⁶Ma nyi ketene ghena ta Azariya ne, nahe hɛ kenza kerafe rafe mbe palepa ta wəshi nyi menete ka meghea ka Zhəwda.

⁷Ma kwa mte ŋkɛ, pa mbeli lamte ŋkɛ kwa kwele ta mbelia nci mbe meleme ta David. Yotam, wəzege ta ŋkɛ nde kelete meghe te ŋkwa ŋkɛ.

⁸Ma mbe va ta Azariya mahekenemsə degheseghəmbe mbe meghea ka Zhəwda, Zakari wəzege ta Zhɛrobowam ya kameghea ka Israyɛl mbe Samari. Deke ŋkwaŋe terea ŋkɛ mbe meghe.

⁹Wəsə nya kehima kwa kema ta Mahwətə yamene ŋkɛ, kala ka shihɛnyɛ. Kesərəakɛ mene jaɗafa nyi kala ŋa Zhɛrobowam wəzege ta Nebat nya ketsəkwəame ka Israyɛl mbe mene jaɗafa ŋkɛ we.

¹⁰Shaləwm, wəzege ta Yabɛsh, tsate ghena yite, peslekɛ ŋkɛ te ŋwela kwa ntsə ta mbeli, pa dzete meghe te ŋkwa ŋkɛ.

¹¹Ma nyi ketene ghena ta Zakari ne, nahe hɛ kenza kerafe rafe mbe palepa ta slene ta ka meghea ka Israyɛl.

¹²Tsetse yipəte geva ghena nya gezete nda Mahwətə ke Zhɛhə: «Ka shihɛ ŋa pa te kwa wəfaɗe ta shi ne, kamene meghe hɛ te ŋkwa ŋa hwa ka Israyɛl.»

¹³Shaləwm wəzege ta Yabɛsh, kekelete meghea ka Israyɛl mbe va kwa mahekenemsə meslighəmbe ta Azariya kameghea ka Zhəwda. Ama deke tere kwetɛŋe menete ŋkɛ te meghe mbe Samari.

¹⁴Pa Menahɛm wəzege ta Gadi, se shave mbe Tirsa, kadzembe Samari, pa peslekɛ Shaləwm. Pa kelete meghe te ŋkwa ŋkɛ.

¹⁵Ma nyi ketene ghena ta Shaləwm ne, nahe hɛ kenza kerafe rafe mbe palepa ta slene ta ka meghea ka Israyɛl. Pa mbeli tsate ghena yitea Zakari.

¹⁶Pa Menahɛm ɗate meleme ta ka Tifsa. Kampəkawa mbeli nyi mbe ba'a kabezemte hɛɗi nyi laka ŋkwa shɛ slə mbe Tirsa pa mbe Tifsa. Ma nda ɗa melemea shɛ ŋkɛ ne, kwa ɗema mbeli kepele nda ŋkwa kedzembe meleme, perawemte hwə te mi nyi le hwə pɛtɛ.

¹⁷Mbe va kwa mahekenemsə meslighəmbe ta va ta Azariya te meghea ka Zhəwda, Menahɛm wəzege ta Gadi, ya kameghea ka Israyɛl. Va meŋe menete ŋkɛ te meghe mbe Samari.

¹⁸Mbe nza ta ŋkɛ pɛtɛ ne, wəshi nyi keɗema kehi yamene ŋkɛ kwa kema ta Mahwətə, kesərəakɛ mene jaɗafa nyi kala ŋa Zhɛrobowam wəzege ta Nebat we, nya ketsəkwəame ka Israyɛl mbe mene jaɗafa.

¹⁹Pa Pəwl, meghea ka Asiri dzembe hɛɗia Israyɛl. Pa Menahɛm ndeke nda kiləwə mze kwa ghɛmɛ 30.000 kezha kemane ŋkɛ kave nda berete ke meghea ŋkɛ.

²⁰Ma nda tsenete cɛdɛ nya Menahɛm ne, jaɓeregwale yatsehete ka Israyɛl. Yayata nde mcɛlə ne, dəɓərə mcɛfemsə yaŋki ŋkɛ. Ma vəa ŋkwa nya fəave nda dəɓərəa mze kwa tɛawetɛa shɛhɛ mbeli ke meghea ka Asiri ne, pa slənyɛ te hɛɗia ka Israyɛl ba'a zhɛneghe geva kalə sha ghɛa ŋkɛ.

²¹Ma nyi ketene ghena ta Menahɛm ne, nahe hɛ kenza kerafe rafe mbe palepa ta slene ka meghea ka Israyɛl.

²²Ma kwa mte Menahɛm ne, wəzege ta ŋkɛ Pekahiya ya kameghe te ŋkwa ŋkɛ.

²³Ma mbe kwa mcɛfemsə va ta Azariya te meghea ka Zhəwda, Pekahiya wəzege ta Menahɛm ya kameghea ka Israyɛl mbe Samari kava bake.

²⁴Wəshi nyi keɗema kehite geva yamene ŋkɛ kwa kema ta Mahwətə, kesərəakɛ mene jaɗafa nya kala ŋa Zhɛrobowam, wəzege ta Nebat, nya ketsəkwəame ka Israyɛl mbe mene jaɗafa we.

²⁵Kwete wəndə Pɛka sləa ŋkɛ, wəzege ta Remaliya, nya kese kawəndə kwelea ka sewajɛ kempa, tsate ghena yite. Pa se le mbeli mcɛfemsə se mbe Gala'ad, pa hɛ maghe kənə mbe kwete cɛ ki ghɛa meghe. Ma kwa peslekɛ ŋkɛ ne, pa kelete meghe te ŋkwa ŋkɛ.

²⁶Pɛtɛa ghena ta Pekahiya nyi ketene le yɛ slene ta ŋkɛ nahe hɛ kenza kerafe rafe mbe palepa ta ka meghea ka Israyɛl.

²⁷Ma mbe va kwa mcɛfemsə bakeghəmbe ta Azariya mbe meghe mbe Zhəwda ne, Pɛka, wəzege ta Remaliya ya kameghea ka Israyɛl mbe Samari. Bakemsə va ta ŋkɛ te meghe.

²⁸Wəshi nyi keɗema kehite geva yamene ŋkɛ kwa kema ta Mahwətə, kesərəakɛ mene jaɗafa nyi kala ŋa Zhɛrobowam wəzege ta Nebat, nya ketsəkwəame ka Israyɛl mbe mene jaɗafa ŋkɛ we.

²⁹Ma vəa ŋkwa nya mene meghe Pɛka mbe ka Israyɛl ne, pa Tɛglat-Falasar meghea ka Asiri, pa kelehwe meleme Yon, Abɛl-Maka, Yanowa, Kɛdɛsh ba'a Hasor, gheŋkɛ hɛɗia ka Gala'ad, le ŋa ka Galilɛ le pɛtɛa hɛɗia ka Nɛftali. Pa fəghe mbelia hɛɗi nyi kadzembe Asiri.

³⁰Ozɛ wəzege ta Ɛla, pate ŋwashɛ ŋwashɛ yitea Pɛka wəzege ta Remaliya. Pa ŋkɛ peslekɛ ŋkɛ ba'a kelehwe meghe. Mbe va kwa bakemsə ta Yotam wəzege ta Azariya kameghea ka Zhəwda.

³¹Ma nyi ketene ghena ta Pɛka ne, mbe palepa ta ka meghea ka Israyɛl le yɛ slene ta ŋkɛ nyi menete ŋkɛ.

³²Ma mbe kwa bake ta va ta Pɛka wəzege ta Remaliya te meghea ka Israyɛl ne, Yotam wəzege ta Azariya, nde kelete meghea ka Zhəwda.

³³Va ta ŋkɛ bakemsə mcɛfeghəmbe nda dzembe meghe ŋkɛ, va meŋe ŋkwaŋeghəmbe menete ŋkɛ te meghe mbe Zhɛrəzalɛm. Sləa meghekɛ ne, Yerəwsha, wəzha ta Sadok.

³⁴Wəshi nyi ɗe Mahwətə yamene ŋkɛ kala nya menete yitenyɛ Azariya pɛtɛ.

³⁵Ya tsagha shɛ ŋkɛ ne, kezamte yɛ kələŋə kedzeghe melɛ ŋkɛ we. Mba mbeli kasla le mimia wəshi keseɗa ba'a katere 'wərdə kwa hə hə hwa hɛ. Yotam nde ŋate mɛa cɛ nya wəba ta ghɛa Shala.

³⁶Ma nyi ketene ghena ta Yotam ne, mbe palepa ta ka meghea ka Zhəwda le yɛ slene nyi menete ŋkɛ.

³⁷Mbe vəa meghea Yotam ghate ghwene Rɛsin, meghea ka Siri ba'a ŋa Pɛka, le ŋa ka Israyɛl, Mahwətə kaɗa hɛɗia Zhəwda.

³⁸Ma kwa mte Yotam ne, pa mbeli lamte ŋkɛ kwa kwele ta ka keshia nci mbe meleme ta David. Wəzege ta ŋkɛ Ahaz nde kelete meghe te ŋkwa ŋkɛ.