Read kapsiki 2 Ka Meghea Kɛfi 16 Bible Online

2 Ka Meghea Kɛfi 16 - kapsiki bible

2 Ka Meghea Kɛfi 16

¹Ma mbe kwa meŋe mberefaŋeghəmbe ta va ta Pɛka wəzege ta Remaliya, kameghea ka Israyɛl, Ahaz wəzege ta Yotam, ya kameghea ka Zhəwda.

²Va ta ŋkɛ bakemsə nda dzete meghe ŋkɛ, pa ŋkɛ menete va meŋe ŋkwaŋeghəmbe mbe Zhɛrəzalɛm, ama ashɛ kamene wəsə nya ɗe Shala Mahwətə ta ŋkɛ we, nyi keɗema keyipəte geva le ŋa shinyɛ David.

³Wəshi nyi menete ka meghea ka Israyɛl yazele ŋkɛ yipə yipə. Pa le wəzege ta ŋkɛ dzeghekɛ melɛ ŋkɛ le kala wəsə kwa ndiremi nyi mene hwelefe ta mbeli nyi ŋkamte Mahwətə kezha ve nda hɛɗia shɛ ke mbelia ka Israyɛl.

⁴Kadzeghe melɛ te ŋkwa nyi veyi nda mbeli ke Gətəli, katere 'wərdə te ŋkwa shɛhɛ, pelɛ ghweme nyi nza wəfe ɗɛke ɗɛke.

⁵Pa Rɛsin, meghea ka Siri ba'a Pɛka, wəzege ta Remaliya ba'a meghea ka Israyɛl se kampa le Ahaz. Pa ŋkɛ have nda ke Zhɛrəzalɛm, ama shaŋe hɛ kahərə ŋkɛ le mpa.

⁶Te vəa shɛnyɛ pa Rɛsin veyi meleme ta Ɛlat mbe berete ta ka Siri kaya hɛ, kwa ŋkamte mbelia ka Zhəwda ŋkɛ. Pa ka Ɛdom se kantishɛ nci mbe pa ɓeshi.

⁷Pa Ahaz ghwenakɛ nda ghena ke Tɛglat-Falasar meghea ka Asiri, ma ke shɛ: «Nde mene ŋa slene 'ya, wəzege ta ŋa 'ya. Nde kambele ɗa va meghea ka Siri ba'a va ka Israyɛl nyi kehave ɗa mpa.»

⁸Mbe vəa shɛnyɛ ne, pa tsenete mze kwa tere tere ba'a mze kwa tɛawetɛa nyi mbe ghɛa Mahwətə ba'a nyi ki ghɛa ta meghe, pa ghwenave nda ke meghea ka Asiri kawəsə gəmə.

⁹Pa ŋkɛ menete wəsə nya 'yɛwakɛ Ahaz ve. Pa ŋkɛ lə kezha ha nda mpa ke meleme ta Damas, pa kelehwe ŋkɛ, fəhwe mbeli nyi mbe kadzembe Kir. Ma Rɛsin le ŋa ŋkɛ ne, pa peslekɛ ŋkɛ.

¹⁰Meghe Ahaz lə kadzembe Damas kezha begeme le Tɛglat-Falasar meghea ka Asiri. Ma kwa nakɛ reghwetɛ kedzeghe melɛa nya mbe cɛa ka Damas ŋkɛ ne, pa ghweneghe nda pa ta ŋkɛ ba'a nza ta ŋkɛ kadzeme Zhɛrəzalɛm ke Əwriya, nde dzeghe Shala.

¹¹Pa Əwriya ŋate reghwetɛ kala nya ncɛte nda Ahaz kwa ghwenave nda nza ta ŋkɛ ŋkɛ, pɛtɛ nahemte slene ta ŋkɛ nda tese Ahaz se mbe Damas.

¹²Ma kwa se meghe ne, pa ŋkɛ nakɛ reghwetɛ keŋa ŋa, hendeyite geva yite

¹³ba'a dzeghekɛ melɛ kwa tere tere le ghəa ŋkɛ zlaɓe le hə ba'a tɛ, le melɛ nya kezha mbeli pɛtɛ, pa ŋkɛ shekaghe mimi kənə reghwetɛ.

¹⁴Pa ŋkɛ kelemte reghwetɛ nya menete mbeli yitea mze kwa tɛawetɛa nya keveyi geva kaŋa Mahwətə. Ma reghwetɛa shɛ ne, terasle nde yitea mɛa cɛ nya dzembe mbeli kwa, pa veyi talɛ kwetere wəmbəa reghwetɛ nya kamɛnɛfɛ laka bela kwa gwela.

¹⁵Yawa, ma ke meghe gezave nda ghena ke nde dzeghe Shala Əwriya: «Deke nya wəba nya reghwetɛ yamene slene na te ɓiyitsa. Katedzeghe melɛ kwa tere tere na masheke keveci keveci le hə nya kele mbeli kase kala verazle ta veci ke ghə, melɛ kwa tere tere kaŋa meghe, zlaɓe le hə, kezha mbeli pɛtɛ ne, hə ba'a tɛ ya yite. Katesheke mimia wəshi keseɗa nyi dzeghekɛ melɛ na le na te. Ma reghwetɛ nya le mze kwa tɛawetɛa ne, 'ya nde kele zəzə ta nyagha le ghəa ɗa.»

¹⁶Pɛtɛ nde dzeghe Shala Əwriya menete ghena nyi gezeke meghe Ahaz.

¹⁷Pa meghe Ahaz mpəmte selə nya le mze kwa ghwə ghwə, pa kelemte kwenə nyi jama jama nyi pelɛ hɛ, pa nya ŋate mbeli kala ndərə nya te wəmbəa slə meŋe bakeghəmbe nyi le mze kwa tɛawetɛa, pa veyi kwake te hɛɗi.

¹⁸Ya, ma kezha gwəfə nda ghə ke meghea ka Asiri ne, pa ŋkɛ zhɛremte ŋkwa nya ŋate mbeli kaŋa veci kezhɛne mpi mbe ghɛa Mahwətə, ba'a laka “Ŋkwa kedzembe ta meghe”, pelɛke te ŋwela.

¹⁹Ma nyi ketene ghena ta Ahaz ne mbe palepa ta ka meghea ka Zhəwda le yɛ slene nyi menete ŋkɛ hɛ.

²⁰Ma kwa mte ŋkɛ ne, pa mbeli lamte ŋkɛ kwa kwele ta ka shihɛnyɛ te meleme ta David. Wəzege ta ŋkɛ Ɛzɛkiyas nde kelete meghe te sebe ta ŋkɛ.