Read kapsiki 2 Ka Meghea Kɛfi 18 Bible Online

2 Ka Meghea Kɛfi 18 - kapsiki bible

2 Ka Meghea Kɛfi 18

¹Ma mbe kwa mahekene ta va ta Ozɛ wəzege ta Ɛla kameghea ka Israyɛl ne, pa Ɛzɛkiyas wəzege ta Ahaz kelete meghea ka Zhəwda.

²Va ta ŋkɛ bakemsə mcɛfeghəmbe nda kelete meghe ŋkɛ, pa ŋkɛ menete va bakemsə meslighəmbe mbe meghe mbe Zhɛrəzalɛm. Abi sləa meghekɛ wəzha ta Zakari nde.

³Wəsə nya ganyɛ kwa kema ta Mahwətə yamene Ɛzɛkiyas, pɛtɛ kala ŋa shinyɛ David.

⁴Gheŋkɛ nde zamte yɛ kələŋə kedzeghe melɛ, nde mpəmte yɛ gɛaŋa nyi mɓeyi mbeli ba'a nde tsaslemte yɛ seləa Ashɛra. Gheŋkɛ nde mpəmte shishi mze kwa tɛawetɛa nya menete Moyize: kwa nza ŋkɛ pa te vəa shɛ ne, mba ka Israyɛl katere nda 'wərdə kave zləvə te shishi nya heka shɛ mbeli kaNehəwshtan.

⁵Ɛzɛkiyas yasema Shala Mahwətə ta ka Israyɛl, kagezleŋe ghə ve za ke kweci ka meghea kɛfia ka Zhəwda nyi te kema ta ŋkɛ le nyi kwa sebe ta ŋkɛ.

⁶Mba ŋkɛ dɛŋe dɛŋe te Mahwətə mbe nza ta ŋkɛ, kese ŋkɛ kazhɛre geva ve we. Kayɛ fete ŋkɛ tsape tsape yitea ghena nyi ndeke nda Mahwətə ke Moyize.

⁷Le Ɛzɛkiyas Mahwətə, vatse menete meghea ŋkɛ ŋkɛ megela mbe yayata nza ta ŋkɛ pɛtɛ. Pa zhɛnete nda ghə ke meghea ka Asiri kaɗema nza mbe dzeve ta ŋkɛ.

⁸Zhɛne ne, pa ɗate ka Filisti, kekaghe hɛ hwa'a mbe hɛɗia Gaza ba'a fəhwe meleme nyi berete berete ba'a yɛ ŋkwa ka ya ŋkwa perə.

⁹Ma mbe kwa wəfaɗe ta va ta Ɛzɛkiyas mbe meghe ne, yipə le ŋa Ozɛ wəzege ta Ɛla va mberefaŋe mbe meghea ka Israyɛl, ma meghea ka Asiri Salmanasar ne, nahe ŋkɛ kese kadzaslete Samari,

¹⁰pa mbeli kelehwe melemea shɛ te kwa mahekene ta va, ma geze ta ŋkɛ mbe kwa ŋkwaŋe ta va ta Ɛzɛkiyas te meghe keɗema te kwa mesli ta va ta Ozɛ te meghe mbe Israyɛl.

¹¹Pa meghea ka Asiri kesehwe mbelia ka Israyɛl kakeleghe hɛ kadzembe Asiri te bela ta Hala, laka ŋkwa nya hwɛ Habor hələa Gozan, ba'a mbe meleme ta Mɛdi.

¹²Ma nda menete nda geva wəshi nyi ke ka Israyɛl ne, va nya ɗema hɛ fa ghena nya gezeke Shala Mahwətə ta nci kese hɛ kayipə jikə geva le we. Kese hɛ kafa we, kese hɛ kamene kala ghena nyi gezeke Shala laka Moyize, nde mene slene ta Mahwətə we.

¹³Ma mbe kwa meŋe wəfaɗeghəmbe ta va ta Ɛzɛkiyas, pa meghea ka Asiri, Sɛnakɛrib se kaha nda mpa ke pɛtɛa meleme nyi berete berete te hɛɗia meghea Zhəwda ba'a fəhwe hɛ.

¹⁴Pa Ɛzɛkiyas, meghea ka Zhəwda ghweneghe nda mɛ ke meghea ka Asiri ɓiyitsa mbe Lakish: «Nahe 'ya kemenete ŋa fete, hwepema wənə na va 'ya ma. Ma wəshi nyi tegeze ɗa na kave ŋa 'ya ne, kasəwə wəsəa shɛ 'ya!» Pa meghea ka Asiri 'yɛwete va Ɛzɛkiyas kave nda kiləwəa dəɓərəa mze kwa ghwə ghwə 9.000, kiləwəa dəɓərəa mze kwa tere tere gwəmsə mesli ŋkɛ.

¹⁵Pa Ɛzɛkiyas fəte mze kwa tɛawetɛa nyi mbe ghɛa Mahwətə ba'a nyi ki ghɛa meghe.

¹⁶Tsagha shɛ, pa tsasleve wəshi mze kwa tere tere nyi slapesla slapesla nyi beteyi ŋkɛ te gelembe nyi mɛa ghɛa Shala ba'a te sheghwə nyi dzeme vare gelembe. Pa ŋkɛ fəave nda hɛ ke meghea ka Asiri.

¹⁷Pa meghea ka Asiri ghwenakɛ nda meghea ka sewajɛ nya wəba le kwete meghea ka sewajɛ, le kwete wəndəa kwelea ghedəkwəa ŋkɛ nya te ghəa ka sewajɛ kwele kwele ke Ɛzɛkiyas, se mbe Lakish kalə kadzembe Zhɛrəzalɛm. Ma kwa dzeme hɛ kantsehe mbe meleme ne, pa hɛ sletenji mɛa ŋkwa yɛmə nya perawete mbeli kanya wəba, kwa hweŋkwa nya kelə kadzembe wəvea ka tsewe lekwesa.

¹⁸Pa hɛ hekakɛ meghe. Pa Ɛliyakim wəzege ta Hilkiya wəndə nya te ghə ghɛa meghe, le nde rafe wəshi Shebna ba'a Yowa, wəzege ta Asaf nde geze ghena ta meghe, shave sha hɛ.

¹⁹Ma ke wəndəa kwelea ghedəkwəa ka Asiri sha hɛ: «Kwiɗi mə geze nda mə ke Ɛzɛkiyas, ghena ta Meghe nya Wəba, meghea ka Asiri: ‹Te wa vate ghə na wa?

²⁰Ma zəzə na ne, kanza ghena nyi gəmə gəmə te ŋkwa ntsehwelea mpa ba'a hwepe ghə kezha mpa na?› Wa wəndə nya ve ghə na te kezha ɗema ghena ta ɗa wa?

²¹Te Ɛzhipte nya kaghwəvərə nya keɓele ɓele nya kempahwe dzeve ta wəndə nya kedɛŋe geva te ve ghə na. Kaganda ne, nahe Farawon, meghea ka Ɛzhipte kenza kala ghwəvərə nya keɓele ɓele kaŋa mbeli nyi keve nda ghəa nci.

²²Ya kwete ma pe yɛ sha tezhɛne ɗa: ‹Te Shala Mahwətə ta n'yɛ zəzə ta n'yɛ.› Ama gha Ɛzɛkiyas le ghəa ŋa nde mpəmte kələŋə kedzeghe melɛ le yɛ reghwetɛa kwa gezete nda na ke ka Zhɛrəzalɛm le ka Zhəwda: ‹Mbe kema ta reghwetɛa nya mbe Zhɛrəzalɛm shɛ gwəɗəŋə yɛ kasəkwə›

²³Ma tsetsenya ne, zhɛnete mə kaghəpə le nde sleke n'yɛ, meghea ka Asiri: wərə 'ya kandeke ŋa gədəwə 2.000, kenza nde kakemave mbeli na kadzeme hɛ.

²⁴Ama tsema nza na kaŋkamte nya ɓɛhwɛ hwa ka meghea ka sewajɛa nde sleke ɗa wa? Kwa nza ŋkɛ te Ɛzhipte veyi zəzə na kezha kemave gədəwəa lɛmə ve!

²⁵Ma banda ne, gəmə se nde sleke ɗa kaɗa hɛɗi nya kelehwe ŋkɛ, kaɗetema Mahwətə na? Ashɛ we, Mahwətə le ghəa ŋkɛ nde ndeke nda hweŋkwa.»

²⁶Ma ke yɛ Ɛliyakim wəzege ta Hilkiya le Shebna ba'a Yowa sha meghea ghedəkwəa ka Asiri: «Geze n'yɛ le ghena ta ka Aram, kafa ghen'yɛ. Mba na kegeze n'yɛ le ghena ta ka Ɛbrə, yagha mbeli nyi pelɛ zli nyi kafate.»

²⁷Ama, ma ke meghea ghedəkwəa ka Asiri sha hɛ: «Ma zəzə yɛ ne, deke ke nde sleke ŋayɛ ba'a ke gheyɛ geze ghena nde sleke n'yɛ nahe na? Ke mbeli nyi te zli nyi ketenza kala gheyɛ kazeme wevɛa nci kasa hwencia nci, temə vireɗi wəka!»

²⁸Pa meghea ghedəkwəa ka Asiri kazlape ghena le berete ta ŋkɛ pɛtɛ le ghena ta ka Ɛbrə: «Fa mə ghena ta Meghe nya wəba, meghea ka Asiri.

²⁹Ma ke: Ghwetema ŋayɛ Ɛzɛkiyas ma, katembelete ŋayɛ ŋkɛ we.

³⁰Mba Ɛzɛkiyas kegeze ŋayɛ kave ghə te Mahwətə nya ketembele ŋayɛ kaɗema ghəpə yite, kageze ŋkɛ kaɗema meleme nya tedzembe dzeve meghea ka Asiri. Vema ghə yɛ te ma.

³¹Fa nda ma ŋa Ɛzɛkiyas yɛ ma, fa mə ɓetəkə nya tegeze ŋayɛ 'ya, 'ya meghea ka Asiri: zlenekɛ mə ntɛaŋentɛa mehele, se mə sha 'ya. Ma yayata ŋayɛ ne, ŋa ŋkɛ tenza wəvea rɛzɛŋea ŋkɛ le yɛ ŋa dasekwa ta ŋkɛ, ba'a kasa yɛmə kwa ghwa ta ŋkɛ.

³²Nda tese 'ya kakele ŋayɛ katedzete kwete hɛɗi kala hɛɗia ŋayɛ, hɛɗi ganyɛ kamene wəshi te, ha kezha ta ɗafa, rɛzɛŋe kezha ta tɛ, bekele kezha ta n'yi, pa le yɛ mze te hɛɗia shɛ. Kenya tempə yɛ teke ne, kanza yɛ teghweme te nyagha ŋkwa. Mba yɛ kefa ghena ta Ɛzɛkiyas, kwa nza ŋkɛ gheyɛ yateŋka ŋkɛ kadzembe gamba kwa gezete ŋkɛ Katembelete ŋayɛ Mahwətə.

³³Nahe shala ta kweci hɛɗi kefɛake ɗa kekele hɛɗia nci na?

³⁴Tsema menete ɗa shala ta Hamat ba'a ŋa Arpad wa? Ba'a ŋa ka Sefarvayim, ŋa Hɛna ba'a ŋa Ava? Nahe kwete hwa hɛ kefɛake ɗa kekele Samari na?

³⁵Hwa pɛtɛa shala shɛhɛ ne, shala nya kefɛake ɗa kekele hɛɗia ŋkɛ shɛ we. Tsema nza Mahwətə kafɛake ɗa kekele Zhɛrəzalɛm?»

³⁶Pɛtɛ mbeli nyi keya ŋkwa tikə tikə. Nde zhɛne ghena shɛ ya kwetɛŋe we, kwa nza ŋkɛ tsagha gezete meghe Ɛzɛkiyas ke hɛ.

³⁷Pa Ɛliyakim wəzege ta Hilkiya le wəndə nya te ghəa ghɛa meghe, le nde rafe wəshi Shebna ba'a Yowa, wəzege ta Asaf ba'a nde geze ghena ta meghe, kwa sebe ta nya ŋkweŋkwahemte lekwesa ta nci hɛ, pa hɛ lə sha meghe Ɛzɛkiyas kagezete nda ghena nyi gezete meghea ghedəkwəa ka Asiri.