Read kapsiki 2 Ka Meghea Kɛfi 19 Bible Online

2 Ka Meghea Kɛfi 19 - kapsiki bible

2 Ka Meghea Kɛfi 19

¹Ma kwa fate ghena nyi gezeke hɛ meghe Ɛzɛkiyas ne, pa ŋkwahemte lekwesa ta ŋkɛ perə, pa hwepahwe wəsə hwa hwə, cape ŋkɛ kalə kadzembe ghɛa Mahwətə.

²Mbe vəa shɛnyɛ ne, pa ghwenakɛ Ɛliyakim wəndə nya te ghəa ghɛa meghe le Shebna, nde rafe palepa ba'a kwete wəndə nya ketemə hwa ka dzeghe Shala sha nde mɛ ŋkwa Ɛzayi wəzege ta Amots. Mbeli nyi perə ne, le wəshi hwa hwə hɛ,

³ma ke hɛ sha nde mɛ ŋkwa: «Wa nya ghena nya kese nya va Ɛzɛkiyas: ma veci nya ne, veci kesa yaka, veci ke'yɛ ɓəmə ba'a kwa shifə ghə ŋkɛ. Kala nya nza mbeli kageze ne, gare ya wəzege, ama berete va ma kezha yake we.

⁴Nahe meghea ka Asiri keghweneke meghea ghedəkwəa ŋkɛ kezha ŋele Shala teghweme. Ma kenza nde nahe Shala Mahwətə ta ŋa kefate ŋele nya ŋelekɛ meghea ka Asiri le ɗa nya temene ŋkɛ kala nya gezete ŋkɛ ne! Səkwəte Mahwətə kezha mbelia ŋkɛ nyi ketene.»

⁵Ma kwa ntsehe mbeli nyi ghwenakɛ meghe Ɛzɛkiyas sha Ɛzayi ne,

⁶ma ke sha hɛ: «Kwiɗi mə geze nda mə ke nde sleke ŋayɛ ghena nya gezeke Mahwətə: Nahe na kefate ŋele nya ŋelekɛ ɗa meghea ka sewajɛa ka Asiri. Ghazlənəma yɛ va wəsə nya gezete hɛ ma.

⁷Katekemave kwete ghena meghea shɛ se te hɛɗia ŋkɛ laka ɗe ta ɗa temene geva ŋkɛ. Nda tezhɛne geva ŋkɛ kalə sha hɛɗia ŋkɛ ne, katemene 'ya kapesle mbeli le kafayɛ te hɛɗia ŋkɛ.»

⁸Nahe wəndə kwelea ghedəkwəa ka Asiri kefate nahe nde sleke hɛ keslə mbe Lakish kalə kampa le meleme ta ka Libna. Tagha sləyi ŋkɛ.

⁹Ma fa meghea ka Asiri ne, nahe Farawon Tiraka, nde Ɛtiyopi kese kezha mpa le. Pa ghwenakɛ nda mɛ ke Ɛzɛkiyas zhɛkwa,

¹⁰meghea ka Zhəwda: «Kwele kwele vate zəzə ta ŋa na te Shala ta ŋa, ma zəzə na ne, wərə ŋkɛ kafɛake ɗa kekele Zhɛrəzalɛm. Mba na keghwetete ghəa ŋa laka gheŋkɛ.

¹¹Nahe na kefave megela tsema tsema menete nda meghea ka Asiri ke kweci hɛɗi ba'a tsema tsema bezemte hɛ ŋkɛ. Ma zəzə na ne, katembele na na?

¹²Ma kweci shala nyi mpəmte ka shihɛ ɗa: yɛ Gozan, Haran, Rɛsɛf ba'a ŋwalea Ɛdɛn nyi mbe Telasar, ashɛ shaŋe shala ta nci kayate meleme ta nci wəka?

¹³Kelete zəzə te ka meghe nyi, ŋa ka Hamat, ŋa Arpad, ŋa Layir, ŋa Sefarvayim, Hɛna ba'a Ava!»

¹⁴Pa Ɛzɛkiyas kelete palepa nya ghweneke nda meghea ka Asiri pa jaŋgate. Cape ŋkɛ kadzembe ghɛa Shala kaveyi kwa kema ta Mahwətə.

¹⁵Ntake Ɛzɛkiyas kasəkwə ghə kwa kema ta Mahwətə: «Mahwətə, Shala ta ka Israyɛl, gha ya mentishɛ te ghəa ka ghwene ta ŋa, gha ya kaShala kwetɛŋe ŋa kezha ka meghe nyi te hɛɗi pɛtɛ, gha nde pate ghweme le hɛɗi.

¹⁶Mahwətə, fate megela, neweve ndeɗekə, zəzətema ŋele nya ŋelekɛ ŋa nya wəndə nya ghweneke nya Sɛnakɛrib gi, gha Shala nya le mpi.

¹⁷Mahwətə, kaganda, nahe meghea ka Asiri kebezemte kweci hwelefefi ba'a hɛɗia nci.

¹⁸Berete ya va hɛ kabeteyi shala ta kweci hwelefefi mɛa ghwə kazamte sebe te hɛ, va nya ɗema hɛ kashala ganji, deke pa ta wəshi nahe, nyi menete mbeli le sheghwə le yɛ pelɛ.

¹⁹Ama gha ne, Shala Mahwətə ta n'yɛ, mbelete n'yɛ va pela ta Sɛnakɛrib. Tagha gɛ, kateɗepete pɛtɛa hɛɗi meghe nyi te hɛɗi, deke gha Mahwətə ya kaShala.»

²⁰Pa Ɛzayi wəzege ta Amots ghweneghe nda ghena nya ke Ɛzɛkiyas ɓiyitsa: «Wa nya ghena nya gezeke Mahwətə nya, Shala ta ka Israyɛl: Nahe 'ya kefate səkwə nya səkwəte ɗa na te ghena ta meghea ka Asiri, Sɛnakɛrib.

²¹Wa nya ghena nya gezeke Mahwətə nya te ghəa ŋkɛ: Meleme ta Siyon kaɗema kaɓela ŋa, mbe ŋ'wəshi ŋa ŋkɛ. Zhɛrəzalɛm nya ganyɛ nya kaŋ'wəshi ŋa, kagagəzə ghə kwetere wəmbəa ŋa.

²²Wa yaŋelekɛ na wa? Wa yayiɗəkɛ na wa? Kadzete nyama wəndə gezete ghena na kanewe le ntsə keŋele wa? Kadzete 'ya, Shala nya kaganda kwetɛŋe, Shala ta ka Israyɛl!

²³Laka mɛa nde ghwene ta ŋa, nahe na keŋelekɛ ɗa, 'ya Mahwətə. Ma pa na sha 'ya: ‹'Ya Sɛnakɛrib, tarame 'ya pelɛ wəmata gədəwəa ɗa, nahe 'ya kedzeme ɗa mbe ghweme, pa pelɛ ghəa Liban, kezha tsasle lekelekea ŋkɛ nyi ndeɗe ndeɗe ba'a yɛ vɛa ŋkɛ nyi bebiya ma. Pa te kwa keɗaŋe ta ghəa ghweme ntsehe 'ya ba'a pa mbe ghɛa wəfe ta ŋkɛ.

²⁴'Ya, nahe 'ya kelate ghwa ba'a kasahwe yɛmə kweci hwelefefi. Katehase kwete bela ta hələa Nil 'ya laka ŋkeɗe seɗa te hɛɗia ka Ɛzhipte!›

²⁵Yawa, Sɛnakɛrib, nda keɗepe na wəka? Vəashi ne, 'ya nde menete wəshia shɛhɛ, vəashi ne, nahe 'ya kehimte hweŋkwa ta ŋkɛ, tsetsenya ne, tserame menete hɛ 'ya. Nahe 'ya ketarete kezha zhɛre meleme nyi berete berete na kakwəfi.

²⁶Pala pala mbeli nyi mbe melemea shɛ, keta ta hɛ va ghazlənə ba'a bətə hɛ va hawe. Nahe hɛ kenza kala gwəzə hwa gamba ba'a ɗɛkeɗɛa gwəzə, kala gwəzə nyi kepese dzeyi te dɛɓere nyi kənəa yɛ ghɛ, kala ha nya kezhɛre kawəbəghə tewə ŋkɛ kenehe.

²⁷Nahe 'ya keɗepemte nza ta ŋa pɛtɛ: nahe 'ya keɗepe və nya ntishɛ na te, və nya shave na keɗema nya dzeki na te, və nya zəzə wəsə kwa ndiremi na te 'ya na te.

²⁸Kaganda ne, nahe na kezəzəte wəsə kwa ndiremi te 'ya. Nahe 'ya kefate 'yaghwa mehele ta ŋa. Vatse gɛ 'ya kate'yɛ ŋa pahwe wəfela mbe ŋshi va gha pa zayiwə mbe, pa lɛ mbe mɛ va gha. Pa 'ya zhɛneghe ŋa kalə sha ghɛa ŋa kwa hweŋkwa nya se shɛ na kwa.

²⁹Ma na gɛ, Ɛzɛkiyas, 'ya kancɛ ŋa wəsə nya ketese: ma ɓeshi kava, katezeme ha nya kekelenyɛ le ghəa ŋkɛ gəmə mbeli. Tsagha shɛ heshi tsetse ŋkwa. Ama te nya mbe ne, nda tsawe ha ta ŋayɛ yɛ kamene se te wəve, kawəza rɛzɛŋea ŋayɛ ba'a kanda.

³⁰Ma mbeli nyi mba teghweme mbe meghea Zhəwda ne, katenza hɛ zhɛkwa kala wəfe nya keha slərə kadzembe hɛɗi ba'a ŋkerɛape nza ya te dzeve ta ŋkɛ.

³¹E'e, kwa nza ŋkɛ kateshave mbeli nyi ketene mbe Zhɛrəzalɛm, katenza nyi kembele pelɛ ghweme ta Siyon.» Pa Ɛzayi mtsehete: «Wa nya wəsə nya temene Mahwətə laka ɗe ta ŋkɛ nya wəba nya.

³²Ma tsetsenya gɛ, wa nya wəsə nya geze ŋkɛ te meghea ka Asiri: Kadzembe meleme nya ŋkɛ we, katehe have ŋkɛ kadzembe we, kateghakɛ ŋkwa ŋkɛ le gelə we, katetsene hɛɗi ŋkɛ yite kezha ha nda mpa we.

³³Katezhɛne geva ŋkɛ kwa hweŋkwa nya kelete ŋkɛ kase. Kadzembe meleme nya ŋkɛ we, 'ya nde gezete, 'ya Mahwətə.

³⁴Kateya Zhɛrəzalɛm 'ya ba'a katembele ŋkɛ 'ya, va nya nza 'ya kaShala, laka nza ta ɗa dɛŋe dɛŋe te David, nde mene ɗa slene.»

³⁵Ma mbe viɗi nya kedzəghə ne, pa nde ghwene ta Mahwətə se kadzembe ghedəkwəa ka Asiri kampəmte zhili 185.000. Ma masheke feɗeghema ta nyi mba te ghweme ne, pa hɛ nakɛ mbeli nyi kempə mpə.

³⁶Pa Sɛnakɛrib meghea ka Asiri, nteɗemte ghedəkwəa ŋkɛ kazhɛneghe geva kadzembe Ninive kanzanyɛ mbe.

³⁷Ma te kwete hɛ mbe səkwə ghə ŋkɛ ki ghɛa Nisrok shala ta ŋkɛ ne, pa ŋwalea ŋkɛ bake yɛ Adramɛlɛk le Sarɛsɛr peslekɛ. Ca pa hɛ hwɛnji kadzete hɛɗia ka Ararat. Pa kwete wəzege ta ŋkɛ Asarhadon, kelete meghe te ŋkwa ŋkɛ.