Read kapsiki 2 Ka Meghea Kɛfi 20 Bible Online

2 Ka Meghea Kɛfi 20 - kapsiki bible

2 Ka Meghea Kɛfi 20

¹Ma mbe vəa shɛ ne, pa zereghwe kemte keseve Ɛzɛkiyas. Pa nde mɛ ŋkwa Ɛzayi, wəzege ta Amots se kezha newe ŋkɛ, ma ke shɛ: «Wa nya ghena nya geze Mahwətə nya: Geze nda ghena ta ŋa ke mbelia ŋa, kwa nza ŋkɛ ne, katembele na va zereghwe nya we.»

²Pa Ɛzɛkiyas zhɛrete kema ɓiyitsa kadzembe dewe, ma ke səkwəte Mahwətə:

³«Ayaga! Mahwətə, zəzəte nza nya nzahwe 'ya tiɗiɗi kwa kema ta ŋa, nahe 'ya kese kamene wəsə nya zeɗehwe ŋa keveci keveci!» Ntake ŋkɛ kanehwene pelame pelame.

⁴Mba Ɛzayi kanakama kashavenyɛ kwa degha ta ghɛa meghe nda se ghena ta Mahwətə shɛ,

⁵kezha zhɛre geva kalə sha Ɛzɛkiyas, meghea mbelia Shala, kezha geze nda: «Wa nya wəsə nya gezete Mahwətə nya, Shala ta shia ŋa David: ‹Nahe 'ya kefate səkwə ta ŋa ba'a nahe 'ya kenakɛ nehwene ta ŋa. Yawa, 'ya katembele ŋa. Ma vatahebezle ne, wərə na katelə kadzembe ghɛa Mahwətə zhɛkwa.

⁶Katemtsehe hɛa ŋa 'ya kava meŋe mcɛfeghəmbe! Katezləgwə ŋayɛ 'ya, gha le Zhɛrəzalɛm shave mbe dzeve ta meghea ka Asiri. Kateya meleme nya 'ya, va nya nza 'ya kaShala, laka nza dɛŋe dɛŋe te David nde mene slene ta ɗa.›»

⁷Ma ke Ɛzayi gezete: «Kelete mə ghwempe ta ya ta dasekwa, menate mə te zhia meghe kezha mpi ŋkɛ.»

⁸Ma ke Ɛzɛkiyas sha nde mɛ ŋkwa ɓiyitsa: «Wa wəsə kencɛ wəsə nya ketencɛ katembe ɗa Mahwətə, ba'a vatahebezle ne, wərə 'ya katelə kadzembe ghɛa Mahwətə zhɛkwa wa?»

⁹Ma ke Ɛzayi shɛ: «Katencɛ ŋa wəsə kencɛ wəsə Mahwətə kezha ɗepete na fəyitekeghə temene wəsə nya meɗeyi ŋkɛ: katehende geva shenaŋkwe kaseɗa meŋe mbe kema keɗema kwa sebe dzeme te taŋa ta Ahaz: dzate mbe kema yaɗe na na, dzeyi te sebe na?»

¹⁰Ma ke Ɛzɛkiyas: «Dekwe ma dzate mbe kema shenaŋkwe kaseɗa meŋe, ama ɗehwe ma 'ya kezha dzeyi nde te sebe.»

¹¹Pa nde mɛ ŋkwa Ɛzayi səkwəte Mahwətə ɓiyitsa, pa zhɛnakeyi shenaŋkwe te sebe kaseɗa meŋe dzeme te taŋa.

¹²Ma mbe vəa shɛnyɛ ne, pa meghea ka Babilone, Mɛrodak-Baladan, wəzege ta Baladan, fate shewə ta Ɛzɛkiyas. Pa ghwenakɛ nda ka ghwene ta ŋkɛ le palepa ba'a le wəsə gəmə nya ɗave nda ŋkɛ.

¹³Pa Ɛzɛkiyas kemaneve hɛ ba'a ncɛmte nda ŋkwa nya mbe cɛ nyi tsene wəshi nyi nza zləvə te hɛ mbeli mbe, mze kwa ghwə ghwə, mze kwa tere tere, 'wərdə ba'a n'yia nyi kezəŋwə zeɗekə. Pa ŋkɛ ncɛte nda ŋkwa wəshi kempa ta ŋkɛ pɛtɛ le yɛ nyi tewəfərə wəshia ŋkɛ, kewəfərəte wəsə we, ya nyi ki ghɛa meghe, ya mbe nza ta hɛɗia ŋkɛ pɛtɛ.

¹⁴Ma kwa sebe ta ŋkɛ ne, pa nde mɛ ŋkwa Ɛzayi se sha Ɛzɛkiyas, ma ke 'yɛwete ve: «Wa ke mbeli nyi sha gha wa? Ba'a tema se hɛ wa?» Ma ke Ɛzɛkiyas shɛ: «Cakeɗake se hɛ se mbe Babilone.»

¹⁵Ma ke Ɛzayi shɛ: «Wa yanakɛ hɛ ki ghɛ ŋa wa?» Ma ke Ɛzɛkiyas: «Nahe hɛ kenakɛ wəshi pɛtɛ, wəsə shɛ kewəfərəakɛ 'ya va hɛ hwa mcɛləa ɗa we.»

¹⁶Ma ke Ɛzayi sha Ɛzɛkiyas: «Ma ke Mahwətə:

¹⁷‹Te kwete veci ne, pɛtɛa wəshi nyi ki ghɛa ŋa tsetsenya, pɛtɛa nyi tsenete ka meghe nyi kese te kema ta ŋa, pɛtɛ fə hɛ mbeli kadzeme Babilone. Katetene wəsə teke we.

¹⁸Pa le kweci ka hwelefefia ŋa tekese mbeli kezha tsewe hɛ yitea nza hɛ kaka mene slene ta meghe ki ghɛ meghe nya mbe Babilone.›»

¹⁹Pa Ɛzɛkiyas zhɛnete nda ke Ɛzayi: «Ghena ganyɛ ŋkɛ kwa gezete na se va Mahwətə.» Ma ke sha zəzə: «Katenza kwelɛŋe le nza gwezlayɛ kala hɛa ɗa teghweme.»

²⁰Ma nyi ketene ghena ta Ɛzɛkiyas ne, nahe hɛ kenza kerafe rafe mbe “Palepa ta wəshi nyi menete meghe ka Zhəwda”. Mbe palepa shɛ geze ntsə geva nya menete ŋkɛ mbeli ba'a ŋkwa ketsene yɛmə nya menete ŋkɛ ba'a ŋkwa nya perawete ŋkɛ kezha kele yɛmə kadzembe Zhɛrəzalɛm.

²¹Ma kwa mtenyɛ ŋkɛ ne, Manasɛ wəzege ta ŋkɛ nde kelete meghe te ŋkwa ŋkɛ.