Read kapsiki 2 Ka Meghea Kɛfi 22 Bible Online

2 Ka Meghea Kɛfi 22 - kapsiki bible

2 Ka Meghea Kɛfi 22

¹Va ta Zhoziyas deghese nda kelete meghe ŋkɛ. Pa ŋkɛ menete va mahekenemsə kwetɛŋeghəmbe mbe Zhɛrəzalɛm. Yedida sləa meghekɛ, wəzha ta wəndə nya heka mbeli kaAdaya nde, mbe Boskat.

²Wəshi nyi ɗe Mahwətə yamene ŋkɛ. Pa nzahwe nza ta ŋkɛ kala shinyɛ David, kezlakemte wəsə nya se ŋkɛ kamene we.

³Ma te kwete hɛ, mbe kwa meŋe degheseghəmbe ta va ta ŋkɛ mbe meghe ne, pa Zhoziyas ghwenakɛ nde rafe palepa Shafan, wəzege ta Asaliya shia Meshəwlam, kadzembe ghɛa Mahwətə.

⁴Ma ke shɛ: «Kwiɗi sha Hilkiya, wəndə kwelea ka dzeghe Shala. Geze nda shɛ ŋkɛ ɓelate cɛdɛ nyi keleke mbeli kezha mene ghɛa Shala, nyi yate ka dzeghe Shala kwa tseneke hɛ.

⁵Kezha ve nda ke wəndə nya nza slenea shɛ te dzeve ve kezha ŋki nda ŋkɛ ke mbeli nyi kemene slene mbe, kezha hi ŋkwa nyi kebezenji mbe. Kezha pave sheghwə, le yɛ pelɛ kwa tsehe tsehe nyi kenza wərə yitea mene slene ta hi ŋkwa.

⁷Ama ka'yɛwe mbeli va hɛ kezha ɓelate cɛdɛa shɛ kaba nda tefə mbeli we, kwa nza ŋkɛ tiɗiɗi menete hɛ.»

⁸Ma kwa kemave ghena nya ŋkɛ ne, pa wəndə kwelea ka dzeghe Shala gezete nda ke Shafan nahe ŋkɛ kentsate palepa ta wəsə mahalegəa Shala mbe ghɛa Mahwətə, pa ŋkɛ ndeke nda. Pa Shafan jaŋgate,

⁹cape kalə kageze nda ghena ta ŋkɛ ke meghe: «Ma ke ka mɛ ŋkwa ne, nahe hɛ kebetakame mze kwa tɛawetɛa kwa səndəkwəa ghɛa Shala ba'a nahe ghen'yɛ kendeke nda cɛdɛ ke mbeli nyi nza slene te dzeve va hɛ kezha hi ŋkwa.»

¹⁰Zhɛne ma ke: «Wəndə kwelea ka dzeghe Shala Hilkiya ndeke ɗa palepa nya. Pa ŋkɛ jaŋgate.»

¹¹Ma kwa fate wəsə nya mbe palepa ta wəsə mahalegə meghe Zhoziyas ne, pa ŋkwahemte lekwesa ta ŋkɛ.

¹²Pa hekakɛ nde dzeghe Shala Hilkiya, Ahikam, wəzege ta Shafan, Akbor, wəzege ta Mikaya, nde rafe wəshi Shafan ba'a Asaya, kwete hwa ka mene slene ta ŋkɛ, ma ke sha hɛ:

¹³«Kwiɗi mə 'yɛwakɛ mə ntsehwelea ghena nya mbe palepa nya kemave nya mbeli, kezha 'ya ba'a kezha ka Zhəwda va Mahwətə. Ya kwela sema ka shihɛ ɓəmə kayɛ fete yitea ghena nyi kerafete geva mbe, kemenete hɛ kala nya kerafete geva we, vatse ne, kwele kwele tenza hwepe wənəa Mahwətə kənəa gheɓəmə.»

¹⁴Nde dzeghe Shala Hilkiya, Ahikam, Akbor, Shafan ba'a Asaya cape kalə sha nde mɛ ŋkwa nya kamale Həwlda, nya mbe ghedəkwə nya kamɛnɛfɛ le nza mbe Zhɛrəzalɛm. Za nta ne Shaləwm, wəzege ta Tikva, shia Haras, gheŋkɛ yanza lekwesa nyi keveyi geva kaŋa Shala mbe ghɛa Shala ve. Pa mbeli nyighɛ gezete nda nza ta ghena shɛ ke ka mɛ ŋkwa.

¹⁵Pa Həwlda gezete nda ghena ke hɛ kalə kageze nda ke meghe kala nya:

¹⁶«Wa nya ghena nya gezete Mahwətə nya: 'Ya kateɗa Zhɛrəzalɛm ba'a mbelia ŋkɛ le beze nya ndiremi kala nya kerafete geva mbe palepa nya jaŋgate meghea ka Zhəwda.

¹⁷Nahe ka Zhɛrəzalɛm keneghakɛ ɗa, nahe hɛ keterekɛ nda 'wərdə kwa hə hə ke kweci shala. Pɛtɛa wəshi nyi menete hɛ kehwepete ɗa wənə. Vatse hwepete wənə 'ya va meleme nya kwele kwele, kagweɗakwete geva ŋkɛ we!

¹⁸Ma meghe le ŋa ŋkɛ ghə, nya keghweneke ŋayɛ ka'yɛwe ntsehwele va 'ya ne, wa nya ghena nya geze nda 'ya nya, 'ya, Mahwətə, Shala ta ka Israyɛl: nahe na kefate ghena nya mbe palepa nya.

¹⁹Nahe na kefate ghena nya gezete 'ya megela te ghəa Zhɛrəzalɛm ba'a mbeli nyi mbe: ɗa ta nci kwele kwele ŋkɛ kawəsə keyipə fela mbeli le. Nahe na kempiyi dzeve, nahe na keɗepete fete ta ŋa kwa kema ta ɗa, pa na ŋkwahemte lekwesa ta ŋa kanehwene pelame pelame. Yawa megela, 'ya perə nahe 'ya kefate, kaganda ŋkɛ,

²⁰vatse gɛ katesərə ŋa 'ya kamte na le kwelɛŋe. Kateve ŋa mbeli kwa kwele ta ŋa kaɗema na kenakɛ ndiremi nya teɗa Zhɛrəzalɛm 'ya le.» Pa wəndə kwelea ka dzeghe Shala Hilkiya ba'a mbeli nyi kebeghe ŋkɛ keleghe nda ghena shɛ ke meghe Zhoziyas.