Read kapsiki 2 Ka Meghea Kɛfi 24 Bible Online

2 Ka Meghea Kɛfi 24 - kapsiki bible

2 Ka Meghea Kɛfi 24

¹Mbe vəa meghea ŋkɛ ne, pa Nabəkodonozor meghea ka Babilone zehwe hɛɗia Zhəwda. Zhowakim ne ve fa ghena ŋkɛ. Ama te kwa mahekene ta va ne, pa ɗema ghena ta ŋkɛ.

²Pa Mahwətə ghwenakɛ nda ka Babilone, ka Siri nyi ketaze ŋkwa, le ka Mowab, ba'a Amon, nyi ketazemte meghea ka Zhəwda, kala nya gezete ghena nya kese va Mahwətə nde mɛ ŋkwa.

³Kwa nza ŋkɛ Mahwətə nde ve ndiremia shɛ kadzete meghea ka Zhəwda, va nya ɗema newe hɛ ŋkɛ kwa kema ta ŋkɛ. Kwa nza ŋkɛ kwele kwele menete nda fete meghe Manasɛ,

⁴nahe ŋkɛ kempəmte kweci mbeli kwele kwele nyi ɗema fete ve mbe Zhɛrəzalɛm, viɗi ŋkwa nya mbe melemea shɛ va ghena ta mpə ŋkwa, vatse ɗema Mahwətə kakelemte te wənə.

⁵Ma nyi ketene ghena ta Zhowakim ne mbe palepa ta slene ta ka meghea ka Zhəwda.

⁶Ma kwa mtenyɛ Zhowakim ne, wəzege ta ŋkɛ Zhowakin nde kelete meghe kwa sebe ta ŋkɛ.

⁷Ma meghea ka Ɛzhipte ne kese kashave mbe hɛɗia ŋkɛ zhɛkwa we, kwa nza ŋkɛ nahe meghea ka Babilone kefəhwe hɛɗi nyi kese mbe dzeve ta ŋkɛ ve, nya kwelɛ ghala ta ka Ɛzhipte laka bela kwa gwela ba'a laka Efrate, le hələa Babilone.

⁸Zhowakin nda dzembe meghe ŋkɛ ne meŋe degheseghəmbe. Deke tere mahekene menehwe meghe ŋkɛ mbe Zhɛrəzalɛm. Nehəwsheta sləa meghekɛ, wəzha ta Ɛlnatan nde Zhɛrəzalɛm.

⁹Wəsə nya keɗema kehi kwa kema ta Mahwətə yamene Zhowakin kala ŋa yitenyɛ.

¹⁰Ma mbe vəa shɛ, pa ka sewajɛa ka Babilone nyi kesleke kwete meghea ka sewajɛa meghe Nabəkodonozor, se kantishɛnyɛ mbe Zhɛrəzalɛm.

¹¹Ma mba ŋkɛ kasleke ŋkwa nya tagha ne, pa Nabəkodonozor se le ghəa ŋkɛ kantishɛnyɛ tagha.

¹²Pa meghe Zhowakin shave mbe meleme le meghekɛ ɓiyitsa, le ka jama jama ta ka sewajɛa ŋkɛ, le yɛ ka mene slene nyi jama jama ba'a mbelia ŋkɛ nyi gezleŋema ghə ŋkɛ va hɛ, pa hɛ lə sha meghea ka Babilone. Pa kesehwe hɛ kamava. Te kwa deghese ta va ta Nabəkodonozor te meghe.

¹³Kala nya gezete Mahwətə kaghate ne, pa Nabəkodonozor fəmte wəshi nyi mbe ghɛa Shala le yɛ nyi ki ghɛa meghe, pa ŋkɛ mpəmte wəshi mze kwa tere tere nyi vɛsəte meghe Salomon kezha mene slene le hɛ mbe ghɛa Shala.

¹⁴Pa fəmte mbeli nyi mbe Zhɛrəzalɛm, ka mene slene nyi jama jama, mbeli nyi nza zləvə te hɛ, pɛtɛa nci ne mbeli kaslibə 10.000, kese mbeli kaɓela nyi keɗepe feɗe wəshi le yɛ ka tsa wəshi le yɛ nyi kehi wəshi we. Deke ka titikwəa kɛfi yasərəakɛ ŋkɛ tagha.

¹⁵Pa keleghe meghe Zhowakin kadzeme Babilone, le meghekɛ, mia ŋkɛ ba'a mbelia ŋkɛ nyi gezleŋema ghə ŋkɛ ve, le yɛ ka meghea ka Zhəwda.

¹⁶Pa fəghe mbeli nyi nza zləvə te hɛ kadzeme Babilone, 7.000 hɛ, ka ɗepe feɗe wəshi le ka ɗepe tsa wəshi ne, slibə hɛ, mbeli nyi pɛtɛ ne, mbeli tsape hɛ kezha mene wəshia ka sewajɛ.

¹⁷Pa Nabəkodonozor veyi Mataniya kwesegwenyɛa Zhowakin kameghe ba'a zhɛremte sləa ŋkɛ kaSɛdɛkiyas.

¹⁸Va ta Sɛdɛsiyas bakemsə kwetɛŋeghəmbe nda kelete meghe ŋkɛ. Va meŋe kwetɛŋeghəmbe menete ŋkɛ te meghe mbe Zhɛrəzalɛm. Nahe sləa meghekɛ kenza kaHaməwtal, wəzha ta Zhɛrɛmi nde Libna.

¹⁹Sɛdɛsiyas ne, wəsə nya kehitema geva yamene ŋkɛ kwa kema ta Mahwətə, kala nya menete Zhowakim.

²⁰Mahwətə va wənəa ŋkɛ nde vate ndiremi te ka Zhɛrəzalɛm ba'a te meghea ka Zhəwda, nda se ŋkɛ kaneghamte mbelia ŋkɛ cakeɗa cakeɗa le. Pa Sɛdɛsiyas ɗema ghena ta meghe Nabəkodonozor nde Babilone.