Read kapsiki 2 Ka Meghea Kɛfi 4 Bible Online

2 Ka Meghea Kɛfi 4 - kapsiki bible

2 Ka Meghea Kɛfi 4

¹Ma te kwete hɛ ne, kwete male, nya se za nta kawəndə nya hwa wəvəsəa ka mɛ ŋkwa, pa nde se kasləyi Ɛlizɛ, ma ke mpiyi nda dzeve kezha kemane: «Ɛlizɛ, nahe na keɗepe kande ghazlənə ganyɛ se za ɗa va Mahwətə, nahe ŋkɛ kemte. Ma tsetsenya, wəndə nya kelete cɛdɛ ghen'yɛ ve kadewa ne, katese ŋkɛ kafə ŋwalea ɗa bake kaka mavashi.»

²Ma ke Ɛlizɛ shɛ: «Wa ya nza 'ya kamenete kezha gha wa? Geze ɗa wəsə nya va gha ki ghɛ.» Ma ke shɛ: «Kwete hwa wəsə va 'ya we. Deke n'yi kefi geva ɓɛhwɛ ya va 'ya.»

³Ma ke Ɛlizɛ zhɛkwa: «Yawa, kwiɗi səkwəve wəbəzli nyi ɗema wəshi kwa hɛ va ka ghedəkwəa ŋa. Pa na səkwəve kwele kwele.

⁴Kwa sebe ta ŋkɛ, kwiɗi sha ghɛa ŋa le ŋwalea ŋa, pa na ŋzlete cɛ megela. Nda gə n'yi na kadzawa hɛ kave vare bela, pɛtɛ na viɗikɛ hɛ.»

⁵Cape male nyagha tsagha gɛ. Ma kwa ntsehe nde ki ghɛ le ŋwalea nta ne, pa ŋzlete cɛ. Ntake ŋwale kanta nda wəbəzli, kaviɗi hɛ nde.

⁶Ma kwa viɗinji kwelehe shɛhɛ ne, ma ke sha kwete hwa ŋwalea nta: «Ndeke ɗa kwete nya ɗema wəsə kwa.» Ma ke wəzege shɛ: «Mba kwete shɛ we.» Tsagha gɛ ne, pa n'yi nzanyɛ kehwɛ.

⁷Pa malea shɛ lə kagezete nda wəsə nya kemenete geva ke nde mɛ ŋkwa wəsə. Ma ke wəndə nyagha shɛ: «Kwiɗi pamte n'yia shɛhɛ shɛ na ŋkimte nda dewa ta wəndə. Ma nyi ketene cɛdɛ va gha ne, wərə kakemanakɛ ŋa le ŋwalea ŋa mbe nza ta ŋayɛ.»

⁸Te kwete veci, kadzeyi Ɛlizɛ laka meleme ta Shəwnɛm, pa kwete male kwa mcɛlə wəshi mbe, pa deneve geze nda kezha se ŋkɛ kazeme wəsə ki ghɛa nta. Vatse gɛ, ghala se mɛa vecia shɛ, ma te yayata və nya dzeyi Ɛlizɛ mbe melemea shɛ ne, kalə ŋkɛ kazeme wəsə ki ghɛa nta.

⁹Ma ke male shɛ sha za nta: «Nahe 'ya keɗepe, ma wəndə nya kese nya keveci keveci ki ghɛa ɓə ne, wəndə nya keveyi geva kala ŋa Shala ŋkɛ.

¹⁰Ŋate nda ɓə cɛ pelɛ te cɛ nya mencikə, veyi nda ɓə gezle mbe, tsagha tabele, wəsə kentishɛ ba'a paterela. Ma te yayata və nya tese ŋkɛ sha gheɓə ne, wərə ŋkɛ kanza mbe.»

¹¹Ma te veci nya se Ɛlizɛ sha mbelia shɛhɛ, cape ŋkɛ kadzeme cɛa nya ɓɛhwɛa shɛ kaɓelahe mbe.

¹²Pa gezete nda ke nde mene slene ta ŋkɛ Gɛhazi kalə kaheka male ke ghɛa shɛ. Ma kwa hekakɛ ŋkɛ, pa nde se kaghereŋe nda te kema ta ŋkɛ.

¹³Pa Ɛlizɛ gezete nda ke Gɛhazi kezha geze nda ke malea shɛ: «Kewəba sa yaka na yitea ghen'yɛ. Wa yanza ghen'yɛ kamenete kezha gha wa? Wərə wəndə kagezete nda ke meghe keɗema ke meghea ka sewajɛ kezha kemanakɛ ŋa na?» Ma ke shɛ: «Ewə, hana! Hwa mbelia ɗa ne, gwezlayɛ 'ya.»

¹⁴Ma ke Ɛlizɛ sha Gɛhazi: «Wa yanza wəndə kamenete kezha ghenta wa?» Ma ke Gɛhazi: «Ya, wəzege ve we, ɓiyitsa kehale hale za nta.»

¹⁵Ma ke Ɛlizɛ shɛ: «Kwiɗi hekake tsagha.» Ma kwa se nde kadzemɛa cɛ yitea hɛ.

¹⁶Ma ke Ɛlizɛ shɛ: «Ma heshi tsetse ŋkwa te və kala nya ne, katekese wəzege na mɛa dzeve ta ŋa.» Ama ma ke: «Hɛhɛyi, ewə! Gha nya kande mɛ ŋkwa ta Shala ne, sla ɗa ma tseŋwə na ma!»

¹⁷Pa malea shɛ dzawa hwə nda, ma kala vəa heshi tsetse ŋkwa ta ŋkɛ, pa yake wəzege teza kala nya gezete nda Ɛlizɛ.

¹⁸Pa wəzege kelenyɛ. Ma te kwete hɛ ne, pa ŋkɛ dzemte kasləyi yitenyɛ kwamte kamene slene le ka leke ha.

¹⁹Taghanyɛ ne, ma ke: «Yita! Aya ghəa ɗa! Shewə 'ya va ghəa ɗa!» Ma ke yitenyɛ sha nde mene slene ta ŋkɛ: «Keleghe nda ŋkɛ ke meghekɛ kahe kahe.»

²⁰Pa nde mene slene keleghe nda wəzege ke meghekɛ. Pa meghekɛ kelete kaveyi kwa seɗa ta nta, ama talala veci kwa ghə ne, mtiwə ŋkɛ.

²¹Ma tagha ne, pa nde dzeme cɛa Ɛlizɛ, ɓelaheyi wəzege te gezle ba'a ŋzlete cɛ. Cape nde kadzemte.

²²Pa nde hekakɛ za nta, ma ke shɛ: «Ghwenave ɗa nde mene slene kwetɛŋe le kwara ŋemale. 'Ya kalə kahe kahe sha nde mɛ ŋkwa ta Shala nda se ɗa 'ya.»

²³Ma ke za nta 'yɛwete ve: «Wa nde menete geva nda lə na shɛ ɓeshi wa? Kenza ŋkɛ kagəsəkəa dzemɛa ghweme ta tere, ya kaveci kezhɛne mpi we.» Ma ke zhɛnete: «Nzama mehele ta ŋa keyirə yirə ma!»

²⁴Pa nde vate serede te kwara, ma ke sha nde mene slene ta nta: «Mbi ɓə, nza te kema ta kwara. Ghereŋema na le 'ya keɗema 'ya kegeze ŋa ma.»

²⁵Cape nde tsagha dzeme laka ghweme ta Karmɛl kezha lə kasləyi Ɛlizɛ. Ma kwa nakɛ Ɛlizɛ kase nde cakeɗake ɗake ne, ma ke sha nde mene slene ta ŋkɛ Gɛhazi: «Wa nya male ta ka Shəwnɛm nya!

²⁶Hwɛ kalə shɛ ba'a 'yɛwete ve kenza ŋkɛ kwelɛŋe nde, tsagha za nta ba'a wəzege ta nci.» Ma ke malea shɛ zhɛnete nda ke Gɛhazi: «Kwelɛŋe mbeli.»

²⁷Ma kwa se nde takwa yitea Ɛlizɛ pelɛ ghweme ne, pa negheyi nda geva kwa seɗa. Kaɗe Gɛhazi keŋka ŋkɛ, ma ke Ɛlizɛ shɛ: «Sərəakɛ ŋkɛ, kwa nza ŋkɛ kebeze beze wənəa nta. Kencɛte ɗa Mahwətə va wa va wa we, kegezete ɗa kwete ghena te we.»

²⁸Ma ke malea shɛ: «'Ya nde səkwəve wəzege va gha na? Ewə! Ma 'ya gezete ŋa: Mba na kegwəfə ɗa ghə gəmə?»

²⁹Ma ke Ɛlizɛ sha Gɛhazi: «Nahe na kehite geva yitea lə na? Kelete geta ta ɗa kwiɗi kalə kadzembe Shəwnɛm. Ma kebegeme na le wəndə kwa hweŋkwa ne, ghereŋema na kanjiŋwe ŋkɛ ma. Ma kenza nde wəndə nde ɗe kanjiŋwe ŋa ne, kelema və na kazhɛne nda ma. Kwagha gɛ, kateve geta ta ɗa na kwa kema va wəzege.»

³⁰Ama ma ke malea shɛ sha Ɛlizɛ: «Te sləa Mahwətə nya le mpi ba'a le ŋa ŋa le ghəa ŋa ne, kalə 'ya keɗema mə le gha we.» Cape hɛ le Ɛlizɛ.

³¹Ama mpelɛa ma Gɛhazi ntsehe ke hɛ. Pa sha geta ta Ɛlizɛ kwa kema va wəzege, wəsə shɛ kemenete geva we: gaka shɛ we, kegaŋkəɗə we. Pa se sha nde mɛ ŋkwa kageze nda: «Kezhɛneke wənə wəzege we.»

³²Ma nda ntsehe Ɛlizɛ ki ghɛa shɛ ne, mba wəzege shanda kemte mte te gezle.

³³Pa Ɛlizɛ dzembe cɛ, pa ŋzlete cɛ yitea ghəa ŋkɛ, ntake ŋkɛ kasəkwə Mahwətə.

³⁴Pa bərəɓənyɛ kənəa wəzege, jikə mɛ le mɛ, ntsə le ntsə, dzeve le dzeve. Ma kwa nza ŋkɛ kənə, pa geva ta wəzege zhɛne nefekɛ geva.

³⁵Pa Ɛlizɛ sate kadzeghwa mbe cɛa shɛ dzembe teke dzembe teke ke, zhɛne bərəɓə ŋkɛ kənə zhɛkwa. Pa wəzege tsate watɛhe mberefaŋe zhigə, pa pelemte ntsə.

³⁶Taghanyɛ pa Ɛlizɛ hekakɛ Gɛhazi, ma ke shɛ: «Kwiɗi ghwezeke meghekɛa wəzege.» Pa Gɛhazi sawa kazeleke. Ma kwa se nde ne, ma ke Ɛlizɛ shɛ: «Nde kelete wəzege ta ŋa.»

³⁷Pa hendeke geva, gwəɗəŋə nde mbe hwəa ŋkɛ ntiŋə ghə mbe hɛɗi. Pa kelete wəzege ta nta, cape nde.

³⁸Ma te kwete hɛ ne, pa ma menete geva te hɛɗi, na Ɛlizɛ kese kadzembe Gilgal, pa tsenete ka mɛ ŋkwa yite. Ma ke sha nde mene slene ta ŋkɛ: «Veyi shaga kwa dəghwə nya wəba te ghwə shɛ na takɛ nda nɗeli ke wəvəsəa ka mɛ ŋkwa.»

³⁹Pa kwete wəndəa nci slə kadzembe wəve kaɗa gwəzə. Pa ŋkɛ nakɛ kwete wəsə kala hɛremɛɗɛ mbe gamba, pa ŋkɛ ndave ya te. Mpɛafe ŋkɛ shɛ mbe lekwesa, sema ta ŋkɛ ne, pa ŋkɛ tsasleve hɛ mbe ba'a beteyi hɛ shaga nya wəba. Wəndə shɛ keɗepe wəsəa shɛ we.

⁴⁰Ma kwa nehe nɗeli nyagha mbeli ne, ndɛame ke hɛ shɛ ne, ntake hɛ kageze: «Ghwɛ ya hwa nɗeli nya, nde mɛ ŋkwa ta Shala!» Wəndə shɛ kashɛ zeme we.

⁴¹Ma ke Ɛlizɛ gezete: «Ntake ɗa hə!» Pa menahwe hwa nɗeli, ma ke shɛ: «Mze nda ke hɛ kazeme hɛ!» Nahe wəsə nya kwa shaga shɛ kezhɛrenyɛ wərə mbeli kazeme.

⁴²Mbe və nyagha shɛnyɛ, pa kwete wəndə nya kese mbe Ba'al-Shalisha fəke nda ɗafa nyi takɛ mbeli yitea ncɛ kema ta wəshi: bakemsə hwa ta ɗafa megi le ŋa ha ghə, pa slibə viɗi ya ta wəshi kwa menjaɓa kwa. Pa Ɛlizɛ geze ke nde mene slene ta ŋkɛ kanehe nda ke hɛ pɛtɛ.

⁴³Ama ma ke nde mene nda slene ta ŋkɛ zhɛnete: «Tsema nza 'ya kabehekɛ mbeli gwəmsə le wəshi nyi wa?» Ma ke Ɛlizɛ: «Nehe nda ke mbeli pɛtɛ kazeme hɛ! Kwa nza ŋkɛ wa nya ghena ta Mahwətə nya: ‹Pɛtɛ tekemave yayata wəndə kazeme, pa le tene tetene hɛ.›»

⁴⁴Pa nde mene slene neheve nda ɗafa ke mbelia nci. Yayata wəndə kezehwe, tene hɛ kala nya gezete Mahwətə.