Read kapsiki 2 Ka Meghea Kɛfi 7 Bible Online

2 Ka Meghea Kɛfi 7 - kapsiki bible

2 Ka Meghea Kɛfi 7

¹Ma ke Ɛlizɛ zhɛnete nda: «Fa mə pɛtɛa ŋayɛ ghena nya geze Mahwətə: ‹Hendɛ tsetse ŋkwa kala nya, katepa hə mbeli kiləwə meŋe bakeghəmbe deke le dəɓərə kwetɛŋe, tsagha kiləwəa megi bakemsə wəfaɗeghəmbe, te shikwəa ka Samari we.›»

²Wəndə nya terasle yitea meghe nya dɛŋe geva ŋkɛ keveci keveci, ma ke: «Ya Mahwətə ntsate wəfela te ghweme kabetakawa ha ne, pa nya gezete nya na menete geva na?» Ma ke Ɛlizɛ: «Yawa, katenakɛ na, ama kandɛmakɛ na we.»

³Ka derena ya shɛ wəfaɗe pelɛke pelɛke ta meleme, takwa yitea mɛ degha nya wəba. Ma ke hɛ kwelɛ ghəa nci: «Wa raberə nza ghen'yɛ pelɛ kaneghe mte wa?

⁴Ya gheɓəmə tarete dzembe meleme ne, katempə gheɓəmə kwa ɗema wəsə kezeme shɛ. Gheɓəmə nza teke ne, katempə gheɓəmə perə! Dzawa ɓəmə ɓetəkə mbe ghedəkwəa ka Siri ba'a ndeke nda ɓəmə ghəa ɓəmə ke hɛ. Ma kesərəakɛ ɓəmə hɛ teghweme ne, megela, kanza gheɓəmə teghweme. Ma kempəmte ɓəmə hɛ ne, yawa, katempə gheɓəmə!»

⁵Ma hetɛhwɛɗi ne, ntəŋə hɛ dzawa laka ghedəkwəa ka Siri. Hwa'a hɛ yitea ghedəkwə ne, kenakɛ wəndə hɛ we.

⁶Nda ma mbe ghedəkwəa ka Siri ne, nahe Mahwətə kedakete ka sewajɛ le gaka ta ka sewajɛ nyi berete berete, gədəwəa lɛmə ba'a yɛ wəmata gədəwə. Ma ke ka Siri kwelɛ ghəa nci: «Meghea ka Israyɛl pave ka sewajɛa ka Hɛt le ŋa ka Ɛzhipte kezha se kaɗa ɓəmə!»

⁷Nahe hɛ kehwɛnji zlərə ŋkwa kambele mpia nci. Mba ghedəkwə le wəshi nyi kwa, mba cɛ lekwesa, yɛ gədəwə ba'a kwara lɛmə.

⁸Ka derena nyi wəfaɗe nyighɛ ne, shilimə hɛ mbe ghedəkwə. Shilimə hɛ mbe kwete cɛ lekwesa, kazehwe wəsə, kasahwe wəshi nyi kemave hɛ. Pa hɛ fəte mze kwa ghɛmɛ le yɛ mze kwa tere tere le lekwesa kalə kawəfərəakɛ pelɛke te ŋwela. Pa hɛ dzembe kwete cɛ lekwesa ba'a fəte wəshi keghə keghə nyi lə hɛ kawəfərəakɛ.

⁹Ama ma ke hɛ kwelɛ ghəa nci: «Wəsə nya mene nya mə ne, megela ŋkɛ we: ghena kezlama ya va gheɓəmə ne, pa gheɓəmə yate kezha ghəa ɓəmə. Ma keneghete hendɛ gheɓəmə le nda tencɛ ŋkɛ gheɓəmə ne, kateɗa ɓəmə mbeli. Mbi ɓəmə! Kele ɓəmə ghena ganyɛ nya kadzeki ghɛa meghe.»

¹⁰Pa hɛ zhɛneke geva kase kadzembe meleme, pa hɛ hekakɛ mbeli nyi kenewe ŋkwa mɛa degha ta meleme, ma ke hɛ sha hɛ: «Nahe ghen'yɛ kese mbe ghedəkwəa ka Siri, wəndə shɛ mbe we, kefate ghena ta wəndə ghen'yɛ mbe we. Deke gədəwəa lɛmə ba'a kwara lɛmə nyi kehwepe hwepe ba'a cɛ lekwesa ya mba tagha.»

¹¹Pa ka newe ŋkwa te mɛ ghweme hekakɛ kwete wəndə taghanyɛ kezha lə le ghena shɛ kadzeki ghɛa meghe.

¹²Pa meghe sate te tepe viɗi, ma ke sha mbelia ŋkɛ: «Kaba mə 'ya kancɛ ŋayɛ ntsehwele nya mene ka Siri! Nahe hɛ keɗepe shewə mə va ma: vatse slənji hɛ mbe ghedəkwə kalənji kawəfərənji hwa gamba. Ma keshave ɓəmə mə mbe Samari ne, nda tekese ɓəmə hɛ le mpi ba'a kadzembe meleme hɛ.»

¹³Pa kwete wəndə kwelea ka sewajɛ gezete nda ke meghe: «Kelete ɓəmə gədəwə nyi mba teghweme mcɛfe. Ya tsemanyɛ ŋkɛ ne, katempə hɛ kala pɛtɛa mbeli nyi mbe meleme. Ghweneghe ɓəmə kweci mbeli le gədəwəa lɛməa shɛhɛ kezha newe wəsə nya kemenete geva.»

¹⁴Pa meghe gezete kezha hwepe wəmata gədəwə bake mbeli yitea gədəwəa lɛmə ba'a pa ghwenakɛ ka sewajɛ heviɗi kazele ka sewajɛa ka Siri ba'a kanewe wəsə nya kemenete geva.

¹⁵Pa ka newe ŋkwa heviɗi zelete seɗa ta ka sewajɛa ka Siri hwa'a kwa Zhəwrdɛŋe. Dzeyi kwa hweŋkwa ne kwele kwele lekwesa le kweci wəshi nyi betakɛ ka Siri kezha ɗepe hwɛ kahe kahe. Pa mbeli nyi ghwenakɛ mbeli se kagezete nda ke meghe.

¹⁶Taghanyɛ, pəɗəmə ka Samari kadzembe ghedəkwəa ka Siri kezha fə wəshi nyi mbe. Kala nya gezete Mahwətə ne, deke le dəɓərə kwetɛŋe pa kiləwəa hə meŋe bakeghəmbe mbeli, tsagha kiləwəa megi bakemsə wəfaɗeghəmbe.

¹⁷Pa meghe ghwenakɛ nde mene slene ta ŋkɛ, nya kebeghe ŋkɛ keveci keveci, kezha newe wəsə nya kemene geva te shikwə, kwa mɛ degha ta meleme. Ama pa mbeli tsenete te ŋkwa shɛ ba'a ŋkeɗemte ŋkɛ, mtiwə ŋkɛ kala nya gezete nde mɛ ŋkwa Ɛlizɛ, kwa se meghea ka Israyɛl kasləyi ŋkɛ.

¹⁸Kwa nza ŋkɛ ma ke Ɛlizɛ gezete nda ke meghe: «Hendɛ tsetse ŋkwa ne, katepa kiləwə megi mbeli te dəɓərə kwetɛŋe bakemsə wəfaɗeghəmbe tsagha kiləwə hə meŋe bakeghəmbe te shikwəa Samari we.»

¹⁹Ma ke nde mene slene ta meghe zhɛnete: «Ya Mahwətə ŋate wəfela te ghweme ba'a betakawa ha ne, pa ghena nya gezete nya na menete geva na?» Ma ke Ɛlizɛ zhɛnete nda: «Katenakɛ na, ama kandɛmakɛ na we.»

²⁰Nyagha shɛ nde menete geva kaganda: pa mbeli tsenete geva mɛa mɛa degha ta meleme kaŋkeɗemte nde mene slene ta meghe, mtiwə ŋkɛ.