Read kapsiki 2 Ka Meghea Kɛfi 8 Bible Online

2 Ka Meghea Kɛfi 8 - kapsiki bible

2 Ka Meghea Kɛfi 8

¹Ma te kwete hɛ ne, pa Ɛlizɛ gezete nda ke male nya zhɛnahwe wənə ŋkɛ hwa wəzege ta nta nya kemte, ma ke shɛ: «Slə ŋayɛ mə le mbelia ŋa teke, kwiɗi mə kanza te ŋkwa nya ɗepe yɛ. Kwa nza ŋkɛ, na Mahwətə kezəzəte kateve ma te hɛɗia ka Israyɛl. Kategha geva ŋkɛ katemə kava mberefaŋe.»

²Pa malea shɛ menete wəsə nya gezete nda nde mɛ ŋkwa: pa hɛ slənji kahe kahe le mbelia nta kalə kanzanji kava mberefaŋe te hɛɗia ka Filisti.

³Ma te kwa keɗaŋe ta va mberefaŋe ne, pa hɛ senji se te hɛɗia ka Filisti, pa ŋkɛ lə sha meghe ka'yɛwe ghɛa nta le wəvea nta.

⁴Ma vəa ŋkwa shɛ ne, mbe geze ghena yɛ meghe le Gɛhazi, nde mene slene ta Ɛlizɛ. Gheŋkɛ ka'yɛwe pɛtɛ wəshi meŋele nyi menete Ɛlizɛ kezha gezete nda ŋkɛ.

⁵Yipə yipə le geze nda ghena ta wəzege nya kemte nda zhɛnahwe mpi Ɛlizɛ hwe Gɛhazi, nda senyɛ meghekɛa wəzege shɛ sha meghe kezha 'yɛwe ghɛa nta le wəvea nta. Ma ke Gɛhazi: «Maze yawe, wa nya malea shɛ nya le ghəa nta, le wəzege ta nta shɛ nya zhɛnahwe nda mpi Ɛlizɛ.»

⁶Pa meghe ka'yɛwe va malea shɛ, pa gezemte nda ghena shɛ pɛtɛ. Taghanyɛ pa meghe ndeke nda ghena shɛ ke kwete nde mene slene ta ŋkɛ nya ɗema ghəa ŋkɛ kagezleŋe ve kezha ve nda wəshi nyi kaŋa nta ke malea shɛ: gezete nda ke mbeli ŋkikɛ nda wəshi nyi meneve mbeli te wəvea nta ghala ɗema nde te hɛɗi nya pa te və nya ɓeshi.

⁷Ma te kwete hɛ ne, pa Ɛlizɛ lə kadzembe Damas. Shewə meghea ka Siri, Bɛn-Hadad. Ma kwa fate ŋkɛ teke nde mɛ ŋkwa ta Shala mbe meleme,

⁸ma ke sha Hazayɛl: «Kwiɗi ɗave nda wəsə gəmə ke nde mɛ ŋkwa Ɛlizɛ. Kwa sebe ta ŋkɛ, geze nda kezha 'yɛwe nza ta ɗa ŋkɛ va Mahwətə kenza nde kambele 'ya va zereghwe nya.»

⁹Pa Hazayɛl lə sha nde mɛ ŋkwa: le wəshi ganji nyi te hɛɗia ka Damas te zlegwemə wəfaɗemsə kezha ve nda ke Ɛlizɛ. Hwa'a ŋkɛ sha nde mɛ ŋkwa ma ke shɛ: «Nde mene slene ta ŋa Bɛn-Hadad, meghea ka Siri nde ghweneke ɗa. Pa gezete ɗa ka'yɛwe va gha kenza nde kambele ŋkɛ va zereghwe ta ŋkɛ.»

¹⁰Ma ke Ɛlizɛ zhɛnete nda: «Kwiɗi geze nda katembele ŋkɛ kaganda, ama nahe Mahwətə kencɛte ɗa katemte ŋkɛ.»

¹¹Taghanyɛ kanewe mbeli ne nahe nza ta nde mɛ ŋkwa le kema ta ŋkɛ kezhɛrenyɛ, ntake kanehwene.

¹²Ma ke Hazayɛl shɛ: «Yitea wa nehwene na wa nde mɛ ŋkwa?» Ma ke Ɛlizɛ zhɛnete nda: «'Ya kenehwene kwa ɗepe wəsə kwa ndiremi nya temene nda na 'ya ke ka Israyɛl: katendə meleme ta nci nyi berete berete na, katesla ghə na te mempɛhwetɛti, katemberɛɗɛ ŋwalea fəshi na, katehene mi nyi le hwə na.»

¹³Ma ke Hazayɛl: «Tsema nza 'ya kamenete wəsə nya kala nya berete ta kwele va 'ya ya ɓɛhwɛ we?» Nahe Mahwətə kencɛte ɗa katenza na kameghe mbe Siri.

¹⁴Pa Hazayɛl slənyɛ yitea Ɛlizɛ kazhɛneghe geva kalə sha mɛtrea ŋkɛ. Ma ke 'yɛwete ve: «Wa ke nde mɛ ŋkwa sha gha wa?» Ma ke Hazayɛl zhɛnete: «Nahe ŋkɛ kegezete ɗa katembele na.»

¹⁵Ama te hendɛ ta ŋkwa ne, pa Hazayɛl kelete gwada, selameyi ŋkɛ hwa yɛmə ba'a pelakeyi ŋkɛ kwa kema ta meghe kezha ɓərətə ŋkɛ. Pa meghe mtenyɛ, pa Hazayɛl dzete meghe te ŋkwa ŋkɛ.

¹⁶Te kwa mcɛfe ta va ta Zhoram, wəzege ta Akab meghea ka Israyɛl, Zhoram wəzege ta Zhozafat, nde kelete meghe mbe Zhəwda.

¹⁷Va ta ŋkɛ mahekenemsə bakeghəmbe, pa ŋkɛ menete va deghese mbe meghe mbe Zhɛrəzalɛm.

¹⁸Pa wəmeve wəzha ta Akab. Kendireminyɛ dzeghwa ta ŋkɛ kala kweci ka meghea ka Israyɛl ba'a kala mbelia Akab, nyi kemene wəshi nyi ɗema ghəa Mahwətə.

¹⁹Ndagwara kaɗe zamte meghea Zhəwda Mahwətə we. Kwa nza ŋkɛ nahe Mahwətə kemeɗeyi nda ke nde mene nda slene David kamene meghe sebe ta ŋkɛ kajive kajive mbe Zhɛrəzalɛm.

²⁰Te vəa meghea Zhoram ɗema ka Ɛdom fa ghena va ka Zhəwda pa hɛ ntave ŋa nci meghe.

²¹Pa Zhoram lə kadzembe Sayir le wəmata gədəwə kempa ta ŋkɛ pɛtɛ. Ma te tepe viɗi ne, pa meghe le mbelia jama nyi te ghəa wəmata gədəwə kempa ta ka Ɛdom nyi kentəsləte hɛ. Pa ka sewajɛa ka Zhəwda hwɛnji kalə sha ghɛa nci.

²²Se te vecia shɛ ne, nahe ka Ɛdom kenza waɗe laka ka Zhəwda. Pa meleme ta ka Libna ɗema ghena ta ka Zhəwda perə mbe vəa shɛnyɛ.

²³Ma kweci slene nyi menete Zhoram ne, nahe hɛ kenza kerafe rafe mbe. “Palepa ta wəshi nyi menete ka meghea ka Zhəwda”.

²⁴Ma kwa mtenyɛ ŋkɛ ne, pa mbeli lamte ŋkɛ kwa kwele ta ka shihɛnyɛ mbe meleme ta David. Pa wəzege ta ŋkɛ Ahaziya kelete meghe ta ŋkwa ŋkɛ.

²⁵Te kwa meŋe bakeghəmbe ta va ta Yoram wəzege ta Akab, kameghea ka Israyɛl, Ahaziya wəzege ta Zhoram nde kelete meghe mbe ka Zhəwda.

²⁶Va ta ŋkɛ bakemsə bakeghəmbe nda kelete meghe ŋkɛ, kwetɛŋe menete va ŋkɛ kameghe mbe Zhɛrəzalɛm. Atali sləa meghekɛ, hwelefe ta Omri meghea ka Israyɛl nde.

²⁷Pa Ahaziya menete wəsə kwa ndiremi kwa kema ta Mahwətə kala nya menete mbelia ghɛa Akab, kwa nza ŋkɛ nahe ŋkɛ kejikəte geva le hɛ laka wəme.

²⁸Yɛ Zhoram wəzege ta Akab hɛ le Ahaziya lə kampa le Hazayɛl meghea ka Siri, mbe Ramot te hɛɗia Gala'ad. Ma hwa mpa ne, pa ka Siri ɗakɛ meghe Yoram le zhi.

²⁹Pa zhɛneghe geva kadzembe Zhizrɛyɛl kampi zhia ŋkɛ. Pa Ahaziya lə kadzembe melemea shɛ kezha newe Yoram kwa nza ŋkɛ shewə kwele kwele.