Read kapsiki 1 Wəshi nyi Mene Ka Meghe 10 Bible Online

1 Wəshi nyi Mene Ka Meghe 10 - kapsiki bible

1 Wəshi nyi Mene Ka Meghe 10

¹Ma te kwete hɛ, pa ka Filisti ntsa yitea ka Israyɛl le mpa pelɛ ghweme ta Gilbowa. Kweracɛ ka Israyɛl hwɛnji, ama kwele kwele nyi mpəmte mbeli.

²Ŋkelikə ka Filisti kənəa yɛ Sawəl le ŋwalea ŋkɛ. Pa hɛ mpəmte yɛ Zhonatan, Abinadab le Malkishəwa nyi kaŋwale tezhilia meghe Sawəl.

³Se te vəa shɛ ne, dzawe zhɛrenyɛ mpa kaŋa Sawəl. Pa kweci ka mpa have ntsate, ntake Sawəl kabare bare va ghazlənə te kema ta nci.

⁴Ma ke sha nde kele nda wəshi kempa ta ŋkɛ: «Kelete kafayɛa ŋa shɛ na n'yimte ɗa le, va nya nza nde kaɗe 'ya kapesle ɗa ka Filisti nyi kaka slamtema mɓɛta nyi le ghəa nci kezha ŋ'wəshi ɗa we.» Ama hɛreɗɛ nde kele wəshi kempa ta ŋkɛ ɗema kwa zhɛ nda ghazlənə zlahe. Pa Sawəl kelete kafayɛa ŋkɛ ɓiyitsa, pa neghate geva te.

⁵Ma kwa nakɛ nde kele nda wəshi kempa ta ŋkɛ nahe Sawəl kemte ne, pa neghate geva te ŋa ŋkɛ kafayɛ kamtenyɛ perə.

⁶Tsagha menete geva ŋkɛ nda mpənji yɛ Sawəl le ŋwale tezhilia ŋkɛ nyi mahekene. Pɛtɛ mbelia ŋkɛ mpənji te və nya kwetɛŋe.

⁷Nahe ka Israyɛl kefate nahe ka sewajɛa ka Israyɛl kehwɛnji ba'a nahe yɛ Sawəl le ŋwalea ŋkɛ kempə. Tagha gɛ, pa hɛ wəfəyite yɛ meleme ta nci ba'a hwɛnji, pa ka Filisti se kanzanji mbe melemea shɛhɛ.

⁸Te hendɛ ta ŋkwa, pa ka Filisti nyi kelə kezha fə wəshia mbeli nyi kempə mpə nakɛ geva ta yɛ Sawəl le ŋwalea ŋkɛ pelɛ ghweme ta Gilbowa.

⁹Pa hɛ fəhwe wəshia Sawəl, slahwe ghəa ŋkɛ ba'a fəhwe wəshi kempa ta ŋkɛ. Kwa sebe ta ŋkɛ, pa hɛ ncɛte hɛ dzeyi te meleme ta ka Filisti, yitea zlape geva ghena mɛnɛfɛa shɛ dzeyi mbe yɛ ghɛa shala ta nci ba'a hwa mbeli.

¹⁰Kwa sebe ta ŋkɛ, pa hɛ beteyi wəshi kempa ta Sawəl mbe cɛa kwete shala ta nci ba'a baŋeyi 'yɛ'yɛa ghəa ŋkɛ mbe ghɛa shala ta nci Dagon.

¹¹Pa mbeli nyi mbe Yabɛsh nya mbe Gala'ad fate wəshi nyi menete ka Filisti le Sawəl.

¹²Cape ka katsala kɛfia ka sewajɛ lə kezha kele geva ta yɛ Sawəl le ŋwalea ŋkɛ, pa hɛ fəghe hɛ kadzawa Yabɛsh. Pa hɛ lamte 'yɛ'yɛa nci yitea hwemeke ta Yabɛsh, pa hɛ menete səwəmayɛ kahɛ mberefaŋe.

¹³Va nya ɗema Sawəl kese kanza dɛŋe dɛŋe te Mahwətə mtenyɛ ŋkɛ. Kese kahawe va wəshi mahalegəa ŋkɛ we. Nahe ŋkɛ kese kave zəzə te ka gepe ŋkwa kwa weta, ka'yɛwe ghena va hɛ,

¹⁴kaɗema ka'yɛwe ghena va Mahwətə. Kwa nza ŋkɛ tsagha nda menete Mahwətə kapeslekɛ ŋkɛ mbeli, pa ŋkɛ ndeke nda meghe ke David, wəzege ta Zhɛsɛ.