Read kapsiki 1 Wəshi nyi Mene Ka Meghe 11 Bible Online

1 Wəshi nyi Mene Ka Meghe 11 - kapsiki bible

1 Wəshi nyi Mene Ka Meghe 11

¹Pɛtɛ ka Israyɛl tsenete geva yitea David kwa Hɛbron, ma ke hɛ shɛ: «Hwelefe ta ŋa ghen'yɛ, shave ki ghɛ nya kwetɛŋe mə.

²Ma vəashi kwa nza Sawəl mba kameghe ne, nahe na kese te ghəa ka sewajɛa ka Israyɛl kadzemte mpa hɛ ba'a kasheke hɛ. Nahe Shala Mahwətə ta ŋa kegezete ŋa: ‹Gha nde tesleke mbelia ɗa ka Israyɛl, gha nde tenza kameghea nci.›»

³Pɛtɛ mbelia jama ta ka Israyɛl kese sha David perə kwa Hɛbron. Pa tseɓate ghena le hɛ kwa kema ta Mahwətə, pa hɛ fikɛ kanza kameghea ka Israyɛl kala ghena nya kese va Mahwətə, nya gezete Saməyɛl.

⁴Pa yɛ meghe David le pɛtɛa ka Israyɛl dzembe Zhɛrəzalɛm le mpa. Zhɛbəs kwete sləa melemea shɛ, va nya nza ŋkɛ, ma ka Zhɛbəs nyi kese mbe melemea shɛ le nza ne, mbe hɛ.

⁵Ma ke ka Zhɛbəs sha David: «Kadzembe meleme ta n'yɛ yɛ we!» Ama pa David kelehwe Siyon, bela ta meleme nya nza zli biyake yite, nya ndeke nda slə mbeli kwetere wəmbə kaMeleme ta David.

⁶Ma te vecia shɛ, ma ke David gezete: «Ma wəndə nya ketepesle wəndə yitea ka Zhɛbəs mpelɛa ma ne, gheŋkɛ nde tenza kameghea ka sewajɛ.» Zhowab nya nza meghekɛ kaSerəwya nde ghate kaɗa ŋkwa, pa zhɛrenyɛ kameghea ka sewajɛ.

⁷Pa David nzanyɛ mbe bela meleme nya nza nya zli yite, vatse hekate nda slə mbeli “kaMeleme ta David”.

⁸Kwetere wəmbəa ŋkɛ, pa ŋate kweci ghedəkwə dzasle yitea ŋkwa nya heka mbeli kaMilo, ama Zhowab le ŋa ŋkɛ ne, bela ta meleme nya ketene yahite ŋkɛ.

⁹Ma tsagha, mbake yambake geva berete ta David, va nya nza Shala Mahwətə nde berete le.

¹⁰Wa nyi sləa ka katsala kɛfi kempa ta David nyi. Ghenci zlaɓe le ka Israyɛl ne, nahe hɛ keveyi David kameghe kala nya gezete Mahwətə te ghəa mbelia ŋkɛ. Nahe hɛ kenzanji dɛŋe dɛŋe te mbe pɛtɛa vəa ŋkɛ mbe meghe.

¹¹Wa nyi sləa ka katsala kɛfia shɛhɛ nyi: Ishebal, wəzege ta kwete nde Hakmon, nya kameghea ka ya ŋkwa. Gheŋkɛ nde kafete megha ta ŋkɛ mbe kwete və yitea mbeli gwəmsə mahekene kampəmte hɛ hwa mpa nya kwetɛŋe.

¹²Kwa sebe ta ŋkɛ, Ɛlazar, wəzege ta Dodo nya kande Ahowa nya kakwete katsala hwa mbeli nyi mahekene nyi.

¹³Gheŋkɛ nde se le David kwa Pas-Damim te və nya tsenete geva ka Filisti yitea mpa. Ntake ka sewajɛa ka Israyɛl kahwɛ mbe kema ta nci. Le kwete shɛ wəvea megi kwa.

¹⁴Pa yɛ Ɛlazar le mbelia ŋkɛ nzanji te tepe ta wəvea shɛ, pa hɛ kelehwe kampəmte ka Filisti. Nahe Mahwətə kendeke nda hərə ŋkwa zlahe ke ka Israyɛl tagha.

¹⁵Ma te kwete hɛ, mahekene kweci hwa mbelia jama nyi mahekenemsə lə kadzete keleɓa yitea David terasle yitea gezlɛŋəa Adəwlam, kwa nza nde ghedəkwəa ka Filisti ya shɛ kwa zlərəa ka Refay.

¹⁶Ma David ne, te ŋkwa kewəfərə ta ŋkɛ nya nza zli yite ŋkɛ, ama kwa Bɛtelɛhɛm kwete wəvəsəa ka Filisti.

¹⁷Pa David menete kwete zəzə te ŋkwa shɛnyɛ, ma ke: «Wa nde tesa ɗa yɛmə nya kwa weta nya wəba nya mɛa degha ta Bɛtelɛhɛm tse wa?»

¹⁸Ma ɓiyitsa gɛ, pa mbeli nyi mahekene nyighɛ dzawanji laka ghedəkwəa ka Filisti le berete, gəve yɛmə nya kwa ŋkwa ketsene yɛmə nya mɛa degha ta Bɛtelɛhɛm. Pa hɛ keleke yɛməa shɛ ba'a ndeke nda ŋkɛ ke David. Ama kese ŋkɛ kasa we, pa ŋkɛ ndeke nda ŋkɛ ke Mahwətə laka ɓasle ŋkɛ te hɛɗi.

¹⁹Ma ke David: «Shala ta ɗa, hweŋkwa va 'ya kasa yɛməa shɛ we! Nahe ŋkɛ kenza kala mimia mbeli nyi kelə kezha gə ŋkɛ nyi mbasa mbasa kezamte mpia nci.» Pa ŋkɛ ɗema sa yɛməa shɛ. Wa nya tsetse wəsə nya menete ka katsala kɛfi nyi mahekenea shɛhɛ.

²⁰Abishay, wəza meghekɛa Zhowab ya te ghəa wəvəsəa mbeli nyi mahekene nyighɛ. Gheŋkɛ nde kafete megha yitea ka ghema gwəmsə mahekene kampəmte hɛ. Pa zləvəa ŋkɛ dzemtenyɛ hwa wəvəsəa mbeli nyi mahekene nyighɛ.

²¹Gheŋkɛ yanza zləvə te za ma ke kweci mbeli nyi bake, pa zhɛrenyɛ kameghea nci. Wəndə keyipə geva shɛ le mbe wəvəsəa mbeli nyi mahekene nyighɛ we.

²²Nahe Benaya, nde Kabsɛyɛl nya kawəzege ta Yoyada, nya kakatsala sewajɛ, kemene meyidala kwele kwele. Gheŋkɛ nde mpəmte ka sewajɛ nyi ghyana ghyana bake mbe Mowab. Gheŋkɛa shɛ nde dzawa kapeslekɛ nivɛrə kwa yitea weta yɛmə hwa kwacakelɛ nya dzawe.

²³Gheŋkɛa shɛ nde peslekɛ kwete nde Ɛzhipte gare mɛtre bake gasle kwete yite biya ŋkɛ, pa megha yite dzeve ve kedekenyɛ kala sheghwə kepeɗe pawa ketsa zlave nya vəashi. Tereŋe ŋkɛ yite le geta, pa ŋkɛ zləgwəhwe megha ta ŋkɛ ba'a peslekɛ ŋkɛ le.

²⁴Wa nyi wəshi nyi menete Benaya, wəzege ta Yoyada nyi, na kevate zləvə te ghəa ŋkɛ hwa ka katsala kempa nyi mahekene nyighɛ.

²⁵Gheŋkɛ yaɗepe mbeli za ma hwa wəvəsəa mbeli nyi mahekenemsə. Ama keɓelahwe mbeli hwa wəvəsəa mbeli nyi mahekene nyi we. Pa David mbeɗeyi ŋkɛ kawəndə nya keya ŋkɛ.

²⁶Ma kweci ka katsala kempa ne, yɛ: Asayɛl, wəza meghekɛa Zhowab, Ɛlanan, wəzege ta Dodo nde Bɛtelɛhɛm,

²⁷Shamot, nde Haror, Hɛlɛs, nde Palon,

²⁸Ira, wəzege ta Ikɛsh nde Tɛkowa, Abiyɛzɛr, nde Anatot,

²⁹Sibkay, nde Həwsha, Ilay, nde Ahowa,

³⁰Maray, nde Netofa, Hɛlɛd, wəzege ta Ba'ana, nde Netofa,

³¹Itay, wəzege ta Ribay, mbe Gibɛya te hɛɗia ŋwalea Bɛnjamɛn, Benaya, nde Piraton,

³²Həwray nya dekwede yitea hələa Ga'ash, Abiyɛl nde Bɛt-Araba,

³³Azmavɛt, nde Bahəwrim, Ɛliyaba, nde Sha'albon,

³⁴ŋwalea Hashɛm nya kande Gizon, Yonatan, wəzege ta Shagɛ, nde Harar,

³⁵Ahiyam, wəzege ta Sakar, nde Harar, Ɛlifal, wəzege ta Əwr,

³⁶Hɛfɛr, nde Mekɛra, Ahiya, nde Palon,

³⁷Hɛsro, nde Karmɛl, Naray, wəzege ta Ɛzbay,

³⁸Zhowɛl wəza meghekɛa Natan, Mibar wəzege ta Hagri,

³⁹Sɛlɛk, nde Amon, Naray, nde Beyɛrot nya kekele nda wəshi kempa ta Zhowab, Serəwya sləa meghekɛ,

⁴⁰Ira nya kwa yita ta Yɛtɛr, Garɛb nya kwa yita shɛnyɛ,

⁴¹Əwri, nde Hɛt, Zabad, wəzege ta Alay,

⁴²Adina wəzege ta Shiza, kwete hwa meghe nyi mbe hwelefe ta Rəbɛn, nya beghakɛ ka sewajɛ mahekenemsə,

⁴³Hanan, wəzege ta Ma'aka, Yoshafat, nde Mɛtɛn,

⁴⁴Əwziya, nde Ashetarot, Shama ba'a Yɛyiyɛl, ŋwalea Hotam, nde Arowɛr,

⁴⁵Yɛdiyayɛl, wəzege ta Shimri le Yoha, wəza meghekɛ nya kande Tis,

⁴⁶Ɛliyɛl, nde Mahava, Yeribay le Yoshaviya, ŋwalea Ɛlnam, Itma, nde meleme ta ka Mowab,

⁴⁷ba'a yɛ Ɛliyɛl, Obɛd le Yasiyɛl, ka Soba.