Read kapsiki 1 Wəshi nyi Mene Ka Meghe 13 Bible Online

1 Wəshi nyi Mene Ka Meghe 13 - kapsiki bible

1 Wəshi nyi Mene Ka Meghe 13

¹Pa David tsenete ka meghea ka sewajɛa ka Israyɛl ba'a le kweci mbeli nyi yitea meghe.

²Ma ke sha ka Israyɛl nyi ketsenete geva pɛtɛ: «Ma kenza nde ndeɗekə sha gheyɛ ba'a keyɛte Shala Mahwətə ta ɓəmə, ghweneghe nda ɓəmə mɛ ke kweci mbelia ɓəmə nyi mbe Israyɛl pɛtɛ, ba'a ke ka dzeghe Shala le ka Lɛvi nyi mbe meleme nyi nza hɛ. Gezete nda ɓəmə ke hɛ kezha se hɛ sha gheɓəmə.

³Ma tagha gɛ, katekele səndəkwəa Shala ta ɓəmə gheɓəmə kase, va nya nza nde kese mə kakele zəzə te mbe vəa Sawəl we.»

⁴Pɛtɛ mbeli nyi ketsenete geva keyɛte kezha mene kala nyagha kwa nza nde kawəsə nya tiɗiɗi ŋkɛ sha mbeli pɛtɛ.

⁵Pa David tsenete pɛtɛa ka Israyɛl se mbe meleme, se kwa ghala ta Ɛzhipte laka bela kwa zeme hwa'a mbe Lebo-Hamat laka bela kwa gwela kezha lə kakele səndəkwəa Shala same kwa Kiriyat-Yɛyarim.

⁶Zlaɓe ŋkɛ le hɛ kadzembe Ba'ala, geze ta ŋkɛ Kiriyat-Yɛyarim, te hɛɗia Zhəwda kezha kele səndəkwəa Shala, səndəkwəa Mahwətə nya nza ka shɛrəbɛŋe kənə, kala nya hekate mbeli.

⁷Pelɛ ghɛa Abinadab ŋkɛ. Pa mbeli veyi kwa wəmata gədəwə mɛnɛfɛ nya zleɗe yɛ Əwza hɛ le Ahiyo.

⁸Kazlama yɛ David le pɛtɛa ka Israyɛl le wetse kwa kema ta Mahwətə le berete ta nci pɛtɛ, kagha cimə hɛ, katsa wəshi ketsa hɛ: yɛ getsepele, ŋgwəleŋə, dɛŋwə, ciŋəci le yɛ veke.

⁹Ma kwa ntsehe hɛ takwa yitea ŋwela ta Kidon, mbasa sla keneghakɛ səndəkwəa shɛ, pa Əwza hate dzeve kezha tawe ŋkɛ.

¹⁰Pa Mahwətə hwepete wənə va Əwza, pa ɗate va nya kwaɗakɛ səndəkwəa shɛ ŋkɛ. Mtiwə ŋkɛ mtenyɛ tagha mbe kema ta Mahwətə.

¹¹Kwetɛ kwetɛŋe mehele ta David va nya peslekɛ Əwza Mahwətə. Pa ŋkɛ hekate nda slə ke ŋkwa shɛ kaPɛrɛs-Əwza. Tsagha heka ŋkwa shɛ mbeli pa ɓeshi.

¹²Pa David ghazlənənyɛ va Mahwətə ma ke: «Kashɛ 'ya ve Səndəkwəa Mahwətə ki ghɛa ɗa we!»

¹³Pa ɗema kele səndəkwəa Mahwətə kalə sha ghɛa ŋkɛ, mbe meleme ta David, ama pa veyi ki ghɛa Obɛd-Ɛdom nde meleme ta ka Gat.

¹⁴Tere mahekene menete Səndəkwəa Mahwətə ki ghɛa Obɛd-Ɛdom, pa Mahwətə wəpikɛ ghɛa ŋkɛ zlaɓe le mcɛlə nyi ve.