Read kapsiki 1 Wəshi nyi Mene Ka Meghe 17 Bible Online

1 Wəshi nyi Mene Ka Meghe 17 - kapsiki bible

1 Wəshi nyi Mene Ka Meghe 17

¹Ma kwa dzeki ghɛa ŋkɛ meghe David, ma ke nde mɛ ŋkwa sha Natan: «Newe ma nza ta ɗa mbe ghɛ nya menete mbeli le sheghwə lekeleke, ama deke mbe cɛ lekwesa nza səndəkwəa jikə geva ta Mahwətə! Tsema zəzə na te wa?» Ma ke Natan shɛ:

²«Zəzə ganyɛ ya va gha te ghəa ŋkɛ. Menete wəsə nya ɗe na, kwa nza ŋkɛ le gha Mahwətə.»

³Ama te viɗia shɛ, pa Mahwətə gezete nda ghena ke Natan, ma ke shɛ:

⁴«Kwiɗi sha nde mene slene ta ɗa David, ma pa shɛ: Wa nya ghena nya geze ŋa Mahwətə nya: Kaganda geze 'ya, 'ya Mahwətə, gha nde teŋa ɗa ghɛ kanza 'ya mbe we.

⁵Kwa nza ŋkɛ ghala kelakave ka Israyɛl 'ya shave mbe Ɛzhipte pa ɓeshi nya, nahe 'ya kegha kanza mbe cɛ na. Kala wəndə kedzeghwa 'ya pa teke pa teke, ashɛ mbe cɛ lekwesa na wəka?

⁶Ɓiyitsa mbe va shɛ pɛtɛ kwa beghe ka Israyɛl 'ya ne, kwele kwele veyi ka meghe 'ya hwa ka meha ghwə yitea sleke mbelia ɗa ka Israyɛl, ama kegha 'ya kageze sha wəndə: ‹Wa raberə nda ɗema na ŋate ɗa cɛ le sheghwəa lekeleke wa?›, a 'ya we.

⁷Vatse gɛ, pa na geze nda ghena ta ɗa ke nde mene slene ta ɗa David: 'Ya Mahwətə nya te ghəa wəshi pɛtɛ, kwamte se na kaya timɛti nda keleke ŋa 'ya, 'ya ɗete kezha nza na kameghea mbelia ɗa ka Israyɛl.

⁸Le gha se 'ya te yayata ŋkwa nya se na te. Nahe 'ya kempəmte ka ghema ta ŋa te kema ta ŋa. Pa 'ya veyi sləa ŋa kanya wəba kala ka meghe nyi te hɛɗi pɛtɛ.

⁹Kateve nda ŋkwa 'ya ke mbelia ɗa ka Israyɛl. Kave hɛ 'ya te ŋkwa shɛ, katenza hɛ kaɗema ghazlənə shɛ. Kase ka ndiremia mehele kampə hɛ kala nya vəashi we,

¹⁰te və nya veyi ka meha ghwə 'ya kasleke ka Israyɛl, mbelia ɗa. Katempə ka ghema ta ŋa 'ya nda tegeze ŋa ghena 'ya kala nya: 'Ya le ghəa ɗa, Mahwətə, nde teŋa ŋa ghɛ.

¹¹Kwa nza ŋkɛ ne, ma te veci nya tekiɗi mpia ŋa, kanta kwete 'ya kwetɛŋe hwa ŋwalea ŋa kanza kameghe te sebe ta ŋa, kave meghea ŋkɛ 'ya kakwa berete.

¹²Gheŋkɛ nde teŋa ɗa cɛ, te zlaɓa ta ɗa tenza meghea ŋkɛ kaghala ghala.

¹³Kayitenyɛ tenza 'ya, kawəzege ta ɗa tenza ŋkɛ. Kakelemte dzeve ta ɗa 'ya kənə kala nya menete nda 'ya ke meghe nya kese mpelɛa ma ke gha we.

¹⁴Kameghe teve ŋkɛ 'ya kaghala ghala te ghəa mbelia ɗa ka Israyɛl kwa nza ŋkɛ bereteke tenza meghea hwelefe ta ŋkɛ kaghala ghala.»

¹⁵Pɛtɛ Natan ɓelamte nda ghena shɛhɛ ba'a wəsə nya nakɛ ŋkɛ ke David.

¹⁶Pa meghe David lə kadzawa kema ta Mahwətə. Ma ke shɛ: «Shala Mahwətə ta ɗa, nahe 'ya keɗepe, 'ya le mbelia ɗa ne, wərə ghen'yɛ gare ŋ'wete wəsə nya ndeke n'yɛ na we.

¹⁷Ama sha gha ne Shala Mahwətə ta ɗa, ashɛ wərə we. Mba na mbe mene meɗe mɛ zhɛkwa kezha hwelefe ta ɗa. Kala wəndə nya kwele newe ɗa Shala Mahwətə ta ɗa.

¹⁸Wa kwete wəsə nya nza 'ya kagezete ŋa te zləvə nya vate na te 'ya, kwa nza nde nahe na keɗepe ɗa, 'ya nya kande mene slene ta ŋa wa?

¹⁹Kwa nza ŋkɛ kala ghena ta ŋa nya meɗeyi na kwa ɗehwe ɗa na, vatse menete wəshi meŋele nyi na, pa na ncɛte ɗa.

²⁰Shala Mahwətə ta ɗa, wəndə keyipə geva shɛ le gha we! Kwete Shala nya kaganda shɛ keɗema gha, kala nya fa ghen'yɛ ghalanza we.

²¹Tsagha ɓiyitsa, kwete hwelefe shɛ te hɛɗi kayipə geva le ka Israyɛl we. Pa na se kambelemte hɛ, deke hɛ kwetɛŋe, va yaka nya te hɛ, va ka Ɛzhipte ba'a wəshi nyi zhɛrete hɛ kashala, kezha veyi hɛ kambelia ŋa. Pa na veyi hɛ wəbake, kwa menete wəshi meŋele na kezha ŋkamte kweci hwelefefi te kema ta mbelia ŋa.

²²Pa na veyi hɛ kambelia ŋa kaghala ghala, Mahwətə, pa na veyi ghəa ŋa kaShala ta nci.

²³Ma tsetsenya gɛ, Shala Mahwətə ta ɗa, menete wəshi nyi gezete na, yipəte ya hweŋkwa hweŋkwa ŋkɛ kala meɗe mɛa ŋa ke 'ya ba'a ke ka shihɛ ɗa.

²⁴Pa sləa ŋa nza kewəbanyɛ kaghala ghala. Nda geze mbeli: ‹Shala ta ka Israyɛl, Mahwətə nya te ghəa pɛtɛa wəshi ŋkɛ ke hɛ.› Veyi sebe te meghe ki ghɛa ɗa kaghala ghala.

²⁵Kwa nza ŋkɛ gha le ghəa ŋa nde ncɛmte ɗa kave ɗa hwelefe nyi ketekele meghea ɗa kaghala ghala te sebe ta ɗa. Vatse nza 'ya le berete kasəkwə ŋa kala nya teke.

²⁶Mahwətə, Gha ya kaShala, ghena nya gezete na ne, nahe na kemeɗeyi ɗa nza ganyɛ nya tsetsenya!

²⁷Ma tsetsenya gɛ, wəpikɛ mbeli nyi ki ghɛa ɗa kezha nza hwelefe ta ɗa kaka meghe kwa kema ta ŋa kaghala ghala. Kwa nza nde gha nde wəpi ŋkwa gɛ Mahwətə, nza wəpi ta ŋa kaghala ghala!»