Read kapsiki 1 Wəshi nyi Mene Ka Meghe 21 Bible Online

1 Wəshi nyi Mene Ka Meghe 21 - kapsiki bible

1 Wəshi nyi Mene Ka Meghe 21

¹Ma te kwete veci, pa Satan zəzəte kabeze ka Israyɛl kwa ŋkate David ŋkɛ yitea ɓela ka Israyɛl.

²Ma ke David sha Zhowab ba'a sha kweci ka meghea ka sewajɛ: «Kwiɗi mə kaɓela ka Israyɛl, se te hɛɗia Bɛrshɛba hwa'a te ŋa Dan, nda se yɛ kageze ɗa nza ta nci kwa nza nde kaɗe 'ya kaɗepete ɓela ta mbeli.»

³Ma ke Zhowab sha meghe: «Meghe yawe, mbakete ka Israyɛl Mahwətə gwəmsə zhigə! Yitea gha hɛ kaka mene slene ta ŋa. Ama kezha wa ɗe na kaɗepete ŋkwini ŋkwini hɛ ba'a katsəkwə ka Israyɛl yitea beze ghena wa?»

⁴Ama ghena nya gezete meghe ne, kwa shɛma zhɛne ghə ŋkɛ va Zhowab, vatse yɛhwe ŋkɛ kamene. Cape hɛ kadzembe hɛɗia Israyɛl pɛtɛ, kwetere wəmbəa ŋkɛ, pa hɛ zhɛneke geva kadzembe Zhɛrəzalɛm.

⁵Pa gezete nda ɓela ta mbeli ke David: miliyeŋə slibə gwəmsə zhili nyi wərə mpa, 470.000 nyi mbe Zhəwda.

⁶Kese Zhowab kaɓela hwelefe ta ka Lɛvi le ŋa Bɛnjamɛn hwa hɛ we, kwa nza ŋkɛ kwele kwele ɗema ghena ta meghe ŋkɛ.

⁷Pa Shala ɗema ghena nyagha, pa ɗate ka Israyɛl.

⁸Ma ke David sha Shala: «Jaɗafa nya wəba yamenete 'ya. Nahe 'ya keɗepe kala gezhi menete 'ya! Ama kelemte ɗa beze ghena ta ɗa te wənə tsetsenya.»

⁹Ma ke Mahwətə gezete nda ghena ke Gad, kwete nde kelɛŋəa nya kande geze ghena za ta David:

¹⁰«Kwiɗi sha David! Ma pa na shɛ: ‹Wa nya ghena nya geze Mahwətə nya: Ɗa mahekene tarete 'ya kageze ŋa. Ntave hwa hɛ kwetɛŋe nda teve 'ya kadzete gha a ke.›»

¹¹Pa Gad lə kagezete nda ke David: «Wa nya ghena nya gezete Mahwətə nya: ‹Nyama yanta na hwa hɛ wa?

¹²Ma kava mahekene te hɛɗi na, na tere mahekene kahwɛ va kafayɛa ka jaga ta ŋa na, na hɛ mahekene nya temene Mahwətə kaɗa mbeli le kafayɛa ŋkɛ kwa ghwene nde ghwene ta ŋkɛ ŋkɛ kampə ŋkwa le ba, kadzete hɛɗia Israyɛl na?› Zəzəve tsetsenya shɛ na gezete ɗa nya lə 'ya kazhɛne nda ke wəndə nya keghwenakɛ ɗa.»

¹³Ma ke David sha Gad: «Mbe yaka nya wəba 'ya... Ama ganyɛ ma teɗe 'ya mbe dzeve ta Mahwətə kenya mbe dzeve ta wəndə ŋelɛ kwa nza nde kwele kwele zhɛ heli ŋkɛ.»

¹⁴Pa Mahwətə ghweneghe ba kadzembe Israyɛl. 70.000 ka Israyɛl nyi kempə ve.

¹⁵Pa Mahwətə ghweneghe nde ghwene ta ŋkɛ kadzeme Zhɛrəzalɛm kezha pesleyi ba shɛ mbe. Ama kwa nakɛ nde ghwene ta ŋkɛ nya keza ŋkwa Mahwətə kamene slene ta ŋkɛ, pa ghəa ŋkɛ ɗema wəsə kwa ndiremia shɛ, ma ke shɛ: «Wərə tsagha, gweɗakwete dzeve ta ŋa.» Ma vəa ŋkwa nyagha ne, dekwede nde ghwene ta Mahwətə yitea ŋkwa nya se Ornan, nde Zhɛbəs kaleke marəwrəa ŋkɛ.

¹⁶Pa David nakɛ nde ghwene ta Shala nyagha kwelɛ yɛ ghweme le hɛɗi kadzeme Zhɛrəzalɛm le kafayɛ yitea dzeve tekafe kenteɗe nteɗe shave mbe kwəɓə. Wəsə ya hwa hwə va yɛ David le mbelia jama, ntiŋə hɛ sha kema mbe hɛɗi.

¹⁷Ma ke David sha Mahwətə: «Ashɛ 'ya nde ghwenakɛ ŋkwa kaɓela mbeli we? 'Ya nde menete jaɗafa le bezemte ghena. Ama mbeli nyi ne, wəsə shɛ kemenete hɛ we. Mahwətə, Shala ta ɗa, 'ya yahi na kaɗa ba'a mbeli nyi ki ghɛa ɗa, mba na keve wəsə kwa ndiremi kadzete mbelia ŋa!»

¹⁸Ma ke nde ghwene ta Mahwətə sha Gad: «Gezete nda ke David dzeme ŋkɛ pate nda reghwetɛ kedzeghe melɛ ke Mahwətə te ŋkwa nya leke ha ta ŋkɛ Ornan nde Zhɛbəs.»

¹⁹Cape David kadzeme kala nya gezete Gad, kala nya gezave nda Mahwətə.

²⁰Nahe Ornan kenakɛ nde ghwene ta Mahwətə kwa zhɛrete geva ŋkɛ shɛ ŋkɛ kaleke ha ta ŋkɛ, pa wəfərənyɛ le ŋwalea tezhilia ŋkɛ wəfaɗe.

²¹Cape David kadzeme sha Ornan. Ma kwa nakɛ meghe ŋkɛ, pa samenyɛ kwa lane kagwəɗəŋə mɛa hwə ve.

²²Ma ke David sha Ornan: «Pelave ɗa ŋkwa nya nza lane ta ŋa nya te 'ya kapa nda reghwetɛ te ke Mahwətə. Ma tsagha, mba wəsə kwa ndiremi nya kakekave mbeli we. Ndeke ɗa nda ŋsle ŋa 'ya kala səkəməa ŋkɛ.»

²³Ma ke Ornan shɛ: «Kelete meghe, menete kala nya ɗe na! Wa nyi sla ta ɗa nyi kezha dzeghe melɛ le hɛ, wa nyi wəmata sheghwə nyi kezha meha ghwə le ba'a ha kawəsə gəmə, kawəsə nya kese te wəve nya pesete hɛɗi. Pɛtɛ ve ŋa hɛ 'ya.»

²⁴Ama, ma ke meghe shɛ: «Ewə, pa pa 'ya va gha kala səkəməa ŋkɛ. Kadzeghe nda melɛ 'ya ke Mahwətə le wəshia ŋa, kaɗema hɛ kakweci wəshi nyi dzawe sha 'ya we!»

²⁵Pa David ndeke nda dəɓərəa mze kwa tere tere gwəmsə ŋkwaŋe ke Ornan kezha pave ŋkwa shɛ.

²⁶Pa David pate nda reghwetɛ ke Mahwətə. Pa dzeghekɛ melɛ kezele kwelɛŋe. Pa kasəkwə Mahwətə, pa Mahwətə zhɛnete nda kwa ghwenakawa nda ghwə ŋkɛ sawa pelɛ ghweme kezha tere wəshi melɛ nyi te reghwetɛ.

²⁷Pa Mahwətə gezete nda ke nde ghwene ta ŋkɛ kezha zhɛneyi kafayɛa ŋkɛ ŋkɛ mbe kwəɓə.

²⁸Nahe David kenakɛ na Mahwətə kezhɛnete nda səkwə ghə ta ŋkɛ te lane ta Ornan, nde Zhɛbəs. Ma se te vəa shɛ, cape ŋkɛ kadzeghe melɛ tagha keveci keveci.

²⁹Ma cɛ lekwesa nya menete nda Moyize ke Mahwətə te ɓerama mbe vəa shɛ ne, te ŋkwa nya kwetɛŋe hɛ le reghwetɛ kedzeghe melɛ, kwa ghəa kələŋə nya mbe Gabawon.

³⁰Ama kashɛ David lə kadzete ŋkwa shɛ kezha 'yɛwe ghena va Shala kwa ghazlənənyɛ ŋkɛ va kafayɛ nde ghwene ta Mahwətə we.