Read kapsiki 1 Wəshi nyi Mene Ka Meghe 28 Bible Online

1 Wəshi nyi Mene Ka Meghe 28 - kapsiki bible

1 Wəshi nyi Mene Ka Meghe 28

¹Pa meghe David tsenete ka meghe nyi mbe Israyɛl pɛtɛ pelɛ Zhɛrəzalɛm: ka meghe nyi mbe yita, ka meghe nyi te ghəa wəvəsəa ka sewajɛ nyi kemene nda slene ke meghe, ka meghe nyi te ghəa ka sewajɛ slibə ba'a nyi te ghəa ka sewajɛ gwəmsə, mbeli nyi te ghəa mcɛlə le wəshi keseɗa ta meghe, le ŋa ŋwalea ŋkɛ. Tsagha ka tsewe tsewe, le ka katsala ka sewajɛ, le mbeli nyi nza zləvə te hɛ.

²Pa meghe David sate te ŋkwa, ma ke sha hɛ: «Fate ɗa mə ka kesaka ma, le mbelia ɗa. Nahe 'ya kezəzəte kezha ŋa ghɛ kave səndəkwəa jikə geva ta Mahwətə mbe, ŋkwa keŋkeɗe seɗa ta Shala ta ɓəmə.

³Ama ma ke Shala gezete ɗa: ‹Gha nde teŋa ɗa ghɛ nya telə mbeli kahawe va 'ya ki we, kwa nza ŋkɛ kawəndə kempa na ba'a nahe na kempəmte mbeli kwele kwele.›

⁴Ndagwara 'ya yantave Shala Mahwətə ta ka Israyɛl mbe hwelefe ta yiteyɛ ɗa kezha nza ghen'yɛ le hwelefe ta ŋkɛ te ghəa Israyɛl kaghala ghala. Ma mbe kwete və ne, nahe ŋkɛ kentave Zhəwda kawəndə nya te ghə, kwa sebe ta ŋkɛ, pa ntave peləa yiteyɛ ɗa mbe hwelefe ta Zhəwda. Ɓiyitsa hwa ŋwalea yiteyɛ ɗa ne, nahe ŋkɛ keɗehwe nda kezha ve ɗa kameghe te ghəa pɛtɛa ka Israyɛl.

⁵Ma tsetsenya ne, na kentave Salomon hwa ŋwale nyi ndeke ɗa Mahwətə kwele kwele, kezha nza kameghea pelɛ pasla ta ka Israyɛl kamene meghe Mahwətə.

⁶Ma ke sha 'ya: Wəzege ta ŋa Salomon nde teŋa ɗa ghɛ le ŋwela nyi yite, kwa nza ŋkɛ gheŋkɛ yantave 'ya. Kawəzege ta ɗa tenza ŋkɛ, kayitenyɛ tenza 'ya.

⁷Nahe 'ya kehite nda meghe nya ketenza kaghala ghala kenza nde kamene slene ŋkɛ le wəshi mahalegəa ɗa ba'a le ghena nyi gezeke 'ya kala nya nza ŋkɛ ɓeshi.

⁸Ma tsetsenya gɛ ka kesaka meyɛ ɗa, mbe kema ta ka Israyɛl nyi kambelia Mahwətə pɛtɛ ba'a kwa kema ta Shala ta ɓəmə nya kefa ɓə, veyi mə geva kaneweve ba'a kamene slene le wəshi mahalegəa Shala Mahwətə ta ɓə. Ma tsagha, mba nza meleme nya ganyɛ nya kaŋa ŋayɛ ba'a wərə yɛ kayate kawəsə kezeme ghɛ nya kaghala ghala kaŋa ŋwalea ŋayɛ.

⁹Ma gha gɛ wəzege ta ɗa Salomon, tekeve kezha ɗepete Shala nya mene nda slene 'ya, hawe ve le wənə nya ɗema ghala kwa, pa na kanewe nza ta wənəa mbeli le zəzə ta nci pɛtɛ. Ma kezele ŋkɛ na ne, katepele ghəa ŋkɛ ŋkɛ kanewe ŋkɛ na, ama kewəfəyite ŋkɛ na ne, katenegha ŋa ŋkɛ kaghala ghala.

¹⁰Ma tsetsenya, wərə na kaɗepe nahe Mahwətə kentave ŋa kezha ŋa nda ghɛ nya ketenza kaŋkwa nya le kwelɛŋe. Hwepete ghə shɛ na dzembe slene.»

¹¹Pa David ndeke nda ntsehwelea nza ta ghɛ Shala ke Salomon, le kweci cɛ nyi vare. Yɛ cɛ ketsene mcɛlə, le cɛ nyi pelɛ ghəa ŋkwa keɗema nyi mbe, ba'a cɛ nya kaŋa səndəkwə Shala.

¹²Pa ŋkɛ ndeke nda ntsehwelea wəshi nyi zəzəte ŋkɛ pɛtɛ kezha ŋa, yɛ ŋwela nyi mbe ghɛa Shala, le cɛ nyi dzasle yite, le nyi tsene wəshia mcɛləa ghɛa shɛ mbeli mbe ba'a nyi tsene wəshi nyi keleke mbeli kaŋa Shala.

¹³Pa ŋkɛ ndeke nda sləa wəvəsəa ka dzeghe Shala, le wəvəsəa ka Lɛvi, le slene nyi temene mbeli mbe ghɛa Mahwətə ba'a ŋa wəshi kesəkwə ghə mbe ghɛa Shala.

¹⁴Pa ncɛte nda kiləwəa mze kwa tere tere nya kehi kaŋa yayata wəsə nya mene mbeli le yite ba'a kiləwəa mze kwa ghwə ghwə kezha wəshi nyi mene mbeli le kala nza ta nci keghə keghə,

¹⁵le kiləwəa wəshi keve paterela zlaɓe le yɛ paterela kwa mze kwa tere tere, le ŋa wəshi keve paterela le yɛ paterela kwa mze kwa ghwə ghwə, kala slene nya mene mbeli keghə keghə le hɛ,

¹⁶le kiləwəa yayata kwete hwa tabele kwa mze kwa tere tere nyi ve ɗafa nyi keveyi geva kaŋa Shala mbeli te, le ŋa tabele kwa mze kwa ghwə ghwə,

¹⁷le ɗaŋeɗa ta lɛ nya njaŋa ŋa kezeme sli, ba'a ŋa zlerekwe kepisə ŋkwa le tereme kwa mze kwa tere tere nya ganyɛ, le ŋa 'yɛmbe kwa mze kwa tere tere ba'a ŋa mze kwa ghwə ghwə kala nya ɗe ŋkɛ,

¹⁸ba'a kiləwəa reghwetɛ ketere 'wərdə le mze kwa tere tere nya ganyɛ. Ma kakwa keɗaŋe gɛ, pa ŋkɛ ndeke nda pa ta wəmata gədəwə nya keveyi geva kaŋa Shala, le ka shɛrəbɛŋe nyi nza bidzə ta nci tepele kənəa səndəkwəa jikə geva ta Mahwətə.

¹⁹Ma ke David ɓiyitsa: «Pɛtɛ wəshi nyighɛ kerafete geva mbe palepa nya kemave 'ya se va Mahwətə. Palepa shɛ nde ncɛ nza ta pɛtɛa wəshia shɛhɛ tsema tsema mene hɛ mbeli.»

²⁰Kwetere wəmbəa ŋkɛ, ma ke mbakete: «Wəzege ta ɗa, nza le hwepe ghə ba'a le berete. Mene slene, mba na kebare bare ba'a keghazlənə! Va nya nza ŋkɛ katewəfə ŋa Shala Mahwətə ta ɗa we. Le gha ŋkɛ ba'a katekemane ŋa ŋkɛ pa te kiɗi ta slene ta ghɛa Mahwətə.

²¹Le gha ka dzeghe Shala le yɛ ka Lɛvi nyi kemene slene ta ghɛa Shala kewəvəsə kewəvəsə perə. Ɓiyitsa kaŋa slene nya ketemene geva, le mbeli nyi nza ɗe ganyɛ va hɛ, nyi keɗepe slene tsape yitea yayata slene hwa ka meghe le jikə ta mbeli pɛtɛ.»