Read kapsiki 2 Wəshi nyi Mene Ka Meghe 10 Bible Online

2 Wəshi nyi Mene Ka Meghe 10 - kapsiki bible

2 Wəshi nyi Mene Ka Meghe 10

¹Cape Robowam kadzawa Sishɛm, kwa nza ŋkɛ kwagha se hwelefe ta ka Israyɛl nyi laka bela kwa gwela katsa kaka kənə kameghe.

²Ma Zhɛrobowam wəzege ta Nebat ne, kwa Ɛzhipte ŋkɛ kwa hwɛnyɛ ŋkɛ va Salomon. Ma kwa fate tsene nya mbe Sishɛm shɛ ŋkɛ, pa same kwa Ɛzhipte.

³Pa mbeli ghwenakɛ ŋkwa kaheka, pa ŋkɛ se kadzehwa hwelefe ta mbeli nyi laka bela kwa gwela. Ma ke hɛ gezete nda ghena ke Robowam:

⁴«Keveci keveci se yiteyɛ ŋa kamene n'yɛ kala ka mavashi. Ma kenza ŋkɛ kazhɛrete n'yɛ yaka nya na tsetsenya kefe kefe, kwa nza ŋkɛ ɗaŋe ɗaŋe te welɛ va ghen'yɛ kala sheghwə nya te welɛ va sla kewəza ne, nahe n'yɛ kehite geva katemene ŋa slene.»

⁵Ma ke Robowam sha hɛ: «Nda se yɛ sha 'ya kwetere wəmbəa hɛ mahekene.» Pa mbelia shɛhɛ dzeghwanji.

⁶Pa meghe Robowam 'yɛwakɛ ntsehwele va mbelia jama nyi kese yitea yitenyɛ Salomon kwa nza ŋkɛ mba te ghweme. Ma ke 'yɛwakɛ ghena va hɛ: «Wa ntsehwelea ghena nya ncɛ ɗa yɛ kezha zhɛne nda 'ya ke mbeli wa?»

⁷Ma ke mbelia jama shɛ: «Ma kencɛte ghəa ŋa na kawəndə ganyɛ sha mbeli, pa na menete wəsə nya ɗe nya hɛ, ma kezhɛnete ghena nya kaganda na ke hɛ, kaka mene ŋa slene tenza mbeli keveci keveci.»

⁸Ama pa meghe ɓelama ghena ntsehwelea mbelia jama. Pa 'yɛwakɛ ntsehwele va megelɛshi nyi dzeyi yite ba'a ka mandalahɛnyɛ.

⁹Ma ke sha hɛ: «Mbeli nyi ka'yɛwe va 'ya kezha zhɛrete wəsə nya vaghe yiteyɛ ɗa kənəa hɛ kala sheghwə nya te welɛ va sla kewəza kakwa kefe kefe. Wa ntsehwelea ghena nya ncɛ ɗa yɛ kezha zhɛne nda ke hɛ wa?»

¹⁰Ma ke megelɛshi nyi kaka mandalahɛnyɛ shɛ: «Mbeli nyi kanehwene va nya se yiteyɛ ŋa kamene le hɛ kala ka mavashi, hɛ ka'yɛwe va gha kezha zhɛrete wəsə kwa ɗaŋeɗa kakwa kefe kefe ɓahwe, wa nya ghena nya zhɛne nda na ke hɛ nya: ‹Deke ma kwatɛka ta dzeve ta ɗa ke dzeve ta yiteyɛ ɗa.

¹¹Nahe yiteyɛ ɗa kevate sheghwə kwa ɗaŋeɗa te welɛ va gheyɛ kala sla kewəza, ma 'ya ne, sheghwə nya ɗaŋeɗa ma yave ŋayɛ 'ya zhɛkwa. Ma ghweɗa yase yiteyɛ ɗa kaŋka ŋayɛ kadzeghwa le ne, ma 'ya ne, le kwərəpə teŋka ŋayɛ 'ya yitea dzeghwa.›»

¹²Ma te kwa mahekene ta hɛ ne, pa yɛ Zhɛrobowam le mbeli pɛtɛ se kasləyi Robowam, kala nya gezete nda ŋkɛ ke hɛ.

¹³Nahe meghe keɗema ɓela ntsehwele nya ncɛte nda mbelia jama. Pa zhɛnete nda ghena ke mbeli 'yaghwake ghwake,

¹⁴kwa yɛhwe ntsehwelea ka mcɛhɛnyɛ nyi kaka megelɛshi ŋkɛ. Ma ke: «Nahe yiteyɛ ɗa kevate sheghwə nya ɗaŋeɗa te welɛ va gheyɛ kala sla kewəza, ma 'ya ne, za ma temtsehe ɗaŋeɗa ŋkɛ 'ya. Le ghweɗa se yiteyɛ ɗa kaŋka ŋayɛ yitea dzeghwa, ma 'ya ne le kwərəpə teŋka ŋayɛ 'ya yitea dzeghwa.»

¹⁵Tsetse se ŋkɛ nda yɛtema ghena nyi 'yɛwete mbeli ve ŋkɛ. Kwa nza ŋkɛ, Mahwətə nde zhɛremte ghena shɛhɛ kala nya kezha yipə meɗe mɛ nya meɗeyi nda ŋkɛ ke Zhɛrobowam wəzege ta Nebat, laka nde mɛ ŋkwa Ahiya, nde Silo.

¹⁶Ma kwa fave ka Israyɛl nyi laka bela kwa gwela kaɗema meghe kese kayɛ ghena nyi 'yɛwete hɛ, ma ke hɛ shɛ: «Wa wəsə nya kejikəte n'yɛ le David wa? Wəsə nya kejikəte n'yɛ shɛ le wəzege ta Zhɛsɛ nya we! Ka Israyɛl, yayata wəndə kazhɛre geva kalə sha ghɛa ŋkɛ. Ma gha gɛ, shia David, yana le hɛɗia ŋa!» Pa hɛ slənji te ŋkwa shɛ.

¹⁷Kezhɛne mbeli kaɗepe Robowam kameghe keɗema deke mbeli nyi te hɛɗia Zhəwda nahe we.

¹⁸Ndagwara nahe ŋkɛ keghwenakɛ Hadoram, wəndə nya te ghəa slene nyi ŋka kwa mbeli kamene le berete, kalə sha ka Israyɛl nyi laka bela kwa gwela. Ama pa hɛ peslekɛ le pelɛ. Slaɗe hwələ mbelenyɛ Robowam kadzeme wəmata gədəwəa ŋkɛ kahwɛ kadzeme Zhɛrəzalɛm.

¹⁹Tsetse ɗema ghena ta hwelefe ta David ka Israyɛl pa ɓeshi.